08/11/2021
كنت بتناقش مع احد الاشخاص ال بيشتكى من انخفاض نسبة المبيعات بعد ما كانت كويسة فى البداية وسألته سؤال مهم :
* اخبار العملاء بتوعك ايه ؟
اكيد لو عندك بيزنس هتبقى بتفكر ازاى تزود المبيعات بأى وسيلة. لكن استنى ماتمشيش عايزك تسمعنى.
وشرحلته موقف فى احد الايام دار حوار بينى وبين صديقى لما سألنى سؤال سهل جدا لكن صعب !!!
* قالى لو عندى بيزنس وعايزه يكبر اعمل ايه ؟
= طبعا اكيد كلنا نفسنا البيزنس بتاعنا يكبر ويحقق مبيعات اكتر فى اسرع وقت لكن هل احنا بنساعد البيزنس بتاعنا انه يكبر.
= اكيد حجم المبيعات بيدل على ان البيزنس ناجح لكن ده مابيضمنش الاستمرارية فى ظل منافسة السوق الشرسة طب انا عايز ابقى مميز اعمل ايه
والاجابة هنا سهلة وكلمتين بس ( اهتم بالعميل )
= اكيد كلنا فى يوم اشترينا منتج ومعجبناش وندمنا لكن هل صاحب المنتج اتضر ، لا ماهو خلاص باع واخد الفلوس !
هتصدقنى لو قولتلك لا بالعكس هو كسب الفلوس بس خسرك
والعكس ممكن اشترينا منتج واكتشفنا انه مميز وان السعر قليل عليه بس مين قال ان الهدف من البيع كان فلوس مش يمكن حاجة تانية !!!
فيه جملة مشهورة بنسمعها فى المحلات (احنا بنشترى زبون) طب تعرف صحاب المحلات بيشترى الزبون ازاى ؟؟ ، كوباية الشاى بتاعتك وتعالى
قبل ماتفكر ازاى تنشر اعلاناتك للعملاء لازم تعرف ازاى تكسب العميل وتخلى العميل يتكلم على منتجاتك ويزودلك مبيعاتك وانت قاعد ماصرفتش فلوس
= هل تابعت مرة عميل اشترى منك منتج وسألته عن رأيه ؟
= هل العميل بتاعك راضى عن اسلوبك وطريقة تعاملك ؟
= هل العميل كان راضى عن الخدمة ال ادمتهاله ؟ ولو كان فيه ملاحظات اهتميت بيها ؟
= ايه اخبار خدمة مابعد البيع عندك ؟
= لو عميل اشتكى من عيب فى المنتج بتقوله ماليش دعوة ولا بتحاول تحلها ؟
لو اهتميت فعلا بالاسئلة ال فوق وطبقتها كل عميل اشترى منك مش هيبقى لوحده ممكن نضيف عليه ( اهله وصحابه واسرته وزمايله فى العمل واسرهم )
عارف العدد ممكن يبقى كام ؟ فكرت ؟ اه زى مافكرت ممكن يبقى بالالاف !!
والعكس لو عميل اشترى منك منتج ومانلتش رضاه هتبقى اسوء دعاية ليك ولمنتجك وهتبقى بتخسر البيزنس بتاعك على المدى البعيد.
ودى كانت اول نصيحة لصديقى ( اهتم بالعميل ، اهتم بالعميل ، اهتم بالعميل )
