12/08/2025
السلام عليكم
أنا أسمي أحمد توني بشتغل مصمم بقالي حوالي 14 سنة , خلال السنين دي اخدت جوائز كتير زي جائزة من سفارة مملكة هولندا وجوائز تانية اخدتها عشان عملت تصميمات لشركات مهمة داخل مصر وخارج مصر القصة طويلة ده مجرد تعريف سريع عشان ماطولش عليكم..
أنا فعلاً اشتغلت بالمبالغ دي بس مريت بتجربة نفسية صعبة جداً الحمد لله بدأت اخرج منها حابب اوضحها قبل ماشرح عملت الفلوس دي ازاي عشان محدش غيري يقع فيها , سبب التجربة دي اني شخص اجتماعي وفي وقت ما قررت اشتغل بشكل مستقل عشان اوفر مصاريف التحركات واستفاد بمجهودي اكتر بدل المرتبات الثابتة اللي مش بتدي الواحد العائد اللي يستحقه واللي خلاني انفذ القرار ده وفاة والدي اللي خلتني بقيت فجأة مسؤول عن بيت لوحدي وزي أي شاب ماعندوش مصدر دخل غير دراعه وشغله وكمان مسؤول عن بيت كان قرار مهم جداً لأن أي قرش هيتوفر البيت وأهلي هيكونوا اولى بيه أكيد .. خصوصاً كمان ان اهداف وطموحات كتير ابتدت تبعد لأن الظروف اختلفت ..
بدأت اشتغل بشكل مستقل والحمد لله بكرم ربنا الشغل العائد بتاعه كان أفضل من الراتب مبالغ كويسة كانت بتمشي الدنيا زي ماشايفين في الصورة لكن في وسط كل ده انا كنت مش واخد بالي ان شخصيتي الاجتماعية مش مناسب ليها الشغل فترات طويلة عن بعد قدام الشاشة من غير التواصل مع الناس بشكل مباشر كنت باخد بريك من وقت للتاني واخرج بس برضه ماكانش كافي دخلت في تجربة نفسية صعبة جداً ماكنتش فاهم ده ايه في الأول اتقالي انت محسود وحاجات زي كدة .. بسبب الموضوع ده الشغل كله وقف وخسرت حاجات كتير بس إن شاء الله بحاول ارجع تاني وربنا هيعوض فياريت اي كان شغلكم تعرفوا ان في حاجات مهمة غير الدخل المادي فخلوا بالكم من نفسكم رغم الظروف الصعبة نحاول على قد مانقدر نوازن بين كل حاجة
البوست ده انا حابب أساعد نفسي بيه وأساعد بيه اي مصمم لسة بيبدأ على قد ماقدر , على مدار سنين شغلي انا ماكانش عندي تواجد على السوشيال ميديا بشكل بروفيشنال نظراً لضيق الوقت اغلب الفرص كانت بتيجي من خلال الثقة والتعامل المستمر والعلاقات لكن إن شاء الله هبتدي افرغ وقت اكتر لده من خلال صفحتي ..
افتكرت كمان من الحاجات السلبية في الموضوع اللي حكيتلكم عنه ان في ناس كانت بتقلق تطلب شغل عشان بتشوف اني عامل شغل بأسعار أعلى من المناسب ليهم عن نفسي بقولهم بالعكس اللي محتاج تصميمات يقدر يبعتلي وإن شاء الله مش هنختلف لأني فاهم كل كلاينت امكانياته ايه وشغفي لشغلي بيخليني احب اتعامل مع كلاينتس مختلفة بغض النظر عن حجم العائد المادي خصوصاً اني محتاج الشغل في الوقت ده
~المهم انا قررت ارجع بإذن الله لو حد محتاج مني شغل يبعتلي رسالة فيها تفاصيل اللي محتاجه
~ولو انت/ي مصمم محتاج اشرحلك عملت الفلوس دي ازاي هتبعتلي رسالة توضحلي بس انك شغال بقالك قد ايه وانا هرد عليك بالشرح ان شاء الله عشان الموضوع فيه تفاصيل محتاجة متابعة وشرح
~ولو انت حابب تنشر التجربة أو تـSupport me اعمل شير..
شكراً :))
