اسكندرية ماريا

02/07/2022

عاجل ......

زلزال بقوة 6 ريختر يضرب الامارات الأن
التفاصيل فى اول تعليق

27/04/2022

عاجل .....
توقف ماكينات السحب etm لجميع البنوك فى معظم احياء الاسكندرية والسبب عطل بسستم البنك المركزى واستياء من العملاء لقرب اجازة عيد الفطر

26/04/2022

عاااجل 🚨
حريق هائل بالمنشية

خسائر بالملايين نتيجة حريق باحد المباني بالمنشية بجوار شارع فرنسا .. ومحاولات رجال الدفاع المدني للسيطرة عليه ..

23/04/2022

حالة من الفوضى يعانى منها الأهالى تحت كوبرى العامرية بمنطقة الكابلات ونجع عبد الرواف بحى العامرية ثان بمحافظة الإسكندرية، بسبب الازدحام والتكدس وافتراش الباعة فى نهر الطريق ذهابا وإيابا وايضا عدم تواجد أفراد أمن أو مرور بصفة مستمرة لتسهيل حركة المرور ناهيك عن صعوبة مرور السيارات.

ويقول عادل سمير فى رساله بعث بها : "نستغيث بالأجهزة التنفيذية، وشرطة المرور، بحى العامرية ثان، فى محافظة الإسكندرية، للعمل على منع الصبية التى لا تتجاوز أعمارهم عن العشرين عاما من قيادة سيارات السيرفيس والتوك توك أسفل كوبرى العامرية، حيث يعرضون حياتهم وحياة الركاب للخطر يوميا، لاسيما وأنهم يقودون بسرعة ورعونة شديدة، ويترتب على ذلك من انتشار حوادث الطرق المتكررة، وبالتالى غياب الرقابة سببا رئيسيا فى إستفحال هذه الظاهرة".

وأضاف : نعانى نحن أهالى النجار وأبو رواف حى العامرية ثان محافظة الإسكندرية من الصبية والأطفال يقودن سيارات الأجرة من أسفل كوبرى العامرية بدون ورق وهذا يعرض حياة الأهالى للخطر، نرجو من مرور العامرية الأسكندرية التحقيق فى هذا الأمر وعمل حملات للموقف

وأشار إلى أن الباعة بفترشون نهر الطريق ذهابا وإيابا مما يزيد الأمر سوء و يعمل على زيادة التكدس و الأزدحام ، اضافة الى انتشار القمامة
نرجو من السادة المسؤولين التحقيق في هذا الأمر!.

13/04/2022

كان معايا مبلغ ، نويت أروح اتبرع بيه فى مستشفى أبو الريش للأطفال ، وأول ما وصلت بتاع الأمن بقوله: عاوز أتبرع ، جري جابلي كرسي ، وكان ناقص يشيلني ، قعدت على جنب بالكرسي ..
شفت طفل متكفن ، يجى أربع أو خمس سنين من طوله على إيد باباه ، وواحد مستنيه بموتوسيكل ، ومامته بتجرى وراه ومعاها واحدة ، بيقولوا لو ملقناش ميكروباص هنتصرف ونيجى ، وفضلوا يجروا في الشارع ورا الموتوسيكل ، اللى هو مفيش تاكسى ياخدوا ابنهم فيه ، مش معاهم فلوس ..
وأنا اتسمرت مش فاهم حاجة ، وفهمت بعدها من واحدة كانت واقفة جنبى طفلة يجى ١٢ سنة ..
قالتلى: ده كان داخل على رجله ، واتوفى ، مامته كانت بتقول كدة وهى بتصرخ ..
لهجتها صعيدية ، قالتلى أنا من أسوان ، بس لينا قرايبنا قاعدين عندهم ، جه أخوها يجى تلات سنين ، لقيت فى إيده كانيولا يا حبيبى ، وواقف جنبها الولد حافى ..

أى وقت بالليل تعدى جنب سور المستشفى ، هتلاقوا ناس نايمة في الشارع ؛ دول أهل الأطفال اللى جوه مش معاهم إمكانيات يأجروا مكان يباتوا فيه ؛ فبيناموا في الشارع
وكمان ساعات يندهوا على أهل الطفل ، محتاجين لبن .. محتاجين دواء .. يعنى منتهى الذل ..

