19/02/2025
دا مش بوست 🚫 دا كراش كورس!
ومع ذلك مش هتقراه! عارف ليه؟ لأنك هتحس الموضوع طويل ويخض! بس لو قسمته شوية بشوية، صدقني هتوفر على نفسك فلوس كورسات كتير، كلهم بيأكدوا على اللي هشرحه ليك دلوقتي! بس أنت ذاكر 🤷♀️
فكر معايا بصوت عالي
أنت بتعمل variations مختلفة في الـ angles والـ copywriting والـ creative عشان تشغل عليها paid campaigns في مراحل الـ funnel المختلفة، وبالتالي تحدد الـ winner معاك وتـ scale عليه! منطقي صح؟
معنى كدا إنك بتبني داتا بـ "اختبار أساليب مختلفة" صح؟ طيب أبنيها إزاي؟ "نص الكورس" دا دلوقتي عن (كل) الـ Copywriting Formulas اللي ممكن تقابلها في شغلك
كل المسوّقين عارفين فورمولا AIDA المشهورة (اللي هي Attention, Interest, Desire, Action). ودي زي السلم الموسيقي لأي حد بيتعلم جيتار، حاجة أساسية لازم تعرفها!
بس الحقيقة AIDA مش الوحيدة، فيه كذا فورمولا أو معادلة تانية، وكل واحدة بتفرق حسب المنتج، الخدمة، أو الهدف اللي عايز توصله. بعض الفورملات دي قديمة جدًا، ومستخبية في كتب ماركتنج من أيام الزمن الجميل، لكنها أثبتت نفسها في اختبارات الوقت والتجربة.
لو جرّبت تمرر منتجك أو خدمتك على الفورملات دي، هتتفاجئ إن واحدة أو اتنين منهم هتبقى PERFECT MATCH للهدف اللي عايز تحققه!
بس عارف فيلم كدا رضا؟ الـ ٣ نفس الشكل بس كل واحد له ستايل مختلف؟ هو دا اللي هتحسه دلوقتي من كل الفورميلا اللي هنتكلم عنها بالتفصيل (ممكن تلاقي بعضهم متشابهين، بس لازم أقولهم كلهم عشان متتخضش لو شوفت الفورميلا أثناء شغلك في أماكن أو مع أشخاص مختلفة)
يلا نشرحهم بالتفصيل سوا (خد نفس، سمي الله، وأفصل بين كل ٣ معادلات أو ٣ فورملا عشان متتوهش) 👇
#1 المعادلة الأبسط والأكتر استخدامًا على الإطلاق:
- إيه اللي عندي ليك؟
عندي ليك منتج أو خدمة هتساعدك تحل مشاكلك وتحقق أهدافك بكل سهولة.
- ده هيعمل إيه ليك؟
هيحسن حياتك، يخلّي شغلك أسرع وأفضل، ويقدم لك حلول عملية من أول ما تستخدمه.
- أنا مين؟
أنا [اسمك أو اسم الشركة]، موجودين علشان نقدم لك أفضل الحلول، ودي مش مجرد وعود، ده اللي بنقدمه فعلاً.
- إنت محتاج تعمل إيه دلوقتي؟
كل اللي عليك تعمله دلوقتي هو [Call to Action - زي: اضغط هنا، سجّل دلوقتي، اطلب الآن]. مش هتندم!
ـــــ
#2 SSS: النجم - القصة - الحل
- النجم: الشخصية الرئيسية، سواء إنت، عميل، أو حتى المنتج نفسه!
- القصة: بتحكي إزاي "النجم" كان عنده نفس المشكلة اللي السوق المستهدف بيعاني منها دلوقتي.
- الحل: بتوضح إزاي المنتج أو الخدمة حلّت المشكلة دي.
ـــــ
#3 PAS: المشكلة - التضخيم - الحل (المفضلة عند الكل تقريبا)
- المشكلة: ابدأ بتوضيح المشكلة اللي بيعاني منها العميل.
- التضخيم: زوّد التأثير العاطفي للمشكلة وخلي القارئ يحس بيها أكتر.
- الحل: عرفه إزاي منتجك أو خدمتك هي الحل الأفضل له.
ـــــ
#4 الطريقة دي محتاجة تركيز Bob Serling's Power (وغالبًا هتستخدمها في الـ LP أكتر)
✅ الجودة أولًا وأخيرًا. منتجك لازم يكون يستحق كل كلمة هتكتبها عنه.
