Padhye MEDIA Services

17/04/2024

‘भावार्थ', संवाद पुणेतर्फे बालसाहित्य महोत्सवाचे आयोजन
रंगारंग कार्यक्रमांची मेजवानी : बाललेखकांच्या हस्ते होणार उद्घाटन
समारोपाला महेश कोठारे यांची उपस्थिती : गप्पा-गोष्टी, हसत खेळत विज्ञान आणि बरेच काही...

पुणे : पुस्तक वाचन चळवळ राबविणाऱ्या ‌‘भावार्थ' आणि संवाद पुणे यांच्या संयुक्त विद्यमाने दि. 18 ते 25 एप्रिल 2024 या कालावधीत पुण्यात पहिल्या बालसाहित्य महोत्सवाचे आयोजन करण्यात आले आहे. गप्पा-गोष्टी, हसत खेळत विज्ञानाची ओळख, मुलांचे भावविश्व खुलविणाऱ्या स्वरचित कवितांचे सादरीकरण असे वैशिष्ट्यपूर्ण कार्यक्रम महोत्सवात होणार असल्याची माहिती ‌‘भावार्थ'च्या कीर्ती जोशी व सल्लागार प्रसाद मिरासदार आणि संवाद पुणेचे सुनील महाजन यांनी पत्रकार परिषदेत दिली. संस्कारक्षम वयातील मुलांच्या हाती विविध विषयांवरील पुस्तके यावीत, त्यांनी ती वाचावित आणि आपले भावविश्व समृद्ध करावे हा या महोत्सवाच्या आयोजनामागील हेतू आहे.

प्रसिद्धी माध्यम समन्वयक : पाध्ये मीडिया सर्व्हिसेस, मो. 9922907801

20/12/2023

‘कलानिधी'चा विदुषी वीणा सहस्त्रबुद्धे स्मृती पुरस्कार अतुल खांडेकर यांना जाहीर
अभिजात भारतीय शास्त्रीय संगीताच्या प्रचार-प्रसाराचे कार्य करणाऱ्या तसेच युवा कलाकाराला सांगीतिक कारकिर्दीसाठी प्रोत्साहन मिळावे या उद्देशाने कलानिधी संस्थेतर्फे विदुषी वीणा सहस्त्रबुद्धे स्मृती पुरस्कराने सन्मानित केले जाते. या वर्षी युवा शास्त्रीय गायक आणि संगीतकार अतुल खांडेकर यांचा विदुषी वीणा सहस्त्रबुद्धे पुरस्काराने गौरव केला जाणार आहे. कार्यक्रम शनिवार, दि. 23 डिसेंबर 2023 रोजी सायंकाळी 6 वाजता गांधर्व महाविद्यालयातील विष्णू विनायक स्वरमंदिरात होणार आहे. पुरस्काराविषयी बोलत आहेत अतुल खांडेकर

सविस्तर प्रतिक्रिया ऐकण्यासाठी खालील linkवर click करा

https://youtu.be/Fmw6CrXoZmk

Pahye MEDIA Services, Pune या आमच्या चॅनलला subscribe करा like करा

‘कलानिधी'चा विदुषी वीणा सहस्त्रबुद्धे स्मृती पुरस्कार अतुल खांडेकर यांना जाहीरअभिजात भारतीय शास्त्रीय संगीता.....

25/09/2023

अमृतमहोत्सवी संगीत नाट्यमहोत्सव
गंधर्वभूषण जयराम शिलेदार आणि जयमालाबाई शिलेदार यांनी मुहूर्तमेढ रोवलेली मराठी रंगभूमी, पुणे ही संस्था १ ऑक्टोबर रोजी अमृतमहोत्सवी वर्षात पदार्पण करीत आहे. सलग ७४ वर्षे संगीत रंगभूमीची सेवा करणाऱ्या या संस्थेतर्फे दि. ३० सप्टेंबर ते दि. २ ऑक्टोबर २०२३ या कालावधीत संगीत नाट्यमहोत्सवाचे आयोजन करण्यात आले असून या निमित्ताने रसिकांना तीन दर्जेदार नाट्यकृती बघता येणार आहेत.

11/07/2023

सुरेल सादरीकरणाने श्रोत्यांच्या मनाचा घेतला ठाव
‘थाटरंग' कार्यक्रमात पंडित हेमंत पेंडसे यांच्या शिष्यवर्गाचे गायन
राधिका ताम्हनकर यांना मोरेश्वर यशवंत कुलकर्णी स्मृती युवा पुरस्कार प्रदान

