Eman Fadel, Cairo (2026)

11/11/2025

إزاي نبرة كلامك تقدر تبيع منتج عادي أو توقع منتج قوي
احترس، إنت دلوقتي على موعد مع كورس قصير مدته ما تزيدش عن نص ساعة، هتطبّق فيه بنفسك نظام كتابة مميز تابع معايا،
عميلك مش بيرفض المنتج قد ما بيرفض الإحساس اللي وصله من كلامك، لأن قرار الشراء عند أغلب الناس بيتاخد في ثواني على أساس شعور سريع بيتكوّن قبل ما المخ يدخل في حسابات طويلة، ودراسات كتير في علم النفس السلوكي بتقول إن المشاعر مش ديكور حوالين القرار لكنها جزء أساسي منه، وده معناه إن اختيارك للنبرة والكلمات وترتيب الجُمل يقدر يرفع منتج عادي أو يوقع منتج قوي
القاعدة البسيطة إن القارئ بيشوف نبرة الصوت أول ما بيقرا، وبعدها بيثبّت حكمه على حسب اللحظات اللي حس فيها بذروة الفهم أو ذروة الاستفزاز، وفي الغالب بيفضل في دماغه آخر إحساس أخده منك، ولو لقط منك تعاطف حقيقي وفهم لوجعه مع طريق واضح وسهل للتنفيذ، هيمشي معاك، ولو لقط طابع استعلاء أو وعود أكبر من الواقع أو خطوات معقدة، هيقف حتى لو المواصفات ممتازة، وعشان كده تبسيط اللغة ووضوح المطلوب وصدق الدليل الاجتماعي بيحسموا النتيجة أسرع من تعداد المزايا
المبادئ اللي تستند لها في الكتابة واضحة ومجربة، فصياغة الخسارة بتأثر أكتر من صياغة الربح لما الموضوع فيه فلوس أو وقت أو مكانة، والدليل الاجتماعي كل ما كان محلي ومشروط بسياق القارئ كان أقوى من كلام عام، والندرة بتشتغل لما سببها منطقي ومفهوم مش لما تبقى حركة فارغة، والمعاملة بالمثل بترفع الاستجابة لما تدي قيمة حقيقية قبل الطلب من غير شروط، وسهولة القراءة والتنفيذ بتخلي الرسالة تبدو أصدق وأسهل تطبيق، وكمان اختيار المشاعر لازم يبقى على الهدف، لو عايز طمأنة استخدم نبرة هادئة مع ضمان واضح، ولو عايز مبادرة وحسم استخدم نبرة مباشرة، ومهم جدا توازن بين “دفء” يحسس القارئ إنك معاه و“كفاءة” تثبت إنك قادر على التنفيذ بأرقام ونتايج
ترجمة الكلام ده لكتابة عملية تبدأ إنك تحدد شعور واحد عايز القارئ يطلع بيه بعد القراءة، اكتب ألم لحظي ملموس من يومه، قدم حل قابل للقياس، اعرض دليل كفاءة صغير وواضح، واطلب خطوة واحدة سهلة دلوقتي، خطط للذروة قبل النهاية، خلّي في لحظة “فهمت” تغير زاوية نظره، واختم بتطمين بسيط يعالج الاعتراض الأقرب لعقله، واقرا النص بصوتك، لو اتعسّرت في جملة قصّرها أو بسّطها، وامنع أي لفظ مش بيخدم الشعور اللي اخترته
اسأل نفسك قبل النشر
إنت عايز القارئ يطلع حاسس بإيه بعد تلاتين ثانية
إيه السطر اللي يثبتله إنك فاهم وجعه؟
إيه الدليل الاجتماعي الأقرب لظروفه؟
إيه الخسارة اللي بتشيلها عنه دلوقتي؟
إيه الخطوة الواحدة اللي هيعملها فورًا؟
تقيس النجاح بإيه
زمن القراءة في أول تلت من المقال
نمط التعليقات حوالين الذروة والنهاية
معدل النقر على الدعوة اللي مربوطة بخطة لو إذن
فرق الأداء بين فريمينج الربح وفريمينج الخسارة على نفس العرض
تغيّر حساسية السعر بعد رسائل الطمأنة مقابل رسائل الضغط
ولو وصلت لهنا تقدر فشكراً لوقتك يا عزيزي

28/01/2025

لو ماتعرفش!!
المشكلة اللي حصلت لـ DeepSeek أمس بتاريخ 27.Jan.2025
كانت بسبب هجمات إلكترونية عنيفة أثرت على أدائها بشكل كبير تم توقف أي تسجيل للحسابات جديد.

التفاصيل كالتالي:

سيرفرات DeepSeek اتعرضت لهجوم اسمه حجب الخدمة الموزع (DDoS)، واللي بيحصل فيه إن الهاكرز بيغرقوا السيرفرات بعدد ضخم جدًا من الطلبات الوهمية، لدرجة إن السيرفرات بتبقى بطيئة جدًا أو تقع تمامًا.

الهجوم ده خلّى الخدمة نفسها تتأثر، وسرعتها قلت جدًا، وبعض المستخدمين ما عرفوش يستخدموا المنصة.

بسبب الهجمات، الشركة اضطرت إنها توقف التسجيلات الجديدة مؤقتًا عشان تحافظ على استقرار الخدمة للمستخدمين الحاليين.

المشكلة أثارت جدل كبير حوالين المنافسة بين الشركات التقنية، خصوصًا إن الهجوم حصل بعدما DeepSeek بدأت تكتسب شهرة كبيرة وتنافس عمالقة زي OpenAI.

الهجوم كان ضربة قوية، لكنه كشف عن مدى قوة وتأثير DeepSeek في السوق، واللي خلاها هدف لهجمات إلكترونية بالشكل ده. الشركة أعلنت إنها شغالة على تعزيز أمانها وتحسين الخدمة.

