12/09/2026
ਅੱਜ ਜਿੰਮ ਵਿੱਚ ਸਵੇਰੇ ਵੜਦਿਆਂ ਸਾਰ ਜਿੰਮ ਦੇ ਰਿਸੈਪਸ਼ਨ ਤੇ ਬੈਠੀ ਕੁੜੀ ਕਹਿਣ ਲੱਗੀ , " ਐਕਸਕਿਊਜ ਮੀ ਸਰ.... ਤੁਹਾਡਾ ਪੈਕੇਜ ਖਤਮ ਹੋ ਗਿਆ ..." .
ਮੈਂ ਅੱਗੇ ਤੁਰਦਾ ਤੁਰਦਾ ਰੁਕ ਗਿਆ ਤੇ ਪੁੱਛਿਆ , " ਕਦੋਂ ਖਤਮ ਹੋਇਆ ਜੀ....."
ਉਹਨੇ ਥੋੜਾ ਜਿਹਾ ਮੁਸਕਰਾਉਂਦੇ ਹੋਏ ਕਿਹਾ, " ਕੱਲ ਹੀ ਖਤਮ ਹੋਇਆ..."
ਸੋਚਿਆ ਪੇਮੈਂਟ ਕਰਨੀ ਤਾਂ ਹੈ ਹੀ ...ਕਰ ਦਿੰਨੇ ਆ.. ਪੁੱਛਿਆ , "ਕਿੰਨੀ ਪੇਮੈਂਟ ਕਰਨੀ ਹੈ.."
ਸਾਹਮਣੇ ਕੰਧ ਤੇ ਲੱਗੇ ਜਿੰਮ ਦੇ ਨਵੇਂ ਪੈਕਜ ਡਿਟੇਲ ਵੱਲ ਇਸ਼ਾਰਾ ਕਰਦੀ ਹੋਈ ਕਹਿਣ ਲੱਗੀ , "ਸਰ ਅਹੁ ਦੇਖ ਲਓ...ਸਾਡੇ ਪਲਾਨ ਥੋੜੇ ਬਦਲ ਗਏ ਨੇ... ਇਹਨਾਂ ਵਿੱਚੋਂ ਦੇਖ ਲਓ ਤੁਸੀਂ ਕਿਹੜਾ ਪੈਕੇਜ ਲੈਣਾ.."
ਮੈਂ ਕਿਹਾ , "ਮੇਰਾ ਤਿੰਨ ਮਹੀਨੇ ਦਾ ਪਲਾਨ ਸੀ 4500 ਦਾ, ਉਹ ਤਾਂ ਕਿਤੇ ਵੀ ਨਹੀਂ....."
ਕਹਿਣ ਲੱਗੀ ," ਸਰ ਹੁਣ ਤਿੰਨ ਮਹੀਨੇ ਦਾ ਪਲੈਨ ਆ 5400 ਦਾ ਹੋ ਗਿਆ... ਇੱਕ ਮਹੀਨੇ ਪਲਾਨ ਦਾ 2000 ਹੋ ਗਿਆ .."
ਮੈਂ ਹੈਰਾਨ ਹੋ ਕੇ ਪੁੱਛਿਆ ," ਇਨੀ ਛੇਤੀ ਪਲਾਨ ਕਿਵੇਂ ਚੇਂਜ ਕਰ ਦਿੰਦੇ ਹੋ.? .. ਤਿੰਨ ਮਹੀਨੇ ਪਹਿਲਾਂ ਤਾਂ 4500 ਦਾ ਸੀ.... ਮੈਂ ਤਾਂ 4500 ਹੀ ਦਵਾਂਗਾ.."
ਉਹ ਥੋੜੀ ਨਿਮਰ ਜਿਹੀ ਹੋ ਕੇ ਕਹਿਣ ਲੱਗੀ , " ਸਰ ਜੀ ਸਾਰੇ ਜਿਮ ਵਾਲਿਆਂ ਨੇ ਰੇਟ ਵਧਾ ਦਿੱਤੇ ਹਨ, ਬਿਜਲੀ ਦਾ ਖਰਚਾ ...ਸਾਫ ਸਫਾਈ ਮਸ਼ੀਨਾਂ ਦੀ ਮੇਨਟੇਨਸ ..... ਟਰੇਨਰਾਂ ਦੀ ਤਨਖਾਹ ਸਾਰੇ ਵਧ ਗਏ ਨੇ..."
