https://www.facebook.com/104279542643752/

واجه - wageh, faculty of mass communication beni suef university, Beni Suef (2026)

15/05/2024

#واجه حب يقولك اي عقوبة المُبتز عشان متخفيش و تعرفي ان حقك هيرجع 🧑‍⚖️
#واجه #عقوبة #جنايات #القانون

13/05/2024

#واجه

12/05/2024

واجه بيقدملكوا " الإبتزاز شكلاً و موضوعاً " 📌🆕
وفي البداية حبينا نعرضلكم انواع الإبتزاز 🔵
واجه يتابع حملته انتظرو باقي الأشكال و الموضوعات📝
#واجه #الإبتزاز #الإبتزاز_العاطفي #الإبتزاز_الجنسي #الإبتزاز_المنفعي

07/05/2024

عودة #واجه من جديد 🆕
#واجه برؤية صحفية جديدة 📝
انتظرو حملة صحفية حول الابتزاز الاكتروني 🔜

11/05/2023

-هل وجود الأطفـال على السوشيال ميديا بيكون آمان ليهم ؟ وهل كونهم "أطفال" بيخليهم ميتعرضوش للابتزاز الإلكتروني؟ تعالوا نعرف مع بعض...

تعتبر وسائل التواصل الاجتماعي بمختلف منصاتها جزء كبير في حياة كل شخص، فبيقضي الأشخاص عدد ساعات كبير جدًا على الموبايلات الخاصة بيهم، ولكن تأثير استخدام السوشيال ميديا على الأطفال قد يكون ليه ضرر أكتر تأثيراً من الكبار، فالطفل بيكون لسه في طور التكوين وبيتأثر بشكل كبير بكل اللي بيمر بيه من تجارب.

للاسف كون ان الاطفال اللي من سن ١٠ سنين لحد سن ١٥ سنة بيبقوا لسه مش مدركين حاجات كتير في الحياة، فده بيخليهم فريسة سهلة للمبتز وبيبقوا معرضين اكتر لمواجهه عمليات الابتزاز الالكتروني ! عشان كده لازم يبقا فيه جهة بتوعيهم وواقفه جبمهم وبتعرفهم ايه الصح وايه الغلط، ولازم يبقا فيه رقابه من الأهل علي الطفل في السن ده بالتحديد منعا من ان يحصلهم اي حاجه ممكن تضرهم وتدمر نفسيتهم.

04/05/2023

الضغط النفسي اللي بيكون علي الضحية أثناء تعرضها لعملية الابتزاز بيبقا صعب جدا عشان كده لازم نعرف مع بعض ازاي اتعامل نفسياً وأجهز نفسي كويس عشان اعرف اتعامل صح مع المبتز لما اتعرض لابتزاز الكتروني والطرق دول لخصناهم في الخطوات الجاية :

١- أنت ضحية:
افتكر دايما أن أيا كان اللي بتتعرضله فهو جريمة، زي السرقة والقتل وغيرها، وأنك أنت الضحية، ومش عليك لوم في اللي بيحصل خالص.

٢- التزم الصمت مع المبتز:
أيوة عارفين انها حاجه غريبة، بس خليني اقولك علي حاجه بسيطة، وهو أن المبتز بيقرر هيعمل ايه بناء على كلامك، لو حس بمدى خوفك هيزيد من تهديده، ولو حس بأنك بتحاول تتفاوض معاه، هيزيد الأمر صعوبة وهيرفع سقف مطالبه وهكذا.

٣- الموافقة مرة...معناها ابتزاز مستمر:
بيحاول المبتز أنه يخليك تستلم لمطالبه وبيحاول إقناعك بأنها مجرد مرة وهينتهي الأمر، ولكن للأسف استسلامك مرة، معناه أنك هتفضل تحت تصرف المبتز إلى ما لا نهاية، وهو ده اللي هيستنزفك نفسيًا تمامًا.

٤- متمسحش أي رسائل أو محادثات:
عارفين انه في اللحظة دي بنحس بخوف وتوتر كبير جدا لدرجة إننا عايزين نمسح اي حاجه ليها علاقة بالأمر ده، وكأننا بنوهم نفسنا بأن كل ده محصلش. ولكن صدقني وبناء على نصائح خبراء الجرائم الالكترونية، فإن أكبر خطأ ممكن نرتكبه هو حذف الرسائل والمحادثات.