✅ حدد عميلك المثالي بوضوح. مش كل الناس زبونك، استهدف الصح.
✅ الشفافية والمصداقية هما سر أعلى الأرباح. العميل اللي يثق فيك هيشتري ويكرر.
✅ العرض القوي هو اللي بيبيع. بدون عرض مغري، حتى أحسن منتج ممكن يعدي مرور الكرام.
🖊️ خطوات الكتابة:
- ابحث بعمق قبل ما تكتب حرف. افهم المنتج، العميل، والسوق كويس جدًا.
- سيب الأفكار تتخمر. متستعجلش، التفكير الهادئ بيجيب أحسن الأفكار.
- اكتب كل الخصائص والمميزات. متسبش حاجة، كل تفصيلة تفرق.
- وضح الفوائد الحقيقية. العميل مش مهتم بالمنتج، مهتم إزاي هيفيده.
- قدّم عرض لا يُقاوم. حاجة تخلي العميل يحس إنه لازم يشتري دلوقتي.
- اعمل ضمان قوي. كسر التردد بإنك تشيل الخوف من دماغ العميل.
- عنوان يخطف الانتباه فورًا. لو العنوان ضعيف، محدش هيكمل باقي الإعلان.
- استخدم الألوان بحكمة. ركّز على اللي يبرز العرض، مش اللي يشوّش.
- قلّل الجرافيكس بقدر الإمكان. البساطة تبيع، الزحمة تشتت.
- ابدأ بمقدمة تحقق الوعد في العنوان. أول سطر يحدد إذا كان العميل هيكمل ولا لأ.
- اهدم أي اعتراض قبل ما يتقال. فكر زي العميل، ورد على تساؤلاته قبل ما يسألها.
- استخدم عناوين فرعية جذابة. حافظ على تركيز القارئ للنهاية.
- حسّس العميل بألمه. لازم يحس إن المشكلة حقيقية ومحتاج حل فوري.
- وريه الحل المثالي. منتجك هو الإجابة اللي بيدور عليها.
- اثبت إنك جدير بالثقة. سمعتك هي اللي هتبيع.
- قدّم دليل قوي. تجارب، أرقام، شهادات… أي حاجة تأكد إنك قد كلمتك.
- استخدم قوائم نقاط. القراءة السهلة تعني قرارات أسرع.
- ارجع تاني للعرض ومزاياه. فكر العميل دايمًا في المكسب اللي هيحققه.
- حدد السعر بوضوح. مفيش لف ودوران، العميل يحب الوضوح.
- قدّم دعوة واضحة لاتخاذ الإجراء (الـ CTA للناس اللي مش واخدة عليها بالعربي) 😂 (اشترِ الآن – احجز مكانك – تواصل معنا)
- زود ضمان إضافي لكسر أي تردد. خلي العميل يحس إنه في أمان تام.
- سهّل عملية الطلب. كل ما كانت الخطوات أسهل، كل ما زادت المبيعات.
- متستخدمش روابط تخرج العميل من صفحتك. متشتتوش، خليه يركّز على الشراء.
- راجع، وبعدين راجع تاني! التفاصيل الصغيرة هي اللي بتصنع الفرق.
ـــــ
#5 معادلة AICPBSAWN – المعادلة الذهبية لجذب الانتباه
⚫ A - Attention: أكبر ميزة أو أكبر مشكلة ممكن تحلها.
⚫ I - Interest: ليه العميل المفترض يهتم بكلامك؟
⚫ C - Credibility: ليه لازم يصدقك؟
⚫ P - Prove: ازاي تثبت كلامك؟
⚫ B - Benefits: كل المزايا بشكل واضح.
⚫ S - Scarcity: خلّي فيه إحساس بندرة المنتج أو العرض.
⚫ A - Action: قله يعمل إيه بالظبط.
⚫ W - Warn: إيه اللي هيحصل لو ما أخدش أكشن دلوقتي؟
⚫ N - Now: حفّزه إنه يتصرف فورًا وياخد أكشن حالًا بالًا فالًا!
ـــــ
#6 – معادلة Gary Halbert في الكتابة الإعلانية
- اجذب الانتباه:
ابدأ بكلام قوي يشد العين والأذن. سواء كان تصريح جريء، سؤال محفّز، أو حتى جملة غير متوقعة!
