Lunes 09:30 - 15:00 17:00 - 20:00 Martes 09:30 - 15:00 17:00 - 20:00 Miércoles 09:30 - 15:00 17:00 - 20:00 Jueves 09:30 - 15:00 17:00 - 20:00 Viernes 09:30 - 15:00

Faro Norte - Ribadeo, Calle Diputación, 21, Ribadeo (2026)

20/06/2026

A CASA DO CONCELLO DE FOZ ILUMINARASE DE VERDE POLO DÍA MUNDIAL DA ELA PARA DAR VISIBILIDADE ÁS PERSOAS AFECTADAS
Foz, 20 de xuño de 2026. Foz iluminará a fachada da Casa do Concello de cor verde con motivo do Día Mundial da Esclerose Lateral Amiotrófica (ELA), que se conmemora este domingo, día 21 de xuño, “sumándose así á campaña de sensibilización e apoio ás persoas afectadas por esta enfermidade neurodexenerativa e ás súas familias”.
A concelleira de Sanidade en Foz, Kathy Navarro Machado, explica que “a ELA é unha enfermidade do sistema nervioso que afecta ás neuronas motoras, provocando unha perda progresiva da mobilidade muscular. Co paso do tempo, as persoas afectadas poden ver comprometidas funcións básicas como camiñar, falar, comer ou respirar, mantendo na maioría dos casos intactas as capacidades cognitivas. En España estímase que arredor de 4.000 persoas conviven actualmente con esta enfermidade e cada ano diagnostícanse novos casos. A investigación científica e o acceso a recursos asistenciais resultan fundamentais para mellorar a calidade de vida das persoas afectadas e avanzar cara a novos tratamentos. Con este xesto simbólico, o Concello de Foz quere amosar o seu compromiso coa sensibilización social, a visibilización da ELA e o apoio ás persoas afectadas e ás súas familias, contribuíndo a facer máis visible unha realidade que precisa maior coñecemento e máis recursos”.
Ademais Kathy Navarro destaca que “é importante que desde as institucións locais apoiemos causas que axudan a visibilizar enfermidades como a ELA, que teñen un enorme impacto nas persoas afectadas e nas súas familias. Con esta iluminación queremos trasladar unha mensaxe de apoio, empatía e compromiso coa sensibilización social e coa investigación. O Concello de Foz reafirma así a súa aposta pola promoción da saúde e pola participación en iniciativas de concienciación que contribúan a construír unha sociedade máis informada, sensible e comprometida coas persoas afectadas por diferentes doenzas”.

19/06/2026

A AULA UNIVERSITARIA DA UNED DE FOZ ORGANIZA UNHA SEMANA DE PORTAS ABERTAS DO 22 AO 26 DE XUÑO.
Foz, 19 de xuño de 2026. A Aula Universitaria da UNED de Foz celebrará do 22 ao 26 de xuño unha semana de portas abertas co obxectivo de dar a coñecer a súa oferta formativa, instalacións e servizos á cidadanía.
A iniciativa está dirixida a estudantes potenciais, familias e persoas interesadas en continuar ou retomar os seus estudos a través da educación a distancia.
Durante estes días, ofreceranse sesións informativas sobre os cursos de acceso, graos, idiomas e posgrao, así como orientación personalizada por parte do persoal da aula. As persoas asistentes tamén poderán visitar as instalacións e coñecer os recursos dispoñibles. Non é necesaria inscrición previa, xa que se trata de visitas libres dentro do horario de 9:00 a 13:00 horas.
A coordinadora da aula, Marta Muiña, destacou que “estas xornadas son unha oportunidade para achegar a UNED á veciñanza e amosar a súa flexibilidade”. Pola súa banda, a concelleira de Educación, Elena Martínez, sinalou que “abrir as portas da aula contribúe a facilitar o acceso á formación superior en Foz”.
Esta actividade enmárcase no compromiso da UNED de achegar a educación universitaria a toda a poboación mediante un modelo accesible e flexible.
Para máis información, as persoas interesadas poden contactar coa Aula Universitaria da UNED de Foz nos teléfonos 982.133.699 e 604.034.549, ou a través do correo electrónico [email protected].