دخلونا للمدير الإدارى ، الراجل رحب بينا ، وجاب لنا مدير الخدمة الاجتماعية ، طلعنا مكتبه وجاب ملف فيه حالات محتاجة ..
أطفال محتاجة علب لبن ، ومفيش إمكانية ، يعنى ممكن يموتوا عشان مفيش لبن ..
طفله عندها ٨٠ يوم ، عاوزة أنبوبة أكسجين ،، ومفيش إمكانية ، وأهلها بيلفوا يدورا على حد يسلفهم ..
طفل محتاج دوا بألف جنيه ، وحالته خطيرة ، مش مع المستشفى غير ٢٠٠ جنيه ، وكمان تبرعات ..
وحالات كتيييييير مش قادر أوصفها ، بس دول اللى فاكرهم ..
المستشفى فيها أورام وقلب مفتوح وفشل كلوى ،
فبقوله: يا فندم ليه مش عامليين دعايا ؟!
قال لي: احنا مش معانا نصرف على الدعايا ..

التبرع إنك تساهم فى علاج حالة ، أو تتكلف بروشتة ، وهما يبلغوك محتاجين كام ؟؟
أو تعين أسر فقيرة مش لاقية تاكل ، وليها حالات عندهم ..
فيه أسر جاية من أدغال مصر ، وفى أسرة مش معاها موبايل ، متخيليين إنهم قاعدين في الشارع ، عشان لو حصل حاجه محدش هيعرف يوصلهم ..
أى جنيه بتدفعوا بيبعتوا عالواتس صورة بالفاتورة ،
الراجل قال: إحنا هنا بفضل ربنا ، وتبرعاتكم هى اللى ساندانا ..
انا مكنتش ناوي خااااالص أقول لحد ، بس بعد اللى شفته بعينى ، وأد ايه الناس دى محتاجة ومحدش يعرف عنهم حاجة ..
دول أطفال بتموت ، وأطفال فى حضانات ، وأطفال عندها أورام ، واللى عندها أيام وتموت ، وأطفال صمامتها مسدودة ، وعندها أكتر من ثقب ، وأمهات شفتها شايلة عيالها صغيرييييين ، وفى إيديهم الكانيولا ، كنت عاوز أبكي جنبهم ..
حمدت ربنا على كل نعمة مش حاسين بيها ، وإن الحمد لله أولادي كويسين ..
ربنا يجيرهم فى مصائبهم ..
لو كل واحد فينا أقل الايمان ، خد خمسين جنيه وراح هناك ، أقسم بالله ممكن تنقذ طفل ،
احنا بنشترى تفاهات كل يوم ، وكولا وشيبسي وشوكولاته وبناكل بأكتر من كده ، أكننا مش هناكل من بره يوم ..
ممكن كل كام واحد أو واحدة وصحابهم ، يلموا من بعض ويتصدقوا كل شهر هناك ، وخلوا كل مرة نية حلوة للصدقة الجميلة دى ..
مرة تنجح ، مرة تتجوز ، مرة يطول فى عمر أهلك ، مرة لمتوفى، والله والله ربنا اكرم مننا ؟ احنا اللى محتاجين ده مش هما ..
طولت عليكم وياريت تعملوا شير ؛ عشان الكل يشوفوا

إبداء بنفسك وساعد غيرك ..

مستشفى أبو الريش للأطفال ، فيها اطفال بتموت عشان أهلهم مش معاهم ٥٠ جنيه يجيبوا علاج ..
اللي عاوز يتبرع يروح بنفسه، ويجيبلهم علاج أو دم أو يتبرع فى حسابهم فى بنك ناصر الاجتماعي
المستشفى معندهاش فلوس ؛ علشان تعمل دعاية زى مستشفى 57 أو مجدي يعقوب ، فخلينا احنا نبقى الدعاية بتاعتها ......
شير فى الخير ..
عايزين نشير علشان الناس تساعد ....
والخير دوار ... شير فى الخير