- ليه يهتموا؟
وضّح للناس ليه اللي بتقوله يخصهم. زوّدها بمعلومة مهمة، نقطة ألم عندهم، أو فائدة هيحصلوا عليها.
- ليه يصدقوك؟
الناس مش هتثق في أي كلام بسهولة، فلازم توضح سبب منطقي يخليهم يثقوا فيك.
- أثبت كلامك:
استخدم شهادات عملاء، دراسات، أو أرقام وإحصائيات بتأكد كلامك.
- عدّد الفوائد:
خليها واضحة ومباشرة. وضح لهم إيه اللي هيكسبوه بالتفصيل وبطريقة جذابة.
- ازاي يطلبوا؟
متخليش الموضوع معقد! وضّح لهم الخطوة الجاية بمنتهى السهولة.
- اطلب منهم الطلب فورًا!
حسّسهم بالاستعجال أو الندرة (عرض محدود – عدد قليل – فرصة متاحة لمدة x ساعة).
ـــــ
#7 – معادلة ACCA
- Awareness – الوعي:
ابدأ بتحديد المشكلة أو الحاجة اللي عند الجمهور المستهدف، خلّيهم يحسوا إنك فاهمهم.
- Comprehension – الفهم:
اتكلم بوضوح، ماتستخدمش كلام معقد. الفكرة لازم تكون مفهومة من أول قراءة.
- Conviction – الإقناع:
مش بس تخلق رغبة، لازم تخلي العميل متأكد 100٪ إنه محتاج منتجك. ممكن تستخدم أدلة قوية زي قصص نجاح أو أرقام موثوقة.
- Action – الفعل:
اطلب منهم ياخدوا خطوة دلوقتي! وضّح لهم إزاي يتصرفوا عشان يستفيدوا.
⚡ الفرق عن AIDA؟
🔹 "Comprehension" بتركّز على الفهم مش مجرد الاهتمام.
🔹 "Conviction" أقوى من "Desire"، لأنها بتخلق يقين عند العميل مش بس رغبة.
ـــــ
#8 – معادلة Robert Collier
- Attention – انتباه
- Interest – اهتمام
- Description – وصف
- Persuasion – إقناع
- Proof – إثبات
- Close – الإغلاق
🎯 إزاي نستخدمها؟
1️⃣ اجذب الانتباه بعنوان قوي.
2️⃣ استغل أول سطر لزيادة الفضول.
3️⃣ وصّف المنتج أو الخدمة بوضوح.
4️⃣ استخدم لغة تقنع القارئ إنه الحل الأفضل ليه.
5️⃣ ادعّم كلامك بشهادات أو أرقام.
6️⃣ قفل العرض بـ CTA قصير وواضح.
ـــــ
#9 – معادلة Earle A. Buckley
- Interest – اهتمام
- Desire – رغبة
- Conviction – إقناع قوي
- Action – اتخاذ القرار
✅ نفس فكرة AIDA، بس الفرق هنا إن التركيز الأساسي على "الإقناع" عشان العميل يكون متأكد إنه بياخد القرار الصح، مش مجرد إنه عايز المنتج وخلاص.
ـــــ
#10 – معادلة AAPPA
- A – Attention – الانتباه:
ابدأ بجملة ملفتة، زي "تعرف إن ٤ من كل ٥ أطفال ممكن يحصلهم كذا بسبب كذا؟"
- A – Advantage – الفائدة:
وضح إزاي منتجك أو خدمتك هي الحل المثالي لمشكلتهم.
- P – Proof – الإثبات:
ادّعم كلامك بتجربة عميل، رأي خبير، أو دراسة موثوقة.
- P – Persuasion – الإقناع:
زود كلامك بعناصر تخلي القرار واضح وسهل زي ضمان الاسترجاع أو التجربة المجانية.
- A – Action – الطلب الفوري:
وضّح للعميل الخطوة الجاية اللي لازم يعملها عشان يحصل على المنتج.
ـــــ
#11 – معادلة AIU
(Attention – Interest – Urgency)
- Attention – شدّ الانتباه
لازم أول حاجة تسرق عين القارئ، سواء كان إعلان، عنوان مشوّق، صورة غريبة، أو حتى ورقة فاضية بتخليه يسأل "إيه دا؟". الفكرة هنا إنك تجذبه يكمل.
