10/06/2026
काल सायंकाळी लातूर शहरातील डॉ.शशिकांत कुकाले, डॉ. संतोष तुपडीकर, डॉ. श्रुती कुकाले, डॉ. सविता तुपडीकर यांच्या त्रिमूर्ती हॉस्पिटलमध्ये उपलब्ध करण्यात आलेल्या रोबोटिक शस्त्रक्रिया यंत्रणेचे, लातूरचे लोकप्रिय खासदार डॉ. शिवाजी काळगे व मान्यवरांसह उपस्थित राहून लोकार्पण केले.
राज्याचे माजी मुख्यमंत्री आदरणीय विलासराव देशमुख साहेब यांनी “जे जे नवं ते ते लातूरला हवं” असा ध्यास घेऊन या शहराच्या विकासाला चालना दिली. त्यांच्या त्या ध्यासाची प्रेरणा घेऊन आज लातूरचा प्रत्येक माणूस कार्यरत झालेला आहे, त्यामुळे शहराच्या विकासाला प्रचंड गती प्राप्त होत आहे. व्यापार आणि औद्योगिक केंद्र म्हणून नावारूपाला आलेल्या लातूरचा नंतर शैक्षणिक केंद्र म्हणून लौकिक वाढलेला आहे. अलीकडच्या काळात आरोग्य सेवेचे केंद्र म्हणूनही लातूरची देश पातळीवर ओळख निर्माण होत आहे.
लातूरात आज असंख्य डॉक्टर मंडळी सेवाभावी वृत्तीने कार्यरत झाली आहेत, सर्वसामान्यांना परवडतील अशा दरात येथे उपचाराच्या अद्यावत सुविधा उपलब्ध झाल्या आहेत. त्यामुळे उपचारासाठी येथे येणाऱ्या रुग्णांची संख्या दिवसेंदिवस वाढते आहे. अद्यावत तंत्रज्ञानाचा ध्यास घेतलेले डॉ.शशिकांत कुकाले व त्यांच्या सहकार्यांनी जागतिक दर्जाच्या वैद्यकीय सुविधा उपलब्ध करून दिल्या आहेत. अत्यंत सुलभ आणि अचूक पद्धतीने कमी वेळात शस्त्रक्रिया करणारी रोबोटिक यंत्रणा आज त्रिमूर्ती रुग्णालयात सुरू करताना आपणाला अत्यानंद होत असल्याचे याप्रसंगी बोलताना म्हटले. जास्तीत जास्त रुग्णांच्या व्याधी दुरुस्त करण्यास या रुग्णालयात सर्वच डॉक्टरांना यश यावे अशी सदिच्छा व्यक्त करून त्यांना याप्रसंगी शुभेच्छा दिल्या.