19/06/2026

RIBADEO ACOLLEU ESTE VENRES O FORO DE TURISMO ESPAÑA VERDE.
Ribadeo 19 de xuño de 2026. O Real Club Náutico de Ribadeo foi escenario este venres do foro de turismo España Verde no que representantes institucionais, expertos e profesionais do sector no norte de España intercambiaron ideas e perspectivas sobre o ámbito turístico.
Medio cento de persoas escoitaron atentamente as reflexións das mesas de debate desenvolvidas ao longo da xornada, que foi inaugurada polo presidente do Real Club Náutico de Ribadeo, Pablo Fernández; o alcalde, Dani Vega, e do director da Axencia de Turismo de Galicia, José Manuel Merelles.
A España Verde, Galicia Calidade e A Mariña como destino foron as ponencias nas que se falou da necesidade de fortalecer a oferta turística, da necesidade dunha colaboración estreita entre o público e o privado e de apostar por un turismo que respecte o territorio e as súas xentes.
Ribadeo converteuse hoxe no protagonista da análise e da promoción dun turismo vinculado á identidade dos destinos do norte peninsular. O alcalde, Dani Vega, agradeceu a participación de todos os poñentes e asistentes ao foro de turismo España Verde, fixo un balance moi positivo do encontro e avogou polo traballo conxunto entre institucións e entidades.

19/06/2026

O CONCELLO DE FOZ ILUMÍNASE DE LARANXA POLO DÍA MUNDIAL DA DISTROFIA MUSCULAR PARA DAR VISIBILIDADE ÁS PERSOAS AFECTADAS
Foz, 19 de xuño de 2026. Foz ilumina a fachada da Casa do Concello con motivo do Día Mundial da Distrofia Muscular, que se conmemora este sábado, día 20 de xuño, “sumándose así á reivindicación de maior visibilidade, apoio e sensibilización arredor desta enfermidade neuromuscular que afecta a milleiros de persoas e ás súas familias”.
A concelleira de Sanidade, Kathy Navarro Machado, explica que “a distrofia muscular engloba un conxunto de enfermidades xenéticas e progresivas que provocan un debilitamento e perda gradual da masa muscular, afectando á mobilidade e á autonomía das persoas que a padecen. Existen diferentes tipos de distrofia muscular, algunhas con aparición na infancia, como a distrofia muscular de Duchenne, e outras que poden manifestarse en diferentes etapas da vida. Aínda que se trata dunha enfermidade considerada rara nalgunhas das súas variantes, a súa repercusión na vida diaria das persoas afectadas é moi importante, facendo fundamental o apoio social, a investigación médica e o acceso a tratamentos e recursos adaptados. Con esta iluminación simbólica, o Concello de Foz quere trasladar unha mensaxe de apoio e solidariedade ás persoas afectadas pola distrofia muscular e ás súas familias, contribuíndo tamén á divulgación e coñecemento desta doenza”.
Kathy Navarro sinala: “desde o Concello de Foz queremos seguir visibilizando enfermidades que precisan maior coñecemento social e máis apoio institucional. Pequenos xestos como a iluminación da Casa do Concello serven para dar voz ás persoas afectadas e lembrar a importancia da investigación, da inclusión e do acompañamento ás familias. O Concello de Foz reafirma así o seu compromiso coa sensibilización en materia de saúde e coa participación nas campañas de visibilización das distintas enfermidades e causas sociosanitarias”.

