19/10/2022
تبيع ولا تسوق..؟!
سؤال ممكن الإجابة عنه تبان سهلة، لكن فرق كبير جدا بين الخيارين، سواء في التفكير، التنفيذ أو الأسلوب
ودا اللي هوضحهولك في السلسلة دي … ؟
في عصر ما قبل الـ Digital media كان مندوبين المبيعات هما نجوم الشباك في أي بيزنس، لكن مرحلة الديجيتال ميديا الموضوع أختلف، وسيكولوجية الجمهور المستهدف اختلفت بشكل كبير جدا، بقى مطلوب منك كصاحب بيزنس يكون عندك المرونة الكافية انك تركز على جزء التسويق بنفس أهمية التركيز على البيع أو أعلى بمراحل.
التسويق هنا مش مقصود بيه ان عندك منتج ومحتاج تسوقله، لا الموضوع أكبر شوية من كدا، بدايته بتبدأ من مرحلة ما قبل المنتج نفسه
بدايته إجابات لأسئلة زي:
هتبيع لمين (بالتفصيل)؟
ايه الحلول اللي بيقدمها المنتج بتاعك لمشاكلهم واحتياجاتهم؟
ايه الطريق المناسب اللي توصلهم من خلاله؟
هتكلمهم وتوصلهم القيمة الأساسية لمنتجك ازاي؟
ايه الميزة اللي في منتجك تشجعهم يشتروا منك؟
وقبل كل دا لازم تحط قدامك طول الوقت انك مش بتبيع منتج أد ما بتقدم (قيمة Value) هيحصل عليها جمهورك المستهدف لما يستخدم منتجك أو خدمتك .
أشهر الأمثلة على كدا:
كوكاكولا طول الوقت بتروج لفكرة (السعادة) اللي هتحسها بعد استخدامك لمنتجاتهم
مرسيدس (الفخامه )
سيارات BMW (الرفاهية )
فودافون (القوة)
وهكذا دور العملية التسويقية كلها أنها تركز على القيمة النهائية (الـ Value ) اللي هتوصل للعميل، ونهتم بكل تفاصيلها سواء في المنتجات (4ps) أو الخدمات (7PS).
في البوست دا وضحتلك فكرة مختصرة جدا عن أهمية التسويق، والفرق بينه وبين البيع، في البوستات الجاية هوضحلك التفاصيل بشكل أكبر، وازاي تركز في كل مرحلة من مراحل عملية التسويق على القيمة الاساسية اللي هتوصلها لعميلك.
دلوقتي بعد المقدمة دي حابب اسألك السؤال مرة تانية ومستني إجابتك في الكومنتات
تبيع ولا تسوق؟
