19/04/2026
انما الأمم الاخلاق ما بقيت
فان هم ذهبت اخلاقهم ذهبوا ...
سيذهبون ان شاءالله
باعتبارنا بلد المليون عمامة، وكلها لابسه محابس وكصصها مجوية وقال الله وقال الرسول وقالت الروايات..
تعال شوف شكم خرق (ديني) نسوي يومياً بحياتنا العامة، هاي نبذة بس.
* "أقربكم مني مجالساً يوم القيامة أحسنكم أخلاقاً".
وانت تطب بالفيس تفشر عالكتلوك بالتعليقات علمود وجهة نظرك اللي محد يشتريها بفلسين، وتتهم الناس بشي ممسوي، وتشهر بيهم، وتتداول فضايح تضر عوائل بحالها، وتتهم هذا بكيفك وتلبس تهم على ذاك براحتك وموبايلك مليان سكرينات لزلات الآخرين حتى تستخدمها ضدهم..
لا خوش اخلاق!!
* "ويلٌ للمطففين، الذين إذا اكتالوا على الناس يستوفون، وإذا كالوهم أو وزنوهم يُخسرون".
انت عبالك هاي شغلة ميزان وكبل؟
زين وسيارتك الشابعة دقلات ومصلحها وتكول زيرو وتمشيها عالغشمة؟ على ابو صابغها جمالية؟! زين ومن تكون ابو محل وتبيع فوك السعر عالزبون اللي ميعرف قيمة الحاجة؟ (أعرف واحد يبيع اكسسوار موبايل سعره 500 دينار ب 5000 دينار)!!
* "يا أيها الذين آمنوا إذا نكحتم المؤمنات ثم طلقتموهن من قبل أن تمسّوهن فمالكم عليهنّ من عدّة تعتدونها فمتعوهن أو سرحوهنّ سراحاً جميلا".
يعني يا زلمة، إذا عقدت على وحدة وفسخت بدون ما يصير بينكم ج**ع فانطوهن حق فسخ العقد وكلمتين حلوة واجبروا بخاطرهن..
زين واللي يلزمها يفضحها فضيحة؟
والله فسخت لان طلعت كذا وكذا!!
ومنو يسأل عليها بعد راح يلكه سمعتها متصخمة لأن جنابه ماعجبته وشهّر بيها!؟
هذا سواء تزوجها وطلقها أو فسخ قبل الزواج يعني بعد العقد.
* "ليس المؤمن بالطعان ولا اللعان ولا الفاحش ولا البذىء".
هههههههه.. هنا تشبع ضحك..
من ئنته ئبن زنة وشيل ايدك.
* "المؤمن من سلم الناس من لسانه ويده".
يعني مو يلزم رشاشته ويترس الجو مذنب، ولا يدك بيوت العالم، ولا يروع العوائل لأنه اخو خيته، ولا يطلع بالفضائيات يشتم اللي يدافع عن حقه، ولا يستعمل منصبه حتى يأذي الناس البريئة ولا ولا ....
* "ولا تصعر خدك للناس ولا تمش في الأرض مرحا، إن الله لايحب كل مختالٍ فخور".
جا ورتل الجكسارات المقدسة؟ والحمايات مالتك التتجاوز عالناس؟ وإذلال الناس على مساعدة أو هبة؟ وسد الابواب بوجه اللي يحتاجك وهي مسؤوليتك أن تخدمهم؟!
* "من حسن إسلام المرء تركه مالايعنيه".
لا شلون، كرار نوشي وغيره منو كتله غير التدخل بأم حياته؟
الإيمو منو طشر روسهم بالبلوك؟
شكم واحد ووحدة ماتوا من ورا الترند!؟
* "إنكم لتأتون الرجال ش**ة من دون النساء بل أنتم قوم مسرفون".
ومودة (هذا الحلو مالي) وين مزدهرة؟ مو بالمناطق اللي الدين واصل بيها للسماء!؟
والعركات العشائرية عالحلوين شنو وضعها بلا زحمة؟
ختاماً حتى لا يطول البوست لأن احنه لا يم الاخلاق ولا الدين ولا حتى الفطرة البشرية السليمة، وهذا مو كلام واعظ بكد ما هو فضح للنفاق والدجل، قرآنك يكول:
"يا أيها الناس اتقوا ربكم إن زلزلة الساعة شىءٌ عظيم، يوم ترونها تُذهلُ كُل مرضعةٍ عما أرضعت وتضعُ كل ذات حملٍ حملها وترى الناسَ سكارى وماهم بسكارى ولكن عذاب الله شديد!".
صلي وصوم يا مجتمع (الأخلاق الحميدة)!!.
