Bengtol Anchalik Committee, ABSU

08/07/2026

बेंतल द'खरा गाहाय मावख' बेंतल, सिरां।
अक्ट'- 8 जुलाइ, 2026इं

👉गंसे फरायसालिया जोंनि इयुन जोलैफोरखौ दाखांनायनि थिलि, बेखौ जोथोन लानाया जोंनि बिबान। फै जों जोंनि फरायसलिफोरखौ जोथोन लाखिनि।

*बड'फा गोजोरथियारि सोलायनाय मावथांखि*
*BODOFA MISSION FOR SUSTAINABLE CHANGE*

*फरायसालिखौ साखोन-सिखोन खालामनाय हाबाफारि*

बेंतल द'खरा दुलाराय बर' फरायसा आफादा "बड'फा गोजोरथियारि सोलायनाय मावथांखि" खौ बिथा खालामनानै द'खरानि साखाथियाव थानाय बेंतल एम, भि गेजेर फरायसालिखौ दिनै बेंतल द'खरानि सिंआव थानाय गासै मोनब्रै दालायसा आफादफोरनि मददजों सोलोंनायनि आबहावा सोरजिनायनि थांखिजों फरायसालि साखोन सिखोन खालामनाय हाबाफारि मावफुङो।

बे हाबाफारिखौ गासै फरायसालिनि आबहावाखौ गोख्रों खालामनो, फरायसालिखौ फरायसाफोरनि थाखाय बांसिन गोसो बोनो हानाय आरो थुलुंगा होनो लोगोसे बिमा-बिफा आरो गार्जियन फोरखौ गावनि गथ'फोरनि मुं थिसन्नायाव बांसिन फोथायथि सोरजिनाय आरो बे हाबाफारिनि गेजेरजों फोरोंगिरि, फरायसा, बिमा-बिफा आरो जायगानि सुबुं समाजनि गेजेराव बर' बिजोंनि फरायसालिफोरखौ गोख्रों हेफाजाब आरो खौसेथिनि मोन्दांथिखौ बांहोनांगौनि थाखाय नोजोर बोनानै लानाय जायो।

बेंतल द'खरा एबसुनि गाहाय नेहाथारि देभिद बसुमतारी दैदेननाय बे हाबाफारियाव बेखेवगिरि आलासि मसरै सिरां जिल्ला एबसुनि बोसोनगिरि थारसोन बसुमतारी बिथांआ बाहागोलायो लोगोसेनो मिरू एबसुनि हारिमु नेहाथारि सुसिल इस्लारि, सिरां जिल्ला एबसुनि नेहाथारि सुरज नार्जारि, सिलेस्थेन बसुमतारी, बेंतल द'खरा एबसुनि आफादगिरि सोमदोन औवारी, सिरां जिल्ला दुलाराय बर हारिमु आफादनि आफादगिरि बिस्थिराम बर', बेंतल गुदि बर थुनलाइ आफादनि गाहाय नेहाथारि रहेन हाज'वारी, बेंतल एम भि फरायसालिनि गाहाय फोरोंगिरि जनाथन समफ्रामारि, लोगो फोरोंगिरि केनेदि बसुमतारी, जनमेन्र्द ब्रह्म, बेंतल द'खरा एबसुनि बारग आफादगिरि राजिब बसुमतारी, बारग रांगिरि बिरन नार्जारि, बारग नेहाथारि राजिब बसुमतारी बिथांमोनहा मैखोमै बाहागो लादोंमोन।

04/07/2026

बेंतल द'खरा गाहाय मावख' बेंतल, सिरां।
अक्ट- 4 जुलाई 2026इं।

दिनै बेंतल दख'रा दुलाराय बर’ फरायसा आफादनि सिङाव थानाय फारियै बेंतल गोजौसिन गेजेरारि फरायसालि, थुक्राझार गोजौसिन गेजेरारि फरायसालि आरो सुबायझार पि एम स्री गोजौ फरायसालिआव गोलोम बोथोरनि बन्द समाव बेसेन नाङै फोरोंथाइ मावबादा, दान मोनसेनि थाखाय थाखो-9 आरो 10 नि फरायसाफोरनो बेखेवना होयो।