٥- حافظ على خصوصيتك قدر الإمكان:
بيحاول المبتز في الأوقات دي انه يوصل لكل حساباتك الالكترونية على مختلف المنصات عشان يجمع معلومات أكتر وصور أكتر عنك، عشان كده بيبقا الاحسن في الأوقات دي أنك ياما تقفلي كل حساباتك أو تعيدي ضبط خصوصية الحساب، ومتقبليش أية صداقات جديدة.

٦- احكي لشخص قريب منك (خصوصا لو كنت في سن صغير) :
لو كنت في مرحلة عمرية صغيرة، كالثانوية أو الجامعة، فأنت لازم تبلغ شخص أكبر منك ذو ثقة، عشان يعرف يكمل معاك في الخطوات الجاية. فسواء كان الشخص ده احد الوالدين، أو أحد أفراد العائلة، أو مدرسك أو مديرة مدرستك، المهم أن يكون شخص ذو ثقة.
أما لو كنت في مرحلة أكبر سنًا ومش محتاج لشخص يمشي معاك في الإجراءات القانونية أو يحميك، فالاختيار يرجعلك في إبلاغ شخص قريب منك أو لا. ولكننا دايمًا بنميل لضرورة انك تتكلم مع شخص بتثق فيه عشان تخفف الضغط اللي عليك.

٧- اتكلم مع محامي مختص بالجرائم الإلكترونية (لو كان ده متاح):
بالرغم من أن إبلاغ الجهات المختصة بالجرائم الإلكترونية يعتبر خطوة ضرورية جدا، بس لازم بردوا اللجوء لمحامي مختص بهذا الأمر، لأنه بدوره هيحميك ويفسر كل الخطوات والإجراءات القانونية ليك، وهيتعامل مع المبتز بدالك.

٨- أخيرًا، استني وثق في نفسك وبخطواتك:
عارفين ان النصيحة دي صعبة جدا، وتنفيذها أصعب، ولكن صدقني لازم انك تستني. فالمبتز بيشتغل على مستوى توترك، فلو اتبعت كل الخطوات السابقة، فمفيش غير انك تثق في اللي عملته وفي نفسك وأنه لازم تستني لحد ما يتم اتخاذ الإجراءات القانونية اللازمة.

وافتكر دايما انك أنت الضحية هنا مش الجاني.

04/05/2023

دلوقتي هنرد علي اكتر سؤال بيتسئِل وهو اعمل ايه او اتصرف ازاي بالظبط لو اتعرضت للابتزاز ؟! تعالوا نشوف الإجابة مع بعض..

-في الاول هنتكلم عن الإجراءات القانونية اللي المفروض الواحد يتبعها اول ما يتعرض للابتزاز وهما:
1- تقديم بلاغ على الموقع الرسمي لوزارة الداخلية على اللينك https://moi.gov.eg/ .

2- استخدام الخط الساخن (108) وهو خط مخصص للإبلاغ عن الجرائم الإلكترونية، وجرائم الإنترنت، ويعمل على مدار 24 ساعة.

3- إخطار إدارة مكافحة جرائم الحاسبات وشبكات المعلومات بمقر وزارة الداخلية بالتجمع الخامس في القاهرة الجديدة، بالحضور الشخصي أو الاتصال بأرقام تليفونات : 27928484 / 27926071 / 27921490 / 27921491

4- الاحتفاظ بالرسائل التى تحتوى على السب أو الإهانة أو الابتزاز، والتوجه لقسم الشرطة التابع له، وتقديم بلاغ بالواقعة وإثبات نص الرسائل بالمحضر.

5- يجب تقديم البلاغ في خلال 3 أشهر من حصول الابتزاز طبقًا لنص المادة 3 من قانون الإجراءات الجنائية.

مينفعش ابدا تسيب حقك القانوني .. لازم تعمل كل الاجراءات اللي مؤكد هتجيبلك حقك عشان تحس فعلا انك انتصرت علي المبتز وخدت منه حقك بالكامل.. كمان عشان يكون عبرة لأي حد تاني يفكر يبتز غيره بأي طريقة.