28/01/2025

غير كل قواعد اللعبة في الذكاء الاصطناعي 👈👈 𝐷𝑒𝑒𝑝𝑆𝑒𝑒𝑘
السنين الأخيرة شوفنا سباق رهيب في مجال الذكاء الاصطناعي، وكانت الشركات الأمريكية زي OpenAI هي المسيطرة تمامًا. لكن فجأة، ظهرت شركة صينية ناشئة اسمها DeepSeek، وقدرت تقلب الطاولة وتخلي أمريكا في موقف صعب جدًا. في المقال ده، هنتكلم عن كل حاجة تخص DeepSeek، من أسباب قوتها وتأثيرها على السوق، لحد إزاي ممكن تستفيد منها.

إيه هو DeepSeek؟
DeepSeek هو نموذج ذكاء اصطناعي صيني معمول عشان ينافس أدوات زي ChatGPT اللي بتقدمها OpenAI. المميز في DeepSeek إنه عنده قدرات خارقة في معالجة اللغة الطبيعية والتفكير المنطقي، وده بيخليه أقوى بكتير من منافسيه.
أهم مميزاته:
بيعتمد على 300 مليار منطوق مقارنة بـ 2 مليار بس في OpenAI.
بيقدم حلول متعددة لأي مشكلة بدل ما يديك إجابة واحدة.
مفتوح المصدر، يعني أي حد يقدر يطوّره.
تكلفته أقل بكتير من باقي أدوات الذكاء الاصطناعي.

تأثير DeepSeek على الاقتصاد
ظهور DeepSeek عمل خسائر رهيبة للسوق الأمريكي:
الشركات الأمريكية خسرت أكتر من 2 تريليون دولار بسبب DeepSeek.
شركة NVIDIA لوحدها فقدت أكتر من 500 مليار دولار من قيمتها السوقية.
المستثمرين بدأوا يحوّلوا استثماراتهم للصين، وده بيوضح قد إيه السوق بيتغير.

ليه DeepSeek أرخص وأكتر كفاءة؟
التكلفة:
تكلفة تدريب نموذج GPT-4: 600 مليون دولار.
تكلفة تدريب DeepSeek: 6 مليون دولار بس!
التشغيل:
تكلفة تشغيل GPT: 100 دولار لكل مليون توكن.
تكلفة تشغيل DeepSeek: أقل من 4 دولار لكل مليون توكن.
الفرق الضخم ده بيخلي DeepSeek مش بس منافس تقني، لكنه كمان الحل الأرخص.

4. التفكير المنطقي: الميزة اللي بتفرق DeepSeek
واحدة من أهم مميزات DeepSeek هي طريقته في التفكير المنطقي. هو مش بس بيجاوب على سؤالك، لكنه كمان بيفكر معاك، ولو الحل الأول مش مناسب، بيقترح حلول تانية.
الطريقة دي بتساعد المستخدمين يلاقوا الحل الأنسب لمشاكلهم.

5. مفتوح المصدر: فرصة لكل المطورين
على عكس الأدوات الأمريكية، DeepSeek مفتوح المصدر، وده معناه إن أي مطور في العالم يقدر يشتغل عليه ويعدّل فيه.
فوايد المصدر المفتوح:
تسريع الابتكار.
تخصيص النموذج حسب احتياجاتك.
تكوين مجتمع عالمي من المطورين اللي بيطوّروا الأداة باستمرار.

👈👈 إزاي تستخدم DeepSeek؟
خطوات بسيطة:
افتح المتصفح اللي بتستخدمه.
اكتب: DeepSeek.com واضغط Enter.
سجل حساب جديد أو ادخل بحسابك لو موجود.

بعد ما تدخل، هتلاقي واجهة سهلة جدًا، ابدأ في كتابة سؤالك أو طلبك.
استخدم Prompts واضحة عشان تاخد أفضل نتيجة.
أمثلة Prompts فعالة:
"اكتب مقال 500 كلمة عن تأثير الذكاء الاصطناعي على التعليم."
"قارن بين DeepSeek و ChatGPT من حيث الكفاءة والتكلفة."
"اعمل خطة تسويقية لشركة ناشئة تستهدف الشباب."

7. DeepSeek بيشتغل فين؟
كتابة المحتوى: زي المقالات والتقارير أو حتى المنشورات التسويقية.
تلخيص الأبحاث: تلخيص أي مقالات طويلة أو دراسات.
البرمجة: كتابة أكواد أو حل مشاكل تقنية.
التسويق: اقتراح أفكار إبداعية وخطط تسويقية.
حل المشكلات: تقديم أكتر من حل لأي تحدي.

8. هل DeepSeek هو المستقبل؟
التطور السريع لـ DeepSeek بيخليه منافس قوي جدًا في مجال الذكاء الاصطناعي. بفضل تكلفته القليلة، تفكيره المنطقي، وقدرته على تقديم حلول متعددة، DeepSeek ممكن يكون الأداة اللي هتقود الثورة الجاية في الذكاء الاصطناعي.
لكن السؤال الحقيقي: إنت مستعد تجرب DeepSeek بنفسك؟
شوف الكومنتات هساعدك توصل أكتر..

30/12/2024

هحكيلكم النهارده عن تجربة شخصية كانت نقطة تحول في حياتي، حاجة غيرت طريقة تفكيري تمامًا وخلتني أشوف الأمور بشكل مختلف. التغيير بالنسبة لي مكنش مجرد قرار؛ كان رحلة طويلة، مليانة تخبطات ودروس، وده اللي خلاني أطلع بزتونة نجاحي، واللي هشاركها معاكم دلوقتي.

hashtag
كنت زمان بفكر إن القرار هو أهم حاجة، وإن بمجرد ما أقرر أعمل حاجة هتوصلني للنجاح، كل حاجة هتتزبط لوحدها.