पुणे : भैरव, तोडी, आसावरी, बिलावल, काफी, पूर्वी, मारवा, कल्याण आणि भैरवी या थाटांमधील सरगम गीते, बंदिशी आणि तराणे यांच्या सुरेल आणि भावपूर्ण सादरीकरणाने श्रोत्यांच्या मनाचा ठाव घेतला. निमित्त होते पंडित जितेंद्र अभिषेकी यांचे ज्येष्ठ शिष्य पंडित हेमंत पेंडसे यांच्या शिष्य वर्गाने आयोजित केलेल्या गुरुपौर्णिमा कार्यक्रमाचे.
कर्वेनगरमधील क्षिप्रा सहनिवास सोसायटीच्या सभागृहामध्ये क्लब कानसेनतर्फे या कार्यक्रमाचे आयोजन करण्यात आले होते. कार्यक्रमाची सुरुवात पंडित पेंडसे आणि मधुरा पेंडसे यांच्या हस्ते दीपप्रज्वलनाने झाली. शिष्यांनी पंडित हेमंत पेंडसे यांनी संगीतबद्ध केलेल्या शास्त्रीय संगीतामधील रचना या कार्यक्रमात सादर केल्या. या कार्यक्रमामधील सर्व रचना या वेगवेगळ्या थाटांमधील असल्याने कार्यक्रमाचे नावच ‘थाटरंग' असे देण्यात आले होते.
नरेंद्र चिपळूणकर, शुभांगी भावसार, मीनल नांदेडकर यांनी संवादिनीची तर पुष्कर महाजन, समीर मोडक आणि एकनाथ जोशी यांनी तबल्याची आणि राजगोपाल गोसावी यांनी पखवाजाची साथ केली.
सर्व शिष्यवर्गातर्फे अनिल पटवर्धन आणि राधिका ताम्हनकर यांनी पंडित हेमंत पेंडसे आणि मधुरा पेंडसे यांचे गुरुपूजन केले.
शास्त्रीय संगीतामध्ये उल्लेखनीय आणि मोलाची कामगिरी करणाऱ्या आणि त्याच ध्येयाने कार्यरत राहणाऱ्या युवा कलाकारांना “मोरेश्वर यशवंत कुलकर्णी स्मृती युवा पुरस्कार” दुबईमध्ये वास्तव्यास असणारे श्रीरंग कुलकर्णी यांच्यातर्फे वडिलाच्या स्मृती प्रित्यर्थ प्रदान केला जातो. या वर्षीचा पुरस्कार पंडित पेंडसे यांच्या शिष्या, युवा गायिका राधिका ताम्हनकर यांना या कार्यक्रमात प्रदान करण्यात आला. पुरस्काराचे वितरण श्रीरंग कुलकर्णी यांच्या हस्ते करण्यात आले.
या वर्षीच्या पुरस्काराचा मान सुगमसंगीता बरोबरच शास्त्रीय संगीतातही आपली वेगळी ओळख निर्माण करणाऱ्या राधिका ताम्हनकर यांना मिळतो आहे, ही आमच्यासाठी फार आनंदाची गोष्ट आहे, असे श्रीरंग कुलकर्णी यांनी सांगितले.
पुरस्कार वितरण सोहळ्यानंतर राधिका ताम्हनकर यांनी बिलासखानी तोडी रागामधील दोन बंदिशी सादर केल्या आणि पंडित पेंडसे यांनी संगीतबद्ध केलेली ‘रे मन' ही रचना सादर करून रसिकांना मंत्रमुग्ध केले.
कार्यक्रमाचा समारोप करताना पंडित हेमंत पेंडसे यांनी उत्तम सादरीकणाबद्दल सर्व शिष्य वर्गाचे कौतुक करून मार्गदर्शन केले. एका थाटातील रचना सादर केल्यानंतर लगेच दुसऱ्या थाटातील रचना गाताना कशा पद्धतीने सादरीकरण करणे अपेक्षित आहे, नेमक्या कोणत्या गोष्टींकडे लक्ष दिले पाहिजे याविषयी शिष्यांना अवगत केले. गायक आणि वादकांमध्ये सादरीणापूर्वी कोणत्या गोष्टींची काळजी घेतली जावी, सादरीकणाविषयी सविस्तर चर्चा व्हावी ज्या योगे सादरीकरण उत्तम पद्धतीने श्रोत्यांपर्यंत पोहोचेल याविषयी पंडित पेंडसे यांनी शिष्यांशी मनमोकळा संवाद साधला.
या वेळी सुप्रसिद्ध शास्त्रीय गायिका अपर्णा गुरव, तबलावादक मिलिंद गुरव आणि राहुल धोंगडे उपस्थित होते. प्राची नारकर, अनुष्का नाईक आणि साक्षी गुलवाणी यांनी कार्यक्रमाचे सूत्रसंचालन केले.
ऑनलाईन झालेल्या कार्यक्रमात पंडित जितेंद्र अभिषेकी आणि पंडित हेमंत पेंडसे यांनी संगीतबद्ध केलेल्या संतरचना शिष्यांनी सादर केल्या.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)

05/07/2023

आवर्तन गुरुकुलतर्फे शुक्रवारपासून गुरुपौर्णिमा उत्सवाचे आयोजन
शिष्य वर्गाची गायन, वादन आणि नृत्याद्वारे गुरुवंदना

