22/08/2026
#సాధారణంగా ఒక వ్యక్తి మరణిస్తే అతడి అధ్యాయం ముగిసిపోయిందని అంతా భావిస్తుంటారు. అయితే ప్రముఖులు, సెలబ్రిటీలకు మాత్రం ఇందులో కాస్త మినహాయింపు ఉంటుంది.
షేక్ స్పియర్ పుర్రె మాయం
ఆంగ్ల భాషలో అత్యంత ప్రసిద్ధి చెందిన నాటక రచయిత, కవి షేక్ స్పియర్ 1616లో మరణించిన సంగతి తెలిసిందే. ఆయన్ను స్ట్రాట్ఫోర్డ్-అపాన్-అవాన్లో సమాధి చేయగా.. కొన్ని శతాబ్దాల తర్వాత ఆయన పుర్రె చోరీకి గురైనట్లు ప్రచారం మెుదలైంది. దీంతో 2016లో పరిశోధకులు ఆయన సమాధిని పరిశీలించగా.. నిజంగానే పుర్రె భాగం కనిపించలేదు.
ఎవా పెరాన్, జువాన్ పెరాన్కు అవమానం
అర్జెంటీనా మాజీ ప్రథమ మహిళ ఎవా పెరాన్ 1952లో క్యాన్సర్తో మరణించగా.. ఆమె భౌతిక కాయం రాజకీయాలకు కేంద్ర బిందువుగా మారింది. ఆమె భౌతిక కాయం ప్రజలను ఐక్యం చేస్తుందనే భయంతో మిలిటరీ దానిని రహస్యంగా ఇటలీకి తరలించి వేరే పేరుతో పాతిపెట్టింది. చివరకు 1971లో ఆమె భౌతిక కాయాన్ని గుర్తించి.. 1976లో తిరిగి అర్జెంటీనాలో పాతిపెట్టారు. మరోవైపు ఆమె భర్త అర్జెంటీనా మాజీ అధ్యక్షుడు జువాన్ పెరాన్ 1974లో మరణించగా 1987లో దొంగలు ఆయన సమాధిని తవ్వి రెండు చేతులను నరికి పట్టుకెళ్లారు. మిలియన్ల డాలర్ల డబ్బును డిమాండ్ చేసినప్పటికీ ఆ చేతులు ఇప్పటివరకు లభించలేదు.
