26/07/2026
📍სახელი: სალომე
📍გვარი: მახარაშვილი
📍პროფესია: იურისტი, ფერმწერი, მხატვრული ვიტრაჟისა და მინაზე დეკორატიული ხატვის სპეციალისტი.
📍საქმიანობა: მაქვს მრავალწლიანი გამოცდილება კერძო სექტორში მუშაობის პროფესიუილი განათლების თანამედროვე სისტემების დანერგვის პროექტებში. ეს წლები ჩემთვის მნიშვნელოვანი პროფესიული და პიროვნული განვითარების ეტაპი იყო, რისთვისაც დღესაც მადლიერი ვარ. თუმცა, ხელოვნება ყოველთვის ჩემი ცხოვრების განუყოფელი ნაწილი იყო. გახლავართ Art by Salome Makharashvili - S.M.Art -ის დამფუძნებელი.
ბავშვობიდან ვხატავ, ვარ მრავალი საერთაშორისო და ადგილობრივი კონკურსის გამარჯვებული, საქართველოს პრეზიდენტის ორგზის სტიპენდიანტი და პერსონალური გამოფენების ავტორი.
დროთა განმავლობაში მივხვდი, რომ ჩემი ნამდვილი მოწოდება სწორედ ხელოვნება იყო. დღეს ჩემი საქმიანობა სრულად უკავშირდება შემოქმედებას — ვქმნი ფერწერულ და დეკორატიულ ნამუშევრებს, ვმუშაობ მხატვრული ვიტრაჟისა და მინაზე დეკორატიული ხატვის მიმართულებით, ასევე ვარ საავტორო კურსების შემქმნელი და მენტორი. ვმუშაობ როგორც ხელოვანებთან, ასევე ადამიანებთან, რომლებსაც ამ სფეროში არც გამოცდილება აქვთ და ხშირად საკუთარ შესაძლებლობებშიც ეპარებათ ეჭვი. სასიხარულოა, როდესაც ისინი საკუთარი ხელით ქმნიან პირველ უნიკალურ ნამუშევარს, აღმოაჩენენ საკუთარ შემოქმედებით პოტენციალს და ეუფლებიან ახალ საქმეს, რომელიც მომავალში შესაძლოა მათი ცხოვრების მნიშვნელოვან ნაწილადაც იქცეს. ჩემთვის განსაკუთრებული ბედნიერებაა, როდესაც წლების განმავლობაში დაგროვილ გამოცდილებასა და ცოდნას სხვებსაც ვუზიარებ და მათ პროფესიულ განვითარებაში საკუთარი წვლილი შემაქვს.
— როგორ დაახასიათებდით საკუთარ თავს რამდენიმე სიტყვით❓❗
— პირველ რიგში ვარ ხელოვანი იდეებით, ფანტაზიით წარმოსახვით. ასევე ვარ მიზანდასახული, პასუხისმგებლიანი და შრომისმოყვარე ადამიანი, რომელსაც სჯერა, რომ ნამდვილი შემოქმედება არასოდეს ჩერდება.
— როგორ დაიწყო თქვენი სიყვარული შუშის ხელოვნებისადმი და როდის მიხვდით, რომ ეს თქვენი საქმე იყო❓❗
— ხატვა და ფერწერა ბავშვობიდან ჩემი ცხოვრების განუყოფელი ნაწილია. ყოველთვის ვსინჯავ სხვადასხვა ტექნიკას, მასალას. მხატვრული ვიტრაჟი ჩემს ცხოვრებაში სრულიად შემთხვევით შემოვიდა. ერთი შეხედვით შემთხვევითმა შეხვედრამ სრულიად ახალი სამყარო გამიხსნა. მალევე მივხვდი, რომ მინაზე მხატვრობა კიდევ ერთი გამორჩეული საშუალებაა საკუთარი ემოციების და სათქმელის გადმოცემის. ასე გახდა მხატვრული ვიტრაჟიც ჩემი შემოქმედების მნიშვნელოვანი ნაწილი.
— რა გაძლევთ შთაგონებას თითოეული ახალი ნამუშევრის შექმნისას❓❗
— შთაგონებას ყველგან ვპოულობ
— ბუნებაში, ადამიანებში, მოგზაურობაში, ფერებში, სინათლესა და ყოველდღიურ დეტალებში. ხშირად ერთი პატარა ემოციაც კი საკმარისია, რომ ახალი იდეა დაიბადოს. ჩემთვის ოჯახი ყველაზე დიდი ღირებულებაა და სწორედ ოჯახის წევრები მაძლევენ ძალას და მოტივაციას, შევქმნა და ვიმუშაო.
— რომელია ,თქვენი პირველი ნამუშევარი, რომელიც დღემდე განსაკუთრებულად გახსოვთ და რატომ❓❗
— ჩემთვის განსაკუთრებული მნიშვნელობა აქვს სასტუმრო Best Western-ის რესტორან „მრგვალ ბაღში“ განთავსებულ მხატვრული ვიტრაჟის ტექნიკით შესრულებულ მოხატულ მინის პანოს „მზესუმზირები“. ეს იყო ჩემი პირველი მასშტაბური ნამუშევარი ამ მიმართულებით, რომელმაც დამარწმუნა, რომ ხელოვნებას შეუძლია არა მხოლოდ სივრცის გაფორმება, არამედ მისი ხასიათის შეცვლაც. სწორედ ამიტომ მას ყოველთვის განსაკუთრებული ადგილი უჭირავს ჩემს შემოქმედებაში.