ਕੁੱਲ ਮਿਲਾ ਕੇ ਆਖਰਕਾਰ 5400 ਪੇਮੈਂਟ ਕਰਕੇ ਹੀ ਖਹਿੜਾ ਛੁੱਟਿਆ... ਸੋਚ ਰਿਹਾ ਸੀ.. ਲਓ ਇਹਨਾਂ ਨੇ ਵੀ ਆਪਣਾ ਡੀਏ ਕਿਸੇ ਨੂੰ ਬਿਨਾਂ ਪੁੱਛੇ- ਦੱਸੇ ਵਧਾ ਲਿਆ..।
ਵਾਪਸੀ ਤੇ ਨਾਲਦੀ ਦਾ ਫੋਨ ਆਇਆ ,ਕਹਿਣ ਲੱਗੀ, "ਦਹੀਂ ਫੜ ਲਿਆਉਣਾ..."
ਰਸਤੇ ਵਿੱਚ ਇੱਕ ਦੁਕਾਨ ਤੋਂ ਇਕ ਕਿਲੋ ਦਹੀ ਦਾ ਪੈਕਟ ਲਿਆ ਪੇਮੈਂਟ ਕਰਨ ਲੱਗੇ ਪੁੱਛਿਆ , "ਕਿੰਨੇ ਕਰਾਂ ..?"
ਦੁਕਾਨਦਾਰ ਕਹਿਣ ਲੱਗਿਆ , "ਜੀ 80 ਰੁਪਏ ਕਰ ਦੋ .."
ਮੈਂ ਹੈਰਾਨ ਹੋ ਕੇ ਕਿਹਾ .."ਹੁਣ ਤਾਂ ਥੋੜੇ ਦਿਨ ਪਹਿਲਾਂ ਤਾਂ ਇਹ 75 ਦਾ ਸੀ..."
ਕਹਿਣ ਲੱਗਿਆ, "ਕੀ ਕਰੀਏ ਜੀ ..ਪਿੱਛੋਂ ਹੀ ਰੇਟ ਵਧਾ ਦਿੱਤੇ ਸਾਡਾ ਵੀ ਕਮਿਸ਼ਨ ਘੱਟ ਗਿਆ..."
ਪੇਮੈਂਟ ਕਰਨਾ ਲੱਗਿਆ ਸੋਚ ਰਿਹਾ ਸੀ ਕਿ ਇਹਨਾਂ ਨੇ ਵੀ 6-7 ਪਰਸੈਂਟ ਆਪਣਾ ਡੀਏ ਆਪ ਹੀ ਵਧਾ ਲਿਆ...
ਹੋਰ ਤਾਂ ਹੋਰ ਸਾਡੇ ਗੁਆਂਡ 'ਚ ਖੜੇ ਬਾਬੂ ਕੁਲਚੇ ਵਾਲੇ ਨੇ ਵੀ ਆਪਣਾ ਕੁਲਚਾ 25 ਤੋਂ 30 ਦਾ ਕਰ ਦਿੱਤਾ....।
20 ਪਰਸੈਂਟ ਵਾਧਾ.??.. ਪਰਸੈਂਟੇਜ ਦਾ ਹਿਸਾਬ ਕਿਤਾਬ ਲਾਉਂਦਿਆਂ ਦਿਮਾਗ ਘੁੰਮ ਜਾਂਦਾ...
ਸਾਡੇ ਗਵਾਂਢੀ ਅਮਰੀਕ ਨੇ ਕੁਝ ਇੱਟਾਂ ਮੰਗਵਾਈਆਂ ਹੋਈਆਂ ਸੀ.. ਕੋਲੇ ਜਾ ਕੇ ਪੁੱਛਿਆ , " ਕੀ ਕਰਵਾਉਣ ਲੱਗੇ ਓ..?
