13/01/2026
رمضان على الأبواب😍
كلنا بنستني رمضان من السنة للسنة.. وبنبقى نفسنا نتعبد الشهر كله ومانضيعش لحظة فيه..😇
بس مع الأسف.. كتير مننا بيتفاجئ إن الشهر جري وهي مالحقتش تعمل كل اللي نفسها تعمله..أو تتعبد بالشكل اللي كان نفسها فيه.. وبترجع تندم وتتحسر على الوقت القيم اللي ضاع منها..😢
وعشان رمضان فعلًا غالي وممكن يكون هو سبب سعادتك في الدنيا ودخولك الجنة في الآخرة، ما ينفعش نسيبه يضيع..لازم نحاول بإيدينا وأسنانا ونجتهد على أد ما نقدر..😌
“وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ”
وعشان الحكمة بتقول” من ترك نفسه بلا جدول جدولته الملهيات” حبيت أساعد نفسي وأساعدكم معايا بالأداة دي عشان على الأقل مافيش يوم يعدي من غير حد أدني من العبادات..🤓
في البلانر دي استخدمت طريقة ال “Time Boxing” أو “إطارات الوقت”..
بنقسم اليوم لأوقات محددة وبنحدد لنفسنا مهمات تخلص في الوقت دا..نركز فيها ونركز إننا نعملها بيقظة ووعي ونية وإحسان..👌
أنا قسمت اليوم ل 3 فترات.. كل فترة منهم 8 ساعات ، وحطيت في كل فترة الأساسيات من الفروض اللي ما ينفعش نسيبها والزيادات من السنن والعبادات اللي حبيت أتقرب بيها من ربنا..وطبعًأ كل حد ممكن يزود أو يقلل من النوافل على قدر استطاعته وماننساش
“أَحَبُّ الأعمالِ إلى اللهِ أدْومُها و إن قَلَّ”😉
وكمان حبيت أتعرف على ربنا أكتر ،وعشان كدا شاركت معاكم معاني بسيطة لجزء من أسماء الله الحسنى..لعل معني منها يلمس قلبك وتتعبدي بيه ويكون مفتاح قرب ليكي من الله جل وعلا..😇
وعشان نتشجع على ختم القرآن في شهر القرآن قسمت جزء كل يوم على ال 3 فترات.. وطبعًا تقدري تزودي قدر استطاعتك أو تقريه كله في فترة واحدة، اللي يريحك.. وهتلاقيني كاتبالك السور اللي هتقريها في جزء النهاردة مع نبذه من معلومات عنها عشان تتشجعي تدوري وتعرفي عنها أكتر أو لعل مقصدها يكون باب ليكي يساعدك إنك تقريها بتدبر أكتر..😊
وعشان رمضان ماينفعش من غير دعاء..شاركتك كل يوم بدعاء من الأدعية المأثورة عن سيدنا محمد “صل الله عليه وسلم” تدعي بيه لنفسك وماتنسيش تدعيلي معاكي..☺️
أخيرًا هتلاقيني مجمعالك محصلة يومك من العبادات عشان تتشجعي وتشوفي إنك تقدري تلتزمي وتحتفلي بإلتزامك..👏
بس أهم من كل دا إنك ماتنسيش نيتك.. اللي ممكن تسبقي بيها الصوامين والقوامين..وعشان زي ما تحتفلي بإلتزامك في الدنيا، تحتفلي بفرحتك بالعفو والقبول والجنة في الآخرة..عشان كدا هشارك معاكي بعض نوايا لعبادات رمضان وكمان هسيبلك مكان تملي إنت نوايا براحتك..☺️
وعشان فيه مننا اللي ممكن تكون عاجباها الفكرة بس بتحب تحدد هي المهام لنفسها هعملك في آخر البلانر خالص صفحة فاضية بنفس التصميم ممكن إنت تطبعيها بعدد أيام رمضان وتملي المهام براحتك خالص..😉
وحتى لو إنت مالكيش في الكتابة والجداول..المهم إنك تحددي لنفسك المهام وتبقي واعية ويقظة للعبادات اللي إنت عايوة تلتزمي بيها في رمضان زتكتبي الدعاوي اللي نفسك تدعيها عشان رمضانك يكون يقظة وبلا ندم❤️
هسيبلكم لينك تحميل البلانر PDF في أول كومنت🥰
أخيرًا..البلانر من تصميمى، ومش مسامحة أي حد ينسبها لنفسه أو يسىء استخدامها أو استغلالها 😊
