23/12/2020
كوبي رايتر، كوبي رايتر...
كل شوية نشوف حد طالب كوبي رايتر مبدع ودماغه شغالة، طب ياترى مين هو (الـ Copywriter) ؟!
الكوبي رايتر بإختصار شديد هو الشخص اللي بيبيع كلام عشان يسوق لمنتج أو خدمة معينة.
يعني بإختصار تاني، الـ Copywriting هو حرفة إستخدام الكتابة بهدف إنك تقنع جمهور معين بشراء سلعة أو خدمة، او القيام بفعل معين عموما.
والكوبي رايتر هو اللي بيعمل الموضوع ده🤝
مهنة الكوبي رايتر من أقدم المهن في مجال التسويق، ولو شوفنا الإعلانات المكتوبة بتاعت زمان هنلاحظ إن ديما بيكون في رسالة تسويقية بيتم توجيهها لجمهور مستهلك معين.
وديما بتكون الرسالة دي واضحة وقصيرة وبتحث متلقى الإعلان على القيام بفعل معين، واللي عادةً بيكون هدفه البيع.
الكوبي رايتر بيبدأ الكوبي بتاعته بعنوان جذاب تخليك تقرأها، وجواها يبدأ يشرحلك مميزات المنتج أو الخدمة بشكل مُبسط وقصير.
وفي الأخر بيستخدم Call To Action (CTA) واللي بيكون عبارة عن أمر غير مباشر بيوجهه بطريقة جذابة تخليه يحس بضرورة شراء المنتج أو الخدمة.
من مميزات الكوبي رايتر الناجح إنه يقدر يلمس Need أو إحتياج عند الجمهور اللي بيقدمله الإعلان، ويبدأ يشتغل عليها.
فاكرين إعلان فودافون السنة اللي فاتت بتاع بيبي شارك!؟
كان في طفل مشغل الأغنية على اليوتيوب طول الوقت في البيت والأسانسير والعربية، وده معناه إنه بيستهلك ميجات كتير من باقة الأم.
هو هنا لعب على مشكلة حقيقية بتواجه الأم، وهي نفاذ الباقة بسرعة.. وعلطول قام مقدملها الحل واللي هو عروض على باقات النت.
بالنسبة للـ Target Audience بتوعه واللي هما الأمهات، بيقتنعوا إن دي فعلا مشكلة ولازملها حل، فبيبدأوا يسألوا عن العروض ويشتركوا فيها، وكدة هو قدر يوصل رسالته التسويقية بنجاح🤝
وبكدة نكون عرفنا مين هو الكوبي رايتر وبيعمل ايه، ونكون عرفنا بردو إن الهدف الرئيسي من الكوبي رايتنج هو البيع أو الربح بشكل مباشر، عن طريق كوبي مختصرة ومقنعة، ومطرقعة😌
منشن لصاحبك الكوبي رايتر وسيبوا في الكومنتات أكتر كوبي مطرقعة كتبتوها🤝
ولو انت عندك بزنس وعايز كوبي رايتر شاطر يكتبلك إعلاناتك.. تقدر تكلمنا على الرقم ده⬅️ 01144566638
