21/08/2026
श्रीराम पुजारी जन्मशताब्दी सांगता समारोहानिमित्त संगीत महोत्सव
पुणे : सोलापूर येथील सांस्कृतिक राजदूत म्हणून ओळख असणारे विद्यार्थीप्रिय शिक्षक व समाजधुरीण प्रा. श्रीराम पुजारी यांच्या जन्मशताब्दी सांगता समारोहाचे आयोजन श्रीराम पुजारी प्रतिष्ठानतर्फे पुण्यात करण्यात आले आहे. या निमित्ताने दोन दिवसीय भव्य संगीत महोत्सव होणार असून नामवंत शास्त्रीय गायक व वादक आपली कला सादर करणार आहेत.
संगीत महोत्सव शनिवार, दि. २२ ऑगस्ट आणि रविवार, दि. २३ ऑगस्ट रोजी कोथरूड येथील पुण्याई सभागृहात होणार आहे. शनिवार, दि. २२ ऑगस्ट २०२६ रोजी सायंकाळी ५ वाजता पंडित राम मराठे यांची नात प्राजक्ता मराठे यांचे शास्त्रीय गायन होणार आहे. त्यानंतर कश्यप बंधू म्हणून ओळखले जाणारे बनारस घराण्याचे सुप्रसिद्ध गायक पंडित दिवाकर कश्यप आणि पंडित प्रभाकर कश्यप यांचे युगल शास्त्रीय गायन होणार आहे.
रविवार, दि. २३ ऑगस्ट २०२६ रोजी सकाळी ९ वाजता ‘पप्पा सांगा कुणाचे.....’ ही ज्येष्ठ मराठी चित्रपट अभिनेते अरुण सरनाईक यांच्या जीवनावर आधारित विशेष चित्रफित दाखविण्यात येणार असून त्यानंतर सुप्रसिद्ध शास्त्रीय गायिका देवकी पंडित यांचे गायन होणार आहे. दि. २३ रोजी सायंकाळी ५ वाजता पद्मविभूषण पंडित हरिप्रसाद चौरसिया यांचे शिष्य पंडित रूपक कुलकर्णी यांचे बासरी वादन होणार असून महोत्सवाची सांगता ग्वाल्हेर घराण्याचे प्रसिद्ध गायक पंडित ओंकार दादरकर यांच्या शास्त्रीय गायनाने होणार आहे.
कलाकारांना यती भागवत, आशय कुलकर्णी, स्वप्निल भिसे, कालीनाथ मिश्रा (तबला), सिद्धेश बीचोलकर, मिलिंद कुलकर्णी, अभिनय रवंदे, अमेय बिच्चू (संवादिनी) साथसंगत करणार आहेत.
कार्यक्रम सर्वांसाठी विनामूल्य खुला आहे.
प्रसिद्धी माध्यम समन्वयक : पाध्ये मीडिया सर्व्हिसेस, मो. ९९२२९०७८०१