19/06/2026

CONSTITUÍDA A COMISIÓN DA PRAZA DE ABASTOS DE ACISA RIBADEO.
Ribadeo, 19 de xuño de 2026. En Acisa Ribadeo quedou constituída a comisión da praza de abastos, que terá como obxectivos analizar os problemas, as inquedanzas e as vantaxes deste sector, recentemente adherido ao colectivo empresarial ribadense, así como as actividades organizadas e as que se levarán adiante ao longo dos vindeiros meses.
Forman parte da comisión: Manuel González, presidente da asociación de praceiros; Carmen Cruzado, presidenta de Acisa; Felipe Fernández, secretario da asociación; Manoli Torviso, tesoureira de Acisa; Jesús Pérez, xerente de Acisa; así como Beatriz Acebedo, Alba Rodil e Beatriz Díaz, da praza de abastos de Ribadeo.
Foi o xerente de Acisa o que explicou que “a comisión é un órgano consultivo non vinculante” e que “calquera decisión ou acordo adoptados deberán ser ratificados pola xunta directiva e pola asemblea xeral de Acisa”. E subliñou que “a comisión deberá reunirse ao menos unha vez ao ano”.
A presidenta, Carmen Cruzado, deulles á benvida “a un foro no que agardamos abordar todas aquelas cuestións de interese para o sector”. Esta é a segunda comisión específica de traballo que se constitúe en Acisa Ribadeo. A primeira foi a de comercio, creada o ano pasado.
Cruzado Iglesias indicou: “agardamos ao longo das vindeiras semanas poder crear a de hostalería e hoteis, servizos e industriais. Aproveitamos para facer un chamamento aos negocios asociados para que dean o paso adiante e poidamos contar con estes foros para traballar e cambiar impresións, porque son moi interesantes”.

18/06/2026

DO 19 AO 21 DE XUÑO TERÁ LUGAR O XVII TORNEO INFANTIL DE FÚTBOL BASE, QUE ORGANIZA A SD RIBADEO.
Ribadeo, 18 de xuño de 2026. Do 19 ao 21 de xuño terá lugar o XVII Torneo Infantil de Fútbol Base, que organiza a SD Ribadeo.
No evento participarán 48 equipos procedentes na súa maioría de Asturias e de Galicia e tamén de Cantabria e Castela e León. Arredor de 1.200 xogadores e adestradores se darán cita no torneo, que encherá de novo a vila de deporte e de familiares, que arrouparán aos seus rapaces e gozarán de Ribadeo, da súa paisaxe, do seu comercio e da súa gastronomía. O torneo desenvolveranse no estadio municipal Pepe Barrera, no Campo de Outeiro da Devesa, no Campo El Soutón de Vegadeo e no Campo Trenor en Barres.
Na presentación do XXI Torneo de Fútbol Base Alevín da SD Ribadeo participaron o alcalde, Dani Vega, o técnico municipal de Deportes, Iván López, a secretaria da SD Ribadeo, Mª José Tella, o coordenador de Fútbol 8 da SD Ribadeo, Aitor García, o deputado provincial Dani García, o concelleiro Marcos Villamil, así como a presidenta e o xerente de Acisa, Carmen Cruzado e Jesús Pérez.
Este evento deportivo está organizado pola SD Ribadeo, coorganizado pola Secretaría Xeral para o Deporte e colaboran o Concello de Ribadeo, Acisa, a Deputación de Lugo, o Vegadeo CF, o Barres CF, Ayuntamiento de Castropol, Eroski e Gadis.
Así rematarán catro fins de semana de torneos de fútbol base en Ribadeo.