- Interest – خليه يهتم
خلاص شدّينا انتباهه، نيجي بقى للخطوة اللي تخليه يكمل. لازم تحفزه بمعلومة مشوّقة، سؤال، أو حاجة تخليه يفكر "أنا محتاج أعرف أكتر!".
- Urgency – الاستعجال
مش عاوز القارئ يسيب الموضوع ويفكر بعدين؟ يبقى لازم تضيف عنصر الإلحاح، زي "لفترة محدودة"، "العرض ده مش هيتكرر"، أو "الفرصة الأخيرة!".
ـــــ
#12 – معادلة PPPP
(Picture – Promise – Prove – Push)
- Picture – صوّر لهم المشهد
ابدأ بحاجة تخلّي القارئ يتخيّل نفسه في الموقف، حسّسه إنه جوه الحدث.
- Promise – وعدك ليهم
قولهم إيه الحاجة اللي هتغير حياتهم، تريحهم، أو تحل مشكلتهم؟ لازم يكون وعد واضح ومحدد.
- Prove – إثبات الكلام
ماحدش بيصدق كلام بس! قدم دليل، تجربة حقيقية، رأي عميل سابق، أو أي حاجة تأكد إنك مش بتبيع كلام.
- Push – "من الآخر، قوله ينجز"
دلوقتي لازم تطلب منهم ياخدوا خطوة، سواء يشتروا، يسجّلوا، أو حتى يبعتولك رسالة. ما تسيبش القرار ليهم، وجّههم.
ـــــ
#13 – معادلة Star-Chain-Hook
- Star – النجم
ابدأ بشخصية أو عنصر رئيسي يكون بطل القصة – ممكن يكون العميل، المنتج، أو حتى انت شخصيًا.
- Chain – الربط
احكي القصة بطريقة مترابطة، بين المشكلة، الحل، والتجربة، بحيث كل معلومة تكمّل اللي قبلها.
- Hook – الخطاف 🎣
هنا بتختم بحاجة تجبر القارئ إنه ياخد خطوة، سواء عرض مغري، تحفيز نفسي، أو حتى تساؤل يخلّيه مايرضاش يفوّت الفرصة.
ـــــ
#14 – معادلة ABC Checklist
- Attain Attention – شدّ الانتباه
- Bang out Benefits – اشرح الفوائد بطريقة مباشرة
- Create verbal pictures – استخدم تخيّل بصري يشدّ القارئ
- Describe success incidents – احكي قصص نجاح سابقة
- Endorse with testimonials – اعرض آراء العملاء السابقين
- Feature special details – وضّح التفاصيل اللي تميّز العرض
- Gild with values – أربط العرض بقيم قوية ومؤثرة
- Honor claims with guarantees – قدم ضمانات عشان الناس تطمّن
- Inject action in reader – حفّز القارئ ياخد خطوة
- Jell with postscript – انهي بملحوظة قوية تبقى في دماغه
ـــــ
#15 – معادلة String of Pearls
الفكرة هنا إنك بتعرض مجموعة نقاط أو معلومات بشكل متتالي، وكل نقطة تكون قوية في حد ذاتها. لكن لما تتجمع مع بعضها، بيكون التأثير أقوى بكتير.
ـــ
#16 – معادلة Cluster of Diamonds
شبيهة باللي قبلها، بس الفرق إنك بتجمّع المعلومات تحت عنوان رئيسي، زي:
"5 أسباب تخليك تجرّب XYZ النهارده"
وبعدها بتعرض الأسباب واحدة ورا التانية، كل واحدة قوية لوحدها، بس كلها مع بعض بتعمل تأثير مضاعف.
ـــــ
#17 – معادلة The Fan Dancer (مش هنوضحها أوي، هي واضحة 😂)
الهدف هنا هو الإغراء بالمعلومات بدون كشف كل حاجة. يعني تقدم حاجة بسيطة تخلي القارئ عاوز يعرف أكتر. كل ما كنت غامض ومحفّز، كل ما زاد الفضول والاهتمام.
ـــــ
#18 – معادلة الخمس أسئلة (The Five-Point Copywriting Formula)
جاك لايسي اخترع معادلة عبقرية لأي إعلان بيبيع بجد، ودي ببساطة ٥ أسئلة ذهبية، لو جاوبت عليهم صح، هتكتب إعلان يخلي العميل يقفل معاك بدون تردد:
1️⃣ إنت هتقدملّي إيه لو سمعتك؟
لازم تجذبني من أول كلمة وتقولي إيه الحاجة العظيمة اللي هتغير حياتي لو ركزت معاك.