لكن اللي اكتشفته بعد كده إن القرار هو البداية، بس التغيير الحقيقي بيجي من تنفيذ الخطوات اللي بعده. زي ما العربية مش بتتحرك لمجرد إننا شغلناها، لازم نمشيها خطوة خطوة، وكل ما نتحرك، نوصل أسرع.

hashtag
أهم خطوة بدأت بيها كانت إني أحدد هدفي بشكل واضح جدًا. كنت بسأل نفسي: إيه اللي عايزة أوصله؟ وليه؟
لما الهدف يبقى واضح قدامك، هتلاقي نفسك عارفة هتعملي إيه. كتبت أهدافي بالتفصيل، سواء شخصية أو مهنية، واتخيلت نفسي وأنا بوصل لها. الصورة دي كانت بتحفزني كل مرة أحس بالإحباط.

التخطيط العملي: دماغ منظمة = نجاح مستمر.
هنا كانت النقلة بجد. بدأت أقسم الهدف الكبير لخطوات صغيرة، وكتبت خطة يومية لكل حاجة:
✔️إيه اللي هعمله النهارده؟
✔️إيه اللي محتاجة أخلصه الأسبوع ده؟
كنت ببدأ يومي بورقة وقلم، وده فرق معايا جدًا. بدل ما أبقى تايهة في اليوم، بقى عندي خريطة واضحة.

التقييم اليومي: المرآة اللي بتوضح الطريق..
كل يوم كنت بقيم نفسي. عملت إيه؟ إيه اللي قصرت فيه؟
حتى لو يومي كان سيء، كنت بتعلم منه، وما كنتش بجلد نفسي. بالعكس، كنت باخدها فرصة لتطوير خطتي. عرفت إن اللي ما بيتابعش خطواته كل يوم، بيلاقي نفسه بعيد عن الطريق اللي رسمه.

التحفيز الذاتي: القوة اللي بتكمل بيها المشوار

كل مرة كنت أحقق حاجة صغيرة، حتى لو خطوة بسيطة، كنت بكافئ نفسي.
خلصت المهمة اللي عليا؟ أشوف فيلم بحبه.
مشيت على خطتي لمدة أسبوع؟ أجيب حاجة لنفسي.
الحاجات البسيطة دي كانت بتخليني مستمتعة بالرحلة، مش بس مستنية الوصول.

الاستعانة بالله: القوة اللي ما بتنتهيش
أكتر حاجة فرقت معايا إن كل خطوة كنت بعملها كنت بدعي ربنا يساعدني فيها. كنت دايمًا فاكرة إن مفيش حاجة بتحصل من غير توفيق ربنا. لما كنت بحس بالإحباط أو الخوف، كنت بستعين بيه، وده كان بيرجعلي طاقتي.

الناس الصح: طاقة إيجابية مستمرة
من أكتر الحاجات اللي ساعدتني إن حوالي ناس بتشجعني. لقيت إن النجاح مش بس في العمل الفردي، لكن في اختيار الناس اللي حواليك، اللي دايمًا بيذكروك بأهدافك، ويدعموك لما تقع.

النجاح رحلة مش محطة وصول..
تعلمت إن التغيير مش حاجة بتحصل في يوم وليلة. هو مشوار طويل، لكن كل خطوة صغيرة بتفرق. النهارده لما ببص ورا، بشوف إن الخطوات الصغيرة هي اللي عملت الفرق الكبير.

لو عندك هدف نفسك تحققه، ابدأ دلوقتي. اكتب، خطط، قيم نفسك، واحتفل بكل إنجاز بسيط. النجاح مش مستحيل، لكنه محتاج تنظيم وصبر. زتونة النجاح بالنسبة لي كانت في الوضوح، التزامي بالخطة، واستعانتي بالله. والباقي كان خطوات صغيرة بتاخدني للأمام. 💪✨

29/12/2024

ما تضيعش عمرك زي ما ضيعت 2024..

اقعد مع نفسك النهارده كده بكل هدوء واسأل نفسك: إيه الحاجة اللي بتستنزفك؟ بتسحب طاقتك وبتضيع يومك من غير ما تحس؟ يمكن تكون حاجة بسيطة بس بتتكرر، زي التفكير في مشكلة ملهاش حل، أو سوء تفاهم مع حد قريب منك فضل شاغل بالك طول اليوم. أوقات بنلاقي نفسنا بندور في دايرة مفرغة، بنحاول نثبت حاجة، نحل حاجة، أو حتى نهرب من حاجة، ومش واخدين بالنا إننا كده بنخسر جزء من حياتنا.

يمكن تكون بتسكرول على المنصات عشان تحس إنك حر، أو عشان تهرب من التزاماتك. لكن الحقيقة؟ أنت ممكن تكون مقيد أكتر مما كنت تتخيل. حاول النهارده تواجه نفسك بالحقيقة دي، وافهم إيه اللي بيستهلك وقتك وطاقتك، عشان تبدأ تتحرر من القيود دي واحدة واحدة. يومك وطاقتك غاليين عليك.. ما تهدرهمش.

وأنا كإيمان هحاول أساعدك تتخطى ده بسهولة ووعي هرشحلك مجموعة كتب تفهمك جزء كبير عن نفسك ..

1. العادات الذرية" (Atomic Habits) لـ جيمس كلير
الكتاب ده هيعلمك إزاي تكسر العادات اللي بتستهلكك وتبني عادات أفضل، خطوة بخطوة.

2. فن اللامبالاة" (The Subtle Art of Not Giving a F*ck) لـ مارك مانسون
بيعلّمك تدي اهتمامك للحاجات اللي تستحق وتتحرر من كل حاجة تافهة بتسحبك لورا.

3. لا تهتم بصغائر الأمور" (Don't Sweat the Small Stuff) لـ ريتشارد كارلسون
الكتاب بيعلّمك إزاي تتخطى الحاجات الصغيرة اللي بتضيع منك طاقتك ووقتك.

4. التفكير بسرعة وببطء" (Thinking, Fast and Slow) لـ دانيال كانيمان
هيساعدك تفهم إزاي بتفكر، وتعيد ترتيب أفكارك عشان تقدر تركز على المهم بس.

