10/09/2025
الخلاف ف الرأى
ليه فجأه بنتحول لهمج بمجرد مابنختلف فأى موضوع أياً كان أهميةالموضوع أوالهدف منه لدرجة ان فى ناس بتخسر بعض وبيوت بتخرب وعائلات بتتفرق ( سيبك من المقدمه دى )
رأيك فأى موضوع لازم تحط احتمال ولو واحد ف الميه انه يكون غلط انت مش نبى ولا بينزلك وحى ومصدر تكوين رأيك مش بالضروره يكون صحيح الا فى الامور الدينيه والاستثناء ده مشروط بانك تكون دارس كتاب وسنه ومؤهل علمياً وعقلياً ونفسياً انك تشرح لغيرك أو تناقشه فى فهمك يعنى فهمك لآيه معينه مش بالضروره يكون صحيح وممكن نختلف فيه بعد كل المؤهلات دى .
الاختلاف من سنن الكون وربنا خلقنا مختلفين عشان نكمل بعض مش كل واحد يبقى شايف نفسه هو اللى صح والباقى لازم يمشى على نفس خطاه حتى ابنك او بنتك مش مطلوب انك تبقى متفق معاهم فكل حاجه ولا تطالبهم يكونوا زيك لان طلبك ده حاجه من اتنين اما انك كامل وده مستحيل والكمال ل الله وحده أو انك موهوم ابن موهومه وفاكر نفسك كامل وفى الحاله دى انت لاتصلح للنصيحه من الاساس .
