23/05/2026
राभाङ्लामा उप–विभागीय स्तरको पहिलो ऐतिहासिक टी–२० क्रिकेट प्रतियोगिता भव्य रूपमा सुरु
Sikkim Wavesराभाङ्ला, नाम्ची सिक्किम, २३ मे २०२६ :
सिक्किम राज्य स्थापना भएको ५० वर्ष पूरा भएको अवसरमा “गोल्डेन जुबिली १९७५–२०२५” कार्यक्रमअन्तर्गत राभाङ्ला क्षेत्रमा पहिलो पटक आयोजना गरिएको उप–विभागीय स्तरको ऐतिहासिक टी–२० क्रिकेट प्रतियोगिता आज भव्य रूपमा सुरु भएको छ। “नशा मुक्त सिक्किम” अभियानलाई केन्द्रमा राख्दै राभाङ्ग, याङ्गाङ, तिमी तथा सिक्किप बीएसीको संयुक्त पहलमा राभाङ्ला एडीसीको अगुवाइमा प्रतियोगिता सञ्चालन गरिएको हो।
प्रतियोगिता राभाङ्ला १४ माइल खेल मैदान, ०९ बारफुङ निर्वाचन क्षेत्रमा आज बिहान विधिवत रूपमा उद्घाटन गरिएको थियो। उद्घाटन समारोहका मुख्य अतिथि क्षेत्र विधायक रिक्सल दोर्जी भुटियाले दीप प्रज्वलन तथा खेल उद्घाटन गर्दै प्रतियोगिताको औपचारिक शुभारम्भ गरे। कार्यक्रममा “सुनौलो, समृद्ध अनि सक्षम सिक्किम” अभियानको सन्देशलाई समेत विशेष रूपमा जोड दिइएको थियो।
कार्यक्रमको शुभारम्भ लामाहरूको पवित्र मन्त्र उच्चारणसँगै दीप प्रज्वलन गरेर गरिएको थियो। त्यसपछि अतिथिहरूलाई पारम्परिक स्वागत गर्दै कन्फोलिङ टिबिटियन सेटलमेन्ट राभाङ्लाका कलाकारहरूले आकर्षक तिब्बती सांस्कृतिक नृत्य प्रस्तुत गरेका थिए, जसले सम्पूर्ण वातावरणलाई सांस्कृतिक र उत्साहपूर्ण बनाएको थियो।
आजको कार्यक्रममा याङ्गाङ बीडीओ, ०९ बारफुङ अन्तर्गतका चारवटै प्रादेशिक क्षेत्रका जिल्ला पञ्चायत प्रतिनिधिहरू, सम्पूर्ण ग्राम पञ्चायत एकाइका सभापति तथा सदस्यहरू, राभाङ्ला महकुमा कार्यालयका कर्मचारीवर्ग, सीएलसी अध्यक्ष, ओएसडी, विभिन्न विभागीय अध्यक्षहरू, पार्टीका वरिष्ठ कार्यकर्ताहरू, राभाङ्ला प्रहरी विभागका एचएसओसहित सुरक्षाकर्मीहरू, खेलप्रेमी दर्शक तथा खेलाडीहरूको उल्लेखनीय उपस्थिति रहेको थियो।
कार्यक्रम सञ्चालक नवीन शर्माले सम्पूर्ण कार्यक्रमलाई व्यवस्थित रूपमा सञ्चालन गरेका थिए भने मुख्यमन्त्रीका अतिरिक्त राजनीतिक सचिव तथा नाम्ची जिल्ला प्रतिनिधि श्री विष्णुप्रसाद शर्माले स्वागत मन्तव्य राख्दै प्रतियोगिताले युवाहरूलाई सकारात्मक दिशातर्फ प्रेरित गर्ने विश्वास व्यक्त गरे। उहाँले खेलकुदमार्फत युवाहरूलाई अनुशासन, सहकार्य तथा स्वस्थ जीवनशैलीतर्फ अग्रसर गराउने उद्देश्यले प्रतियोगिता आयोजना गरिएको उल्लेख गर्नुभयो।
सांस्कृतिक प्रस्तुतिको क्रममा कलाकार गौतम राईको हास्य नृत्यले उपस्थित दर्शकलाई भरपुर मनोरञ्जन दिएको थियो। त्यस्तै, खेलको पहिलो इनिङ समाप्तिपछि स्थानीय कलाकार लक्ष्मण प्रधानले प्रस्तुत गरेको सुन्दर नेपाली एकल गायनले कार्यक्रमलाई थप ऊर्जा र आकर्षण प्रदान गरेको थियो।
कार्यक्रममा सहभागी सम्पूर्ण कलाकारहरूलाई मुख्य अतिथि विधायक रिक्सल दोर्जी भुटियाले प्रोत्साहनस्वरूप नगद पुरस्कार प्रदान गर्दै सम्मान जनाएका थिए। साथै, प्रतियोगिताको सुरुवातदेखि नै उत्कृष्ट प्रदर्शन गर्ने खेलाडीलाई “म्यान अफ द म्याच” पुरस्कार प्रदान गरिने आयोजक समितिले जानकारी दिएको छ।
स्थानीय खेलप्रेमीहरूका अनुसार राभाङ्ला क्षेत्रमा यस स्तरको टी–२० क्रिकेट प्रतियोगिता पहिलो पटक आयोजना भएको हुँदा युवाहरूमा विशेष उत्साह देखिएको छ। प्रतियोगिताले क्रिकेट खेलको विकास, युवाहरूलाई खेलकुदतर्फ आकर्षित गर्ने, नशामुक्त समाज निर्माण गर्ने तथा खेल पर्यटन प्रवर्द्धनमा महत्वपूर्ण योगदान पुग्ने अपेक्षा गरिएको छ।
आज सम्पन्न पहिलो दिनको खेल तथा सम्पूर्ण कार्यक्रम सफलतापूर्वक सम्पन्न भएको जानकारी आयोजक समितिले दिएको छ। कार्यक्रमको अन्त्यमा नयाँ सदा वार्ड पञ्चायत श्री सुरज क्षेत्रीले उपस्थित सम्पूर्ण अतिथि, आयोजक, खेलाडी, कलाकार, सुरक्षाकर्मी, सञ्चारकर्मी तथा खेलप्रेमी दर्शकहरूलाई धन्यवाद ज्ञापन गर्दै प्रतियोगितालाई सफल बनाउन सबैको महत्वपूर्ण सहयोग रहेको उल्लेख गर्नुभयो।
धन्यवाद ज्ञापनसँगै उद्घाटन दिवसको कार्यक्रम समापन गरिएको थियो। साथै, प्रतियोगिताको सम्पूर्ण खेल गतिविधि, नतिजा तथा विशेष समाचारहरू आगामी दिनहरूमा निरन्तर सार्वजनिक गरिने जनाइएको छ।