30/04/2023

ولأن الابتزاز محرم في جميع الاديان فحابين نتكلم عن الابتزاز في الديانة المسيحية .
الابتزاز الالكتروني يقوم علي تصيد اخطاء الاخرين ومراقبتهم او التجسس عليهم او اختراق أجهزتهم للحصول علي معلومات يمكن التهديد من خلالها .
"لِمَاذَا تَنْظُرُ الْقَذَى الَّذِي فِي عَيْنِ أَخِيكَ، وَأَمَّا الْخَشَبَةُ الَّتِي فِي عَيْنِكَ فَلاَ تَفْطَنُ لَهَا؟" (لو 6: 41).
"يَا مُرَائِي، أَخْرِجْ أَوَّلًا الْخَشَبَةَ مِنْ عَيْنِكَ، وَحِينَئِذٍ تُبْصِرُ جَيِّدًا أَنْ تُخْرِجَ الْقَذَى مِنْ عَيْنِ أَخِيكَ!" (مت 7: 5).
كمان الدين المسيحي بيرفض فضح الآخرين والوشاية بيهم حتي لو اخطأوا ،وارتبطت الوشاية بالوقوف علي الدم لأنها بتسبب في هلاك الشخص "لاَ تَسْعَ فِي الْوِشَايَةِ بَيْنَ شَعْبِكَ. لاَ تَقِفْ عَلَى دَمِ قَرِيبِكَ. أَنَا الرَّبُّ." (لا 19: 16).
وأخيرا الدين المسيحي بيأكد ضرورة صون اللسان وعدم استخدامه في الشر أو الغش "صُن لِسَانك عَن الشّرِ وشَفَتْيكَ عَن التَكَلْمِ بالغّشْ "(سفر المزامير 13:34) . وده الي بيأكد تحريم الدين المسيحي للابتزاز بكل أنواعه ومهما كانت أهدافه .
الابتزاز الاكتروني مرفوض في جميع الديانات والأعراف وغير مقبول مجتمعياً وكمان بتوجد عقوبات صارمة قانونيا علي مرتكبيه ، علشان كدا لازم نعرف إن المبتز هو المجرم الوحيد وإن إعتبار المجرم والضحية شركاء في الجريمة هو مشاركة في الجريمة .

29/04/2023

اتفقت كل الأديان علي تحريم عملية الابتزاز، ف ربنا نهانا عن التجسس علي حياة الآخرين، أو تتبع اخبارهم حتي ولو كان من أجل المصلحة.
فحكم الابتزاز في الاسلام هو التحريم والتجريم نظرا لانه فعل منافي لكل اللي جات بيه تعاليم الإسلام السامية اللي بتقتضي بإن المسلم لا يروع أو يخوف حد، والرسول (صلي الله عليه وسلم) نهي بشكل صريح ومباشر عن ترويع المؤمن وتهديده أو تخويفه بأي شكل من الأشكال، حيث جاء عنه أنه قال (لا يحل لمسلم أن يروع مسلماً) رواه ابو داوود، فالتخويف والتهديد بيأثروا علي حياة الفرد بشكل كبير سواء من الناحية النفسية أو من الناحيه الاجتماعية، وان المبتز بيستغل الأمر ده عشان يأثر علي الضحية وتصرفاتها، والابتزاز الالكتروني معصية ذات إثم كبير بتوصل لكونها كبيرة من الكبائر، وجاءت الشريعة بحفظ الضرورات ال٥ : (الدين والنفس والعرض والعقل والمال).
المبتز مش بس القانون اللي هيحاسبه إنما كمان ربنا هيحاسبه علي كل الابتزاز والتهديد والترهيب اللي مارسه علي الضحية، فحتي لو مخادش جزاءه في الدنيا فهو هياخده في الآخرة.

