08/05/2023
حياتنا اليومية مليئة بالقرارات .. وكتير من قراراتنا بتأثر علينا وعلى اللي حوالينا سواء سلبا إو إيجابا .. وممكن تبقى قرارات بسيطة زي هناكل ايه ونشرب ايه .. وممكن تبقى قرارات مهمة زي اختيار مكان السكن وطبيعة الشغل ..
وممكن تبقى قرارات استراتيجية زي السفر للخارج ولا الاستقرار في البلد .. أو غيرها من القرارات اللي مبتحصلش كل يوم واللي بيكون ليها تأثير على كل الدواير المحيطة بينا .. عشان كدا عملية اتخاذ القرار بتكون صعبة جدا خصوصا لما تكون مرتبطة بالبيزنس ولما بتتعلق بقرار استراتيجي .. واللي بتحتاج منا نفكر بشكل مختلف عن كتير من القرارات اللي بناخدها في حياتنا واللي بيأثر عليها شوية معطيات لازم نحطها في الاعتبار واحنا بنفكر بشكل استراتيجي
وقبل ما نتكلم عن المعطيات دي لازم تبقى عارف إن قرارك الاستراتيجي صعب الرجوع فيه .. لأنه بيعمل تأثيرات كبيرة جدا على البيزنس بتاعك .. فلو افترضنا إنك بتصنع منتج معين ومصنعك موجود في مكان ما قريب من العمالة بتاعتك وقريب من العملاء بتوعك وسهل للموردين اللي بيتعاملوا معاك الوصول ليك .. ولكن مع الوقت المكان معدش مناسب ليك من حيث المساحة والقدرة الإنتاجية فحبيت تتوسع وقررت إنك تنقل مصنعك لمكان تاني أكبر وأوسع ..
ولكن المكان المناسب للخطوة دي بيواجه شوية تحديات ممكن متكنش واخد بالك منها .. زي زيادة تكلفة النقل لبعد المكان .. فتلاقي الموردين بيعلوا عليك مصاريف النقل فتكلفتك تزيد .. أو تلاقي إن العمالة بتاعتك بقى عندها مشقة كبيرة في إنها تنتقل لمكان العمل واللي بيأثر بشكل سلبي على طاقتهم الإنتاجية .. أو تلاقي إن تكلفة نقل الموظفين تضاعفت بشكل كبير فوق ما كنت متخيل !
عشان كدا القرار الاستراتيجي بتكون نتايجه كارثية لو متمش دراسته بشكل صحيح .. فلازم تاخد بالك من شوية معطيات بتأثر على قرارك الاستراتيجي وفي نفس الوقت تساعدك تحسن من رؤيتك وخطواتك
1- البيئة المحيطة
في الأوقات اللي بتكون فيها الرؤية ضبابية لازم تكون حذر جدا في عملية اتخاذ القرار لأنك مش هتعرف ترجع في قرارك .. ولأن الرؤية بتكون شبه منعدمة فبالتالي قرارك نفسه هيكون مش مضمون نجاحه .. فحاول تتأكد من استقرار الأوضاع حواليك .. وتتابع بشكل كويس جدا طبيعة الأوضاع السياسية والاقتصادية والاجتماعية والقانونية في السوق اللي أنت موجود فيه
2- دراسة الوضع الداخلي لمؤسستك بشكل جيد
زي ما ذكرنا في أول الكلام .. هنفترض إنك قررت تتوسع وتنقل مصنعك لمكان جديد وكنت حاسب تكلفتك بشكل سليم وعارف أنت محتاج مصاريف أد ايه .. ولكن بعد ما قررت تاخد القرار اكتشفت إن المبلغ ده مش كافي وإنك محتاج مصاريف أكتر ..
وفي نفس الوقت مخدتش بالك إن قرارك ده تسبب في أزمة سيولة كبيرة للشركة واللي كان ليه تأثيرات سلبية كتيرة على جوانب مختلفة .. زي تقليل نفقاتك التسويقية واللي أثرت بشكل مباشر على وجودك في السوق .. أو أثرت على قدرتك بسداد التزاماتك المالية للموردين اللي بيتعاملوا معاك .. واللي تسبب في منع التسهيلات اللي كنت بتحصل عليها منهم أو التعامل مع فئة محدودة منهم وفقد ميزة تنوع الموردين .. فبدل ما كان قرارك هدفه التوسع والنمو لقيت إن نتيجة قرارك تسببت في بعض الانكماش خصوصا لو كان الانكماش ده جه مع ظروف اقتصادية صعبة
3- استعدادك للمخاطرة
أوقات ممكن تكون متردد في اتخاذ قرار ما لأنك مش متأكد من نتايجه ولكن بيغلب على ظنك إنه قرار صحيح .. فهل أنت عندك القدرة على المخاطرة واتخاذ القرار وتحمل تبعاته ولا هتفضل متردد كتير وواقف في مكانك خصوصا إن عدم حسم الموضوع ممكن يأثر عليك بشكل سلبي جدا ..
فمثلا عندك براند وسمعته في السوق فيها مشاكل وكان من أحدى الحلول هي تغيير اسم البراند بس خوفك من اتخاذ القرار عطلك كتير وخلاك واقف في مكانك مبتتحركش .. فأنت هنا محلتش المشكلة لأنك خايف تاخد القرار وحتى لما جربت حلول بديلة كانت النتايج كلها سلبية
4- الفرصة البديلة
لازم تبقى عارف إن كل قرار هتاخده فأنت هتصرف عليه وقت ومجهود وموارد والأهم من كل ده هو ضياع الفرصة البديلة اللي ممكن تضيع منك لو كانت جودة قرارك ضعيفة أو نتايجها سلبية
وزي ما قال James E. Faust "بعض القرارات الحاسمة التي نضطر لاتخاذها لها وقت محدد، وعندما نتأخر في اتخاذ هذه القرارات، فإن الفرص تضيع من يدنا بشكل دائم. وفي بعض الأحيان، يتوقف تقدمنا نحو اتخاذ القرارات التي تتطلب التغيير بسبب وجود شكوك لدينا. وعليه، قد نضيع فرصًا قيمة."
ياريت تشاركنا بخبراتك لو في قرار استراتيجي شوفته بنفسك وكان ليه تأثير على بيزنس تعرفه سواء كان التأثير إيجابي أو سلبي