ਅਮਰੀਕ ਕਹਿਣ ਲੱਗਿਆ .."ਬਾਹਰ ਛੋਟਾ ਜਿਹਾ ਬਾਥਰੂਮ ਬਣਾਉਣਾ, ਸਰਦਾ ਨਹੀਂ.."
ਪੁੱਛਿਆ.." ਇੱਟ ਕੀ ਰੇਟ ਆਈ ਆ.."
ਇੱਟ ਦਾ ਰੇਟ ਸੁਣ ਕੇ ਮੈਂ ਹੈਰਾਨ ਹੋ ਗਿਆ, ਜਿਹੜੀ ਦਿਨਾਂ ਵਿੱਚ ਹੀ 7 ਹਜਾਰ ਤੋਂ 11000 ਹੋ ਗਈ.."
ਅੰਦਰ ਸਾਡਾ ਜਮਾਤੀ ਬੂਟਾ ਮਿਸਤਰੀ ਕਾਂਡੀ- ਤੇਸੀ ਚੱਕੀ, ਨੀਹਾਂ ਵਿੱਚ ਇੱਟਾਂ ਚਿਣੀ ਜਾ ਰਿਹਾ ਸੀ..."
ਅਮਰੀਕ ਕਹਿਣ ਲੱਗਿਆ , "ਆ ਦੇਖ ਲਓ ਬੂਟੇ ਮਿਸਤਰੀ ਨੇ ਵੀ ਆਪਣੀ ਦਿਹਾੜੀ 800 ਤੋਂ ਸਿੱਧੀ 1000 ਕਰ ਦਿੱਤੀ..."
ਮੈਂ ਪਰਸੈਂਟੇਜ ਦਾ ਹਿਸਾਬ ਲਾ ਰਿਹਾ ਸੀ ਕਿ ਬੂਟਾ ਮਿਸਤਰੀ ਸਾਡੀ ਗੱਲ ਸੁਣ ਕੇ ਵਿੱਚੋਂ ਹੀ ਬੋਲ ਪਿਆ..." ਬਾਈ ਜੀ 800 ਨਾਲ ਸਰਦਾ ਨਹੀਂ.. ਮਹਿੰਗਾਈ ਤਾਂ ਦੇਖ ਲਓ ਕਿੱਥੇ ਚਲੀ ਗਈ...."
ਅਮਰੀਕ ਕਹਿਣ ਲੱਗਿਆ .." ਬੈਠ ਯਾਰ... ਚਾਹ ਬਣ ਰਹੀ ਆ..."
ਮੈਂ ਨਾ- ਨਾ ਕਰਦਾ ਆਪਣੇ ਘਰ ਤੁਰ ਪਿਆ ਸੋਚ ਰਿਹਾ ਸੀ , ਪੂਰੀ ਦੁਨੀਆ ਆਪਣੀ ਕਮਾਈ ਵਿੱਚ ਲੋੜ ਅਨੁਸਾਰ ਵਾਧਾ ਕਰ ਲੈਂਦੀ ਆ... । ਵਿਧਾਇਕ, ਮੰਤਰੀ ਪਤਾ ਵੀ ਨਹੀਂ ਲੱਗਣ ਦਿੰਦੇ ਕਦੋਂ ਵਾਧਾ ਕਰ ਲੈਂਦੇ ਨੇ....ਇੱਕ ਮੁਲਾਜ਼ਮ ਹੀ ਹੈ ਜਿਹਨੂੰ ਧਰਨੇ ਮੁਜਾਹਰੇ , ਡਾਂਗਾਂ ਸੋਟੇ, ਪਾਣੀ ਦੀਆਂ ਬੁਛਾੜਾਂ, ਅਥਰੂ ਗੈਸ ਦੇ ਗੋਲੇ ... ਪਤਾ ਨਹੀਂ ਕੀ-ਕੀ ਕਰਕੇ ਆਪਣਾ ਡੀਏ ਵਧਾਉਣਾ ਪੈਂਦਾ ਹੈ ।
✍🏻 ਨਿਰਭੈ ਸਿੰਘ ਜਰਗ ਦੀ ਕੰਧ ਤੋਂ ਕਾਪੀ 🙏