पुणे : गायन-वादन-नृत्य या कलांचे विद्यार्थ्यांना कुठल्याही मोबदल्याविना प्रशिक्षण देऊन त्यांना त्यांच्या कलेच्या सादरीकरणासाठी मंच उपलब्ध करून देणाऱ्या आवर्तन गुरुकुलतर्फे दि. 7 ते 9 जुलै या कालावधीत गुरुपौर्णिमा उत्सवाचे आयोजन करण्यात आले आहे. गुरुकुलात पंडित सुरेश तळवलकर, पंडित रामदास पळसुले, नृत्यगुरू डॉ. सुचेता भिडे-चापेकर, नृत्यगुरू डॉ. शमा भाटे तसेच पंडित निषाद बाकरे यांच्याकडून मार्गदर्शन घेतलेल्या शिष्यवर्गाचे उत्सवात सादरीकरण होणार आहे.
प्रसिद्ध तबलावादक पंडित रामदास पळसुले यांच्या संकल्पनेतून सहा वर्षांपूर्वी आवर्तन गुरुकुलाची सुरुवात झाली असून गुरुपौर्णिमा उत्सवाचे यंदाचे दुसरे वर्ष आहे, अशी माहिती आवर्तन गुरुकुलचे विश्वस्त शिरीष कौलगुड यांनी पत्रकार परिषदेत दिली. अनिता संजीव, श्रीकांत शिरोलकर या वेळी उपस्थित होते. आवर्तन गुरुकुल ही नोंदणीकृत संस्था असून ना नफा ना तोटा तत्त्वावर काम करीत आहे.
तबला, पखवाज वादन, हिंदुस्थानी शास्त्रीय गायन, कथक तसेच भरतनाट्यम्‌‍चे प्राथमिक शिक्षण घेतलेल्या विद्यार्थ्यांना त्यांच्या कलेत पारंगत करून सादरीकरणासाठी आवर्तन गुरुकुलातर्फे मंच उपलब्ध करून दिला जातो. गुरुकुलात विद्यार्थ्यांच्या परीक्षा घेतल्या जात नाहीत; मात्र विद्यार्थी आपल्या कलेत पारंगत होईपर्यंत गुरू त्यांना मार्गदर्शन करीत असतात, हे या गुरुकुलाचे वैशिष्ट्य आहे.
गुरपौर्णिमा उत्सव शकुंतला शेट्टी ऑडिटोरियम, कर्नाटक हायस्कूल, एरंडवणे येथे होणार असून दि. 7 आणि दि. 8 रोजीच्या कार्यक्रमाची वेळ सायंकाळी 6 ते 9:30 तर रविवारी सकाळी 10 ते 1 आणि सायंकाळी 6 ते 9:30 अशी आहे. महोत्सवाच्या पहिल्या दिवशी (दि. 7) भरतनाट्यम्‌‍ नृत्यगुरू डॉ. सुचेता चापेकर यांच्या शिष्या नृत्यगंगा हा कार्यक्रम सादर करणार आहेत. त्यानंतर पं. निषाद बाकरे यांच्या शिष्यांचे गायन होणार आहे. अखेरच्या सत्रात गुरू तालयोगी पं. सुरेश तळवलकर यांच्या शिष्यांचा तालकीर्तन हा भारतीय व विदेशी तालवाद्य वादनाचा कार्यक्रम होणार आहे.
महोत्सवाच्या दुसऱ्या दिवशी (दि. 8) कथक नृत्यगुरू शमा भाटे यांच्या शिष्यांची नृत्यप्रस्तुती होणार असून त्यानंतर गुरू तालयोगी पं. सुरेश तळवलकर यांच्या शिष्यांचे पखवाज वादन होणार आहे.
महोत्सवाच्या अखेरच्या दिवसातील सकाळच्या सत्रात गुरू पं. रामदास पळसुले यांच्या शिष्यांचे तबला वादन आणि त्यानंतर गुरू तालयोगी पं. सुरेश तळवलकर यांच्या शिष्यांचे पखवाज वादन होणार आहे. सायंकाळच्या सत्राची सुरुवात पं. निषाद बाकरे यांच्या शिष्यांच्या गायनाने होणार आहे. त्यानंतर गुरुपूजन सोहळा होणार असून अखेरच्या सत्रात गुरू तालयोगी पं. सुरेश तळवलकर यांच्या शिष्यांचे तबलावादन होणार आहे. गुरुपौर्णिमा उत्सवानिमित्त आयोजित कार्यक्रम सर्वांसाठी खुला आहे.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)

19/01/2023

एकपात्री कलाकार परिषद आणि निळू फुले कला अकादमीतर्फे या आमच्या
महिलांसाठी सौ. श्यामल कुलकर्णी स्मृती राज्यस्तरीय एकपात्री स्पर्धेचे आयोजन

