https://www.facebook.com/106484535434560/

LeadUp Marketing, 30 شارع ليبيا/تقسيم 2/كفرالشيخ, Kafr el Sheikh (2026)

22/03/2023

رمضــ كريم ــــان

كل عام وأنتم بخير

27/12/2022

الاستثمار الزراعي من المجالات الشيقة 🤩

وكنا سعداء جدا بالمشاركة في حملة تسويق مشروع درة النخيل بالتعاون مع شركة المدائن للاستثمار ش.م.م

أنت كمان لو بتأسس مشروع .. كلمنا واحنا نساعدك في حملته التسويقة وبإذن الله نكون سبب في نجاحك ونجاحه 👌

22/12/2022

على مدار ١٠ سنين كانت بتواجه قطر موجة نقد شرسة منذ اختيارها لتنظيم كأس العالم ٢٠٢٢

الغالبية انقسموا .. ما بين مشكك في قدرتها على التنظيم ، وما بين من يتهمها بالرشاوي للحصول على حقوق تنظيم البطولة

ولكن قطر ( اتفقت او اختلفت معاها ) كانت محددة هدفها ومخططة للوصول ليه ومن الواضح أن الملف كان في إيد إدارة تسويقية عبقرية

زي أي مشروع ممكن تقرر تبدأه في حياتك .. قطر اشتغلوا على مشروعهم الأهم والأكثر تأثيرا وهو مشروع تنظيم كأس العالم

وعلى جانب التنظيم اشتغلوا على بناء مجد حتى وإن كان التاريخ لا ينصفهم

بدأوا بالتخطيط لتأسيس بنية تحتية كاملة تناسب تنظيم المونديال وقدروا يحققوا معادلة فريدة من نوعها باستغلال نقطة ناس كتير كانت بتعتبرها سلبية ولكنها استغلتها خير استغلال وهي صغر مساحة الدولة

لأول مرة في تاريخ كأس العالم ممكن المشجع يحضر كل الماتشات في نفس اليوم عادي جدا

تخيل تقدر تحضر ٤ ماتشات في نفس اليوم بين نهاية الماتش وبداية الماتش اللي بعده ساعة واحدة فقط .. بسهولة جدا تطلع من الاستاد تركب مترو في خلال ربع ساعة تكون عند الاستاد التاني ودي نقطة خلت العالم كله يشيد بها وبعظمة التنظيم بسببها

وبينما كانت قطر تأسس للبنية التحتية، كانت شغالة على ملف تلميع البراند بصورة احترافية

ازاي؟

- ركزوا على الترويج لشركة طيران قطر بكثافة في الدوريات الكبرى

- توسيع نفوذ منصتهم الإعلامية ( بي إن سبورت ) اللي قدرت تتواجد في معظم الدول بكل اللغات الممكنة وتستضيف كل نجوم المجال الرياضي

كل اللي فات ده كان عبارة عن بناء لبراند قوي قادم بقوة في السوق

البراند هنا هو (قطر) نفسها.. اللي من ١٠ سنين كانت عبارة عن دويلة صغيرة مش معروفة غير لجيرانها

النهاردة أصبحت دولة عملاقة ولها ثقل عالمي .. بسبب لعبة

الظاهر للجميع أنه بسبب لعبة.. لكن الباطن الحقيقي بسبب "قوة إدارة التسويق في المنظومة " اللي أجبرت الجميع على احترام قطر لأنها كانت دارسة كويس كل خطوة بتعملها

طبعا الموضوع فيه تفاصيل كتير كل تفصيلة قد تحتاج لمجموعة مقالات

لكن حبينا نشيد بالمنظومة التسويقية في قطر.. واللي بتوصلنا رسالة كلنا إن أي فكرة تحتاج لطموح وتخطيط وتمويل مناسب وبإدارتها تسويقيا صح تقدر توصل لهدفك وتجبر الجميع على احترامك

أنت كمان لو عايز تعمل مشروع ناجح لازم تخططله كويس وتكون محدد أهدافك .. وطبعا أهم حاجة هو التسويق 👌

29/07/2022

عام هجري سعيد
كل عام وأنتم بخير

08/07/2022

عيد أضحى مبارك
تقبل الله منا ومنكم صالح الأعمال

03/07/2022

ليه احنا افضل اختيار ليك لو حبيت تصمم لوجو؟

احنا محترفين ولينا خبرة في تصميم اللوجوهات ومعرفة الأنسب كواجهة بصرية لكل عميل وركز في الكلام اللي هنقوله دلوقتي..