دعوة للتبرع لمستشفى أبو الريش للأطفال ..
فيه وسيلة سهلة للتبرع عن طريق خدمة فوري ..
رقم المستشفى 9655
ربنا يتقبل ..
لا تستصغروا فعل الخير .. فربما كانت هي المنجية ..
( ع فكرا احنا نقدر نعمل احسن اعلان للمستشفي دي نحط الكلام دا ف جروبات وع صفحات دا لو مش هتقدر تتبرع ليها غيرك ممكن يشوف الكلام دا وربنا يقدرو ويساعد )
#منقول

#تعديل
ممكن تسئلوا في بنك ناصر الاجتماعي عن رقم حسابهم وكيفية التبرع والله يجزيكم خير

08/04/2022

23/03/2022

واجه نفسك ان هى دى الحقيقة...........

_ بكام الكاچو لو سمحت ؟

= 280 جنيه الكيلو

_ طب اوزنلي نص كيلو

= الله، دا انت هتشتري بجد

_ يعني هكون بسأل على سعره ليه، فضول ؟

= طب بقولك إيه، ما اعملك تشكيلة حلوة كدا

_ تشكيلة إيه ؟

= لب اسمر على سوداني مملح، على حمص، وكلها مش هتعدي ال40 جنيه

_ بقولك ايه من غير حوارات، لو معندكش كاچو قول وانا اشوف مقلى تانية

= الفكرة مش في كدا، الفكرة ان انت عمرك في حياتك ما دوقت الكاچو

_ مين اللي قالك كدا، دا انا متربي عليه، بابي كان بيحبه أوي وبيجيبه كتير في البيت

= لا والله ؟ متربي عليه وجاي تسأل على سعره ؟

_ عادي، جايز غلي وللا حاجة .. بتحصل

= بلاش دي، انت بتقول اني معنديش كاچو أصلا وبحور صح ؟

_ بيتهيألي كدا

= الكاچو تحت إيدك أساسا، انت ساند عليه

_ إيه دا بجد ؟ مخدتش بالي خالص

= متتوترش كدا عادي، خد منديل نشف عرقك

_ لا هو الجو حر أوي بس النهارده

= عشان كدا لابس چاكيت وبلوڤر وكوفيه بس ؟

_ لا دا ...

= هششش، متبررش انا فاهم كل حاجة، احنا شباب زي بعض

_ فاهم إيه بقى ؟

= علبة السجاير السوبر اللي طالة من جيب قميصك

_ مالها

= مكرمشة وطالع تلاتينها، واضح ان فاضل فيها سيجارتين بس

_ دا صحيح

= والعلبة الميريت اللي في إيدك، لسه بالسولوفانة بتاعتها، إنت لسه شاريها وانت جاي ؟

_ آه برضو، انت بتحقق معايه؟ فاضل شوية وتقولي كنت فين امبارح الساعة 11 وربع

= لا تحقيق ولا حاجة، الحكاية كلها ان النهارده 27، وانت غالبا لسه قابض المرتب

_ جبت التايهة انت كدا

= اللي هو غالبا مش أكتر من 3000 جنيه

_ لا كدا جبت التايهة بجد، عرفت ازاي اني بقبض 3000 جنيه ؟

= تصرفاتك كلها جاية من كتالوج الطبقة المتوسطة

_ تصرفات إيه ؟

= بتشرب سجاير البروليتاريا الكادحة بس بتتطلع لسجاير البرجوازيين

_ الحكاية كلها اني بدلع نفسي يوم في الشهر مش أكتر

= لا الموضوع أعمق من كدا

_ اشرحلي

= احنا معندناش فقرا في مصر تخيل ؟

_ يا راجل ؟

= آه والله، احنا عندنا ناس عقولها مليانة نشارة خشب، اصل الفقر دا اختيار، كل أثرياء العالم آمنوا من أعماقهم بالجملة دي