17/06/2026

O 12 DE XULLO TERÁ LUGAR O SORTEO DUNHA VIAXE A MÉXICO PARA DÚAS PERSOAS. SERÁ NO MARCO DO XI RIBADEO INDIANO DA MAN DE ACISA, QUE REPARTIRÁ 180.000 PAPELETAS ENTRE OS CLIENTES DOS LOCAIS ASOCIADOS DESDE ESTE VENRES, 19 DE XUÑO.
Ribadeo, 17 de xuño de 2026. Os establecementos asociados a Acisa repartirán 180.000 rifas entre o 19 de xuño e o 12 de xullo, xornada na que terá lugar o sorteo dunha viaxe a México no marco do XI Ribadeo Indiano. Será ao remate do concerto que Estrellas de Buena Vista y Más ofrecerán na rúa San Roque.
A presidenta de Acisa, Carmen Cruzado, manifestou: “dende Acisa quixemos un ano máis poñer os máximos recursos posibles a disposición dos nosos socios e socias para contribuír a facer o mellor Ribadeo Indiano posible e deste xeito dinamizar a economía local. E por iso neste 2026 volve o sorteo dunha viaxe a México para dúas persoas. Somos conscientes do éxito que tivo esta iniciativa nas edicións pasadas e consideramos que non podía faltar este ano, pero queriamos darlle un impulso. Será a sexta vez que desde Acisa enviemos ás Américas a unha parella no mes de setembro. Dende a nosa asociación estamos a traballar para premiar e fidelizar as compras na nosa vila nunha época na que comezan as rebaixas e aumenta a afluencia turística e sen dúbida este sorteo é unha axuda moi importante e unha cita moi agardada tanto polos negocios locais asociados como pola súa clientela”.
O xerente de Acisa, Jesús Pérez, explicou que “Acisa pon en circulación desde este venres 180.000 papeletas, 20.000 máis que na edición pasada. A viaxe que se sortea é para dúas persoas e será para desfrutar do 11 ao 18 de setembro de 2026. O premio cubre o vo Madrid-México-Madrid, así como 7 noites de hotel en habitación dobre premium room en réxime de todo incluído, no hotel Iberostar Waves Paraíso de 5 estrelas, así coma servizos extra como embarque preferente, asentos especiais, asistencia a eventos na Rivera Maya, entre outros complementos extra”.
Pérez Prada dixo que “participar no sorteo é moi sinxelo. As rifas estarán a disposición dos clientes nos establecementos asociados a Acisa do 19 de xuño ao 12 de xullo. O único que teñen que facer é pedir as rifas tras o gasto realizado. As papeletas deberán ir debidamente seladas polos establecementos. O sorteo, ante notario, será presencial o 12 de xullo tras a actuación de Estrellas de Buena Vista y Más. É moi importante destacar e incidir en que a rifa debe conservarse ata o mesmo 12 de xullo e que ese día dende as catro da tarde ás nove da noite, as persoas que teñan papeletas no seu poder, deberán introducilas na urna que estará instalada fronte aos Cocos na rúa San Roque. Alí deberá quedar a parte pequena da rifa co selo do establecemento e haberá que conservar a parte grande para o sorteo. Non serán validas as papeletas sen o selo dos negocios, ou con selos de establecementos non asociados. As bases do sorteo están dispoñibles na web e redes sociais de Acisa”.
O xerente de Acisa engadiu: “sendo moi prudentes, coa edición das 180.000 rifas e facendo unha media de 4 rifas por compra e unha media de 40 euros de valor de cada compra estariamos a falar de que estariamos xerando 1.800.000 euros de impacto na economía local de Ribadeo nas tres semanas que dura campaña, sen contar os tres días do evento”.
A presidenta do colectivo empresarial tivo palabras de agradecemento para as administracións e para os patrocinadores: “queremos agradecer o apoio da Vicepresidencia da Deputación de Lugo, a través da Área de Cultura, e á Xunta de Galicia, que cofinancian esta programación do Ribadeo Indiano, así como ao Concello, co que seguimos a coorganizar este importante evento histórico cultural. E tamén quero dar as grazas aos nosos patrocinadores: a Cervexas Alhambra, que colabora co Ribadeo Indiano na súa liña de compromiso por apoiar todas aquelas experiencias únicas pensadas para desfrutar sen presa e dedicando a cada cousa o tempo que se merece, ao Banco Sabadell, a Caixa Rural, a Vitaldent, a Gestión Gratelu e a Discosta que afianzan a súa colaboración con nos. Sen a súa inestimable axuda non poderiamos chegar a onde chegamos neste XI Ribadeo Indiano”.
Jesús Pérez manifestou: “dende Acisa queremos resaltar o noso compromiso coa organización do Ribadeo Indiano e como consecuencia co traballo en estreita colaboración co Concello de Ribadeo para levalo a cabo. Ambos aportamos o que somos capaces, cada un dende as súas posibilidades con recursos propios e cos que nos achegan as diferentes administracións e firmas privadas a cada un de nós para levar a cabo un gran evento que dinamiza a economía local e fomenta o turismo neste municipio”.
A presidenta de Acisa dixo: “hai que agradecer tamén todo o traballo que hai detrás dunha cita destas dimensións ao persoal do Concello de Ribadeo, ao persoal de Acisa, e a todas as persoas que de xeito voluntario tamén aportan o seu gran de area para que o Ribadeo Indiano vaia a máis e se supere ano tras ano. A conta atrás comezou e aquí xa respira o seu ambiente. As maletas, as hortensias, as fotos, as lembranzas, a morriña empezan a invadir este concello e a memoria das súas xentes”.
No acto de presentación da viaxe a México, que se sorteará no marco do XI Ribadeo Indiano, participaron representantes de Acisa, da Vicepresidencia da Deputación de Lugo, do Concello de Ribadeo e dalgunhas das firmas patrocinadoras.

