07/09/2026
#ରେମୁଣା #ଦୁର୍ଗାଦେବୀ :କ୍ରାନ୍ତି ଦର୍ପଣ
ରେମୁଣା :ଦୁର୍ଗାଦେବୀ ଜଗନ୍ନାଥ ମନ୍ଦିରରେ ଛାତ୍ରଛାତ୍ରୀମାନଙ୍କ ଦ୍ୱାରା ନନ୍ଦଉତ୍ସବ ପାଳିତ
କୃଷ୍ଣ, ରାଧା ଓ ଗୋପୀ ବେଶରେ ସଜିଲେ କୁନି କୁନି ଛାତ୍ରଛାତ୍ରୀ; ଭଜନ, ନୃତ୍ୟ ଓ ସାଂସ୍କୃତିକ ପରିବେଷଣରେ ମୁଖରିତ ହେଲା ପରିବେଶ
ରେମୁଣା: ଭକ୍ତି ଓ ଆନନ୍ଦମୟ ପରିବେଶ ମଧ୍ୟରେ ରେମୁଣା ଅଞ୍ଚଳର ଦୁର୍ଗାଦେବୀ ଜଗନ୍ନାଥ ମନ୍ଦିର ପରିସରରେ ନନ୍ଦଉତ୍ସବ ଆନନ୍ଦ ଉଲ୍ଲାସର ସହିତ ପାଳିତ ହୋଇଯାଇଛି। ଦୁର୍ଗାଦେବୀ ସରସ୍ୱତୀ ଶିଶୁ ବିଦ୍ୟାମନ୍ଦିରର ଛାତ୍ରଛାତ୍ରୀମାନଙ୍କ ଦ୍ୱାରା ଆୟୋଜିତ ଏହି ଉତ୍ସବରେ ଭାରତୀୟ ସଂସ୍କୃତି, ପରମ୍ପରା ଓ ଶ୍ରୀକୃଷ୍ଣଙ୍କ ବାଲ୍ୟଲୀଳାର ମନୋରମ ଝଲକ ଦେଖିବାକୁ ମିଳିଥିଲା।
ନନ୍ଦଉତ୍ସବ ଅବସରରେ ବିଦ୍ୟାଳୟର କୁନି କୁନି ଛାତ୍ରଛାତ୍ରୀମାନେ ଶ୍ରୀକୃଷ୍ଣ, ରାଧା, ଗୋପ-ଗୋପୀ ଓ ବିଭିନ୍ନ ପୌରାଣିକ ଚରିତ୍ରର ବେଶରେ ସୁସଜ୍ଜିତ ହୋଇଥିଲେ। ସେମାନଙ୍କର ଆକର୍ଷଣୀୟ ବେଶଭୂଷା ଓ ମନୋରମ ପରିବେଷଣ ଉପସ୍ଥିତ ଅଭିଭାବକ, ଗୁରୁଜୀ-ଗୁରୁମା ଓ ଅତିଥିମାନଙ୍କ ମନ ମୋହିଥିଲା।
ଏହି ଅବସରରେ ଛାତ୍ରଛାତ୍ରୀମାନେ ଭଜନ, କୀର୍ତ୍ତନ, ନୃତ୍ୟ ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ। ଶ୍ରୀକୃଷ୍ଣଙ୍କ ବାଲ୍ୟଲୀଳାକୁ ଆଧାର କରି ଛାତ୍ରଛାତ୍ରୀମାନଙ୍କ ଚିତ୍ତାକର୍ଷକ ପରିବେଷଣ ମନ୍ଦିର ପରିସରକୁ ଭକ୍ତିମୟ କରିଦେଇଥିଲା। କୁନି କୁନି ପିଲାଙ୍କ ମୁହଁରେ କୃଷ୍ଣଭକ୍ତିର ଭାବ ଓ ସେମାନଙ୍କ ଉତ୍ସାହ ଉତ୍ସବର ଆକର୍ଷଣକୁ ଆହୁରି ବଢ଼ାଇଥିଲା।
କାର୍ଯ୍ୟକ୍ରମ ଅବସରରେ ଗୁରୁଜୀ ଓ ଗୁରୁମାମାନେ ନନ୍ଦଉତ୍ସବର ମହତ୍ତ୍ୱ ସମ୍ପର୍କରେ ଛାତ୍ରଛାତ୍ରୀମାନଙ୍କୁ ଅବଗତ କରାଇଥିଲେ। ଶ୍ରୀକୃଷ୍ଣଙ୍କ ଜୀବନାଦର୍ଶରୁ ସତ୍ୟ, ଧର୍ମ, ନୀତି, କର୍ତ୍ତବ୍ୟବୋଧ ଓ ମାନବିକତାର ଶିକ୍ଷା ଗ୍ରହଣ କରିବା ପାଇଁ ପିଲାମାନଙ୍କୁ ପରାମର୍ଶ ଦିଆଯାଇଥିଲା।
ଏଭଳି ଧାର୍ମିକ ଓ ସାଂସ୍କୃତିକ ଉତ୍ସବ ମାଧ୍ୟମରେ ଛାତ୍ରଛାତ୍ରୀମାନଙ୍କ ମନରେ ଆମ ପରମ୍ପରା ଓ ସଂସ୍କୃତି ପ୍ରତି ଶ୍ରଦ୍ଧା ସୃଷ୍ଟି କରିବା ସହ ନୈତିକ ମୂଲ୍ୟବୋଧର ବିକାଶ କରିବା ଉଦ୍ଦେଶ୍ୟ ରହିଥିବା କୁହାଯାଇଥିଲା।
ଶେଷରେ ଶ୍ରୀକୃଷ୍ଣଙ୍କ ନିକଟରେ ପୂଜାର୍ଚ୍ଚନା ପରେ ସମସ୍ତଙ୍କ ମଧ୍ୟରୁ ପ୍ରଧାନ ଆଚାର୍ଯ୍ୟ ରମେଶ ଚନ୍ଦ୍ର ମହାପାତ୍ର ଙ୍କ ସମେତ ଗୁରୁଜୀ-ପ୍ରଶାନ୍ତ କୁମାର ସିଂହ, ସଂଜୀବ କୁମାର ଦେ, ପ୍ରମୋଦ କୁମାର ମହାର୍ଣ୍ଣା ଏବଂ ଗୁରୁମା ସୁଶୀଲା ଜେନା,ସରସ୍ବତୀ ଗିରୀ, ସରସ୍ବତୀ ଦେହୁରୀ ଏବଂ ଗାୟତ୍ରୀ ଦାସ ଙ୍କ ସହଯୋଗ ଓ ଅଭିଭାବକମାନଙ୍କ ଉପସ୍ଥିତିରେ ନନ୍ଦଉତ୍ସବ ସୁନ୍ଦର ଓ ସଫଳତାର ସହ ପାଳିତ ହୋଇଥିଲା। ଏହି ଅବସରରେ ଦୁର୍ଗାଦେବୀ ଜଗନ୍ନାଥ ମନ୍ଦିର ପରିସର ନନ୍ଦ ଘରେ ଆନନ୍ଦର ଭାବନାରେ ଉତ୍ସବମୁଖର ହୋଇଉଠିଥିଲା।
ରିପୋର୍ଟ -ଦୀପକ କୁମାର ମାଝୀ,