पुणे : एकपात्री कलाकार परिषद, महाराष्ट्र आणि निळू फुले कला अकादमी यांच्या संयुक्त विद्यमाने केवळ महिलांसाठी ज्येष्ठ एकपात्री कलाकार सौ. श्यामल कुलकर्णी यांच्या स्मरणार्थ श्यामल करंडक राज्यस्तरीय एकपात्री अभिनय स्पर्धेचे पुण्यात आयोजन करण्यात आले आहे, अशी माहिती एकपात्री कलाकार परिषदेचे अध्यक्ष दीपक रेगे, सचिव भाग्यश्री देशपांडे आणि कुलकर्णी यांच्या कन्या अनुजा कोल्हटकर यांनी पत्रकार परिषदेत दिली.
निळू फुले कला अकादमीचे विश्वस्त सुरेश देशमुख, एकपात्री कलाकार परिषदेच्या उपाध्यक्ष चैताली माजगावकर-भंडारी या वेळी उपस्थित होत्या. स्पर्धेचे यंदाचे दुसरे वर्ष आहे. पहिल्या वर्षी राज्यातून 40 स्पर्धक सहभागी झाल्या होत्या. स्पर्धेची यंदाची प्राथमिक फेरी दि. 11 व 12 फेब्रुवारी 2023 रोजी होणार असून अंतिम फेरी दि. 18 फेब्रुवारी रोजी होणार आहे. त्यानंतर लगेचच बक्षीस वितरण समारंभ आयोजित करण्यात आला आहे. प्राथमिक फेरी निळू फुले कला अकादमी, इंदुलाल कॉम्प्लेक्स, काका हलवाई शेजारी, शास्त्री रोड, सदाशिव पेठ येथे होणार आहे. स्पर्धेतील अंतिम विजेत्या महिलेस पाच हजार रुपयांचे प्रथम पारितोषिक व श्यामल करंडक देण्यात येणार असून द्वितीय क्रमांकास तीन हजार रुपये व स्मृतीचिन्ह, तृतीय क्रमांकास दोन हजार रुपये व स्मृतिचिन्ह तर उत्तेजनार्थ दोन पारितोषिके देण्यात येणार आहेत.
असे आहेत स्पर्धेचे नियम..
स्पर्धा मराठी भाषेत होणार आहे. 18 वर्षावरील स्पर्धकास सहभागी होता येणार आहे. एकपात्री सादरीकरण म्हणजे नाटकातले स्वगत अथवा नाट्यछटा नव्हे. सादरीकरणासाठी लेखकाची परवानगी आवश्यक आहे. तसेच स्पर्धकाने किमान दोन अथवा दोन पेक्षा जास्त पात्रांच्या भूमिका सादर करणे अपेक्षित आहे. प्रत्येक स्पर्धकाला किमान 5 व जास्तीत जास्त 8 मिनिटे सादरीकरण करायचे असून अंतिम फेरीत दाखल होणाऱ्या स्पर्धकाला प्राथमिक फेरीतील सादरीकरणच करायचे आहे. परीक्षकांचा निर्णय अंतिम राहील. सादरीकरणात कोणत्याही जातीचा, धर्माचा, राजकीय व्यक्तींचा उल्लेख नको, समाजात तेढ निर्माण होईल असे सादरीकरण नको. स्पर्धकांनी जाण्या-येण्याचा खर्च स्वत: करायचा आहे. स्पर्धेची प्रवेश फी 300/- रुपये असून फी ऑनलाईन (गुगल पेसाठी क्रमांक - 9763594129) भरता येणार आहे. प्रवेश अर्ज भरण्याची अंतिम तारीख 5 फेब्रुवारी 2023 असून स्पर्धेविषयी अधिक माहितीसाठी दिपाली निरगुडकर (9226130807) किंवा प्रिया उंडे (7498248342) यांच्याशी संपर्क साधावा, असे आवाहन करण्यात आले आहे.
सौ. श्यामल कुलकर्णी यांचे देश-विदेशात एकपात्री कार्यक्रम...
सौ. श्यामल कुलकर्णी यांनी प्रथम 1975 मध्ये स्वानुभवावर आधारित, स्वलिखित ‘असे संसार संसार' हा विनोदी एकपात्री कार्यक्रम सादर केला. तो रसिकांनी आणि मान्यवरांना अतिशय भावला. त्यावेळी बोटावर मोजण्या एवढे एकपात्री कलाकार या क्षेत्रात कार्यरत होते. महाराष्ट्रात अनेक ठिकाणी तसेच बिलासपूर, रायपूर, दिल्ली, हैदराबाद, बंगलोर, हुबळी आणि परदेशात लंडन, अमेरिका, सिंगापूर येथील महाराष्ट्र मंडळात असे 1000च्यावर त्यांचे एकपात्री कार्यक्रम झालेले आहेत. एकपात्री हा कलाप्रकार सर्वदूर पसरावा असा त्यांचा प्रयत्न होता. एकपात्री कलाकार परिषद, महाराष्ट्रच्या स्थापनेपासून त्यांचा त्यात सहभाग होता. त्या एक वर्ष परिषदेच्या अध्यक्षही होत्या. आपण कोणत्या परिस्थितीतून आलो, मिळालेल्या संधी आणि स्त्री कलाकार म्हणून कोणत्या अडचणींचा सामना करावा लागला याचा त्यांनी कधी विसर पडू दिला नाही. गेल्या दोन दशकात कलाक्षेत्रात मुली-महिलांना पुढे आणण्यासाठी त्यांनी अथक प्रयत्न केले. सौ. श्यामल कुलकर्णी यांची या कलाप्रकाराबद्दलची आस्था लक्षात घेऊन त्यांचे कार्य तसेच पुढे चालू ठेवून त्यांच्या स्मृती जतन व्हाव्यात यासाठी स्त्री कलाकारांना पारितोषके देण्याचा मानस कुलकर्णी कुटुंबीयांनी व्यक्त केला होता. एकपात्री कलाकार परिषदेच्या सहकार्याने या स्पर्धा आयोजित करत त्याला मूर्त स्वरूप आले आहे.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)

03/01/2023

पुण्यात शनिवारी नुक्कड साहित्य संमेलन
तर रविवारी पहिल्या बालसाहित्य संमेलनाचे आयोजन