17/06/2026

A EMMED DE RIBADEO LEVA A MÚSICA ÁS PARROQUIAS CUNHA ACTUACIÓN EN OVE O VINDEIRO 22 DE XUÑO.
Ribadeo, 17 de xuño de 2026. A Escola Municipal de Música e Danza (EMMeD) de Ribadeo continúa a desenvolver o seu programa Musiqueando polas parroquias, unha iniciativa que busca descentralizar a oferta cultural do municipio e achegar o traballo do alumnado a todos os veciños e veciñas.
A vindeira cita terá lugar en Ove o luns, 22 de xuño, ás 19:00 horas. O escenario elixido será a antiga Escola, onde se ofrecerá unha pequena mostra do esforzo realizado por unha parte do alumnado do centro ao longo do presente curso académico.
Motor sociocultural de todo o concello
Segundo explica o responsable da EMMeD, Hugo García, “esta actividade responde a un dos piares fundamentais da institución: un dos nosos obxectivos prioritarios é consolidarnos como un motor sociocultural para todo o concello de Ribadeo, e non só para o seu núcleo urbano”.
García sinala que esta programación itinerante está pensada especificamente “para que as persoas que non residen no casco ribadense, e ás que lles pode resultar máis complicado asistir ás actividades que a EMMeD organiza habitualmente, poidan coñecer de preto o proxecto educativo e artístico da escola”.
Con esta actuación, a EMMeD reafirma o seu compromiso coa dinamización das parroquias rurais, ofrecendo espazos de encontro veciñal a través da música e poñendo en valor a aprendizaxe dos seus estudantes fóra das aulas convencionais.

17/06/2026

RIBADEO ACOLLE DO 19 AO 21 DE XUÑO A FEIRA GALEGA DE ARTESÁNS.
Ribadeo, 17 de xuño de 2026. Ribadeo acolle do 19 ao 21 de xuño a Feira Galega de Artesáns. Contará con 15 stands que estarán situados na Praza de España. O horario de apertura será de once da mañá a nove da tarde.
A concelleira de Comercio e Turismo, Marta Saiz, explicou que “esta fin de semana teremos a oportunidade de ver en Ribadeo as creacións e as propostas dos artesáns galegos, que chegan á nosa vila da man da Xunta e de Artesanía de Galicia”.
A edil ribadense contou que “nos 15 postos desta Feira Galega de Artesáns poderemos atopar complementos de moda e téxtis, marroquinaría, xoiaría, teas, sombreirería, bixutaría, xoguetes ou esmaltes”.
Saiz indicou que “esta feira está percorrer diversas localidades e cidades galegas e consideramos que será un atractivo importante para Ribadeo a súa celebración esta vindeira fin de semana. O obxectivo é dar a coñecer traballo dos artesáns galegos, que veñen aquí procedentes das catro provincias: A Coruña, Lugo, Ourense e Pontevedra”.