2️⃣ هتعمل كده إزاي؟
مش كفاية وعود، عاوز أعرف إزاي منتجك أو خدمتك هتحقق الفايدة دي.
3️⃣ مين المسؤول عن الوعود دي؟
أنا مش هثق في أي حد! طمّنّي، مين ورا الكلام ده؟ خبرة، شهادات، تقييمات؟
4️⃣ مين جربه قبل كده؟
الناس بتثق في تجارب غيرها أكتر من أي كلام، فأعرض قصص نجاح أو تقييمات حقيقية.
5️⃣ هتكلفني كام؟
الجزء اللي محدش بيحبه، لكن لو عرضت السعر بطريقة توضح القيمة الضخمة اللي العميل هياخدها، هتلاقيه بيقولك: "خد فلوسي"!
ـــــ
#19 – معادلة التسع خطوات (The Nine-Point Formula)
الماركتير Frank Egner يمكن مأضفش كتير في المعادلة دي، بس دي من وجهة نظره طريقة مقنعة تسهل عليك كتابة إعلان مقنع من الألف للياء:
1️⃣ ابدأ بعنوان يشد الانتباه ويثير الفضول.
2️⃣ استخدم افتتاحية تخلي القارئ حابب يكمل.
3️⃣ اشرح منتجك أو خدمتك بطريقة بسيطة وسهلة الفهم.
4️⃣ احكي قصة نجاح حقيقية عن شخص استفاد من المنتج.
5️⃣ ضيف تقييمات وآراء حقيقية لبناء الثقة.
6️⃣ وضّح المميزات اللي تخلي منتجك فريد من نوعه.
7️⃣ بيّن القيمة الحقيقية اللي العميل هيحصل عليها.
8️⃣ استخدم لغة تحفّز القارئ يتصرف بسرعة.
9️⃣ اختم بملاحظة (P.S.) تلخّص الفوائد وتأكد على العرض.
ـــــ
#20 – معادلة السبع خطوات لبوب ستون (Bob Stone’s Seven-Step Copywriting Formula)
1️⃣ ابدأ بوعد قوي يخلّي القارئ يكمل معاك.
2️⃣ وسع الوعد ووضّح الفوائد بشكل جذاب.
3️⃣ قول للعميل بالظبط إيه اللي هيوصل له بعد الشراء.
4️⃣ ادعم كلامك بأدلة قوية: تجارب، تقييمات، شهادات.
5️⃣ خلّيه يحس إنه هيخسر حاجة مهمة لو مأخدش خطوة دلوقتي (إزاي هيكون الوضع لو ما عملوش كده؟)
6️⃣ كرّر أهم الفوائد في النهاية عشان تأكد على القرار.
7️⃣ حفّزه ياخد خطوة دلوقتي من خلال CTA واضحة ومباشرة.
ـــــ
#21 – معادلة DDPC
✅ D – Dramatic (الدراما)
ابدأ بإدخال القارئ في حالة شعورية قوية. خليه يحس بالوجع، التحدي، أو الفرصة الكبيرة اللي قدامه.
✅ D – Descriptive (الوصف الدقيق)
صوّر له المشهد بكلمات تخليه يحس بالتجربة كأنه عايشها. كل ما كنت دقيق أكتر، كل ما كان وقع الإعلان أقوى.
✅ P – Persuasive (الإقناع)
استخدم حجج منطقية، أدلة، تجارب سابقة، وإحصائيات علشان تخليه واثق في كلامك تمامًا.
✅ C – Clinching (الحسم النهائي)
اختم الإعلان بجملة قوية تجبر القارئ على التصرف فورًا. متسيبش مجال للتردد، عاوزه يحس إنه لو مأخدش خطوة دلوقتي، هيخسر حاجة مهمة.
ـــــ
#22 ‘A Forest’ – الحيلة الذكية لكتابة محتوى جذاب وسلس!
رغم إن دي مش معادلة تسويقية بالمعنى التقليدي، لكنها دليل سهل وسريع تقدر تفتكره دايمًا علشان تخلي المحتوى بتاعك أقوى وأكتر إقناعًا!