_ يعني انا اخترت أبقى فقير ؟

= مش بشكل مباشر، بس عملت دا لما ما حاولتش تكون غني قد ما حاولت تقلد الأغنيا

_ مش فاهم

= بعبارة أسهل، كل انسان في الدنيا ربنا صارفله شوية طاقة صح ؟

_ صح

= فيه واحد بيخلص الطاقة دي في انه يقعد يولول ويصيح ويندب حظه

_ حصل

= وفيه واحد بيخلص الطاقة دي في إنه يحاكي الحياة اللي مش قادر يعيشها

_ دا كمان حصل

= فيه واحد تالت بقى، بيخلص الطاقة دي في مكانها الصح

_ اللي هو ؟

= بيشتغل علشان يحقق الحياة اللي عايز يعيشها

_ طب ما انا بشتغل بس مبحققش

= النظام العالمي الجديد قسم الناس لنوعين، تيران بتلف في سواقي، وأصحاب أراضي بيشغلوا التيران دي

_ انا أنهي واحد فيهم ؟

= نفض دقنك بس من التبن اللي عليها وبعدين اسأل

_ أوكيه فهمت

= انت بتشتغل اه، بتتعب اه، بس في النهاية هما اللي بيغتنوا مش انت، إنت كبيرك يرمولك شوية برسيم يوم 27 في الشهر

_ عندك حق انا لسه صارف البرسيم بتاع الشهر ده من دقيقتين

= وجاي تخلصه دلوقتي في دقيقتين

_ ازاي

= طالع من قاع المجتمع للسطح تشم نفسك لمدة دقيقة وتنزل تاني صح ؟

_ صح

= الناس اللي فوق هما اللي سمحولك تشم نفسك في الدقيقة دي، عشان يضيعوا قصادها بقية عمرك

_ بمعنى ؟

= انت ليه جاي تشتري كاچو النهارده انت اصلا عمرك دوقته بذمة أمك ؟

_ الصراحة لأ، بس سمعت يعني انه بتاع ولاد الناس

= هو دا، انت عايز تقلد الناس الأعلى منك اجتماعيا، ودا بيبسطهم جدا

_ ليه يبسطهم

= علشان دا هيخليك تفضل طول عمرك عبد في مؤسساتهم

_ اممممممم

= انت محاصر طول الوقت بوسائل إعلامية مبترحمش

_ فعلا، انا صوت عمرو أديب خرم ودني

= مش عمرو أديب بس، تتفرج على فيلم تلاقيه متصور في كامباوند، وكل أبطاله من A كلاس، وعربيات ومدارس انترناشيونال، وبيتكلموا انجليزي وبيلبسوا براندات

_ ايوه انا بحس اني مش عايش

= تسيب الفيلم وتغير القناة تلاقي اعلان عن وحدة سكنية ب 5 مليون، وولية مستفزة بتقول ما تدوهالهم ببلاش احسن

_ وانا عمري ما مسكت 19 ألف جنيه على بعض

= تقفل التليفزيون وتفتح الفيس، تلاقي ناس بتعمل آوتينج في أماكن انت متعرفش تتصور جنبها، الحياة كلها بتحاصرك

_ بتحاصرني بس ؟ دي زنقتني في الحيطة

= مع الوقت بتحس انك إنسان درجة تالتة، العالم قصر كبير، وانت بالذات عايش في أوضة الكلب

_ يا باشا أنا الكلب

= هنا علم النفس يقولك ايه ؟ المحاكاة، النموذج اللي مش هتعرف تحققه قلده

_ بعمل كدا فعلا

= تقبض مرتب الشهر دا تروح تصرفه في خروجه، تقبض مرتب الشهر الجاي تصرفه في طقم من براند معروف، تقبض مرتب الشهر اللي بعده واللي بعده واللي بعده ...

_ أشتري بيهم آيفون

= وبكدا هتفضل طول حياتك مستهلك، بتشتري البضاعة بتاعتهم عشان تحس انك شبههم، لكن انت في الحقيقة شغال عندهم

_ عمري ما حسبتها كدا

= عمرك ما حسبتها اصلا، ولا أي حد حسبها، هو ليه واحد مرتبه 3000 جنيه يصرف مليون جنيه عشان يتجوز مثلا

_ ليه ؟

= نفس اللي بيخلي أسرة معدمة تجيب في جهاز بنتها 3 غسالات و3 شاشات، وكراتين هتفضل مقفولة ليوم الدين اصلا، محدش هيستعمل اللي فيها