5.(Start With Why) لـ سيمون سينك
بيعلمك تكتشف هدفك الحقيقي، عشان تقدر تركز عليه بدل ما تتوه في حاجات مش ليها قيمة.
و أهم خطوة تقلبها لعادة أنك تسجل في نوته معاك أنت يومك بيخلص في إيه؟
عشان تعرف ترصد الوقت بيضيع فين وتعرف تعالج النقطة دي.

30/10/2024

يعني إيه CTR وإزاي ممكن يغيّر حملتك الإعلانية بالكامل؟
ساعات ممكن تعمل إعلان وتفتكر إنه هيشد الناس ويجيب تفاعل عالي، لكن لما تنشره وتبدأ تشتغل عليه اعلانات تلاقي ردود فعل أقل من المتوقع تماماً؟ أو ممكن تكتب كوبي عشان تبقى قاصد من وراها -هدف الكامبين يعني _ أنك طالع بهدف سيلز وعاوز مبيعات وتبص تلاقي الناس بردو بتشوف البوست و مفيش أي بيع بيحصل من ورا الشغل دا..

هنا بتيجي أهمية حاجة مهمة جدًا في عالم الإعلانات، وهي الـCTR، أو "معدل النقرات". الـCTR بيساعدك تعرف إذا كان إعلانك بيجذب الناس فعلاً ولا لأ، وهو مؤشر أساسي للنجاح ودا تقدر تراجعه في أي كامبين من اي داشبورد لأنه ماتريك مهم جدا وموجد في كل المنصات الاعلانية اللي بنشتغل عليها. تعالى معايا نعرف الموضوع بشكل أعمق شوية.

يعني إيه CTR؟
الـCTR، أو (Click-Through Rate)، هو مقياس بسيط بيوضح نسبة الناس اللي شافت الإعلان ونقرت عليه. النسبة دي بتتحدد بقسمة عدد النقرات على عدد مرات ظهور الإعلان، ثم ضرب الناتج في 100 علشان نحصل على النسبة المئوية.
مثال توضيحي عشان يسهلها شوية علينا:
لو إعلانك ظهر قدام 100 شخص، و5 منهم نقروا عليه، يبقى الـCTR بتاعك 5%. ده يعني إن 5% من الجمهور اللي شاف الإعلان اهتموا بيه كفاية علشان يدوسوا عليه.

أهمية الـCTR لحملتك الإعلانية
✔️ قياس جاذبية العنوان والصورة:
لو الـCTR منخفض، ده معناه إن العنوان أو المحتوى أو التصميم أو الفيديو مش بيشدوا الانتباه كفاية.
ساعتها ممكن تحتاج تغيّر في الصيغة أو في الصورة لجذب الناس أكتر. وهنا ليها طريقة عشان ما تبوظش الدنيا.
مثال: جرب تختار عنوان واضح ومباشر زي "خصم 50% على منتجاتنا لفترة محدودة!" بدل من "اكتشف عروضنا المميزة."
لو قررت تغير أجزاء في مكونات ال POC لازم تبقى عارف أنت بتغيرها ليه و هتقيسها لمدة أد ايه، ومش أفضل حاجة تغير المحتوى كله،

والسر هنا أنك لو شاكك في الديزاين والهوك هتحتاح تعمل اعلان يطلع مرة التصميم بس اللي مختلف ومرة نفس التصميم القديم بس الهوك اللي مختلف، وممكن تغير الأنجل أصلا اللي بتتكلم عنها.
تأثير الـCTR على تكلفة الإعلان:
كلما كان الـCTR عالي، بتقل تكلفة النقرة (CPC) على منصات زي فيسبوك وجوجل، لأن المنصات دي بتكافئ الإعلانات اللي بتلاقي تفاعل أعلى. ده يعني إنه بنفس الميزانية، هتوصل لعدد أكبر من الناس. وده يفسرلك السعي الكبير وراء خلق التريندات.. ولو حابب نتكلم عن الموضوع دا أكتر اكتبلي تريندات في الكومنتس.

✔️ التفاعل مع الجمهور المستهدف:
الـCTR بيبين لك إذا كان الإعلان مناسب للجمهور المستهدف ولا لأ. لو الـCTR عالي، ده معناه إن جمهورك متجاوب مع الرسالة.

إزاي ترفع الـCTR في 3 خطوات بسيطة؟
اختار عنوان يجذب الاهتمام ويوضح القيمة:
العنوان لازم يكون فيه جاذبية ويخاطب احتياجات الناس مباشرة. العناوين اللي بتقدم فائدة واضحة بتزيد احتمالية النقر.
استخدام صورة واضحة وملفتة:
الصورة بتكون أول حاجة بتشد انتباه المشاهد، وبتلعب دور كبير في دفعه للنقر. اختار صورة توضح الرسالة، ويفضل تكون ألوانها مريحة وواضحة.
✔️ جرب صياغات مختلفة للدعوة إلى اتخاذ إجراء (CTA):
الـCTA هو النص اللي بيشجع الجمهور على الخطوة اللي عايزهم يعملوها، زي "اطلب الآن" أو "شوف العرض." أحيانًا تغيير بسيط في الصياغة بيؤثر بشكل كبير.

✔️ تحليل نتائج الـCTR
بمجرد إنك تبدأ حملة إعلانية، راقب الـCTR دوريًا. لو لقيت المؤشر منخفض، حاول تغيّر في العنوان أو الصورة، وراقب الفرق. لو المؤشر بيزيد، يبقى أنت كده على الطريق الصح.
ماتنساش تعمل شير واشوفك مع ماتريك جديدة تهمك ككاتب محتوى.

17/10/2024

تعرف إن المذاكرة بالورقة والقلم فيها أضعاااف التركيز والاستيعاب؟! لأنك بتشغل حواسك كلها في اللي بتذاكره، سواء عيونك (الذاكرة البصرية)، أو إيديك (اللمس)، وحتى السمع لو بتقرأ بصوت عالي أو حتى جوه دماغك! يعني مش بس بتقرا المعلومة، أنت كمان بتكتبها بإيدك، وده بيساعد المخ إنه يركز أكتر.