पुणे : विवेक साहित्य मंच, महाराष्ट्र राज्य साहित्य संस्कृती मंडळ, श्री मुकुंद भवन ट्रस्ट आणि डेक्कन एज्युकेशन सोसायटी यांच्या संयुक्त विद्यमाने शनिवार, दि. 7 जानेवारी रोजी नुक्कड साहित्य संमेलन तर रविवार, दि. 8 जानेवारी रोजी बालसाहित्य संमेलनाचे आयोजन करण्यात आले आहे. नुक्कड साहित्य संमेलनाचे यंदाचे सहावे तर बालसाहित्य संमेलनाचे पहिलेच वर्ष आहे. संमेलनामध्ये प्रसिद्ध साहित्यिक आणि अभ्यासक सहभागी होणार आहेत.
नुक्कड साहित्य संमेलनात साहित्यकेंद्रीत कार्यक्रम आणि चर्चासत्रांचे आयोजन करण्यात आले आहे तर मुलांना केंद्रस्थानी ठेवून तसेच मुलांचा अधिकाधिक सहभाग असावा या उद्देशाने बालसाहित्य संमेलनाचे आयोजन करण्यात आले आहे, अशी माहिती विवेक साहित्य मंचच्या संयोजक डॉ. अर्चना कुडतरकर, बालसाहित्यकार राजीव तांबे आणि प्रा. डॉ. आनंद काटीकर यांनी आज पत्रकार परिषदेत दिली. प्रसिद्ध कथाकार जी. ए. कुलकर्णी, लेखक, साहित्य समीक्षक गंगाधर गाडगीळ, लेखक शांताराम (के. ज. पुरोहित) आणि आत्मकथन लिहिणाऱ्या पहिल्या दलित स्त्री लेखिका शांताबाई कांबळे यांचे जन्मशताब्दी वर्ष सुरू असल्याने या साहित्यिकांना संमेलन समर्पित करण्यात आले आहे.
नुक्कड आणि बालसाहित्य संमेलन फर्ग्युसन महाविद्यालयाच्या ॲम्फी थिएटरमध्ये होणार आहे. संमेलनाचे उद्घाटन शनिवारी (दि. 7) सकाळी 9 वाजता संत साहित्याचे अभ्यासक, साहित्य संस्कृती मंडळाचे अध्यक्ष डॉ. सदानंद मोरे यांच्या हस्ते होणार असून डेक्कन एज्युकेशन सोसायटीच्या नियामक मंडळाचे अध्यक्ष, शिक्षणतज्ज्ञ डॉ. शरद कुंटे यांची प्रमुख उपस्थिती असणार आहे. अखिल भारतीय साहित्य संमेलनाचे अध्यक्ष, प्रसिद्ध कथाकार भारत सासणे यांचे उद्घाटन सत्रात बीजभाषण होणार आहे.
सकाळी 10:30 वाजता ‘कोरीव लेणी' हा परिसंवाद आयोजित करण्यात आला असून जी.एं.च कथालेखन या विषयावर डॉ. संजीव कुलकर्णी तर जी.एं.च पत्रलेखन या विषयावर महेश आफळे बोलणार आहेत. डॉ. आनंद काटीकर अध्यक्ष असतील. सकाळी 11:15 वाजता ‘नवकथेचे शिल्पकार गंगाधर गाडगीळ' हा परिसंवाद आयोजित करण्यात आला असून डॉ. निर्मोही फडके या कथालेखन तर डॉ. रुपाली शिंदे या कादंबरी विषयांवर बोलणार आहेत. ‘कथा शांतारामांच्या, विषय वैविध्याचा' या सत्रात डॉ. राजेंद्र नाईकवाडे कथालेखन तर डॉ. सुजाता शेणई ललित बंध आणि समीक्षा या विषयावर मतप्रदर्शन करणार आहेत. दोन्ही सत्रांच्या अध्यक्षस्थानी डॉ. नीलिमा गुंडी असणार आहेत.
दुपारी 12:10 वाजता आयोजित करण्यात आलेल्या नुक्कड कथा अभिवाचनात अभय नवाथे, नेहा लिमये, ईशा महल्ले, उमेश पटवर्धन, श्रीया बर्वे यांचा सहभाग असणार आहे. दुपारी 1:30 ते 3:10 या वेळात ‘कविता, सादरीकरण आणि बरंच काही' हे सत्र आयोजित करण्यात आले असून कवितेतील सामाजिकता या विषयावर रमेश वाकनीस आणि कवितेतलं विषयवैविध्य या विषयावर एल.बी. पाटील बोलणार आहेत. कवी प्रवीण दवणे अध्यक्ष असतील. त्यानंतर नवोदित कवींचे सादरीकरण होणार असून अध्यक्षस्थानी काव्य-शिल्प संस्थेचे अध्यक्ष मिलिंद जोशी असणार आहेत. दुपारी 3:20 ते सायंकाळी 5 या वेळात ‘माज्या जल्माची चित्तरकथा' हा दीर्घांक आयोजित करण्यात आला असून मुक्ता आशा, मंजू गौतम सादरीकरण करणार आहेत. दिग्दर्शन योगेश सोमण यांचे आहे. या दीर्घांकावर दीपाली दातार बोलणार आहेत. पहिल्या दिवसाच्या अखेरच्या सत्रात साहित्य अकामदी पुरस्कार प्राप्त युवा लेखक प्रणव सखदेव यांच्या मुलाखतीचे आयोजन करण्यात आले आहे.
रविवारी (दि. 8) आयोजित करण्यात आलेल्या बालसाहित्य संमेलनाचे उद्घाटन ज्येष्ठ लेखिका व गणितज्ज्ञ डॉ. मंगला नारळीकर आणि साहित्य अकादमी पुरस्कार प्राप्त लेखिका डॉ. संगीता बर्वे यांच्या हस्ते सकाळी 9 वाजता होणार असून प्रसिद्ध चित्रकार रवींद्र देव यांची प्रमुख उपस्थिती असणार आहे. सकाळी 10:50 वाजता ‘ऐकताय ना माझी कविता' हे मुलांचे काव्यसंमेलन आयोजित करण्यात आले असून अध्यक्षस्थानी आश्लेषा महाजन असणार आहेत. सकाळी 11:15 वाजता रंगभाषातर्फे ‘बखर बिम्मची' हे नाट्यसादरीकरण होणार आहे.
दुपारी 1:30 वाजता आयोजित करण्यात आलेल्या ‘बोलू चित्रांशी-रंगांशी' या सत्रात गिरीश सहस्त्रबुद्धे आणि राजीव तांबे मुलांशी संवाद साधणार आहेत. दुपारी 2:10 ते 3:00 या वेळात मुलांचे नाट्यछटा आणि एकपात्रिका सादरीकरण होणार आहे. ‘ऐकू या छान छान गोष्टी' या दुपारी 3 वाजता आयोजित करण्यात आलेल्या सत्रात नीलिमा गुंडी आणि धनंजय गुडसुरकर मुलांशी गोष्टींविषयी हितगुज करणार आहेत. दुपारी 3:40 वाजता मकरंद जोशी ‘निसर्गातील सखे-सोबती' या विषयावर बोलणार आहेत. दुपारी 4:10 वाजता योगेश सोमण दिग्दर्शित ‘द प्लॅन' हे नाटक सादर केले जाणार आहे. बालसाहित्य संमेलनाच्या अखेरच्या सत्रात विविध स्पर्धांचा बक्षीस वितरण समारंभ आयोजित करण्यात आला आहे.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)

