16/09/2026
ದಾಳಿಂಬೆ ಹಣ್ಣಿನ ಉಡುಗೊರೆಯ ಹಿಂದಿನ ಕಥೆ: ಕಣ್ಣೀರಿನ ಹಾದಿಯಿಂದ ಸಂತಸದ ತೀರಕ್ಕೆ!
ಬರ ಮತ್ತು ಬಿಸಿಲಿನ ಬೇಗೆಗೆ ಕಾದ ಹೆಂಚಿನಂತಾಗಿದ್ದ ಮುಳವಾಡದ ಕಲ್ಲು-ಮಣ್ಣಿನ ಗುಡ್ಡಗಳು. 65 ಎಕರೆ ಜಮೀನು ಇದ್ದರೂ ಹನಿ ನೀರಿಲ್ಲದೆ, ಶಿವು ಜಾಧವ್ ಅವರ ಕುಟುಂಬದ ಬದುಕು ಬರಡಾಗಿತ್ತು.
ಸ್ವಂತ ಜಮೀನು ಇದ್ದರೂ ನೀರಿಲ್ಲ. ಮನೆ ನಡೆಸುವುದೇ ಕಷ್ಟ. ಬರಗಾಲದ ಕಾರಣ ಮಕ್ಕಳು ಪಾಂಡು ಮತ್ತು ಖೇಮು ಮಹಾರಾಷ್ಟ್ರಕ್ಕೆ ಕೂಲಿಗಳನ್ನು ಕಳುಹಿಸುವ ಗುತ್ತಿಗೆದಾರರಾಗಿ ದುಡಿಯಬೇಕಾಯಿತು.
ಇದರ ನಡುವೆ ಹಿರಿಯ ಮಗ ಪಾಂಡು ಜಾಧವ್ ಅವರಿಗೆ ಬ್ರೇನ್ ಟ್ಯೂಮರ್. ಆಸ್ಪತ್ರೆಯ ಚಿಕಿತ್ಸೆ ಸೇರಿದಂತೆ ಕೋಟಿಗೂ ಅಧಿಕ ಸಾಲದ ಹೊರೆ ಕುಟುಂಬದ ಮೇಲೆ ಬಿತ್ತು. ಅನಿವಾರ್ಯವಾಗಿ ಪಿತ್ರಾರ್ಜಿತ ಆಸ್ತಿಯ 6 ಎಕರೆ ಜಮೀನನ್ನು ಮಾರಾಟ ಮಾಡಬೇಕಾಯಿತು.
ಆದರೆ, ಕತ್ತಲೆಯ ರಾತ್ರಿಯ ನಂತರ ಬೆಳಕು ಮೂಡಲೇಬೇಕು ಎಂಬಂತೆ, ನಾವು ಯಶಸ್ವಿಯಾಗಿ ಜಾರಿಗೊಳಿಸಿದ ನೀರಾವರಿ ಯೋಜನೆಗಳು ಈ ಕುಟುಂಬದ ಬದುಕಿನ ದಿಕ್ಕನ್ನೇ ಬದಲಿಸಿದವು.
ಅಣ್ಣ-ತಮ್ಮಂದಿರು ಕಷ್ಟಪಟ್ಟು ದುಡಿದು, ಕಲ್ಲು-ಮಣ್ಣಿನ ಗುಡ್ಡಗಳನ್ನು ಕೊರೆದು, ಬರಡು ಭೂಮಿಯನ್ನು ಬಂಗಾರದ ಭೂಮಿಯನ್ನಾಗಿ ಪರಿವರ್ತಿಸಿದರು.
ಇಂದು ಅವರ ಶ್ರಮಕ್ಕೆ ತಕ್ಕ ಫಲ ದೊರೆತಿದೆ. 15 ಎಕರೆ ದ್ರಾಕ್ಷಿ, 15 ಎಕರೆ ಮೆಕ್ಕೆಜೋಳ ಹಾಗೂ 5 ಎಕರೆ ದಾಳಿಂಬೆ ಸಮೃದ್ಧವಾಗಿ ಬೆಳೆದು ನಿಂತಿವೆ.
ಗಣೇಶ ಹಬ್ಬದ ದಿನದಂದು ಪಾಂಡು ಜಾಧವ್ ಹಾಗೂ ಅವರ ಕುಟುಂಬದವರು ವಿಜಯಪುರದ ನಮ್ಮ ನಿವಾಸಕ್ಕೆ ಆಗಮಿಸಿ, ಕೃತಜ್ಞತೆಯ ಸಂಕೇತವಾಗಿ ದಾಳಿಂಬೆ ಹಣ್ಣುಗಳಿಂದ ತುಂಬಿದ ಬುಟ್ಟಿಯನ್ನು ಉಡುಗೊರೆಯಾಗಿ ನೀಡಿದರು.
ತಮ್ಮ ಹಿಂದಿನ ಕಷ್ಟಗಳನ್ನು ನೆನಪಿಸಿಕೊಂಡು ಅವರು ಭಾವುಕರಾದರು. ಪಿತ್ರಾರ್ಜಿತ ಆಸ್ತಿ ಮಾರಾಟ ಮಾಡಬೇಕಾದ ನೋವನ್ನು ಮರೆಯಲು, ತಮ್ಮ ಸ್ವಂತ ಗ್ರಾಮದಲ್ಲಿ 5 ಎಕರೆ ಹಾಗೂ ವಿಜಯಪುರದ ಸಮೀಪ 3 ಎಕರೆ ಜಮೀನು ಖರೀದಿಸಿರುವುದಾಗಿ, ತೋಟದಲ್ಲಿಯೇ ಸುಸಜ್ಜಿತ ಮನೆ ಕಟ್ಟಿಕೊಂಡಿರುವುದಾಗಿ, ವಿಜಯಪುರದಲ್ಲಿ ಸುಮಾರು ₹1 ಕೋಟಿ ವೆಚ್ಚದಲ್ಲಿ ಮನೆ ಖರೀದಿಸಿರುವುದಾಗಿ ಹಾಗೂ ತಮ್ಮ ಮಕ್ಕಳನ್ನು ಉತ್ತಮವಾಗಿ ಓದಿಸುತ್ತಿರುವುದಾಗಿ ಹೆಮ್ಮೆಯಿಂದ ತಿಳಿಸಿದರು.
ಒಂದು ಕಾಲದಲ್ಲಿ ಬರ, ಸಾಲ ಮತ್ತು ಅನಾರೋಗ್ಯದಿಂದ ಕಣ್ಣೀರಿಟ್ಟಿದ್ದ ಕುಟುಂಬ, ಇಂದು ತಮ್ಮ ಶ್ರಮದಿಂದ ನೆಮ್ಮದಿಯ ಬದುಕು ಕಟ್ಟಿಕೊಂಡಿದೆ.
ಕಣ್ಣೀರಿನ ಹಾದಿಯಿಂದ ಸಂತಸದ ತೀರಕ್ಕೆ ತಲುಪಿದ ಶ್ರೀ ಪಾಂಡು ಜಾಧವ್ ಅವರ ಕುಟುಂಬದ ಪಯಣ ಉಳಿದ ರೈತರಿಗೆ ಸ್ಪೂರ್ತಿಯಾಗಲಿ.
