13/07/2022
واحدة من الكوارث اللي بنشوفها كل يوم مصايب ومشاكل المطاعم حاجة كده عجيبة والله تلاقي أي حد معاه فلوس يقرر يفتح مطعم منه لله اللي قاله الناس مش حتبطل تاكل وتشرب نصيحة خربت بيت آلاف الناس .
بص يا سيدي تعال نقسم الموضوع لشوية نصايح علشان نسهلها يمكن نلحقك قبل ما تغرق
١- المنافسة في مجال المطاعم شرسة جداً وكل واحد بيحاول يهرس اللي قدامه بأي شكل فلو مش مستعد للمنافسة بلاش تفتح.
٢- المطاعم بتحب التخصص يعني أنا مطعم بيتزا أنا مطعم برجر شغل سمك لبن تمر هندي بتبقى نهايته مش حلوة ومفيش حاجة تعلق مع العميل وتخليه لما يفكر في صنف معين يفكر فيك … قول سوشي حتلاقي في كام مطعم جه في دماغك جرب كده على باقي الأصناف قول بروست قول برجر قول بيتزا ليه حصل كده لأن العميل أنت بتزرع عنده صورة ذهنية معينة بتخليه يفتكرك بيها.
٣- مش معنى أنك طباخ شاطر أنك تفتح مطعم ممكن جروب أو صفحة على السوشيال ميديا وأعمل أكل من البيت وواحدة واحدة حتكبر صدقني ادارة مطعم ومصاريفه مختلفه عن أنك تكون شيف شاطر.
٤- كارثة الكوارث اللي بشوفها كل يوم ناس بتصرف ملايين على تأسيس مطاعم شيك جداً وبعد الافتتاح بشهر يقولك الحقوني ليه يا عم عليه إيجارات ومرتبات ومصاريف مهوله ومش مغطي ربعها أو أقل طيب يا حبيبي أصرف من فلوسك واحدة واحدة وظبط حساباتك وان شاء الله كام شهر وحيبقى الناس عرفتك وحتبدأ تنتشر لأ أصل أنا معييش فلوس … أزاي ؟ أصلي صرفت كل فلوسي أنا وشركاتي على التأسيس وفلوسنا خلصت يوم الأفتتاح … طيب لو ممعكش فلوس تغطيك من ٩ شهور إلى سنة من الافتتاح مصاريف تشغيل (ايجارات - مرتبات - نثريات) يبقى بلاش تفتح أو صغر حجم مطعمك.
٥- نفس الكلام اللي فات ينطبق على الدعاية والتسويق وبناء الهوية وكل ما يلزم للترويج لمطعمكم لو معندكش ميزانية محترمة للتسويق تكفيك ٦ شهور على الأقل يبقى بلاش تفتح مطعم أو صغر حجمه وكبر دعايته.
٦-كل اللي فات ده مبني على أنك تكون مغطي كل الجوانب المهمة للمطعم يعني فاهم إدارة وتشغيل وتسويق وعامل دراسة محترمة ومختار مكان مناسب وحاسب تكاليفك صح وتستعين بأهل الخبرة من أول التخطيط للتصميم للديكورات لوضع الخطة التسويقية لتجهيز المنيو بكل تفاصيلها من تسعير وتصوير وتصميم لتعيين العمالة وتدريبهم للتشغيل لتوقع المشكلات ووضع خطط حلها قبل ما تبدأ شغل فعلي حتقولي بس ده حيكلفني فلوس كتير حلو حيكلفك كام ٥ - ١٠٪ من راس مالك مش أحسن ما تفتح شهرين وتطلع خسران كل راس مالك + مديون.
٧- أنزل أشتغل في مطعم قريب من فكرتك ٣ شهور على الأقل ولو تقدر خليهم ٦ شهور أو سنة حيبقى أفضل أتعلم كل التفاصيل راقب وأشتغل بجد بس برضه خلي بالك أن في كوادر تانية بتقوم الدنيا حسابات ومشتريات ونظافة وغيره ركز في كل نقطة.
٨- طيب لسه مصر تعمل مطعم وتايه روح خد فرنشايز لبراند محترم وشغال وليه أسمه مناسب لقدرتك المالية والإدارية وفي شركات متخصصة تدرس قدرتك و وتقولك ايه المناسب ليك وتقولك مميزات وعيب كل براند معروض عليك.
وان شاء الله نبقى نتكلم قريب في كيفية أختيار الفرنشايز المناسب وأمتى أقول دي صفقة كويسة وأمتى أقولك أهرب بسرعة .
