25/11/2022
ჩვენი გამოკითხვის შედეგებით, ნოემბრის ბოლო კვირის, ამერიკული ტრადიციული პარასკევის, შავად „გაფერადება“ გაკოტრებასთან ასოცირდება , ჩვენს საზოგადოებაში „გაშავების“ ნეგატიური ხასიათის გამო. თუმცა, სულ სხვა დამოკიდებულება აქვს შავი ფერის მიმართ „ამერიკულ ბუღალტერიას“ 😊
ტერმინის შესახებ ასეთი ცნობები არსებობს: ზოგადად, „შავი პარასკევი“ , როგორც ტერმინი საყიდლებთან დაკავშირებული აქტივობებიდან არ იღებს სათავეს. პირველად ეს ტერმინი ამერიკაში ოქროს პანიკას დაუკავშირდა. 1869 წლის 24 სექტემბერს, პარასკევს, ამერიკის ოქროს ბაზრის კრახით გამოწვეული ფინანსური კრიზისის გამო, ამ დღეს „შავი პარასკევი“ ეწოდა.
ტერმინი „შავი პარასკევის“, კონკრეტულად, სავაჭრო ობიექტებში ფასდაკლებებთან კავშირის ბევრი ვერსია არსებობს, თუმცა, ყველაზე გავრცელებული ვერსიით, ტერმინი საბუღალტრო დეტალებს უკავშირდება. კერძოდ, ამერიკის სავაჭრო ობიექტების მეპატრონეები საბუღალტრო აღრიცხვისას, წაგებას წითელ, ხოლო მოგებას - შავი ფერით აღნიშნავდნენ. წლის განმავლობაში ბევრი სავაჭრო ობიექტის საბუღალტრო წიგნაკებში დაგროვილი ჭარბი „წითელი ფერის“ გამო, მადლიერების დღის (აშშ-ში აღინიშნება ნოემბრის მეოთხე ხუთშაბათს) მომდევნო პარასკევს, ფასდაკლებული საქონლის დიდი რაოდენობით გაყიდვა, გადარჩენის ტოლფასი იყო. ფასდაკლებების იდეა მალე მოედო მსოფლიოს და ბევრ მათგანში ეს დღე მთავარ სავაჭრო მოვლენად იქცა.
