JOSUÉ Konparèt

01/02/2022

Anpil nan nou kritike eta sosyete a san yo pa pote okenn kontribisyon pou sa miyò. Jan ou kapab, se mete men pou sa chanje nan antouraj ou. Chak moun gen sa yo ka fè pou sa miyò nan lavi antouraj yo. Pa sispann ede, mete men pou sa miyò, menm si sosyete sa engra. Jis jwe wòl ou nan chanjman, fè devwa w san w pa tann anyen. Pa chita ap gade sèlman, kritike san pwopoze ni mete men, fè sa w kapab pou w chanje lavi lòt yo.

25/12/2021

Pa antre nan foli depanse san gade dèyè tout ti sa w genyen nan sezon fèt sa. Bagay yo deja di, panse a jou kap vini apre fèt yo. Sitou mwa kap vini yo se kalmi, pa mete pil dèt sou do w ke w pap ka pote. Fèt la pap dire, men dèt yo ap peze lou sou pòch ou pou lontan. Kontwole depans ou pou w pa pran nan apre dans chay dèt yo lou. Jwi ak sa w genyen, san fè eksè, kontwole ti monnen ki nan pòch ou, apre fèt la gen lòt obligasyon kap tann ou.

22/12/2021

Aparans anpil moun ka blofe w. Anpil moun pa janm kite parèt vrè moun yo ye a. Nan analize moun sou aparans sèlman, nou souvan twonpe nou. E si w nan viv pou w jere aparans ou sèlman nan je sosyete a, ou chire pi rèd. Chèche konnen byen yon moun avan ou fè l konfyans. Viv lavi ki fè w byen an, ak mwayen ou genyen san ou pa pèdi tan w nan jere aparans. Nan mize sou aparans sèlman, ou riske rate lavi w epi wap viv ak anpil desepsyon .

Linktree. Make your link do more.

20/12/2021

Se bon maketing ki pou fè biznis ou mache

Gen yon biznis pa difisil, se jere li epi fè li mache ki di kichòy. Ki strateji maketing ou an plas pou ou atire kliyan epi vann pwodui ou yo? Ki zam, ki zouti ou pral itilize pou fè biznis ou a rive pi lwen ke posib?

Mete disiplin, epi etabli bon strateji piblisite, w ap sezi wè w rive kote w pa ta panse !

20/12/2021

Tout moun bezwen yon bon alye pou mete bò kote w. Yon moun ki konprann ou, ki la pou ou, ki pap defann enterè li sèlman bò kote w, yon pilye dèyè bannann ou, ki la pou soutni w nan tout sa wap regle. Moun sa pap san defo, men lap konble w anpil. Pa chèche yon moun pafè, men yon bon moun ki la tout bon vre pou ou.

17/12/2021

Nan moman difisil yo, vye panse negatif .konn anvayi lespri w ak tout antouraj ou. Nou tout konn fokis sou sa ki pa bon yo, epi nou wè sèl vye bagay. Si w kapab, se pote ti moso limyè, kè kontan ak bon panse pozitif pou ede tout moun kenbe epi kanpe kontinye goumen ak lavi a. Li pa fasil pou w reprann moral ou, epi pote sa ki pozitif nan moman fè nwa, men si w pa fè l, tout moun ap krake epi peri. Pote limyè pou antouraj nan moman fè nwa, se yon gwo èd kap itil nou tout.

30/11/2021

Pwoblèm lajan se pi gwo difikilte anpil fanmiy ak koup ap viv. Anpil moun chimè depi yo razè, lè w pa wè anwo ou pa wè anba, ou pèdi tout konpreyansyon w ak jantiyès ou. Lajan se rasin anpil pwoblèm nan kay la. Fanmi separe akòz sa, divòs mete pye akòz mank lajan. Enfidelite konn sèvi pretèks separasyon, men vrè pwoblèm nan se razè. Chèche mwayen pou w antre lajan pou relasyon w ak fwaye w ka dire.

09/11/2021

Solidarite se pi gwo fòs kap kenbe moun nan viv ansanm. Sonje gen bagay tank ou pataje yo, tank yap plis. Tankou lanmou, konesans, lespwa. Sitou nan moman difisil sa yo, pa ezite pataje ak sa ki nan bezwen. Kit se moso pen, moso lanmou, moso lespwa. Jan w kapab, ede fè limyè ak kè kontan blayi nan antouraj ou. Pataje gen plis sans nan move moman, se pa lè w nan abondans sèlman. Pataj ak solidarite se pi gwo fòs nan mitan move moman yo.

08/11/2021

Pwoblèm yo tèlman anpil, gen moun ki pare pou fè tout bagay pou yo bliye sousi yo. Pinga w pèdi moun ou ye a, prensip ou ak valè w yo nan chèche bliye pwoblèm ou yo. Sitou pinga ou kreye plis pwoblèm pou ou demen nan chèche bliye pwoblèm ou yo jodya. Fas a chak pwoblèm, poze san w pou w jwen solisyon yo. Fè foli, lage nan plezi, nwaye sousi w ak alkòl pa solisyon, mete kran sou ou pou w afwonte pwoblèm ou yo.

08/11/2021

Se pa tout bagay kè w swete , ke w anvi, kap bon pou ou. Pafwa santiman w konn fè w avèg, mennen w nan chimen ki pap bon pou ou. Gen bagay kap fè w plezi jodya, men ki pap bon pou avni w, ki ka fè w soufri plis pi devan. Ou dwe swiv kè w, men pa kite se santiman w sèlman kap mennen w paske se pa tout bagay ki fè w plezi jodya kap bon pou ou.

Linktree. Make your link do more.

08/11/2021

Gen frap wap pran nan lavi w jodya, se yo kap fè fòs ou demen pou w kontinye batay. Nan move moman sa yo sitou, se ranmase kouraj ou pou w kanpe, epi chèche wout pou w soti tèt ou. Move eksperyans ou nan lavi la pou ranfòse karaktè w. Kit se trayizon, tray wap pase avan w reyisi, kit se move baf lavi pou w kontinye egziste, tout la pou fè w vinn pi fò. Pa lage, pa fè bak, lavi se yon lekòl kap prepare w pou w vinn pi fò, gen plis karaktè, pou w vinn plis sou men w tou pou demen.

Linktree. Make your link do more.

07/11/2021

Idantite w se fòs ou, men etikèt yo kole sou do w se pi gwo obstak ou ka genyen. Pafwa moun nan jis gade w li mete w nan lo moun afè pa bon, moun rich, moun sòt, moun save, moun deprave san li pa menm konnen w. Pa kite se moun kap defini kiyès ou ye, pa kite kote yap chèche kaze w la se li ki fè w. Rezilta travay ou dwe montre yo ke yo te twonpe yo sou ou. E sitou sonje se diferans ou kap pèmèt ou jwen bon plas ou nan sosyete a. Nan sa wap fè, nan moun ou ye a, batay pou w diferan de tout rès lo a.

Linktree. Make your link do more.