02/01/2023

औसेकर महाराजांचे शुक्रवारी चक्रीभजन
पुणे : औसेकर कुटुंबियातील पाच पिढ्या तब्बल 225 वर्षांपासून श्री विठ्ठलभक्तीचा दिव्य आध्यात्मिक अनुभव देणारी चक्रीभजन ही परंपरा जोपासत आहेत. औसेकर कुटुंबियांच्या माध्यमातून चक्रीभजनात लीन होण्याची संधी पुणेकरांना येत्या शुक्रवारी मिळणार आहे. गुरुबाबा महाराज औसेकर डोक्यावर हिरवा फेटा, गळ्यात प्रासादिक नारदीय विणा, तुळशीहार आणि पायी चाळ बांधून दीमडी, झांज, मृदुंग या वाद्यांच्या साथीने चक्रीभजनाच्या माध्यमातून विठ्ठलाचा जयजयकार करीत 14 अभंग, भजने सादर करणार आहेत.
केंद्रीय परराष्ट्र मंत्रालयाअंतर्गत असलेल्या भारतीय सांस्कृतिक संबंध परिषदेचे पुणे विभागीय कार्यालय (आयसीसीआर) आणि सावित्रीबाई फुले पुणे विद्यापीठातील ललित कला केंद्रातर्फे शुक्रवार, दि. 6 जानेवारी रोजी सायंकाळी 5:30 वाजता विद्यापीठातील संत नामदेव सभागृह येथे चक्रीभजनाचे आयोजन करण्यात आले आहे. थोर संत गुरू गुंडा महाराज देगलूरकर यांच्या आज्ञेतून ही नित्यसेवा श्री वीरनाथ महाराज यांना प्राप्त झाली, अशी माहिती आज (दि. 2 जानेवारी) पत्रकार परिषदेत देण्यात आली. भारतीय सांस्कृतिक संबंध परिषदेच्या पुणे विभागीय कार्यालयाअंतर्गत असलेल्या सल्लागार समितीचे सदस्य ज्येष्ठ गायक पंडित सुहास व्यास, आयसीसीआरच्या विभागीय निदेशक निशी बाला आणि चक्रीभजन परंपरेतील साधक ज्ञानराज गुरू बाबा औसेकर यांनी पत्रकारांशी संवाद साधला.
मूर्तीशास्त्राचे ज्येष्ठ अभ्यासक डॉ. गो. बं. देगलूकर यांची प्रमुख उपस्थिती असणार असून कार्यक्रमाचे निरुपण उल्हास पवार करणार आहेत.
शैव आणि वैष्णव भक्तीच्या संगमातून औसा येथे नाथ परंपरेतील अद्वैत धर्मप्रसारक पीठ निर्माण झाले. हे पीठ गेल्या 250 वर्षांपासून वंश आणि शिष्य परंपरेच्या, कृपाप्रासादिक चक्रीभजनाच्या माध्यमातून भक्तिप्रसाराचे कार्य करीत आहे. श्री वीरनाथ महाराज, श्री मल्लनाथ महाराज, श्री दासवीरनाथ महाराज, श्री ज्ञानेश्वर महाराज, श्री गुरुबाबा महाराज अशी पिठाधीश परंपरा सद्गुरू श्री वीरनाथ मल्लनाथ महाराज संस्थान, औसा येथे विठ्ठलभक्तीच्या समर्पित भावनेतून अखंडित प्रवाही आहे.
वैदिक शास्त्रात-साहित्यात चक्रीभजन या शब्दाला सखोल अर्थ आहे. चक्रीभजन पाहणाऱ्याला व ते प्रत्यक्षात गायन व नृत्य करून सादर करणाऱ्या अशा दोघांनाही भगवंताशी एकरूप करते. भगवंताच्या प्राप्तीसाठी चक्राकार पद्धतीने गायन व नृत्य करणे म्हणजे चक्रीभजन. आपल्या गुरुसह जन्म-मरणाच्या चक्रातून पाप व दोष नष्ट करणे म्हणजे चक्रीभजन. प्राण, मन व इंद्रिय एक होऊन जाणे, एकाग्र अवस्था प्राप्त होणे आणि इंद्रियांनी बाह्य विषयांपासून विमुख होऊन मन व आत्म्याशी तद्रुप होऊन प्राणाचे निश्चिल होणे म्हणजे चक्रीभजन.
कार्यक्रम सर्वांसाठी विनामूल्य असून अभावानेच अनुभवता येणारी ही चक्रीभजनाची परंपरा पाहण्यासाठी आणि भक्तीरसाची अनुभूती घेण्यासाठी पुणेकरांनी जास्तीतजास्त संख्येने उपस्थित राहावे, असे आवाहन आयोजक संस्थांनी केले आहे.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)

27/12/2022

पंडित हेमंत पेंडसे यांच्या सांगीतिक कारकिर्दीला अभिषेकीबुवांचा अलौकिक स्पर्श : पंडित सुहास व्यास
षष्ठ्यब्दिपूर्ती निमित्त पंडित हेमंत पेंडसे यांचा शिष्यपरिवारातर्फे सांगीतिक सत्कार सोहळा