لما بتمسك القلم وتبدأ تكتب الملاحظات، المخ بيدخل في حالة من التركيز اللي صعب تحس بيها وأنت بتستخدم الكيبورد. ليه؟ لأن الكتابة بإيدك بتطلب مجهود بدني وذهني في نفس الوقت.
كل حرف بترسمه بيزود إحساسك بالمعلومة ويثبتها أكتر في دماغك.

مش بس كده، الكتابة بإيدك بتساعدك إنك تبني علاقة أعمق مع اللي بتذاكره. يعني لما تقعد تكتب وتلخص، بتفهم المعلومات بشكل أعمق وتستوعبها أحسن من مجرد القراءة على شاشة.

ووقع في إيدي مجموعة أوراق شرح ليا في ورشة أوفلاين حبيت أشيرها معاكم ..
#استراتيجية

10/10/2024

من الأسئلة اللي وصلتني بعد مقال المرة اللي فاتت ..
طب كل مرحلة مفروض بتاخد وقت اد ايه لتطبيقها؟
وبعد ما المحتوي بتاع ال ٣ مراحل يخلص اي اللي بيتم بعد كده ؟
هل ببدأ الفانل من اولها تاني ولا بنعمل ايه؟؟

تعالوا مع بعض كدا نشوف الموضوع بيمشي إزاي؟!
بالنسبة للمدة الزمنية لكل مرحلة في الفانل التسويقي، فهي تعتمد على عدة عوامل، زي نوع المنتج أو الخدمة، وطبيعة جمهورك المستهدف، ومجال عملك.

لكن في العموم، هقدملك إرشادات عامة للوقت المتوقع لكل مرحلة، وإزاي تتصرف بعد انتهاء الفانل.

1. ToFu (Top of the Funnel):
دي المرحلة اللي فيها الجمهور لسه في مرحلة الوعي والاكتشاف، بيبدأوا يتعرفوا على مشكلتهم أو احتياجاتهم، وبيشوفوا إن منتجك أو خدمتك ممكن تكون حل.

المدة المتوقعة:
1-2 شهر: حسب السوق والجمهور المستهدف، المرحلة دي ممكن تستمر لفترة طويلة نسبيًا لأن الجمهور لسه بيتعرف عليك. ممكن ياخد وقته في استكشاف محتواك بدون اتخاذ أي قرارات.
إيه اللي بيتم خلالها؟
نشر مقالات تعليمية، فيديوهات قصيرة، وبوستات على السوشيال ميديا بتهدف لزيادة الوعي.
تتبع التفاعل، وقياس معدلات الزيارات على موقعك أو منصات التواصل الاجتماعي.

2. MoFu (Middle of the Funnel):
في المرحلة دي، الجمهور بيكون انتقل من مجرد وعي إلى البحث عن حل. هنا، لازم تقدم محتوى أعمق وأكتر تخصص، يشرح للعميل إزاي منتجك هو الحل المثالي لمشكلته.

المدة المتوقعة:
3-6 أسابيع: الجمهور هنا بيدخل في مرحلة مقارنة بين الخيارات المتاحة. لازم تديهم الوقت اللي يحتاجوه عشان يقارنوا ويشوفوا المنتج الأنسب ليهم، لكن مش عايز تضغط عليهم بشدة.

إيه اللي بيتم خلالها؟
نشر دراسات حالة، فيديوهات تجريبية، مقالات متقدمة، وشرح تفصيلي للمنتجات أو الخدمات.
التفاعل مع الجمهور المهتم مباشرة، والإجابة عن أسئلتهم.
استخدام تقنيات زي إعادة الاستهداف (Retargeting) للزوار اللي أظهروا اهتمام في المرحلة الأولى.

3. BoFu (Bottom of the Funnel):
هنا بقى العميل بيوصل لمرحلة اتخاذ القرار النهائي، محتاج بس دفعة بسيطة أو تأكيد إنه بياخد القرار الصح.

المدة المتوقعة:
2-4 أسابيع: في المرحلة دي، العميل بيبقى مستعد للشراء، لكن ممكن يكون محتاج يطمن أو يشوف عروض خاصة تدفعه إنه ياخد القرار بسرعة.
إيه اللي بيتم خلالها؟
تقديم عروض ترويجية، شهادات العملاء، ومقارنات المنتجات.
عروض محددة المدة أو الكمية لتسريع عملية الشراء.
متابعة العملاء المحتملين بشكل شخصي عبر البريد الإلكتروني أو المكالمات.
بعد ما المحتوى بتاع الـ 3 مراحل يخلص... إيه اللي بيتم بعد كده؟
بعد ما تخلص من إعداد الفانل التسويقي لكل المراحل، فيه خطوات تانية لازم تتبعها عشان تضمن استمرار النجاح وتحقيق أقصى استفادة من جمهورك والعملاء الحاليين.

1. حافظ على العملاء الجدد وقدّم لهم محتوى BoFu مطوّر:
بعد ما العميل يشتري، ماينفعش تسيبه. لازم تبدأ تقدم محتوى خاص للعملاء الجدد، زي:
نصائح حول استخدام المنتج.
محتوى تعليمات وطرق العناية بالمنتج.
اقتراحات لمنتجات إضافية أو متكاملة.

2. استراتيجيات الـ Post-Sale:
مهم جدًا إنك تشتغل على تجربة ما بعد البيع. العميل اللي اشترى منك لازم يحس إنك لسه مهتم بيه. ازاي؟
ابعت استبيانات عن رأيه في المنتج.
قدّم له عروض حصرية أو خصومات على المنتجات التانية.
اطلب منه كتابة تقييم أو مشاركة تجربته.

3. إعادة الفانل من البداية:
الفانل التسويقي مش حاجة بتخلص مرة وتبدأ من جديد. هو دايمًا بيتم تعديله وتطويره.
تقدر تشتغل على تحسين الـ ToFu بإنك تستمر في جذب جمهور جديد عن طريق المحتوى التوعوي، وطور من استراتيجيات النشر استنادًا للي تعلمته من التفاعل السابق.

