07/05/2021
هى ليلة القدر امتى ؟
جت ولا لسه ؟
طيب ليه في خلاف عليها ؟
طيب ايه رأيك انها ممكن تكون لسه مجتش
أو أنها جت من اول ليلة وترية؟
تعالى نبدا الحكاية من الاول,
كلمة القدر نفسها ، معناها باللغة العربية هى الجاهة والرفعة في المكانة ، وهى القضاء ، قضاء الله على عباده يعنى امره عليهم ، وهى أيضا معناها وقت الشيء المقدر له
طيب هى ليلة القدر في شهر ايه ؟
بعض العلماء اختلفوا حول الشهر ، اه تخيل بقي ،
لكن أغلب جمهور العلماء و الفقهاء اتفقوا حول الشهر انه رمضان ، ب دليل آيات ( شَهْرُ رَمَضَانَ الَّذِي أُنْزِلَ فِيهِ الْقُرْآنُ هُدىً لِلنَّاسِ وَبَيِّنَاتٍ مِنَ الْهُدَى وَالْفُرْقَانِ)
واية ( إِنَّا أَنْزَلْنَاهُ فِي لَيْلَةِ الْقَدْرِ (1) ) وان سورة القدر هى السورة الى بعد سورة العلق وهى اول سورة نزلت في القران الكريم
طيب هو رمضان الاول نزل فيه القرآن بس ؟
لا ، ده نزل فيه كل الكتب السماوية ،
استدلالاً بما ورد عن واثلة بن الأسقع -رضي الله عنه- أنّه قال:
(أُنزِلَت صحُفُ إبراهيمَ أولَ ليلةٍ من رمضانَ،
وأُنزلَت التوراةُ لستٍّ مَضَين من رمضانَ،
وأُنزِلَ الإنجيلُ لثلاثِ عشرةَ ليلةً خلَتْ من رمضانَ، وأُنزلَ الزَّبورُ لثمانِ عشرةَ خلَتْ من رمضانَ،
وأُنزِلَ القرآنُ لأربعٍ وعشرين خلَتْ من رمضانَ)،
خدت بالك من اخر جملة ؟ طيب هل ده معناه أن ليله
25 هى ليلة القدر ؟
ده كلام واثلة بن الاسقع ، طيب في جمهور آخر من العلماء قالوا إن القرآن نزل على سيدنا محمد صلى الله عليه وسلم في ليلة 21 رمضان ، يوم اثنين ، وكان موافق 10 أغسطس سنة 610 ميلادي ، يعنى ليلة 21 رمضان هى ليلة القدر ؟
اتلخبطت ؟
ولسه هتتلخبطت اكتر ، في كتاب البداية والنهاية ل ابن كثير قالك أن الوحى والقرآن نزل في يوم 17 رمضان ، وقال في رواية اخري انه يوم 24 رمضان
طيب عمر بن الخطاب رضي الله عنه لما سأل ابن عباس رضي الله عنه ، قاله عن ليلة القدر انها ليلة 27 رمضان ، يعنى الليلة ، واستدل بكده ب أن رقم 7 هو رقم
عدد السماوات 7
وعدد الارض 7
وعدد أشواط الطواف والسعي 7
وعدد أيام الأسبوع 7
فقال إذن هى ليلة 27 من رمضان ،
طيب تعالى بقي نروح لحاجة اسمها معجزة العدد ،
بعض المفسرين قالوا ايه ، نشوف الأرقام ونحاول نستدل منها ،
بِسْمِ اللَّهِ الرَّحْمَنِ الرَّحِيمِ
إِنَّا أَنْزَلْنَاهُ فِي لَيْلَةِ الْقَدْرِ (1) وَمَا أَدْرَاكَ مَا لَيْلَةُ الْقَدْرِ (2) لَيْلَةُ الْقَدْرِ خَيْرٌ مِنْ أَلْفِ شَهْرٍ (3) تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِمْ مِنْ كُلِّ أَمْرٍ (4) سَلَامٌ هِيَ حَتَّى مَطْلَعِ الْفَجْرِ (5)
سورة القدر ، عدد حروفها 114 حرف بنفس عدد سور القران الكريم
وعدد كلماتها 30 ، وهو نفس عدد أجزاء القرآن الكريم
كلمة هي كانت رقم 27 في ترتيب الكلمات ، في (سلام هي حتى مطلع الفجر ),
وان كلمة ( ليلة القدر ) مكونة من 9 حروف واتكررت 3 مرات في السورة وهى سورة قصيرة ، فقال 3 في 9 ب 27 ،
قال كمان أن عدد الآيات 5 و الترتيب في المصحف هى السورة رقم 97 ، و رقم 5 و 7 و 9 هى ليالي وترية
، التفسير الكبير للرازى ،
يعنى هى ليلة كام ؟ استنى بس
هو الأول ليه ليلة القدر مميزة آوى كده ؟
عشان ربنا ب يكتب فيها ما يكون في تلك السنة ، فلا يغير القدر إلا الدعاء ، عشان كده الناس بتدعى فيها ،
وايه كمان ؟
إنها خير من ألف شهر ، شوف انت بقي لما تصلي ولا تقرأ قرآن وتدعى في ليلة خير من ألف شهر يعنى كأنك بتعبد ربنا حوالى 84 سنة بلا توقف
لا ليلة القدر عظيمة وكبيرة قوى ، طيب الى أتذكر عن العلامات أتذكر فين ؟ في السنة
في أحاديث نبوية عن الرسول صلى الله عليه وسلم
أن علامات الليلة تكون الرياح فيها ساكنة وهادية ، وانك تحس من جواك براحة وطمأنينة (سلام هى) ,
وتانى يوم في شروق الشمس تكون الشمس هادية من غير شعاع ،
تعالى بقي نرجع لليلة القدر وصور شمس كل ليلة وترية الى بتنزل عالنت تجيب إحباط للى ملحقش يجتهد كما ينبغي فيقولك خلاص الليلة عدت ،
طيب افرض رمضان كان في شتاء قارس وفي بلد مفيهاش شمس هيعرفوا منين ؟
علامات الليلة عشان تطمنك مش تحبطك ولحد ليلة 29 منقدرش نقول كانت ليلة كذا ، لأن العلامات الله اعلم بمدى ثبوتها لكن الليلة نفسها هى المرجوة ، كان يسيرا على الله أن يخبرنا موعد الليلة ، لكنه حجب عنا موعدها وكأن الله عايز يسمع دعائك و صلاتك و اجتهادك ال عشر أيام كلهم
فإذا كانت الليلة نفسها ثابتة عند بعض العلماء في الفقه ومتغيرة عند البعض الآخر ، و إذا كانوا اختلفوا حول ليلة نزول القرآن بالتحديد ،
أقرب ما قيل عنها أنها في العشر الأواخر ،
10 ايام كاملة اجتهد فيهم لحد اخر يوم ، اجتهد على قد ما تقدر وسيبك من صور الشمس والقمر عالانترنت العلامات موجودة عشان تساعدك تجتهد مش عشان توقف ، ركز في عبادتك وصلاتك ودعائك ، لحد ليلة 29 ، لأن علم الليلة عند الله وحده
اجتهد كل يوم مش الليالي الوترية فقط ، ( العشر الأواخر ) , قادر ربنا يغير قدرك انت بدعوة من قلبك 💙💚