दिनैनि बे फोरोंथाइ मावबादा बेखेवनाय हाबाफारियाव बुंथिगिरि आलासि महरै बाहागो लायो, मिरू एबसुनि हारिमु नेहाथारि सुसिल इस्लारि, सिरां जिल्ला एबसुनि बुंथिगिरि अबिनास ब्रह्म लोगो बुंथिगिरि जोंसाद बसुमतारी बिथांमोनहा, हाबाफारियावनो बेंतल द'खरा एबसुनि आफादगिरि गाहाय नेहाथारि जों लोगोसे दख'रा एबसुनि गुबुन गुबुन बिबानाव थानाय बाबानगिरि बिथां मोनहाबो मेल सामलाइगिरि महरै बाहागो लायो।

25/06/2026

बेंतल द'खरा गाहाय मावख' बेंतल, सिरां।
अक्ट’- 25 जुन 2026इं

देग्लाय 2026 इं मायथाइनि जौसिन गेजेरारिनि जोबथा आनजादआव बिगियान आरो आरिमु मोननै बिफाननिफ्राय उथ्रिसारनानै बेंटल जौसिन गेजेरारि फरायसालिनि मादाव जौसिन 5 थि मासि आवग्रिनो हानाय फरायसाफोरखौ “बरायनाय आरो मान बाउनाय हाबाफारि - 2026” खौ बेंटल सोलोंसालिमा दालाय दुलाराय बर’ फरायसा आफादनि बान्जायनायाव भबेन चन्द्र औवारि न’ब्लां, बेंटल सोलोंसालिमा आव सानसेनि मेहेर गोनां हाबाफारिजों गाजा गोमजायै खुंफुङो।
बे हाबाफारियाव गाहाइ आलासि महरै बाहागो लायो दुलाराय बर’ फरायसा आफादनि लोगो गाहाइ नेहाथारि मुस्रि दिनेस ब्रह्म बिथाङा। बिथांजों लोगोसे बाहागो लाफायो मिरु एबसुनि सुबुं फोनांजाब नेहेथारि मुस्रि सोमदोन ब्रह्म, हारिमु नेहाथारि मुस्रि सुसिल इसलारि बिथांमोनहा।
हाबाफारियावनो माननि आलासि महरै बाहागो लायो सिरां जिल्ला दुलाराय बर’ फरायसा आफादनि गाहाइ नेहाथारि ड॰ रेडियान नारजारि आरो लोगोसे बाहागो लायो जिल्लानि सुबुं फोनांजाब नेहाथारि मुस्रि बिलास ब्रह्म आरो काजलगाव दख’रा एबसुनि गेलेमु नेहाथारि मुस्रि खोमदोन ब्रह्म बेंतल द'खरा एबसुनि आफादगिरि सोमदोन औवारी, गाहाय नेहाथारि देभिद बसुमतारी बिथांमोनहा।

12/06/2026

बेंतल द'खरा गाहाय मावख' बेंतल, सिरां।
अक्ट-12 जुन 2026इं।

👉गोसोखौ समायना जिउनि थांखिजों आबुं खालाम फरायसाफोर, थांखिनि बै बुब्लियाव गोजोन समखौ हास्थायनानै।

दिनै बेंतल दालाइसा एबसुनि सिंआव थानाय St. Joseph ME School, आवजार थिनियालि गेजेर फरायसालि आरो सालबारि जावलिया देवान गेजेर फरायसालि बे मोनथाम फरायसालियाव मिरु एबसुनि #गुनगोनां_सोलोंथाइनि_जांख्रिखांनाय_मावथांखि खौ बिथा खालामनानै थाखो द' (6) निफ्राय थाखो दाइन (8) नि फरायसाफोरजों गोसो थुलुंगाखांनाय सावरायनाय हाबाफारि लानाय जायो।