✅ A – Alliteration (السجع والإيقاع والجناس التام والجناس الناقس -معلش رجعتك لأيام درس العربي ثانوية عامة 😂)
استخدام كلمات متشابهة في النغمة أو الحروف علشان تخلي الجملة موسيقية وسهلة التذكر.
✅ F – Facts (الحقائق)
الحقائق دايمًا بتضيف مصداقية للكلام وتجذب الناس أكتر، لأنهم بيميلوا للحاجات اللي عندها إثباتات.
✅ O – Opinions (الآراء)
استخدام آراء قوية ومؤثرة بيخلّي القارئ يشعر بالثقة فيك، خاصة لو من خبير أو شخص له تجربة سابقة مع المنتج.
✅ R – Repetition / Rhetorical Questions (التكرار والأسئلة البلاغية)
التكرار بيأكد الفكرة وبيخليها تثبت في دماغ العميل، والأسئلة البلاغية بتفتح تفكيره وتخليه يندمج مع المحتوى.
✅ E – Examples / Experts (الأمثلة والخبراء)
الأمثلة بتقرب الفكرة للعميل، وكلام الخبراء بيدي ثقل ومصداقية للإعلان.
✅ S – Statistics (الإحصائيات)
الأرقام دايمًا بتقنع أكتر، لأنها حقيقة ملموسة وصعب الجدال معاها.
✅ T – Rule of Three (قاعدة التلاتة)
لو عايز حاجة تثبت في دماغ الناس، كررها ٣ مرات! دي قاعدة نفسية فعالة جدًا في التسويق.
ـــــ
#23 SCAMPER – المعادلة العبقرية لتطوير أي محتوى أو فكرة!
المعادلة دي ابتكرها Alex Osbourne، وGary Bencivenga قال عنها:
"هتضاعف إنتاجيتك 11 مرة!" 😲
✅ S = SUBSTITUTE (استبدل)
غير عنصر قديم بعنصر جديد، مفاجئ، أو عصري أكتر علشان تجذب انتباه الجمهور.
✅ C = COMBINE (اجمع)
ادمج بين عناصر ناجحة من مصادر مختلفة لإنشاء محتوى أقوى وأكتر تأثيرًا.
✅ A = ADAPT (تكيف)
استفد من فكرة ناجحة في مجال تاني، واستخدمها بطريقتك الخاصة في مجالك.
✅ M = MODIFY, MINIFY OR MAGNIFY (عدل، صغّر، كبر)
جرب تغير في الحجم أو الشكل أو الأسلوب علشان توصل لفكرة أقوى.
✅ P = PUT to other uses (استخدمه بطريقة مختلفة)
فكر، مين ممكن يستخدم ده بطريقة غير تقليدية؟ وإزاي ممكن يتوظف في أكتر من مجال؟
✅ E = ELIMINATE (احذف)
احذف أي حاجة مش ضرورية أو بتقلل من قيمة المحتوى، علشان يبقى أوضح وأقوى.
✅ R = REARRANGE, REVERSE OR REDEFINE (أعد الترتيب، اعكس، أو أعد التعريف)
جرب تغير ترتيب الفكرة، أو حتى تقلبها 180 درجة، ممكن تكتشف زاوية تسويقية مبتكرة تمامًا!
ـــــ
#24 SLAP – هنا اعتمادك كله على visual مطرقع ويخض!
لو عندك منتج رخيص نسبيًا وبتدور على طريقة بسيطة وسريعة لكتابة رسالتك التسويقية، فـ SLAP ممكن يكون الحل السريع، خصوصًا لو بتستخدم صفحة مبيعات قصيرة! 💡
✅ S – Stop the prospect (اجذب انتباه العميل)
ابدأ بحاجة تلفت النظر وتوقف العميل عن الـ scrolling.
✅ L – Look (خليه يقرأ ويكمل! 👀)
العنوان الرئيسي أو الصورة الأولى لازم تشد القارئ وتخليه يكمل. (سوري يعني، بس يخليه يتنح أو يتصدم!)
✅ A – Act (خليه يتحرك)
قدم له سبب واضح ليه لازم يهتم ويكمل معاك؟
✅ P – Purchase (وصّله لقرار الشراء)
اطلب منه يتصرف فورًا واتأكد إن عملية الشراء واضحة وسهلة.