पुणे : संगीतात गुरू-शिष्य परंपरा महत्त्वाची मानली जाते आणि ती अजूनही टिकून आहे. अभिषेकीबुवांनी प्रत्येक शिष्याला समृद्ध केले. पंडित हेमंत पेंडसे यांच्या सांगीतिक कारकिर्दीत त्यांचे गुरू पद्मश्री पंडित जितेंद्र अभिषेकी यांचा स्पर्श जाणवतो. पंडित पेंडसे यांनी अभिषेकीबुवांची गायन परंपराच जोपासली आहे असे नाही तर त्यांचे सांगीतिक विचारही पुढच्या पिढीपर्यंत पोहोचविले आहेत, असे प्रतिपादन प्रसिद्ध गायक, पंडित सुहास व्यास यांनी केले. सत्कार या शब्दाचा विग्रह म्हणजे सत्याचा आकार असणाऱ्या व्यक्तिंचा सन्मान याची प्रचिती या सोहळ्यात दिसून आली असेही गौरवोद्गार त्यांनी काढले.
जगप्रसिद्ध शास्त्रीय गायक, संगीतकार पद्मश्री पंडित जितेंद्र अभिषेकी यांचे ज्येष्ठ शिष्य, प्रसिद्ध शास्त्रीय गायक व संगीतकार पंडित हेमंत पेंडसे यांच्या षष्ठ्यब्दिपूर्तीनिमित्त शिष्य परिवारातर्फे त्यांच्या सत्कार सोहळ्याचे टिळक स्मारक मंदिर येथे आयोजन करण्यात आले होते. त्यावेळी पंडित व्यास बोलत होते. अखिल भारतीय गांधर्व महाविद्यालय मंडळाचे अध्यक्ष, सुप्रसिद्ध गायक डॉ. विकास कशाळकर, मधुरा पेंडसे, पंडित शौनक अभिषेकी, विदुषी देवकी पंडित, उद्योजक विलास जावडेकर, पंडित हेमंत पेंडसे षष्ठ्यब्दिपूर्ती सोहळा समितीचे अध्यक्ष अनिल पटवर्धन, राधिका ताम्हनकर स्वरमंचावर होते.
पंडित व्यास पुढे म्हणाले, गाणारा प्रत्येक कलाकार हा रचनाकार होऊ शकतोच असे नाही कारण त्यासाठी कल्पकता लागते आणि ती अंत:प्रेरणेतून मिळते. रचनाकार म्हणून नावलौकिक प्राप्त होण्यास अभिषेकीबुवांचा पेंडसे यांना आशीर्वाद लाभला आहे. गुरू शिष्याला केवळ शिकवत नाही तर घडवत असतो, अभिषेकीबुवांनी त्यांच्या प्रत्येक शिष्याला समृद्ध केले.
पंडित विकास कशाळकर म्हणाले, पंडित पेंडसे हे उत्तम गायक तसेच उत्तम रचनाकारही आहेत. ते आदर्श शिष्यच नाही तर आदर्श गुरूही आहेत. त्यांचा गुरूंविषयी आदरभाव पाहिल्यानंतर प्रत्येक गुरूला असे वाटते की, आपल्याला असा शिष्य मिळावा. पंडित पेंडसे यांनी आपले गुरू पंडित जितेंद्र अभिषेकी यांच्याकडून त्यांचे रचनाविषयक वैशिष्ट्य आत्मासात केले आहे. पंडित पेंडसे यांनी त्यांचे गाणे समृद्ध केले आहे.
रचनाकार म्हणून घडणे ही प्रासादिक प्रक्रिया
विदुषी देवकी पंडित म्हणाल्या, बुवांच्या कोणत्याही शिष्याला भेटले की जुन्या आठवणींना उजाळा मिळतो. आम्ही एकमेकांना सांभाळत बुवांकडे शिकलो आहोत आणि आजही एकमेकांना जोडलेले आहोत तेही बुवांमुळेच. बुवांनी सगळ्या शिष्यांना भरभरून दिले. शिष्याची शिकण्याची तहान भागवली पाहिजे या विचारातून बुवांनी प्रत्येक शिष्याला मार्गदर्शन केले. नवीन करू नका तर नव्याने करा हा विचार बुवांनी प्रत्येक शिष्याला दिला. गुरूला वाहून घेण्याची वृत्ती पंडित पेंडसे यांच्याकडे आहे. त्यांनी कायम शिष्याच्या भूमिकेत राहून ज्ञान प्राप्त करून घेतले आहे त्यामुळे त्यांच्यातील रचनाकार घडणे हे प्रासादिक आहे.
सत्कारला उत्तर देताना पंडित हेमंत पेंडसे म्हणाले, हा सोहळा सुहृदांचा आहे. अभिषेकीबुवांनी संस्कार केलेल्या माझ्यासारख्या छोट्या कलाकारासाठी आपण उपस्थित राहिलात याबद्दल मी ऋणी आहे. अभिषेकीबुवांचे शिष्य म्हणून समृद्ध होताना आम्हाला त्यांनी केलेले संस्कार आणि विद्याताईंच्या प्रेमाने अजूनही एकत्र बांधले आहे.
या कार्यक्रमाच्या निमित्ताने पंडित हेमंत पेंडसे यांच्या संगीत रचनांची झलक, मित्रपरिवार व कलाकारांनी व्यक्त केलेले मनोगत दृक्‌‍श्राव्य माध्यमातून दाखविण्यात आले.
सत्कार सोहळ्यानिमित्त पद्मश्री पंडित जितेंद्र अभिषेकी यांचे पुत्र आणि शिष्य पंडित शौनक अभिषेकी, विदुषी अपर्णा गुरव आणि युवा गायिका राधिका ताम्हनकर यांचे गायन झाले. भरत कामत, सुयोग कुंडलकर, मिलिंद गुरव, राज शहा, अभिजित बारटक्के, स्वानंद कुलकर्णी, उद्धव गोळे, आदित्य आपटे यांनी साथसंगत केली. कलाकारांचा सत्कार राधिका पटवर्धन, विलास जावडेकर, अनिल पटवर्धन, रघुनाथ टिळक, अमृता सहस्त्रबुद्धे यांनी केला. कार्यक्रमाचे सूत्रसंचालन रवींद्र खरे यांनी केले तर आभार निखिल केंजळे यांनी मानले.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)

