25/09/2026
متخليش معملك زي عز الدخيلة؟
من فترة طويلة شوية، كان فيه شركة أدوية مشهورة اسمها نيرهادو.
الشركة نزلت منتج حديد بفكرة جديدة وقتها، وهي إن الحديد كان Amino acid chelated، باسم فريترون.
الفكرة وقتها كانت قوية جدًا، والمنتج قدر ياخد نسبة كبيرة من مبيعات سوق الحديد في مصر.
لحد ما دخلت شركة فيتابيوتك بمنتج جديد اسمه فروجلوبين، بفكرة مختلفة تمامًا، وكان بيعتمد على Ferrous fumarate.
وفضل السوق متقسم بينهم مع كام منافس صغير لفترة طويلة.
لحد ما جات كورونا.
فجأة بقى فيه ضغط ضخم على منتجات اللاكتوفيرن والزنك وفيتامين C، وأي حاجة ليها علاقة بالمناعة.
والشركات اللي كان عندها المنتجات دي حققت مبيعات ضخمة جدًا.
وبعدها ظهرت قرارات جديدة خلت تسجيل بعض منتجات المكملات الغذائية يتم من خلال هيئة سلامة الغذاء خلال شهور، بدل هيئة الدواء اللي كانت إجراءات التسجيل فيها بتاخد وقت أطول.
فالنتيجة؟
شركات أكتر... ومنتجات أكتر... وسوق بدأ يستقبل منتجات أسرع من قدرته على استيعابها.
لدرجة إن سوق الحديد نفسه بقى فيه منتج جديد كل كام أسبوع تقريبًا.
والدكاترة بقوا بيسموا مندوبي منتجات الحديد بمناديب عز الدخيلة..
لأن السوق بقى مليان شركات وبراندات بتنتج منتجات متشابهة جدًا، وكل واحد بيحاول ياخد حتة من نفس السوق.
إلى أن وصلنا إلى ان سوق الحديد فيه براندين كبار ماسكين جزء كبير من السوق، والنص التاني تقريبًا بيتوزع على 500 براند اللي بتنافس بعض عليه..
طيب...
ظهر حل بيتكلم عنه البعض ... وهو إن الدكتور يكتب Generic Name بدل Trade Name... و مش بس في الأدوية، لكن كمان في المكملات.
وهنا السؤال المهم ... لو ده حصل فعلًا... كام شركة عندها Product حقيقي وميزة تنافسية هتفضل موجودة؟
وكام شركة كل قوتها أصلًا مبنية على إن الدكتور يكتب اسم البراند؟
وكام منتج هيكتشف إن مشكلته مش في المبيعات... مشكلته إن مفيش سبب حقيقي يخلي حد يختاره؟
تعالى بقى نشوف نفس الـ Case Study في التحاليل الطبية...
سوق التحاليل الطبية لفترة طويلة كان Entry Barriers فيه أعلى من دلوقتي.
عدد الجامعات والجهات اللي كانت بتقدم مسارات ودبلومات مرتبطة بالمجال كان محدود... كانوا ٣ بس تقريبا..
وبعد 2008 بدأت جامعات تانية في الدلتا وغيرها تعدل لوائحها وتدخل في المجال، وده ساعد على زيادة عدد الحاصلين على المؤهلات المرتبطة بالتحاليل.
وبعدها حصلت مجموعة من التغيرات و سيولة اقتصادية وقانونية من بعد الثورة... ومع الظروف الاقتصادية وارتفاع تكلفة المعيشة وضعف المرتبات، بدأ عدد أكبر من الزملاء يشوف إن فتح معمل ممكن يكون فرصة اقتصادية أفضل من الوظيفة.
ومش بس كده...
أبسط سوق ممكن المعمل يدخل فيه هو Routine Testing.
مش محتاج نفس الاستثمارات أو التعقيد الفني الموجود في التخصصات التانيه، ولا محتاج نفس مستوى الـ Entry Barriers.
فالنتيجة؟
عدد المعامل اللي بتقدم تحاليل روتينية زاد بشكل ضخم.
وبقى عندنا في مناطق كتير منافسة شديدة على نفس مجموعة التحاليل، ونفس الأطباء، ونفس المرضى، ونفس الموارد.
يعني باختصار .. معامل كتير جدًا... بتتنافس على سوق محدود.
وده هو الـ Mosaic اللي شايفينه النهارده في سوق التحاليل... و موضوع مش هيخلص لمجرد إن عدد المعامل يقل.
لأن المشكلة مش في عدد المعامل بس... المشكلة الحقيقية هي مين يستحق إنه يفضل في السوق؟
وهنا أنا شايف إن الحل الحقيقي لازم يكون إن الكفاءة هي الرخصة الحقيقية للاستمرار في السوق.
مش مجرد إنك حصلت على ترخيص مرة...
لكن إنك تفضل مؤهل لممارسة المهنة، و تثبت إنك بتتطور، و بتواكب العلم، وملتزم بمعايير الجودة.
وعشان كده، كنت اقترحت في بوست سابق فكرة تجديد ترخيص مزاولة المهنة بشكل دوري.
الفكرة دي طبعًا ماعجبتش بعض الزملاء اللي بيحبوا الرحرحه، وشايفين إن الأفضل إن كل حاجة تفضل مفتوحة من غير مراجعة أو تقييم.
وفيه زملاء تانيين فهموا اقتراحي بشكل مختلف، وافتكروا إني بتكلم عن تجديد ترخيص المعمل نفسه.
وده مش اللي قلته خالص.. أنا كنت بتكلم عن حاجة مختلفة تمامًا..
المعمل ممكن يفضل مرخص... لكن مزاولة المهنة نفسها لازم تفضل مرتبطة بالكفاءة.
لأن السوق الصحي مش المفروض يكون.. مين قدر يدخل السوق؟
لكن المفروض يكون .. مين قدر يثبت إنه يستحق يفضل فيه؟
