04/07/2024
الرد ده بيضايق أغلب العملاء وبيجي في دماغهم ليه دايما أدمنز الصفحات ما بيردوش في التعليقات 🤔
لو خايفين من المنافس فكده كده هيجاوبوا عليه في الخاص لو دخل سألهم من غير ما يعرفوا، ولو عشان التفاعل والتعليقات ويخلوا العملاء عندهم فضول يسألوا، مين أصلا بيدخل يدور على سعر في التعليقات إلا لو لقاه مباشر قدامه.
طب ليه الرد على السعر Inbox؟
خلينا متفقين إن التعليقات مش مكان للنقاش إطلاقا، آخرها نرد على استفسار بسيط بجملة قصيرة، معلومة سريعة ملهاش تفاصيل كتير، لكن صعب نفتح فيها حوار ..
عشان كده الرد بيكون Inbox لأنه بيدي مساحة إننا نتناقش مع العميل ونوضح له كل حاجة مش فاهمها، نعرض له المميزات بالتفصيل، نبعت له صور للمنتج، نفرجه منتجات تانية عندنا ممكن يكون محتاجها، ناخد رقمه عشان نتصل بيه نشرح له تفاصيل الخدمة، نتمم معاه الاتفاق ويبعت بياناته في خصوصية... إلخ
وكده العميل يتشجع إنه يطلب، وده الصح اللي المفروض نعمله مع أي عميل يسأل إننا نفتح معاه شات، زي بالظبط أما يجي لك ضيف يزورك، أكيد مش هتقف تكلمه على الباب، هتقول له اتفضل وتدخله بيتك عشان تتكلموا براحتكم.
فالموضوع أكبر من مجرد رد، ده بناء علاقة مع العميل وإظهار تقدير واهتمام ..
وده ينطبق فقط على أي سؤال فيه تفاصيل محتاجة شرح، لكن لو سؤال بسيط وإجابته مش محتاجة شرح فبنرد عادي في التعليقات، زي اللي بيسأل عن العنوان، سعر حاجة محددة ومعروفة مفيهاش كلام كتير.
طب إيه هي المشاريع اللي ينفع فيها ترد Inbox والمشاريع اللي ما ينفعش؟
لو عايز تعرف تفاصيل سيب كومنت وهنرد عليك Inbox 😂
