13/08/2026
انا اسف والله في اللي هقوله ده بتأسف من قبلها وربنا اعلم انه مش تنظير ..
بس دول والد ووالدة طفلة بريئة من ضحايا حادث الاسماعيلية اسمها بسملة، بنت عندها ١٠ سنين في خامسة ابتدائي طالعة تجيب ١٠٠ جنية، الراجل ده اللي مخلف ٣ عيال، منهم عيل رضيع صوته طالع في الفيديو، بيحكي انه "مضطر" يطلع بنته واخوها يشتغلوا عشان هوا تعبان مش قادر يشتغل، طب تعبان عندك ايه؟ معرفش هوا بيقول لما بياكل عنده حرقان في بطنه وعضمه واجعه وانه راح للدكاترة قالوله معندكش حاجة وطردوه.
طب انا اسف للمرة التانية ..
حضرتك الله اعلم باللي فيك بس بدل ما تطلع بنتك الطفلة اللي بتقول كان نفسها تجيب بوظة فراحت "تسرح" يوم اجازتها في جبل ولا مزرعة، مش عارف تلقط رزقك؟ تقعد بفرشة تبيع اي حاجة؟ مناديل كيكة اي حاجة بالآجل؟ تتعلم صنعة طيب نجارة ولا حدادة ولا تلم كانزات حتى؟ تنزل تشتغل في قهوة؟ طب مراتك تنزل تشتغل؟ طب مش قادر تفتح بيت بتفتحه ليه؟ طب بنتك اللي لسة مخدتش عزاها وكانت بتصرف عليك مش تتأثر بوفاتها شوية؟
بعيدا عن الفقر وظروف الناس اللي ربنا اعلم بيها بس اللي انا شفته ده - بالنسبالي ـ ملوش غير مسمى واحد بس اكيد حضراتكم عرفتوه.