28/04/2023

للاسف في البداية بنلاقي إن الضحية غالبا بتنصاع لطلبات المبتز عشان بتبقا خايفة من الفضيحة وبسبب الضغط النفسي اللي بيحطه المبتز علي الضحية خصوصا ان المحاكمات بتكون علنية والأحكام يسهل نقضها، وبالتالي نجاة الجاني من العقوبة، ودي الحاجات اللي بيحاول يلعب عليها المبتز في انه يخلي الضحية تستجيب لأوامره، بالنسبة لخوف الضحية من الأهل فهو بيلعب علي العامل ده كون ان الاهل ممكن ميكونوش متفهمين لحاجه زي الابتزاز وممكن يرموا اللوم كله علي الضحية ويسببولها ضغط نفسي كبير واللي بيخليها تحس إنها لوحدها محدش واقف جمبها فبالتالي بتفضل تستجيب لطلبات المبتز وهي فاكرة ان ده الحل الوحيد اللي ممكن ينجدها.
كمان خوفها من المجتمع ووصمة العار اللي هتلحق بيها بيبقا دافع كبير جداً بيستغله المبتز.
كمان قلة وعي وجهل الضحية نفسها بوجود قوانين اصلا رادعه لعملية الابتزاز بيخليها فريسة سهلة للمبتز. الضحية بتبقا فاكرة انها اول ما تستجاب للمبتز اول مرة فالابتزاز هيقف، ولكنها متعرفش انها كده دخلت نفسها في دوامة كبيرة من الأوامر والطلبات المتتالية من المبتز اللي مش هتقف.
عشان كده زي ما قولنا قبل كده دعم الأهل هو عامل كبير جدا في وقوف الضحية في وش المبتز وعدم خوفها منه، كمان وعيها وثقافتها بوجود قوانين هتجيبلها حقها، وان مصيرها في ايديها هي مش في ايد المبتز انه يتحكم فيه ويهددها، عشان كده دورنا اننا ننشر الوعي ده ومنخليش الضحية خايفه من المبتز تاني.

27/04/2023

للاسف بسنت خالد مش الوحيدة اللي خسرت حياتها بسبب الابتزاز الالكتروني.. فيه عدد كبير من البنات بيلجأوا للحل ده بإعتبار انهم شايفينه الحل الوحيد اللي ممكن يخلصهم من العذاب اللي هما فيه .. ومن ضمن البنات دول واحدة عانت بالظبط من نفس مصير بسنت وهي "هايدي" واللي انهت حياتها عن طريق حبة غلال مسمومة بعد ما اتعرضت للابتزاز والتشهير من قبل جارتها وبناتها وشابين تانيين، والمشكلة اللي كانت بينهم هي مشاكل ما بين الجيران عادية وسبب ابتزازهم والتشهير بيها هو لمجرد انهم عايزين اهل هايدي يروحوا يعتذرولهم !

وقضت محكمة جنايات الزقازيق، برئاسة المستشار ياسر سنجاب، رئيس المحكمة، والمستشار مصطفى بلاسى، رئيس بالمحكمة، والمستشار أحمد سمير سليم، بقرارها في ثانى جلسات محاكمة المتهمين الخمسة فى واقعة ابتزاز الطالبة هايدي، بالسجن 10 سنوات على المتهمين الأول والثانى، و6 سنوات على المتهمين الثالث والرابع والخامس.

الانتحار مش هو الحل لأي مشكلة بتواجهنا، بالعكس لازم نواجه المشكلة أو أي معضلة بتواجهنا وخصوصا في قضايا الابتزاز الالكتروني، لازم نعيش ونشوف اللي بيبتزنا ده وهو بياخد عقابه بالقانون.

25/04/2023

تعرف إن فيه إحصائية بتقول إن واحدة من كل ٣ سيدات اتعرضوا للعنف عبر الانترنت !
فبلغت النسبة ٣٣٪ من النساء اللي اتعرضوا للعنف عبر الانترنت والعنف ده خرج من كونه عنف علي النت بس لعنف واقعي في الحياة الواقعية، كمان النسبة دي بتزيد وبتوصل ل٥١٪ لو الشخص ده هما عارفينه بالفعل في الحياة الواقعية.
وفي سنة ٢٠١٨ احصت لجنة الاتصالات وتكنولوجيا المعلومات بمجلس النواب المصري تقديم ١٠٣٨ بلاغ بجرايم الكترونيه مختلفة ( منها الابتزاز ) خلال شهرين بس، وفي الحقيقة مفيش احصائيات معينة بتوضح عدد البلاغات المرتبطة بجرايم الابتزاز الالكتروني في مصر. في نفس الوقت وضحت النائبة البرلمانية المصرية ميرفت عبد العظيم ان جرايم الابتزاز الإلكتروني هي من اكتر الجرايم اللي بتشهدها مصر، وبتشكل عبئ كبير على الأجهزة المعنية. وشددت على انه لو تم إحصاء عدد البلاغات المرتبطة بجرايم "الابتزاز الإلكتروني" هيتضح إنها متكررة بشكل كبير جدا في مصر.

واجه - wageh

15/05/2024

13/05/2024

12/05/2024

07/05/2024

11/05/2023

04/05/2023

04/05/2023

30/04/2023

29/04/2023

28/04/2023

27/04/2023

25/04/2023

Address

Website

Alerts

Contact The Business

Shortcuts

Share

Category