23/04/2024
ازاى تزود مبيعاتك؟
النصيحة السابعة: خلى عميلك في جيبك
اللى بيسوق نوعين, نوع بيشتغل طيارى, بيعة وخلاص, ونوع تانى عاوز الاستمرارية عشان ينجح
التجارة الإلكترونية انتشرت جدا, بس هل كل مسوق او تاجر ناجح صحي من النوم ومن اول مرة اشتغل ونجح؟
لأ طبعا, اغلبهم جرب مرة واتنين وتلاتة,
فهم الدورة ماشية ازاى,
ذاكر و دور,
جرب وحقق مبيعات,
فيه مقولة حقيقية جدا بتقول
"اللى ماكنش صبى شاطر في شغلته, عمره ما هيكون معلم فيها"
فانت عشان تكون معلم في شغلتك, لازم تتعلمها صح الأول,,
طب دا ايه علاقته بالعميل وجيبي؟
علاقة قوية جدا طبعا,,
لما تسوق لمنتج معين قميص, بطنلون, برفيوم, موبايل, او اى حاجة تانية,
لازم تدور على شوية حاجات: اهمها..
1-الجودة, عشان انت اللى في وش العميل, وممكن تبيع حاجة جودتها رديئة على صفحتك تخلي العميل يعمل عليك حفلة على السوشيال ميديا تأثر على شغلك ومبيعاتك.
2-التسليم:لازم يكون عندك مصداقية في مواعيد التسليم للعميل, عشان العميل لو حس انك بتعت المنتج متأخر, حتى لو كان المنتج فوق فوق الممتاز, لما يحب يشترى حاجة, عقله هيقوله
"الصفحة دى هتطلع عينك على ما توصل الأوردر, احنا ندور على حد تانى بيبيع نفس المنتج, جايز يعجبنا و اهو نجرب"
ويا سلام لو التجربة كانت إيجابية, الف مبروك... عميل راح.
3-المصداقية: قولت للعميل هيوصلك بنطلون جبردين بيج مقاس لارج تلبيس من كذا لكذا, يبقي دا اللى هيوصله,
العميل قالك شوفت صورة التيشيرت وعاوز نفس اللون هو هو, يبقي اللى تبعته يكون نفس الحاجة او ماتبعتش, ماتعاملش العميل انه زبون طيارى في موقف ميكروباص محافظات.
4-الهيبة والشكل والهالة:لازم تعمل لنفسك هيبة, لما العميل يدخل صفحتك يحس انه دخل صفحة لمكان كبير,
"قصدك ازعق يعنى؟"
طبعا لا, لكن لما تكتب بوست, التزم باسلوب معين في الكتابة ماتحيدش عنه
هتعرض منتج؟
يبقي فيه اسطمبة بتعرض بيها كل المنتجات
مثال:
شغال على ملابس رجالى:-
هتقسم البوستات
1-اعلان عن منتج
2-بوست عادى مفيهوش منتجات
3-تهنئة ومناسبات
الإعلان عن المنتجات دا هيكون فيه:
بناطيل, قمصان, اكسسوار, ملابس داخلية, وهكذا..
يبقي كل بوستات المنتجات تكون لها استايل معين في الكتابة
أ-جملة او اتنين عن المنتج
ب-الخامة والمقاسات والألوان المتاحة
جـ-طريقة التواصل
د-السعر لو حابب
المهم ان يكون ترتيبك واحد في كل البوستات اللى من نفس النوعية
الحاجة التانية: الصورة ثم الصورة ثم الصورة
العين بتشترى, فمتحرمش عميلك من انه يشوف المنتج اللى هيشتريه, معلش يعنى احنا مش بنشترى سمك في مية, احنا عاوزين سمك مشوي متفصص بالسلطات ناكله علطول
الحاجة التالتة: الألوان
كل نوع بوست لازم يبقي له لون معين
هتعمل بوست تعرض منتجات :ازرق مثلا
بوست عادى: وردى او اصفر او اى لون يعجبك
بوست تهنئة: كحلى او ابيض
الديزين اللى مع البوست بتاعك لازم يكون هو نفسه معمول بنظام
الصورة هتكون لها مكان
اللوجو والأسم لهم مكان او اتنين بتبدل فيهم
الكلام له مكان وله فونت معين وهكذا
كدة انت صفحتك بقى لها شكل معين, مش بتغيره مافيهاش عك, العميل يدخلها يحس انه دخل مكان بيتعامل باحترافية, مش رمي بوستات يمين وشمال وخلاص.
كدة انت هتكون قدرت تكسب نقطة مهمة جدا في نقاط البيع بالعمولة الناجح. وكسبت عميلك وبقي دايما في جيبك عشان لما يحب يشترى حاجة انت و غيرك بتسوقولها, هتلاقي مسج تبسطك فيها
"انا اشتريت منكم كذا وكان حلو وعاوز/عاوزة اعمل اوردر بكذا.."