مراحل تنفيذ اللوجو معانا بتبقى ازاي؟

بص يا سيدي..

انت بتقولنا في حاجة في دماغك عايزنا ننفذها.. ولا سايبلنا الخيار احنا اللي نشوف الانسب..
وفي كلا الحالتين.. بنعمل اسكتشات نعرضها عليك.. وطبعا لازم تكون شايف الاسكتشات دي مجرد شخبطة لعرض الفكرة فقط.. والفكرة اللي بنستقر عليها بتتنفذ بعد كده باحترافية..

طب انا كمصمم جرافيك برسم الاسكتشات دي بناء على ايه؟
اولا: بناء على فكرة المشروع او البراند..
ثانيا: بناء على دراسة.. ماهو انت لو جيت قلتلي مثلا عايز افترح مطعم مشويات غير مطعم تيك اواي غير مطعم خمس نجوم.. كل حالة من دول لازم بدخل على النت واشوف اللوجوهات العالمية والمحلية عاملة ازاي..
لان اللوجوهات دي بتمشي بعرف..

ازاي؟
هتبص على لوجوهات اندية كرة السلة مثلا.. هتلاقيها كلها ماشية بعرف واحد.. كلها بتسبح في نفس التيار الخاص بيها..

وتلاقي مثلا لوجوهات اندية كرة القدم ماشية بعرف تاني خالص وبتسبح في تيار تاني..
علشان كده نادي بيراميدز اول لوجو ليه كان مثير للسخرية من الجميع لانه ماكنش موافق عرف لوجوهات اندية كرة القدم وبيسبح بعيد عنهم تماما..
وبسبب كده نادي بيراميدز غير اللوجو بتاعه دلوقتي علشان يبقى ماشي معى نفس موجة تصميمات الاندية..

فانا ماينفعش اصمملك لوجو مالوش علاقة بالعرف المتبع في لوجوهات المجال بتاعك واشتغلك واقولك اصل انا مبدع وبعمل حاجة بره الصندوق.. المصمم اللي بيعمل كده بيبقى لا مؤاخذة ناقصه علم كتير وبيبرر ده بانه بيخرج عن المألوف.. وهو أصلا مايعرفش المألوف..

بعد ده كله بكون توصلت لفكرتين او تلاتة مثلا وبرسمهم وبعرضهم عليك.. وانت تختار..

واللي بتختاره بيتم تنفيذه باحترافية ومراعاة للنسب والتكوين ومرونة التصميم..

وتستلم اللوجو بتاعك جاهز لاستخدامه في اي مساحة وفي اي خامة..

وتنطلق بمشروعك.. اللي برضه هتحتاجنا في تسويقه علشان ينجح ويوصل للهدف اللي انت عايزه..

وهنبقى نتكلم عن ده في بوست تاني إن شاء الله..

28/06/2022

لما بتكون عندك فكرة مشروع وبتبدأ تنفيذها.. أول حاجة بتفكر فيها هي اللوجو..
طبعا لازم تكون أول حاجة تفكر فيها لإن من خلال اللوجو بتنطلق الهوية البصرية بتاعة المشروع..

اللوجو بيحدد اللون اللي هيكون مرادف لشغلك زي بالظبط ما فودافون بتستخدم اللون الأحمر وستاربكس بتستخدم اللون الأخضر وفيس بوك بيستخدم اللون الأزرق..
اللوجو بيحدد انت شغلك هيكون شعبي (زي مطاعم الفول والطعمية) أو كاجوال (زي محلات الملابس الرياضية) أو كلاس (زي براندات الملابس والأحذية عالية الجودة)
اللوجو بيحدد انت صارف على مشروعك ولا مقضيها.. ماهي بتظهر من اللوجو..

في ناس بتكبر دماغها وتحط اي لوجو ملطوش من على النت وده للأسف بيوصل رسالة مباشرة لأي حد بيتعامل مع مشروعه انه مايعرفش أساسيات البزنس
وفي ناس بتتفق مع مصمم غير محترف لعمل لوجو للأسف بيظهر في الأخر ضعيف وناقص كتير وبيوصل فكرة لأي حد أن البراند ده مش احترافي..
في حين في ناس بتعرف أهمية اللوجو وبتختار مصمم محترف ليه باع وخبرة بالمجال بيصمملهم لوجو خاص بيهم مالوش وجود على النت بحيث أن أي حد يشوف اللوجو يعرف ان ده بتاع البراند الفلاني..