19/12/2022

षष्ठ्यब्दिपूर्तीनिमित्त पंडित हेमंत पेंडसे यांचा रविवारी सांगीतिक सत्कार

जगप्रसिद्ध शास्त्रीय गायक, संगीतकार पद्मश्री पंडित जितेंद्र अभिषेकी यांचे ज्येष्ठ शिष्य, प्रसिद्ध शास्त्रीय गायक व संगीतकार पंडित हेमंत पेंडसे यांच्या षष्ठ्यब्दिपूर्तीनिमित्त रविवार, दि. 25 डिसेंबर 2022 रोजी शिष्य परिवारातर्फे त्यांच्या सत्कार सोहळ्याचे आयोजन करण्यात आले आहे, अशी माहिती पंडित हेमंत पेंडसे षष्ठ्यब्दिपूर्ती सोहळा समितीचे अध्यक्ष अनिल पटवर्धन आणि राधिका ताम्हनकर यांनी पत्रकार परिषदेत दिली. या वेळी पुष्कर देशपांडे उपस्थित होते. सविस्तर माहितीसाठी खालील linkवर click करा

षष्ठ्यब्दिपूर्तीनिमित्त पंडित हेमंत पेंडसे यांचा रविवारी सांगीतिक सत्कारजगप्रसिद्ध शास्त्रीय गायक, संगीतकार ...

19/12/2022

षष्ठ्यब्दिपूर्तीनिमित्त पंडित हेमंत पेंडसे यांचा रविवारी सांगीतिक सत्कार

शौनक अभिषेकी, अपर्णा गुरव, राधिका ताम्हनकर यांच्या मैफलीचे आयोजन

पुणे : जगप्रसिद्ध शास्त्रीय गायक, संगीतकार पद्मश्री पंडित जितेंद्र अभिषेकी यांचे ज्येष्ठ शिष्य, प्रसिद्ध शास्त्रीय गायक व संगीतकार पंडित हेमंत पेंडसे यांच्या षष्ठ्यब्दिपूर्तीनिमित्त रविवार, दि. 25 डिसेंबर 2022 रोजी शिष्य परिवारातर्फे त्यांच्या सत्कार सोहळ्याचे आयोजन करण्यात आले आहे, अशी माहिती पंडित हेमंत पेंडसे षष्ठ्यब्दिपूर्ती सोहळा समितीचे अध्यक्ष अनिल पटवर्धन आणि राधिका ताम्हनकर यांनी आज पत्रकार परिषदेत दिली. या वेळी पुष्कर देशपांडे उपस्थित होते.
सत्कार सोहळ्यानिमित्त पद्मश्री पंडित जितेंद्र अभिषेकी यांचे पुत्र आणि शिष्य पंडित शौनक अभिषेकी, विदुषी अपर्णा गुरव आणि युवा गायिका राधिका ताम्हनकर यांच्या मैफलीचे आयोजनही करण्यात आले आहे. षष्ठ्यब्दिपूर्ती सोहळा आणि संगीत मैफल टिळक स्मारक मंदिर येथे सायंकाळी 6 वाजता होणार आहे. कार्यक्रम सर्वांसाठी खुला आहे.
षष्ठ्यब्दिपूर्तीनिमित्त पंडित हेमंत पेंडसे यांचा सत्कार सुप्रसिद्ध ज्येष्ठ शास्त्रीय गायक पंडित सुहास व्यास यांच्या हस्ते होणार असून अखिल भारतीय गांधर्व महाविद्यालय मंडळाचे अध्यक्ष, सुप्रसिद्ध गायक डॉ. विकास कशाळकर आणि पंडित शौनक अभिषेकी यांची प्रमुख उपस्थिती असणार आहे.
पंडित हेमंत पेंडसे हे अभिषेकीबुवांचे ज्येष्ठ शिष्य आहेत. गायक, संगीतकार आणि गुरू म्हणून त्यांना संगीत क्षेत्रात मानाचे स्थान आहे. या क्षेत्रातील त्यांचे मोलाचे योगदान समाजापर्यंत पोहोचावे या उद्देशाने त्यांच्या शिष्य वर्गाने या विशेष सांगीतिक सत्कार सोहळ्याचे आयोजन केले आहे. या कार्यक्रमाच्या निमित्ताने पंडित हेमंत पेंडसे यांच्या संगीत रचनांची झलक, मित्रपरिवार व कलाकारांनी व्यक्त केलेले मनोगत दृक्‌‍श्राव्य माध्यमातून दाखविण्यात येणार आहे, असे पटवर्धन आणि ताम्हनकर यांनी सांगितले.
शास्त्रीय गायन मैफलीत पंडित मंगेश मुळ्ये, सुयोग कुंडलकर, मिलिंद गुरव, अभिजित बारटक्के, स्वानंद कुलकर्णी, उद्धव गोळे, आदित्य आपटे साथसंगत करणार असून कार्यक्रमाचे निवेदन रवींद्र खरे करणार आहेत.
कार्यक्रम रसिकांसाठी विनामूल्य आयोजित करण्यात आला असून कार्यक्रमास आवर्जून उपस्थित राहावे, असे आवाहन संयोजन समितीच्या वतीने करण्यात आले आहे.

प्रसिद्धी माध्यम समन्वयक : पाध्ये मीडिया सर्व्हिसेस (मो. 9922907801)