16/06/2026

RIBADEO ACOLLERÁ O VINDEIRO VENRES, 19 DE XUÑO, O FORO DE TURISMO ESPAÑA VERDE.
Ribadeo, 16 de xuño de 2026. Ribadeo acollerá o vindeiro venres, 19 de xuño, o Foro de Turismo España Verde.
O alcalde, Dani Vega, explicou que “Ribadeo vai acoller o Foro de Turismo España Verde, unha marca que se creou no 1989 por 4 comunidades autónomas. Estamos a falar que desde Galicia, Asturias, Cantabria e País Vasco todas xuntas crearon esa marca, esa estratexia de traballar polo turismo verde. Desde logo somos unhas comunidades autónomas que temos unha estratexia conxunta en moitas materias. Estamos falando de que cando nos unimos en materia de infraestruturas, en materia de inversións, en vías de comunicación, tamén na sanidade pública e nos servizos sociais, en materia de industria e de impacto laboral, creo que tamén é moi oportuno xuntarse, analizar e falar de temas como turismo, o turismo de calidade, o turismo verde e acoller a todas estas comunidades autónomas: País Vasco, Cantabria, Asturias e tamén á dirección de Turismo da Xunta de Galicia. Eu agradézolle á Xunta de Galicia, ao director xeral, a José Manuel Merelles, que escollera a Ribadeo para ser ese punto de encontro para seguir avanzando no turismo de calidade e no turismo verde”.
O rexedor contou que “unha cita que vai debater e poñer propostas encima da mesa. E tamén temos que unir, e eu creo que moi acertado, falar do turismo verde e a España verde, o norte e unir Galicia Calidade, como marca importantísima, como estratexia, non soamente en turismo, senón en todo, a estratexia da comunidade autónoma e que os Concellos debemos sumarnos, debemos colaborar e debemos propoñer. Ribadeo propón e esta mesa, onde vai estar o director xerente do Xacobeo, Ildefonso de la Campa, tamén vai estar o presidente do Clúster de Galicia, Cesáreo Pardal, Ana Méndez, que é a directora xeral de Galicia Calidade e Vidal Martínez--Sierra, que é o presidente do GDR Terras de Miranda, que impulsa moitas iniciativas, que financia moitas propostas, e o turismo rural tamén é importante, está dentro dos horizontes da estratexia do GDR e financia e colabora non só agora senón hai moito tempo”.
E seguiu a relatar: “e rematará a xornada a Ribeira Sacra como experiencia que funcionou e funciona moi ben como a unión dos Concellos, a xerencia do Consorcio de Turismo da Ribeira Sacra está dando moi bos resultados e creo que é bo escoitar a aquelas persoas que o impulsaron hai moito tempo e están sacando grandes réditos. Alexandra Seara vainos falar e explicar ese éxito. E Tania Hermida, tamén como persoa cunha dilatada experiencia dentro da Mancomunidade da Mariña, falará de tamén de todo o que se está facendo dentro da Mancomunidade”.
Dani Vega engadiu: “un agradecemento profundo a todos os colaboradores, a todas as persoas que entenden que este foro é moi importante, é un foro onde por primeira vez se vai falar desde o punto de vista técnico, porque a primeira mesa é estritamente técnica, porque os discursos están ben, pero hai que sentarse, analizar, profundar desde a técnica e mellorar todas as estratexias”.
Para o alcalde ribadense “é un éxito que Ribadeo acolla este foro, estamos moi contentos. Evidentemente, grazas a todas as comunidades autónomas por asistir, acompañar e vir a falar dende Ribadeo e enviar unha mensaxe de que somos calidade e somos un turismo verde”.

Faro Norte - Ribadeo

20/06/2026

19/06/2026

19/06/2026

19/06/2026

19/06/2026

18/06/2026

17/06/2026

17/06/2026

17/06/2026

16/06/2026

Dirección

Horario de Apertura

Página web

Notificaciones

Contacto La Empresa

Atajos

Compartir

Lunes	09:30 - 15:00
	17:00 - 20:00
Martes	09:30 - 15:00
	17:00 - 20:00
Miércoles	09:30 - 15:00
	17:00 - 20:00
Jueves	09:30 - 15:00
	17:00 - 20:00
Viernes	09:30 - 15:00