عشان تحسّن الـ MoFu: حاول تستخدم البيانات اللي جمعتها من عملاءك الحاليين عشان تقدم محتوى أكتر عمقًا وتخصصًا.
تحسين الـ BoFu: بعد نجاح بعض الحملات، اعرف إيه العروض اللي جابت أعلى معدل تحويل (Conversion Rate) وطوّر منها.

4. التجديد والتطوير:
لازم دايمًا تكون في حالة تطوير وتعديل للفانل بتاعك:
لو لقيت جزء من الفانل مش فعال زي ما كنت متوقع، عدل محتواه أو طريقة تقديمه.
تابع نتائج كل حملة واعمل اختبارات باستمرار (A/B Testing) عشان تعرف إيه اللي بيشتغل أحسن مع جمهورك.

مدة كل مرحلة في الفانل بتختلف حسب الجمهور وطبيعة المنتج، لكن عمومًا الفانل بياخد من 2-3 أشهر بشكل عام.
بعد الفانل، مش لازم تبدأ من الصفر تاني، لكن لازم تستمر في تطوير كل مرحلة استنادًا لبياناتك وتجربة العملاء. اهتم بالعملاء الحاليين، واستمر في جذب جمهور جديد، وعدّل الفانل بتاعك بناءً على النتائج.

08/10/2024

هو إيه حكاية ToFu وMoFu وBoFu؟وهل فعلا التعويذة دي شغالة وليها سحرها على أي بزنس؟

لو إنت شغال في مجال التسويق، أكيد قابلتك المصطلحات دي: ToFu (Top of the Funnel)، MoFu (Middle of the Funnel)، وBoFu (Bottom of the Funnel). المصطلحات دي بتوضح رحلة العميل من أول ما يبدأ يعرف عن المنتج أو الخدمة بتاعتك لحد ما ياخد قرار الشراء. تعالى نفهم الموضوع أكتر ونشوف إزاي ممكن نطبقه في شغلنا.

أولًا: ToFu (Top of the Funnel)

ده بيكون أول مرحلة في "الفانل" (قمع المبيعات). المرحلة دي بيتعرف فيها العميل على المنتج أو الخدمة لأول مرة. هنا إنت بتكون لسه بتلفت انتباهه وبتحاول تجذبه من غير ما تضغط عليه عشان يشتري. في المرحلة دي، العميل بيكون عنده مشكلة أو سؤال، بس مش عارف إيه الحل، أو مش متأكد إيه اللي محتاجه بالظبط.

إيه نوع المحتوى اللي نستخدمه في ToFu؟
مقالات مدونات: مقالات بتشرح مشكلة أو موضوع بشكل عام.
فيديوهات توضيحية: فيديوهات قصيرة تشرح فكرة المنتج أو بتقدم نصائح عامة.
بوستات السوشيال ميديا: بوستات بتشد الانتباه، بتجاوب على أسئلة، أو بتطرح مشاكل العميل.

مثال عملي:
لو بتبيع منتجات عناية بالبشرة، ممكن تعمل مقال بعنوان: "إزاي تختار الروتين المثالي لبشرتك؟". هنا إنت بتقدم للعميل معلومات بدون ما تطلب منه يشتري المنتج.

ثانيًا: MoFu (Middle of the Funnel)

المرحلة دي هي منطقة الوسط، واللي بيكون فيها العميل بيدور على حل للمشكلة بتاعته بعد ما لفت نظره في مرحلة الـ ToFu. هنا بيبدأ العميل ياخد خطوة ناحية التفكير في المنتج بتاعك كحل لمشكلته، بس لسه محتاج يفهم أكتر عن إزاي المنتج ده هيفيده.

إيه نوع المحتوى اللي نستخدمه في MoFu؟

دراسات حالة: اعرض تجارب العملاء اللي استخدموا المنتج بتاعك.
المقالات المتقدمة: زي "إيه الفرق بين المنتجات اللي تناسب البشرة الدهنية والجافة؟"
العروض التوضيحية (Demos): فيديوهات بتشرح استخدام المنتج وإمكانياته.
مثال عملي:
لو بنرجع لمنتجات العناية بالبشرة، ممكن تعمل فيديو بعنوان: "إزاي استخدام السيروم بيحسّن بشرتك في 7 أيام." هنا إنت بتدي العميل أكتر معلومات عملية وتوريه النتايج اللي ممكن يحصل عليها.

ثالثًا: BoFu (Bottom of the Funnel)

المرحلة دي هي المرحلة الأخيرة في الفانل، واللي بيكون فيها العميل مستعد ياخد قرار الشراء. في النقطة دي، العميل بيدور على تأكيد إنه بياخد القرار الصح، وعايز يعرف أكتر عن المميزات، الأسعار، وشروط الشراء.

إيه نوع المحتوى اللي نستخدمه في BoFu؟

تجارب العملاء (Testimonials): اعرض آراء العملاء اللي استخدموا المنتج وحبّوه.
العروض الخاصة: قدم خصومات، عروض تجريبية، أو هدايا مجانية لتحفيز العميل على الشراء.
مقارنات المنتجات: زي "ليه منتجنا أحسن من المنافسين؟"
مثال عملي:
لو بنتكلم عن منتجات العناية بالبشرة، ممكن تعرض على العميل عرض خاص: "اشترِ مجموعة العناية بالبشرة النهارده واحصل على خصم 20%!". هنا إنت بتدي العميل سبب قوي عشان ياخد القرار.

مش محتاجة اقولك أن كل المراحل دي بتساعدك تفهم رحلة العميل، وبتخليك تعرف تقدم له المحتوى المناسب في الوقت الصح. كل مرحلة محتاجة أسلوب تسويق مختلف، يعني لو حاولت تبيع مباشرة في مرحلة الـ ToFu، ممكن تفقد العميل لأنه لسه مش مستعد. ولو فضلت تقدم محتوى عام في مرحلة الـ BoFu، هتلاقي نفسك بتضيّع فرص البيع.