_ انا كراتين امي لسه مقفولة

= وكراتين امي انا كمان، وفي الآخر يقولك غارمات ويدخلوا السجن طب ليه، عشان بنقلد اسلوب حياة مش حياتنا، ما اتخلقتش لينا

_ كلامك مظبوط

= عارف ايه الفرق بين الغني والفقير ؟

_ ايه ؟

= الغني اول ما بتجيله فلوس بيفكر هيحوش منهم كام، لكن الفقير اول ما بتجيله فلوس بيفكر هيصرفها في ايه

_ بس برضو الحياة فيها احتياجات كتير

= أكيد مش الكاچو والسجاير الميريت

_ انت صح

= انت جواك مارد جبار، بس انت حابسه في برطمان صلصة

_ وانت فتحتلي البرطمان، هات بخمسة جنيه لب سوبر

= وفر الخمسة جنيه دي مستقبلك أولى بيها، ياما امبراطوريات إقتصادية قامت على خمسة جنيه

_ عندك حق

= وجدعنة مني ومساهمة في مشروع نجاحك، تُمن اللب دا واجب من طرفي، ومش هاخد منك فلوسه

_ الله يكرمك، سلامو عليكو

= مع السلامة، ألو أيوه يا حاج، بيعت بكام النهارده ؟ ولا جنيه، يا ابا انا قولتلك من زمان مش عايز اشتغل في المقلى وعايز ابقى لايف كوتش وانت مصمم تعيشني في جلبابك، انت حر لما اهربدلك جلبابك متبقاش تزعل، سلام ..

09/03/2022

مبروك.....
الف شكر لرجال المباحث بقيادة رئيس مباحث القسم يوسف الببلاوى
لعودة الطالبة فيونيكا الى حضن اهلها بالسلامة

05/03/2022

#رغد
ايه حكايه رغد وليه لازم نساعدها "تعيش" حياتها كطفله طبيعيه من غير ماتعاني من اي تعب وقبل مايهاجمها المرض
مرض البلعمه او HLH مرض مناعي بيهاجم تقريبا اعضاء كتيره في الجسم ..وبيعمل تضخم في الكبد والطحال ونسب الدم بتتغير جدا ولو الحاله اتأخرت بتكون اصعب واصعب 😔
رغد الطفله التانيه و "الوحيده" لأم بتحاول بكل طاقتها تنقذها بعد فرحه قلبها الاولى "وعد" ال المرض هاجمها بشده وانتكست مرتين في العلاج قبل زرع خلايا جذعيه وبتطابق نصفي ودا كان كفيل ان نسبه النجاح تكون ضعيفه اوي واتوفت وعد بعد م فشل زرع النخاع لها
مش عايزين رغد تدخل في دوامه ان المرض يبدأ يهاجمها لان دا بيقلل قصاده من نسبه النجاح ال اصلا ضعيفه ..ساعدوا رغد
هي محتاجه صوتها يوصل بس وينقذها... بس والله💔 ويوفروا خلايا جذعيه متطابقه لها




#شير للهشتاج

05/03/2022

دي بنت اسمها نهله من اسكندريه عزبه سكينه للأسف انت'حرت امبارح ورمت نفسها من الدور الخامس ، ودا كان آخر بوست ليها ..
نهله فارقت الحياه ورمت نفسها من الدور الخامس بسبب معاملة ابوها الصعبة حسب كلام جيرانها !!
نهله فضلت خمس ساعات كاملين مستنيه بعد البوست ده! ونزلت بوست أخير بعد ما كتبت البوست دا ، وللاسف مفيش حد حاول يقف معاها او ينقذها من تفكيرها لحد ما اخدت القرار .. أنا مش مستوعب إزاي اللي حواليها هانت عليهم يسيبوها !!
ليه نسيب حد لوحده ونتجاهله ونخليه يشعر بأحاسيس توصله للمرحله دي !!
حسبي الله ونعم وكيل ..ربنا يرحمك ويغفرلك ويرحمنا بجد يارب رحمتك ولطفك ف اللي حوالينا .

20/02/2022

⭕ عاجل | وزارة الأوقاف.. صلاة التراويح هذا العام في جميع المساجد وبكامل الطاقة الاستيعابية للمساجد 🌙
اللهم بلغنا شهر رمضان🕌🌙