हाबाफारियाव बुंथिगिरि महरै सिरां जिल्ला एबसुनि लोगो बुंथिगिरि जोंसाद बसुमतारी, बेंतल द'खरा एबसुनि आफादगिरि सोमदोन औवारी , बेंतल दालाइसा एबसुनि आफादगिरि सनेस्व'र ब्रह्म, सोलोंथाइ नेहाथारि दिदोम बसुमतारी, बेंतल फरायसालिमा एबसुनि बारग' आफादगिरि बिसिनाथ बसुमतारी आरो बेंतल फरायसालिमा एबसुनि बुंथिगिरि सक्रेतिस बसुमतारी बिथांमोनहा बाहागो लायो।

12/06/2026

बेंतल द'खरा गाहाय मावख' बेंतल सिरां।
अक्ट- 12 जुन 2026इं।

✊ नोंनि जिउनि बेसेनखौ, सानसे बडलेण्डनि महर होनो जों अराय नाजागोन। जै बर' हारिनि जै।

दिनै 39थि बडलेण्ड' मुंख्लं सान, दिनैनि दिनावननो बड'फानि दैदेननायजों बर'फोरा आलादा रायजो बडलेण्ड' मोननांगौनि थाखाय मैखोम सोमाव सारनायाव सुजित नारजारिया मुंख्लं जादोंमोन। दिनै बिथांनि गावखौ बावसोमना हारिखौ फोजा खांलांनायखौ गोसो खांनानै बेंतल द'खरा एबसुनि मावख'आव मुंख्लं सुजित नारजारिनि सावगारियाव बिबार बाउनायजों लोगोसे एबसुनि फिरफिलाखौ खावसे बिरहोनाय जायो।

बेंतल द'खरा एबसुनि लोगो गाहाय नेहाथारि हांगामा नार्जारि दैदेननाय बे हाबाफारियाव आफादनि फिरफिलाखौ खावसे बिरहोयो बेंतल द'खरा एबसुनि आफादगिरि सोमदोन औवारी बिथांआ लोगोसे मुंख्लं सुजित नारजारिनि सावगारियाव बिबार बाउजेनो मिरू एबसुनि हारिमु नेहाथारि सुसिल इस्लारि बिथांआ, हाबाफारियावनो सिरां जिल्ला दुलाराय बर' फरायसा आफाद/ Chirang District Committee, ABSU नि सासे नेहाथारि सिलिसथेन बसुमतारी बिथांआबो बाहागो लायो, मख'नो गोनांदि बेंतल द'खरा एबसुनि गुबून गुबुन बिबानाव थानाय बाबानगिरिफोरजों लोगोसे मोनब्रै दालायसा एबसुनि आफादगिरि गाहाय नेहाथारि फोरजों लोगोसे बिथांमोननि मावथि बिबानगिरि बिथांमोनहाबो मैखोमै बे हाबाफारियाव बाहागो लानायखौ नुनाय जादों।

10/06/2026

बेंतल द'खरा गाहाय मावख' बेंतल, सिरां।
अक्ट' : 10 जुन, 2026इं

👉समायना जिउ लुखांनो गुनगोनां सोलोंथाइनि गोनांथि, फै फरायसाफोर जोंहा गोग्गो आरो गुनगोनां सोलोंथाय लानायाव गोसो होनि।

बेंतल द'खरा दुलाराय बर' फरायसा आफादनि सिङाव थानाय थुख्राजार दालाइसा एबसुआ "गुन गोनां सोलोंथाइ जांख्रिखांनाय मावथांखि" खौ बिथा खालामनानै थुख्राजार गोजौसिन गेजेरारि फरायसालि, सालबारि गेजेर फरायसालियाव फरायसाफोरजों सोलोंथाइ, इयुन जिउ राहा दानाय लोगोसे गोसो थुलुंगाखां होनाय हाबाफारि लायो।