💡 ملاحظة: الفعل المطلوب هو الشراء، فـ "Act" و"Purchase" قريبين جدًا من بعض، بس الفكرة هنا إنك تدفع العميل خطوة بخطوة لغاية ما يتصرف وياخد القرار.
ـــــ
#25 HELLYEAH – دي جريئة شوية وعادة بتكون مع صفحات البيع الطويلة
المعادلة دي بتشتغل بشكل رائع مع صفحات البيع الطويلة اللي بتحتاج إقناع قوي وساعات بيحتاج أسلوب هجومي.
✅ H – Holler (لفت الانتباه بقوة! 🔥)
ابدأ بحاجة صادمة أو ملفتة تجذب القارئ من أول ثانية.
✅ E – Empathize (شاركهم الألم والمشكلة 🤕)
وضح إنك فاهم معاناتهم، ويمكن حتى شاركت نفس التجربة قبل كده.
✅ L – Lambast (هاجم المشكلة وأسبابها)
اتكلم عن المسببات اللي خلّت المشكلة دي موجودة، ولمّح إن الحل عندك!
✅ L – Legwork (إثبات المصداقية)
أثبت إنك مش بتتكلم في الهوا وإن عندك خبرة فعلية في الموضوع.
✅ Y – Yes (أنا عندي الحل! 🙌)
عرفهم إن عندك الحل الجاهز اللي هيغير حياتهم.
✅ E – Educate (وضح ليه الحل بتاعك هو الأفضل 🎓)
اشرح لهم ليه منتجك أو خدمتك هي الحل الأنسب؟
✅ A – Action (قدم "فعل" واضح "يعملوه حالًا")
حدد الـ CTA اللي عايزهم يعملوه بوضوح وبدون تعقيد.
✅ H – Handle objections (اقضي على أي تردد أو شكوك 🤨)
اعرض ضمانات، إثباتات، وشهادات عملاء علشان تكسر أي اعتراض.
🔴 الستايل ده قوي جدًا وبيعتمد على العاطفة والضغط، فلو المنتج بتاعك بيحتاج صفحة مبيعات قوية، جرب HELLYEAH!
ـــــ
#26 PASTOR – المعادلة العاطفية للإقناع وهي أصلا PAS لكن متنكرة 😂
Ray Edwards ابتكر معادلة PASTOR علشان التركيز على القصة والإقناع العاطفي أكتر من الهجوم المباشر. 😌
✅ P – Person, Problem, Pain (الشخص، المشكلة، الألم)
ابدأ بتحديد المشكلة اللي بتواجه العميل، وحسسّه إنك فاهم معاناته بالضبط.
✅ A – Amplify (ضخّم المشكلة وعواقبها 😱)
وضح قد إيه المشكلة دي ممكن تخليه يخسر أو يفضل يعاني لو ما حلهاش.
✅ S – Story, Solution, System (القصة، الحل، النظام)
شارك قصة توضح إزاي الحل بتاعك اشتغل لشخص تاني، وازاي هو نظام فعال.
✅ T – Testimonials (إثبات اجتماعي)
اعرض آراء عملاء سابقين يثبتوا إن الحل بتاعك فعّال ومجرب.
✅ O – Offer (العرض، مع التركيز على التحوّل 🤩)
اقضي 80% من وقتك في شرح التحوّل اللي هيحصل للعميل بعد استخدام منتجك.
✅ R – Response (الدعوة للتصرف 📢)
قدم CTA واضح جدًا يدفع العميل للتحرك فورًا.
💡 PASTOR مناسب لو عايز تبيع بطريقة أكتر إنسانية، وتركز على التأثير النفسي بدل الضغط المباشر على العميل.
ـــــ
وبمناسبة الضغط، كفاية كدا النهاردة 😂
أنا عارفة إن أنا طولت شويتين! في الحقيقة دا "نص الكورس" اللي كنت محضراه ليك النهاردة
أتمنى مكنش تقلت عليك ❤️ وممكن نتناقش في الورك شوب بعد العيد عن كل فورميولا بأمثلة كتير لحد ما تثبت في دماغك وتكون قادر تنفذها بسهولة زي شرب الماية كدا
ركز واستعد ❤️ وشكرا جدًا لو وصلت لـ هنا، وادعيلي دعوة حلوة لحد ما نتقابل في "نص الكورس التاني" 🙏 أو ابعتلي مثلا على InstaPay 😂
