14/07/2026
Rrezikuan jetën e pushuesve në jug, Policia bllokon dy gomone dhe vendos gjoba deri në 510 mijë lekë
Dy drejtues mjetesh lundruese janë ndëshkuar me gjoba të rënda nga Drejtoria Vendore për Kufirin dhe Migracionin (DVKM) Vlorë, pasi u kapën duke lundruar në afërsi të bregut, duke rrezikuar sigurinë e pushuesve në plazhet e jugut.
Sipas njoftimit zyrtar të Policisë së Shtetit, kontrollet intensive dhe reagimi i menjëhershëm pas denoncimeve të qytetarëve çuan në identifikimin dhe bllokimin e dy gomoneve, ndërsa drejtuesit e tyre u gjobitën me 500 mijë dhe 510 mijë lekë.
Rasti i parë u regjistrua në plazhin e Potamit, ku një gomone u konstatua duke lundruar shumë pranë vijës bregdetare. Pas sinjalizimit, shërbimet e DVKM Vlorë organizuan menjëherë kontrollet dhe lokalizuan mjetin në plazhin e Drimadhes. Gomonia u bllokua, ndërsa drejtuesi i saj, shtetasi me iniciale H. L., u ndëshkua me 500 mijë lekë gjobë.
Ndërkohë, gjatë patrullimeve përgjatë vijës bregdetare, efektivët konstatuan një tjetër gomone që lundronte në afërsi të bregut në zonën e njohur si “Plazhi i Hidrovorit”. Mjeti u ndalua dhe u bllokua, ndërsa drejtuesi, shtetasi E. Sh., u gjobit me 510 mijë lekë. Nga verifikimet rezultoi se ai nuk dispononte në bord dokumentacionin e detyrueshëm të parashikuar nga ligji.
Policia bën të ditur se kontrollet do të vijojnë në të gjithë hapësirën detare të qarkut Vlorë, me qëllim garantimin e sigurisë së pushuesve dhe respektimin e rregullave të lundrimit.
Autoritetet u bëjnë thirrje qytetarëve, pushuesve dhe vizitorëve që të denoncojnë çdo shkelje që cenon sigurinë detare apo rendin publik, duke garantuar reagim të menjëhershëm dhe zbatim të ligjit ndaj çdo shkelësi.
