21/06/2026
قلعہ سیف اللہ (پ ر) پشتونخوا نیشنل عوامی پارٹی کے زیرِ اہتمام ملی شہید عثمان خان کاکڑ کی پانچویں برسی کے موقع پر قلعہ سیف اللہ فٹبال اسٹیڈیم میں ایک عظیم الشان، تاریخی اور فقیدالمثال جلسۂ عام منعقد
رپورٹ ڈاکٹر ثناءخان اچکزئی
جلسے کی صدارت پارٹی کے چیئرمین اور رکنِ قومی اسمبلی خوشحال خان کاکڑ نے کی۔ جلسے میں جنوبی پشتونخوا سمیت مختلف علاقوں سے ہزاروں کارکنوں، سیاسی کارکنوں، قبائلی عمائدین، نوجوانوں، خواتین اور عوام کے مختلف طبقات نے بھرپور شرکت کی۔ جلسے سے پشتونخوا نیشنل عوامی پارٹی کے چیئرمین خوشحال خان کاکڑ، شریک چیئرمین مختار خان یوسفزئی، سینئر ڈپٹی چیئرمین و سابق سینیٹر رضا محمد رضا، مرکزی سیکرٹری اطلاعات عیسیٰ روشان، مرکزی سیکرٹری اللہ نور خان، مرکزی سیکرٹری محترمہ صاحبہ بریچ، صوبائی سیکرٹری مالیات سید اکبر کاکڑ اور پشتونخوا سٹوڈنٹس آرگنائزیشن (پی ایس او) کے زونل سیکرٹری وارث افغان سمیت دیگر مرکزی و صوبائی رہنماؤں نے خطاب کیا۔ تلاوتِ کلامِ پاک کی سعادت مولانا شاہ خالد نے حاصل کی، جبکہ اسٹیج سیکرٹری کے فرائض پارٹی کے صوبائی صدر نصراللہ خان زیری نے سرانجام دیے۔ معروف شاعر غفور پشتون نے انقلابی اشعار پیش کیے، جبکہ جلسے کے دوران ملی شہید عثمان خان کاکڑ کی تقاریر اور جدوجہد پر مشتمل خصوصی ویڈیو کلپس بھی شرکاء کو دکھائے گئے، جنہیں حاضرین نے انتہائی جذباتی انداز میں سنا اور بھرپور خراجِ عقیدت پیش کیا۔ اس موقع پر سینکڑوں افراد نے پشتونخوا نیشنل عوامی پارٹی میں شمولیت کا اعلان کیا، جن میں ہارون خان بازی، منیر خان بازی اور دیگر شخصیات شامل تھیں۔ جلسے میں پارٹی کے مرکزی سیکرٹری جنرل خورشید کاکاجی، سید قادر آغا ایڈووکیٹ، مرکزی سیکرٹری مالیات محمد یوسف خان کاکڑ، سردار گل مرجان کبزئی، حاجی اعظم خان مسیزی، صوبائی نائب صدر عبدالقیوم ایڈووکیٹ اور دیگر قائدین نے بھی شرکت کی۔ فٹبال اسٹیڈیم شرکاء سے کھچا کھچ بھرا ہوا تھا۔ مقررین کے مطابق یہ جنوبی پشتونخوا کی تاریخ کے بڑے عوامی اجتماعات میں سے ایک تھا، جس میں ہزاروں افراد کی شرکت نے پارٹی کی عوامی مقبولیت اور ملی شہید عثمان خان کاکڑ سے عوامی وابستگی کو ایک مرتبہ پھر نمایاں کر دیا۔ اپنے صدارتی خطاب میں خوشحال خان کاکڑ نے ملی شہید عثمان خان کاکڑ کو زبردست خراجِ عقیدت پیش کرتے ہوئے کہا کہ انہوں نے اپنی پوری سیاسی زندگی پشتونوں سمیت تمام محکوم اقوام کے قومی، جمہوری اور انسانی حقوق کے دفاع اور حصول کے لیے وقف کر رکھی تھی۔ انہوں نے کہا کہ ملی شہید نے پشتون، بلوچ، سندھی، سرائیکی، کشمیری اور گلگتی عوام کے حقوق کے لیے ہر فورم، بالخصوص سینیٹ آف پاکستان میں، جرات، استقامت اور اصولی مؤقف کے ساتھ آواز بلند کی۔ انہوں نے ضلع قلعہ سیف اللہ اول اور دوم کے نومنتخب ضلعی ایگزیکٹوز کو مبارکباد دیتے ہوئے کہا کہ ضلعی کانفرنس میں نو ہزار سے زائد مندوبین کی شرکت سیاسی شعور، تنظیمی وابستگی اور پارٹی پر عوامی اعتماد کا واضح ثبوت ہے۔ خوشحال خان کاکڑ نے کہا کہ ملی شہید عثمان خان کاکڑ ایک ایسی نڈر اور بااصول شخصیت تھے جنہوں نے ظلم، جبر اور آمریت کے سامنے کبھی سر نہیں جھکایا بلکہ اپنے نظریات، عوام کے حقوق اور جمہوری اقدار کی خاطر اپنی جان کا نذرانہ پیش کیا۔ آج بھی ہزاروں کارکن اور عوام ان کے افکار، نظریات اور سیاسی فلسفے سے رہنمائی حاصل کرتے ہوئے ان کے مشن کو آگے بڑھا رہے ہیں۔ انہوں نے کہا کہ ملی شہید ہمیشہ پشتون ملی وحدت، قومی وقار، خودمختاری اور جمہوری اصولوں کے داعی رہے اور اپنے اصولی مؤقف سے کبھی دستبردار نہیں ہوئے۔ مختلف ادوار میں انہیں سنگین دھمکیوں اور دباؤ کا سامنا کرنا پڑا، مگر انہوں نے حق و سچ کا راستہ ترک نہیں کیا۔ خوشحال خان کاکڑ نے ملک کی موجودہ سیاسی اور سیکیورٹی صورتحال پر گہری تشویش کا اظہار کرتے ہوئے کہا کہ پشتون علاقوں میں بدامنی، دہشت گردی، ٹارگٹ کلنگ، جبری آپریشنز اور عدم تحفظ نے عوام کی زندگی اجیرن بنا دی ہے۔ انہوں نے سابق عسکری قیادت کو تنقید کا نشانہ بناتے ہوئے کہا کہ دہشت گردی کے اسباب اور اس کے ذمہ دار عناصر کا شفاف احتساب ناگزیر ہو چکا ہے۔ انہوں نے کہا کہ گزشتہ کئی دہائیوں سے پشتون عوام کو سیاسی، معاشی اور انتظامی طور پر دیوار سے لگایا جا رہا ہے۔ صوبائی اسمبلی میں نشستوں کی کمی، وسائل کی غیر منصفانہ تقسیم، سرحدی تجارت کی بندش اور ترقیاتی منصوبوں میں عدم توجہی کے باعث جنوبی پشتونخوا شدید مسائل سے دوچار ہے۔ انہوں نے افغانستان کے ساتھ تجارتی راستوں کی بندش کو خطے کی معیشت، زراعت اور کاروبار کے لیے تباہ کن قرار دیتے ہوئے مطالبہ کیا کہ جنوبی پشتونخوا میں ہنگامی بنیادوں پر ڈیم تعمیر کیے جائیں تاکہ زراعت کو فروغ ملے، پانی کے بحران پر قابو پایا جا سکے اور مقامی معیشت کو مضبوط بنایا جا سکے۔ خوشحال خان کاکڑ نے کہا کہ قلعہ سیف اللہ، ہرنائی، پشین، قلعہ عبداللہ، دکی اور دیگر اضلاع میں امن و امان کی صورتحال انتہائی تشویشناک ہو چکی ہے اور آئے روز ٹارگٹ کلنگ اور دہشت گردی کے واقعات رونما ہو رہے ہیں۔ انہوں نے حکومت اور متعلقہ اداروں سے مطالبہ کیا کہ عوام کے جان و مال کے تحفظ کو یقینی بنایا جائے اور امن کے قیام کے لیے مؤثر اقدامات کیے جائیں۔ انہوں نے واضح کیا کہ پشتونخوا وطن کو کسی بھی فریق کی جنگ کا میدان نہیں بنایا جانا چاہیے۔ پشتونخوا نیشنل عوامی پارٹی تمام اقوام کے جمہوری حقوق کا احترام کرتی ہے اور بلوچ قومی تحریک سمیت تمام محکوم اقوام کے آئینی، سیاسی اور جمہوری حقوق کی حمایت جاری رکھے گی۔ انہوں نے کہا کہ پشتونخوا وطن کی قومی، جمہوری اور مذہبی جماعتوں کے ساتھ رابطوں کا سلسلہ شروع کر دیا گیا ہے تاکہ وسائل کی منصفانہ تقسیم، ناروا الاٹمنٹس کے خاتمے، دہشت گردی کے سدباب، تجارت کی بحالی اور عوامی حقوق کے حصول کے لیے مشترکہ جدوجہد کی جا سکے۔ انہوں نے کارکنوں سے مخاطب ہوتے ہوئے کہا کہ اگر دیگر جماعتیں اس جدوجہد میں شامل ہوئیں تو مشترکہ تحریک چلائی جائے گی، تاہم اگر کسی نے ساتھ نہ بھی دیا تو پشتونخوا نیشنل عوامی پارٹی اپنے عوام کے حقوق کے حصول کی جدوجہد ہر صورت جاری رکھے گی۔ خوشحال خان کاکڑ نے علی وزیر سمیت تمام سیاسی اسیروں کی فوری رہائی کا مطالبہ کیا۔ انہوں نے ڈاکٹر ماہ نور ناصر کے حوالے سے ینگ ڈاکٹرز کے جائز مطالبات کی حمایت کا اعلان کرتے ہوئے کہا کہ ڈاکٹروں کو محفوظ ماحول اور پیشہ ورانہ تحفظ فراہم کرنا حکومت کی ذمہ داری ہے۔ مزید برآں، انہوں نے کشمیر عوامی ایکشن کمیٹی کے جائز مطالبات کی حمایت کا اعلان کرتے ہوئے گلگت میں ہونے والے مبینہ دھاندلی زدہ انتخابات کو مسترد کیا اور قلعہ سیف اللہ کے ایک نوجوان کے ساتھ پیش آنے والے واقعے میں ملوث عناصر کی فوری گرفتاری اور انہیں قانون کے کٹہرے میں لانے کا مطالبہ کیا۔ جلسے کے اختتام پر ملی شہید عثمان خان کاکڑ، وطن عزیز میں امن و استحکام، تمام شہداء کے درجات کی بلندی، سیاسی اسیروں کی رہائی، قومی یکجہتی اور عوام کی خوشحالی کے لیے خصوصی دعا کی گئی۔
