20/05/2023
النهاردة وامبارح والكام يوم اللي فاتوا كنت ف الموود اياه
موود الصداع + الندم علي اني اتعلمت الماركيتينج!
ازاي كلام زي دا يطلع من واحد بيبيع كورس يعلمك الماركيتينج؟!
الساعة دلوقتي عندي 3 الفجر مين بياخد باله من كلامه الساعة 3 الفجر؟!
لو كنت من عشاق الروايات فالغالب هتكون قريت رواية الفيل الازرق يعني مر عليك فقرة في منتصف صفحة ما م الصفحات اللي عالناحية الشمال بيكون دكتور يحيي (بطل الرواية) بيلعن اليوم اللي اتعلم فيه لغة الجسد
الراجل قاعد ف كافيتريا عادي لكنه مش قادر يمنع مخه انه يبطل قراية وتحليل الناس اللي حواليه هو مش عايز بس مخه بيعمل دا لوحده
عدم السيطرة علي مخك امتي يحلل وامتي يقف دي مشكلة رقم #1
مشكلة رقم 2: الفيلم وصل للنهاية البطلة بتبكي لما اكتشفت الخيانة كل الناس مشدودة ومتأثرة وانا عارف انها واقفة تعيط هنا والكاميرا جايبة الزاوية دي بالتحديد عشان نبين اسم التلاجة اللي شركتها دافعة فلوس عشان يتسوقلها ف الفيلم وارد انها هتفتح التلاجة تجيب ازازة مية مش عشان الخيانة بتعطش لكن عشان نشوف مميزات التلاجة من جوا (دا لو كانت الشركة دافعة اكتر)
قولي بالله عليك ازاي هتتأثر وانت دماغك بتفكر ف كدا!
فقدان المتعة بالحاجات الممتعة دا رقم #2
دكتور يحيي ف الفيل الازرق كان مرهق بسبب لغة الجسد لكن علمه بيها كان بيديه Unfair Advantage فوق اي حد بيقف قصاده
كذلك التسويق احيانا اه بيكون مرهق ساعات بيفقدك المتعة لكنه ما زال بيديك ال Unfair Advantage!
