24/09/2022
السوشيال ميديا من أفضل القنوات اللى ممكن تبيع بيها منتجاتك
بس مينفعش تعمل صفحة فيس بوك أو أكونت انستجرام وتعمل اعلان وتستنى اول عملية بيع !
الموضوع مش صعب أوي بس بردو مش لدرجة السهولة
فيه خطوات لازم تمشيها الاول قبل ما تبدأ تستخدم السوشيال ميديا كقناة بيع لمنتجاتك:
1️⃣ لازم تفهم شريحتك المستهدفة " Buyer Persona "
مين هو العميل المثالي لمنتجك؟ عايش فين؟ عنده كام سنة؟ ايه أهدافه؟
ايه تحدياته؟ ازاي المنتج بتاعك هيساعده؟
كل دي أسألة لازم تبقى عارف اجاباتها علشان تعرف تقدم المنتج صح.
2️⃣ اختار المنصة المناسبة لمنتجك واللي عملاءك موجودين عليها
هل العميل بتاعك موجود على فيس بوك فعلا؟ ولا بيحب الصور وال stories أكتر وبيقضي وقته على انستجرام؟ أو بيحب الفيديوهات الترفيهية وأغلب وقته بيقضيه على تيك توك؟
لو اخترت منصة بعينها علشان بس كل الناس حواليك بيعملوا اعلانات عليها ممكن تضيع على نفسك فرص كتير جدا وفلوس اعلانات كنت ممكن تستغلها بشكل أفضل.
3️⃣ ايه المحتوى اللى هتنشره؟
أكيد مش صح انك تعتمد على الاعلانات لوحدها، لكن ايه هو المحتوى اللى ممكن تنشره على صفحاتك؟
اغلب الناس بيبقا كل المحتوى اللي بتنشره بيتكلم عن المنتجات بس وكمان بشكل مباشر وده مش صحيح
وعلشان كده لازم تهتم جدا انك تنشر محتوى قيم سواء مرئي أو مسموع
المحتوى ده يكون مفيد للعملاء بتوعك وكمان يشجعهم على انهم ياخدوا قرار شراء ويجربوا منتجاتك.
4️⃣ استخدم كل ال features المتاحة في المنصة اللى انت متواجد عليها
يعني مش بس تركز على ال posts مثلا
لازم كمان تهتم بال stories, polls وكمان الرسائل المباشرة للعملاء وهكذا.
5️⃣ اتفاعل مع جمهورك
لو نشرت محتوى قيم ومهم ومفيد أكيد 100% هتكسب عملاء
لكن لو خليت جمهورك يتفاعل معاك ويشارك هو في صنع المحتوى هتكسب أضعاف العملاء دي.
6️⃣ انشر محتواك بانتظام وبصورة مستمرة
مش مهم أبدا كمية المحتوى اللى بتنشره، المهم انه يكون منتظم ومستمر
اعمل خطة للمحتوى بتاعك ونفذها على مدار 3 شهور وهتلاحظ الفرق.
التسويق على السوشيال ميديا مميز جدا وفعلا نتائجه مبهرة
لكن ميز نفسك واعمل اللي منافسينك مش بيعملوه