طب هو اللوجو لازم يكون حاجة خرافية مالهاش مثيل؟

لا طبعا مش لازم.. ممكن يكون اللوجو قوته وسحره في بساطته.. بص على براندات عالمية كتير هتلاقي اللوجو بتاعهم بسيط جدا زي بوما وامازون واورنج مثلا..
مش لازم دايما اللوجو يكون معقد وفيه فكرة رهيبه علشان تضمن انه يكون واجهة كويسة للبراند بتاعك..

أهم حاجة في اللوجو انه يكون سهل التذكر.. حط تحت الكلمة دي مليون خط..
اللوجو مهما كان الشغل فيه.. اهم حاجة انه يكون سهل التذكر.. مش لازم يكون سهل التذكر بكل تفاصيله.. بس على الاقل اللي يشوف اللوجو يفتكره ويعرف ده بتاع ايه..
مفيش حد بيفضل يتملى في لوجو ويفسر رموزه.. لان انا لاحظت ان بقى في اتجاه دلوقتي في تصميم اللوجوهات انك تحط رمزيات كتير في اللوجو والعميل ينبسط ويقول على المصمم ذكي وفي النهاية الشخص العادي اللي بيشوف اللوجو مابيقعدش يفسر رموزه واسراره..
الانسان العادي بيشوف اللوجو بفكر مجرد وبينطبع في ذهنه كهيئة عامة بألوانه وبعد كده قوة البراند هي اللي بتثبت اللوجو في الذاكرة..

علشان كده شركة زي العربي توشيبا مثلا.. كانت متخذة شكل الطاووس لوجو ليها لحد فترة قريبة (اعتقد قليل اللي يتذكر كده اصلا او حتى ياخد باله) بعد كده تحولوا للوجو بسيط جدا اللي هو التايبو بتاعهم فقط.. كلمة توشيبا وكلمة العربي.. فقط..

طب بعد ده كله لو انت عايز تعمل لوجو تروح لمين؟

لينا طبعا 😁 ..

في الجزء التاني من البوست هقولك ليه احنا افضل اختيار ليك لو حبيت تصمم لوجو..

17/06/2022

ليه ممكن تحتاجنا في " ليد آب " كمسوق الكتروني ليك ؟؟

تخيل مثلا انت بتفتح مشروع جديد ..
سواء بتقدم خدمة ( زي عيادة , مطعم , شركة ,,, ) أو بتبيع منتج ( زي محل ملابس , سوبر ماركت , اكسسوارات ,,, )
في الحالة دي بتتفق معانا على خطة ربع سنوية (ثلاث شهور) أو نصف سنوية (ست شهور) أو سنوية (12 شهر)

بتقولنا عايز توصل لإيه في أي مرحلة من المراحل الثلاثة ..
- انك تكون موجود في السوق
- او تكون منافس قوي في مجالك
- او تكون رقم واحد في السوق

طب احنا نقدر نوصلك لكده؟ ايوه الحمد لله نقدر .. طالما حددت معانا الميزانية المناسبة لهدفك ..

* هما ثلاث عناصر يضمنوا نجاحك ومكانتك في السوق :
التسويق ، التصميمات ، الميزانية

( التسويق ، التصميمات ) بتوعنا احنا .. أما الميزانية بتاعتك أنت حسب طموحاتك في السوق

هنساعدك بإذن الله انك توصل للي عايزه .. لأن نجاحك نجاح لينا

طب ايه اللي بيميزنا في ليد آب ؟

احنا فريق بيكمل بعضه كويس في المجال الحمد لله
في التسويق , والتصميمات , والميديا , وحملات الأوت دور , والمتابعة معاك على مدار 24 ساعة..
ايوووووووه.. هتقدر تتواصل معانا طول اليوم مش في ساعات العمل فقط.. ودي نقطة مميزة جدا لينا..

وكمان الحمد لله عندنا خبرة محترمة بالسوق والواقع وعوامل نجاح وفشل أي مشروع وازاي نقدر نعمل حملات ناجحة

وبالفعل لينا سابقة أعمال في حملات ضخمة نجحت مع نواب برلمان وأعضاء مجالس نقابات وأعضاء مجالس أندية .. بجانب إدارتنا لأقسام تسويق ودعايا في شركات وإدارة صفحات دكاترة ومراكز طبية ومطاعم ومحلات في مجالات محتلفة..

كل اللي عليك .. خد القرار و تواصل معانا واحنا بإذن الله نساعدك توصل بمشروعك لطموحك

LeadUp Marketing

22/03/2023

27/12/2022

22/12/2022

29/07/2022

08/07/2022

03/07/2022

28/06/2022

17/06/2022

Address

Telephone

Website

Alerts

Contact The Business

Shortcuts

Share

Category