बे हाबाफारियावनो बुंथिगिरि महरै सिरां जिल्ला एबसुनि नेहाथारि मुस्रि सुरज नार्जारी, लोगो सोलोंथाइ नेहाथारि मुस्रि खामेस्वर बसुमतारी आरो लोगो बुंथिगिरि मुस्रि जोंसार बसुमतारी, बेंतल द'खरा एबसुनि आफादगिरि सोमदोन औवारी थुख्राझार दालाय एबसुनि आफादगिरि मेरिथ बसुमतारी गाहाय नेहाथारि जोंसाद नार्जारि बेंतल फरायसालिमानि बरग आफादगिरि बिसिनाथ बसुमतारी बिथांमोनहा बाहागो लाहैयो ।

06/06/2026

बेंतल द'खरा गाहाय मावख' बेंतल, सिरां।
अक्ट- 06 जुन 2026इं।

👉 #जाफुंसारनायनि_गुबै_जांख्लाया_सोलोंथाइ बिनिखायनो फै फरायसाफोर, जोंहा गोग्गो सोलोंथाइ लानो आरो गोग्गो गेरेमसा मोनसे हारि समाज दालांनो।

मिरु दुलाराय बर' फरायसा आफादनि मावथांखि #गुनगोनां_सोलोंथाइनि_जांख्रिखांनाय_मावथांखि खौ बिथा खालामनानै, सुबायझार दालाय एबसुनि सिंआव थानाय सुबायझार पि.एम.स्री गोजौ फरायसालियाव थाखो द' (6) निफ्राय थाखो जि (10)नि फरायसाफोरजों थाखो खथायाव गोसो थुलुंगाखांनाय सावरायनाय हाबाफारि लानाय जायो।

हाबाफारियाव बुंथिगिरि महरै बाहागो लायो मिरु एबसुनि हारिमु नेहाथारि सुसिल इस्लारि आरो बेंतल द'खरा एबसुनि आफादगिरि सोमदोन औवारी बिथांमोनहा।

05/06/2026

बेंतल द'खरा गाहाय मावख' बेंतल, सिरां।
अक्ट- 05 जुन 2026इं।

********** ुन_मुलुगनां_आबहावा_सान**************
🌞2026🌞
दिनै बेंतल द'खरा एबसुनि मावख' आरो साखाथि लांगोनानि हाग्राफोरखौ एवस्रांना, सिगांआव गायनानै दोनजानाय बिफांफोरखौ फोसावनाय हाबाफारि लानाय जायो।

04/06/2026

04/06/2026

बेंतल द'खरा गाहाय मावख' बेंतल, सिरां।
अक्ट- 04 जुन 2026इं।

👉 सोलोंथाइ गैयै सासे सुबुंआ बैथा गैयै दिङा जों समान।
फै फरायसाफोर, जोंहा गोग्गो सोलोंथाइ लानो आरो गोग्गो मोनसे हारि समास दालांनो।

दिनै मिरु दुलाराय बर' फरायसा आफादनि मावथांखि #गुनगोना_सोलोंथाइनि_जांख्रिखांनाय_मावथांखि खौ बिथा खालामनानै, बेंतल द'खरा एबसु आरो बेंतल दालायसा एबसुनि बानजायनायाव बेंतल गेजेर गोजौसिन फरारसालि,(Bengtol H S School) बेंतल एम भि फरायसालि (Bengtol MV School) बडलेण्ड एकादेमी फरायसालि, गासै गंथाम फरायसालियाव थाखो द' (6) निफ्राय थाखो जिनै (12) नि फरायसाफोरजों थाखो खथायाव गोसो थुलुंगाखांनाय सावरायनाय हाबाफारि लानाय जायो।

हाबाफारियाव बुंथिगिरि महरै बाहागो लायो मिरु एबसुनि हारिमु नेहाथारि सुसिल इस्लारि, सिरां जिल्ला दुलाराय बर' फरायसा आफाद/ Chirang District Committee, ABSU नि लोगो आफादगिरि रैरूप बसुमतारी, सुबुं फोनांजाब नेहाथारि बिलास ब्रह्म आरो बेंतल द'खरा एबसुनि आफादगिरि सोमदोन औवारी बिथांमोनहा।