— შუშასთან მუშაობა სიზუსტესა და მოთმინებას მოითხოვს. რა არის ამ საქმის ყველაზე რთული და ყველაზე სასიამოვნო ნაწილი❓❗
— ყველაზე რთული პასუხისმგებლობაა, რადგან მინა შეცდომას იშვიათად პატიობს. თუმცა ეს სირთულეც მიყვარს — სწორედ ის მაიძულებს, ყოველ დეტალს განსაკუთრებული ყურადღებით მოვეკიდო. ყველაზე სასიამოვნო კი ის მომენტია, როდესაც დასრულებული ნამუშევარი სინათლეს ხვდება და თითქოს ცოცხლდება.
—რომელ ნამუშევარს თვლით თქვენს ფავორიტად და რა ისტორია დგას მის უკან❓❗
— ძალიან მიჭირს რომელიმე ერთი ნამუშევრის გამორჩევა, რადგან თითოეულში ჩემი ცხოვრების გარკვეული ეტაპი, ემოცია და გამოცდილებაა ჩადებული. თუმცა განსაკუთრებული ადგილი მაინც „მზესუმზირებს“ უჭირავს, რადგან სწორედ მან აღმომაჩენინა მხატვრული ვიტრაჟი მთელი თავისი სიდიადით და ფერადოვნებით. მომცა დამატებითი მოტივაცია და ეს მიმართულებაც ჩემი შემოქმედების განუყოფელ და საყვარელ ნაწილად აქცია.
—რას გრძნობთ, როდესაც ხედავთ, რომ თქვენი ხელით შექმნილი ნივთი სხვის სახლს ან განსაკუთრებულ დღეს ამშვენებს❓❗
— ეს უდიდესი ბედნიერება და პასუხისმგებლობაა. ძალიან მიხარია, როდესაც ვიცი, რომ ჩემი ნამუშევარი ადამიანებს სიხარულს ანიჭებს, მათ სახლში განსაკუთრებულ ატმოსფეროს ქმნის და მათი ცხოვრების მნიშვნელოვანი მომენტების ნაწილი ხდება.
— რა სირთულეებთან არის დაკავშირებული თქვენი საქმიანობა და როგორ ახერხებთ მით გადალახვას❓❗
— ხელოვანის გზა მუდმივ შრომას, განვითარებასა და მოთმინებას მოითხოვს. ხშირად რთულია ახალი იდეების განხორციელება, ტექნიკური გამოწვევების დაძლევა და დროის სწორად განაწილება, თუმცა თითოეული სირთულე ჩემთვის ახალი გამოცდილებაა, რომელიც კიდევ უფრო მაძლიერებს და მაძლევს მოტივაციას, შევქმნა უკეთესი ნამუშევრები.
— რას ურჩევდით ადამიანებს, რომლებსაც ხელსაქმის დაწყება სურთ, მაგრამ პირველი ნაბიჯის გადადგმის ეშინიათ❓❗
— არ დაელოდონ იდეალურ მომენტს. იმოქმედონ. წარმატება ყოველთვის პირველი ნაბიჯით იწყება. შეცდომები განვითარების ნაწილია და სწორედ ისინი გვასწავლიან ყველაზე მნიშვნელოვან გაკვეთილებს. თუ სურვილი ჭეშმარიტია შედეგიც აუცილებლად მოვა.
—როგორ ხედავთ საკუთარ თავსა და თქვენს შემოქმედებას რამდენიმე წლის შემდეგ❓❗
—მინდა კიდევ უფრო მასშტაბური პროექტები შევქმნა, გავმართო ახალი გამოფენები, ჩემი ცოდნა და გამოცდილება კიდევ უფრო მეტ ადამიანს გავუზიარო და ჩემი საავტორო კურსებით როგორც საქართველოში, ისე მის ფარგლებს გარეთ უფრო ფართო აუდიტორიას მივწვდე. მინდა, ჩემი სახელი პირველ რიგში ხარისხთან, პროფესიონალიზმსა და ნამდვილ ხელოვნებასთან ასოცირდებოდეს.
—რა არის თქვენი ყველაზე დიდი ოცნება, როგორც ხელოვანისა და შემოქმედის❓❗
—ჩემი ყველაზე დიდი ოცნებაა, შევქმნა ისეთი ნამუშევრები, რომლებიც დროს გაუძლებს, ადამიანების გულებში დარჩება და შთაგონების წყაროდ იქცევა. ასევე, მინდა, ჩემი ცოდნითა და გამოცდილებით შევძლო ახალი თაობის ხელოვანების აღზრდა, რადგან მიმაჩნია, რომ ცოდნის გაზიარება შემოქმედის ერთ-ერთი ყველაზე მნიშვნელოვანი მისიაა.
— ბოლოს, თუ თქვენი ისტორია ერთი წინადადებით უნდა აღწეროთ, რას იტყოდით❓❗
— ნამდვილი მოწოდება ყოველთვის პოულობს გზას, რათა ჩვენი ცხოვრება გააფერადოს, ხოლო როცა მას სიყვარულით მიჰყვები, ის არა მხოლოდ შენს, არამედ სხვების ცხოვრებასაც უკეთესს ხდის.
მადლობას ვუხდით ქალბატონ სალომეს 💫
