30/04/2026
من خوێندکاری فاروق ڕەفیق بووم!
من خوێندکاری فاروق ڕەفیق بووم، ئامادەی خوان و کۆڕ و سەمپۆزیۆمەکانی بووم (ئەمانە چەکی ئەو بوون).. چەند جار دەیوت گۆران با بەیەکەوە بچین لە لادێیەک خانوویەکی قوڕ بکەین و خەریکی خوێندنەوە بین..
لە زنجیرە سیمینارەکانی سلێمانی سەبارەت بە (هێرمیۆنتیکا) کاتێک زانی من موسڵمانم و بەڕۆژووم، هەڵوێستی گۆڕا بەرانبەرم.. ئیتر لە کاتی وتنەوەی وانەکاندا تەنانەت بە چاوی ڕوون تەماشای نەدەکردم..
دواتر هەڵگەڕامەوە و دەستم کرد بە ڕەخنەگرتن لێی، زمانی خۆیم بەکار هێنا بۆ لێدان لە فیکرەکانی.. لێرەوە بە توندی وەڵامی ڕەخنەکانی دەدایەوە و ناوچاوانی گرژ دەکرد!
ئەو گۆرانەی کە جێگەی ئومێدی فاروق بوو، لە ماوەیەکی کەمدا وێنەکەی گۆڕا و بوو بە دێوەزمەیەک کە شایەنی ئەوەش نەبوو وەڵامی ڕەخنەکانی بدرێتەوە، لەکاتێکدا بڕیاربوو گۆران پەروەردە بکریت و بکریتە
ڕەخنەگرێکی جددی..
من لە هەموو ئەو ماوەیەدا کە نزیک بووم لە فاروق ڕەفیق، هەمیشە میشکم جەنجاڵ بوو بەوەی کە بۆچی فاروق ناسنامەیەک نادات بەدەستەوە و بەردەوام تیۆر و ڕوانگەی جیاواز دەخاتە ڕوو، کە زەمینەی مانای پەسەندکردنی ناسنامەیەکە، بەڵام دانی پێدا نانێت..
گۆران أبراهیم
