24/02/2023
يعني إيه الـــ Brand attack؟🤔
مع المنافسة الشرسة بين البراندات الكبيرة أوقات كتيرة فيه براندات تحب تحط على براندات تانية وكل شركة بتحاول تثبت قوتها وسيطرتها على السوق وتثبت تفوقها وقوة منتجها ونظير كده بتحاول تقلل من القيمة التسويقية للبراند المنافس وده من خلال ما يسمي بحرب البراندات Brand Attack.
وده بيتم من خلال أن شركة هتترصد نقطة ضعف أو خطأ معين لشركة تانية وتستغل ده في حملتها التسويقية والهدف كله تقليل من قيمة المنتج المنافس..
وطبعا ده هيشد شرايح كبيرة جداااا من الجمهور وبتستفيد الشركة أن حملتها التسويقية بتنجح وبتكلفة قليلة لأن الجمهور هو اللي بيبدء يتكلم عن الحملة التسويقية وينشرها في كل مكان ويتعامل معاها على أنها تريند.
وحرفيا لو استغلت الشركة المنافسة خطأ أو نقطة ضعف للبراند بتاعك قادرة تهد اللي اتبني من سنين في يوم واحد.
وأشهر الأمثلة اللي بنشوفها ( مرسيدس وبي أم دبليو-بيبسي وكوكاكولا- بريل وشويبس - إتصالات وفودافون).
وبصرف النظر أن بعض الخبراء بيشوفوا أن Brand Attack ده بيتم بالإتفاق بين الشركات الكبيرة ولكن ده غير مؤكد 🤷
طب هل Brand Attack بيتم بين البراندات الكبيرة بس؟
هقولك لا طبعا ممكن يحصل للشركات المتوسطة والصغيرة كمان طالما كنت ناجح في السوق وبتمشي بخطوات كبيرة فاعرف أنك تحت النظر وأي خطأ ممكن يصدر منك هينتشر بشكل يدمر سمعتك ويخسرك عملائك.
وعشان كده لازم تفهم مكانك في السوق وجمهورك شايفك إزاي عشان تقبل توقعاته منك..
وخليك دايما متابع أي حاجة تنزل على البراند بتاعك من خلال google alert
و ده هيبعت ليك تنبيهات لأي محتوى مكتوب عنك ومعمول لك منشن عليه و يظهر على محرك البحث.
ولو حصل ليك هجمة (خليك جاهز للمشكلة ومعاك الحل دايما).
سواء شكوى أو كومنت سلبي ضروري ترد عليهم بشكل سريع عشان تظهر اهتمامك بعملائك
وفي نفس الوقت حاول تستدرج الخلاف أنه يكون أوفلاين مش أونلاين قدام ملايين الناس
ودايما خلى ردك ذكى واعرف حدود المشكلة ومتحاولش ابدا تخسر عملائك..