إزاي نطبّق ToFu, MoFu, وBoFu في استراتيجية التسويق؟
في البداية، ركّز على نشر محتوى توعوي وشدّ الانتباه (ToFu).
بعد كده، قدم محتوى معلوماتي عملي يساعد العميل يفهم المنتج أكتر (MoFu).
وفي النهاية، خلّي عندك عروض خاصة ومقارنات واضحة تسهّل عليه اتخاذ القرار (BoFu).
الزتونة يا عزيزي هي أن:
الـ ToFu، MoFu، وBoFu مراحل بتحدد نوعية المحتوى اللي محتاج تقدمه في كل مرحلة من رحلة العميل. اعرف إزاي تتعامل مع كل مرحلة، وهتلاقي إنك بتقود العميل من مرحلة الوعي بمنتجك لحد مرحلة اتخاذ قرار الشراء، بشكل سلس ومؤثر.

هنا احنا خلصنا لو عندك اي سؤال ابعتهولي في ال DM او شاركني في الكومنتس، وماتنساش الشير عشان تشجع غيرك يتحمس يذاكر أسهل لأنك عارف ان المعلومات دي كلها من مصادر مختلفة كلها غير عربية وكمان بضيفلك من تجاربي الشخصية في الشغل.
اشوفك في بوست جديد👌

03/10/2024

فاكر الأيام اللي كانت فيها الإعلانات مليانة إلحاح لدرجة تخليك تحس إنك لازم تشتري غصب عنك؟ الزمن ده خلص.
دلوقتي الناس بقت أذكى وبتعرف تفرق بين اللي بيبيع لهم حاجة من غير ما يفهم احتياجاتهم، وبين اللي بيخاطبهم بطريقة تلمس مشاعرهم وتشدهم.
هنا بيظهر فن البيع بالكلام والكوبي رايتنج اللي بتحوله من مجرد بيع، لعملية إقناع ذكية وناعمة بتخلّي العميل هو اللي ياخد القرار.

إيه هو فن البيع بالكلام؟
فن البيع بالكلام، أو الكوبي رايتنج، هو مهارة إنك تعرف تكتب بطريقة تخلّي العميل يشعر إنك فاهمه، وعارف احتياجاته، ومشاكله. بدل ما تعرض المنتج وتقول "اشترِ ده"، بتخلّي العميل يحس إن المنتج هو بالضبط اللي بيدور عليه، وإنه هيحل مشكلة هو كان عايش فيها. الفكرة هنا إنك تكون ذكي في استخدام الكلمات اللي بتوصل للعميل وتخلّيه يحس إنك مش بس بتبيع، لكن بتقدّم له حل عملي وواقعي.

إزاي تبدأ في فن البيع بالكلام؟
👈قبل ما تكتب، لازم الأول تفهم جمهورك كويس. اسأل نفسك: مين هما؟ إيه اللي بيدوروا عليه؟ إيه الحاجات اللي بتهمهم؟ كل ما قدرت تحدد احتياجات جمهورك، كل ما كان أسهل إنك تكتب كلام يلمسهم ويوصل ليهم.

👈الهوك (Hook) هو الجملة الافتتاحية اللي بتخطف انتباه العميل. لازم يكون قوي، مثير، ومباشر. الهدف منه إنك تخلّي العميل يقف ويقرأ الباقي. جرّب حاجة تلمس مشاعرهم أو تثير فضولهم. - اتكلمنا عنه بالتفصيل فخد لفّة في البيدج.

👈كل عميل بيحب يسمع كلام بيلمس واقع حياته، عشان كده لازم أسلوب الكتابة يكون قريب من لغتهم وتفكيرهم. لو كنت بتسوق لفئة الشباب، استخدم لغة بسيطة، كلمات دارجة، ومش لازم تكون رسمية بزيادة.

👈بدل ما تكتب عن خصائص المنتج، ركّز على المميزات اللي هتفيد العميل. ما تقولش بس إن المنتج مصنوع من مواد عالية الجودة؛ قول إزاي الجودة دي هتأثر بشكل إيجابي على حياتهم.

👈استخدم الكوبي بتاعك عشان تحط العميل في سيناريو بيعيشه في حياته اليومية. اربط منتجك أو خدمتك بمشكلة هم بيواجهوها فعلاً، وورّيه إزاي المنتج بتاعك هيكون الحل.

👈الناس بتثق في تجارب الآخرين. استخدم تجارب العملاء السابقين كجزء من الكوبي بتاعك، عشان تدي الثقة للي لسه متردد.

تقدر تقول مثلاً : "أكتر من 500 عميل جرّبوا منتجنا، وكلهم أكدوا إنه غير حياتهم. شوف بنفسك!"
المهم يكون حقيقي مش مجرد كلام بتجيب بيه رجل العميل عشان ما تفقدش ثقتك ولأن ده حرام قبل أي شيء.

👈الـ CTA هي الخطوة الأخيرة اللي بتطلب فيها من العميل ياخد قرار. خليها واضحة ومحددة، بس مش بشكل ملح أو مبيعاتي بزيادة.
بدل ما تقول "اشتري دلوقتي"، ممكن تقول: "ابدأ رحلتك معانا النهاردة واكتشف الفرق."

في فن البيع بالكلام، لازم تكون صادق. مش مهم إنك تبالغ وتوعد بوعود ضخمة، الأهم إنك توصل الفكرة بواقعية. الجمهور بيحبوا يشتروا من شخص صادق مش بيحاول يضحك عليهم.

