04/06/2023
في الأول خلينا نتكلم عن مصطلح media buying او وظيفة media buyer بقى بيتردد كتير اخر فترة وناس كتير داخل المجال وخارج المجال لسه مش عارفين وظيفته بشكل واضح
خليني الأول اقولك ان الميديا باير علمياً والترجمة الحرفية ليه هو المسئول عن شراء المساحات الإعلانية المناسبة للجمهور المستهدف والسلعة او الخدمة المعلن عنها , هتقولي بيعمل اعلانت مبولة يعني ياهندسة !؟ هقولك ياريتها كانت بركت عليك 😂 , خليني اقولك في الاول انك علشان تنفذ اعلان ممول مش محتاج تكون عبقرينو ولا كلاوي الجينيص بتاع الشٌقة لانك ببساطة هتدخل على الصفحة تدوس على ترويج وتمشي ورا الخطوات وبس كده 🤷♂️ , يبقى احنا متفقين ان الميديا باير مش مجرد بيعمل اعلان مدفوع اي حد يقدر يعمله ومكانش بقى في كورسات متخصصة وورش عمل ووظائف للمسمى ده
طيب ياعم محمد ايه هي الوظيفة السرية دي ؟ تعالى احكيلك باختصار تفصيلي مش ممل 😁
عملياً بقى مهمة الراجل الغلبان ده هو انه يوظفلك فلوسك صح , وعلشان الفلوس تتوظف صح فهو بيكون مسئول عن كاملة , من أول دراسة المنتج والتسعير والعميل والمنافس , لاختيار #المحتوى والمنصة المناسبين للمنتج والعميل المستهدف , تشغيل وتحسين أداء الإعلانات المدفوعة بناء على ماسبق من خطة تسويقية ليها اهداف وخطوات
يعني الراجل ده مسئول مع ال social media specialist عن تحديد اهداف البراند والخطة التسويقية , ومع ال graphic designer في اختيار محتوى مرئي مناسب سواء صورة او فيديو , وال content creator هيتكلم ازاي وعن ايه وبردو هيختار فيديو لايف ولا فيديو برومو ولا تصميمات ترويجية ولا إنفلونسر بلوجر ... الخ
تعالى بقى اشرحلك عملي بمثال (انا قررت اتاجر مثلا في ماكينات القهوة)
اولا محتاج احدد الموديل والبراند اللي هشتغل عليه وابدأ دراسة للمنتج بكل عيوبة ومميزاته ودراسة للمنافسين اللي عندهم نفس المنتج علشان ابدأ احط استراتيجية تسعير للمنتج واقدر احدد شكل العميل الي بدور عليه وسلوكة على المنصات المختلفة ومنها هحدد المنصة الي موجود عليها وبناء على المنصة هحدد المحتوى (محتوى فيسبوك غير انستجرام غير تيك توك غير تويتر ....)
طيب دلوقتي انا عملت تحليل للمنتج والمنافس والعميل وحددت المنصة الي هشتغل عليها وحددنا شكل المحتوى
كده نبأ بقى رحلتنا مع العميل 🛩 من أول لما يبدأ يتعرف عليك وعلى منتجاتك مرورا بمرحلة الثقة والمقارنة بينك وبين المنافسين لحد مرحلة قرار الشراء
1️⃣ هبدأ بالعتريف بالمنتج بتاعي وعرض المميزات للمنتج نفسه , ماكينة تحضير قهوة سريعة , وش القهوة مظبوط , بتكفي لعمل 4 أكواب مرة واحدة وبتوفر الكهرباء وشكلها شيك وجذاب (هجذب عملاء مهتمين بالمنتج) وهنا بدأت احوله من مرحلة شخص غريب لمرحلة انه اصبح
2️⃣ بعدها محتاج ازود ثقة العميل فيا ف هبدأ اقدم للعميل محتوى توعية له علاقه بالمنتج او استخداماته ازاي تنضف الماكينة بدون ضرر , ازاي تحضر حبوب البن الخاصة بيك (ملهاش علاقة بالمنتج اصلا) , طرق جديدة لتحضير القهوة بنكهات مختلفة (هتزود ثقة العميل فيك وهيبدأ يحس انك فعلا خبير ف المجال مش مجرد بياع) هنا العميل اتنقل من انه زائر لانه بقى عميل محتمل
3️⃣ هنا انا محتاج أحوله من عميل محتمل لعميل فعلي فهبدأ اوجه محتوى مبيعات زي عروض الاسعار واعلانات التحويل لويب سايت او اعلانات مراسلة على استراتيجيات الاسعار الي هتجذب العميل ( هيتنقل العميل هنا من مرحلة عميل محتمل ليصبح عميل فعلي )
4️⃣ هنا نوصل لاخر مرحلة وهي انه يتحول من customer لـ fan , يعني ميبقاش مجرد زبون اشترى منك لا يكون عنده ولاء ليك ودي ممكن نعملها بكذا طريقة (حسب استراتيجيات التسعير) ممكن ابعتله مع المنتج كيس بن مخصوص هدية أو منتج ذوصلة بالقهوة (مج حافظ حرارة مثلا) , أو حتى مكالمة ودية بعد الاستلام بيومين تسأل عن رأيه في المنتج والخدمة وتقدم خدمة ما بعد البيع
كده انت ضمنت ان العميل ده بقى ولاءه ليك وهينصح بشراء منتجاتك والتعامل معاك
طيب لحد هنا كويس أوي بس انا عايز ازود مبيعاتي وأقلل تكلفة الاعلانات هتعمل ايه يامديا باير ياجامد انت بقى ؟
هنا بقى ييجي وقت ال brain storming (العصف الذهني) بالبلدي ده وقت الفهلوة اللي هيفرق بينك وبين شخص تاني في نفس وظيفتك وهي دي بصمتك الي مش هتتشابه مع غيرك
على سبيل نفس المثال اللي فوق أنا دلوقتي ببيع ماكينة واحده في كل نقرة موقع او رسالة عايز اخليهم قطعتين ف البيعة الواحدة ..... 🤔
هنا هحتاج اصنع محتوى مختلف ومميز يخدم اهداف الخطة الجديدة وانا هختار اني اعمل فيديو بحوار كوميدي (تيك توك) بين اتنين اصحاب او اخوات بيعملوا قهوة ويدور بينهم موقف كوميدي زي ان القهوة بتفور , هيبدأ الفيديو يعمل تفاعل بين كل اتنين بيعملوا منشن لبعض (هنا انا عملت فلترة للمشاهدين وطلعت منهم الثنائيات المهتمين بالقهوة)
هعمل اعلان بيع مباشر ويتم توجيهه للمتفاعلين مع الفيديو ده وهعمل عرض التوصيل مجاني مع خصم رمزي او هدية رمزية لما تشتري اتنين ماكينة قهوة خلال الاسبوع ده فقط ... تخيلت معايا النتيجة ؟ بظبط كده هو ده المطلوب 😎 كل اتنين اتفاعلوا مع الفيديو هم غالبا مهتمين بتحضير القهوة مش مجرد واحد بيشربها ع في كافيه وخلاص وبالتالي العرض هيكون مناسبهم خصوصا مع كلمة (خصم) (فترة محدودة) (فرصة) كل ده بيزود فرصك في البيع لعدد قطع اكبر وتكلفة أقل .
تابعنا علشان تعرف أكتر عن المزيج التسويقي , رحلة العميل , التسويق بالمحتوى , استراتيجيات الاعلانات الناجحة