فن البيع بالكلام مش هو إنك تتكلم كتير، لكن إنك تعرف تتكلم صح.
الكوبي رايتر الناجح هو اللي بيخلق جسر بين البراند وبين العميل من ناحية الثقة في الشراء، وبيخليه هو اللي ياخد الخطوة ناحية المنتج. الفكرة كلها إنك تبقى لامس احتياجتهم، تحكي قصتهم، وتعرض منتجك كأنه الحل اللي بيدوروا عليه. لما تعمل كده، مش هتحتاج تقوله "اشتري"، هو هيعرف لوحده إنه محتاج يشتري.
ما تنساش تشاركني أكتر جزء عجبك النهاردة في المقال ده وكمان تعمل شير عشان تفيد غيرك.

02/10/2024

عمرنا ما فكرنا إن الحاجات اللي بنشتريها، بنشتريها عشان بتلبي احتياج في مشاعرنا، مش مجرد حاجة موجودة وخلاص. كل يوم بنشوف إعلانات ومنتجات كتير، بس مش كلها بتلمسنا أو بتخلينا ناخد القرار ونشتري. السر هنا في حاجة واحدة: المشاعر. خليني أقولك، لو قدرت توصل لمشاعر العميل بشكل صادق، هتلاقي نفسك مش بس بتبيع منتج، إنت بتبني علاقة بينك وبين عميلك، علاقة بتعتمد على الثقة، الحنين، الأمل، والراحة. عشان كده هنتكلم النهارده عن "التسويق بالمشاعر" وإزاي تقدر تطبقه في شغلك.

أول خطوة هي إنك تخرج من الكليشيهات التقليدية وتبدأ تفكر في عميلك كإنسان. إيه اللي بيدور في عقله؟ إيه التحديات اللي بتواجهه كل يوم؟ إيه اللي بيخليه يدور على منتجك أو خدمتك؟ الأسئلة دي مش مجرد كلام، دي المفتاح اللي هيفتح لك الباب لمشاعر عميلك.

فهتبدأ باستكشاف مشاعر جمهورك، ممكن تعمل ده من خلال الاستطلاعات، قراءة التعليقات على السوشيال ميديا، أو حتى مراقبة التفاعل مع المحتوى بتاعك. ساعات الناس بتدور على الحل لمشكلة بتزعجهم بشكل شخصي، زي الشعور بالتعب من شغل طويل، أو الإحباط من مشاكل البشرة. ركز على النقطة دي، لأنها الأساس اللي هتبني عليه قصتك التسويقية.

لغة الإعلانات بتفرق كتير في إقناع العميل. لو استخدمت عبارات بتعكس مشاعر زي "الراحة"، "الثقة"، و"السعادة"، هتخلق صورة في عقل العميل وتربطه بمنتجك. العب على نقاط ضعفهم واحتياجاتهم، وحوّلها لأمل في منتجك.

مثلاً، بدل ما تقول "اشترِ المنتج دلوقتي"، جرب تقول: "خطوتك الأولى لبناء ثقتك بنفسك". الفرق هنا في التوجّه، الأول بيوصل رسالة مادية، التاني بيركز على مشاعر العميل واحتياجاته.

الجمهور مش هيكتفي بكلامك بس، هو عايز يشوف ويعيش التجربة.
خلي منتجك مليان تفاصيل بتمس مشاعرهم. زي التغليف المميز والاهم مناسب للفئة المستهدفة ويكشف تسعيره مايبانش اغلى من سعره ولا أرخص، اللمسة الشخصية في التعامل، أو حتى مشاركة قصة العميل اللي استخدم منتجك وحس بالفرق.

لو بتبيع منتجات يدوية، خليك دايمًا بتشارك قصص الحرفيين اللي بيشتغلوا على المنتجات دي. بيحبوا يشوفوا التفاصيل الصغيرة اللي بتحول منتج بسيط لشيء مميز بيلمس قلوبهم.

الصورة ممكن تقول ألف كلمة، والفيديو بيدخل عمق أكبر في المشاعر. استخدم صور حقيقية بتعكس البسمة، الفرحة، والراحة. خليك مركز على اللحظات اللي فعلاً بتأثر في الناس.

مفيش وقت أحلى من المناسبات زي الأعياد ورمضان عشان تلعب على المشاعر. في الأوقات دي، الناس بتكون مفتوحة أكتر لأي حاجة بتخلّيهم يحسوا بالفرحة أو الحنين. حاول تربط منتجك بالمناسبات دي، زي لو معانا منتج ممكن يتحط على الفطار نقول مثلاً، فرحة عيلتك ما تكملش غير ب ... على سفرتكم.

كتير مننا بيشتري المنتج بسبب خوفه من حاجة معينة، أو رغبته في تحقيق هدف. استغل النقطة دي في تسويقك. مثلاً، لو بتسوق لمنتجات تعليمية، استخدم عبارات زي: "عارف إنك خايف من إنك متلاقيش وظيفة مناسبة؟ الكورس ده معمول مخصوص عشان يحقق حلمك بخطوات واضحة."

الناس مش بتشتري المنتج لمجرد إنه موجود، هما بيشتروا النتيجة اللي هيحسوا بيها بعد استخدامه. ركز دايمًا في إعلاناتك على النتائج العاطفية اللي هيحسوا بيها العملاء.

التسويق بالمشاعر مش مجرد وسيلة للعرض، ده فن إنك تخاطب الناس بلغة قلوبهم. لما تفهم جمهورك وتلمس مشاعرهم بالكلام والصور والتجارب، هتلاقي نفسك بتوصل لعميلك بطريقة مختلفة، من غير ضغط أو إلحاح. خليك صادق في رسالتك، واعرف إن المنتج بتاعك هو مجرد أداة لتحقيق الشعور اللي بيدور عليه العميل.
احكيلي بقى إيه أكتر طريقة بتحب تلعب بيها على المشاعر وإزاي بتستغلها صح؟
وماتنساش تعمل شير عشان غيرك محتاج المعلومات دي.

Eman Fadel

11/11/2025

28/01/2025

28/01/2025

30/12/2024

29/12/2024

30/10/2024

17/10/2024

10/10/2024

08/10/2024

03/10/2024

02/10/2024

Address

Website

Alerts

Shortcuts

Share

Category