08/04/2026
🇰🇭ទេវតាឆ្នាំថ្មី ព្រះនាម រាក្សសាទេវី (រាក្យសាទេវី) ជាបុត្រីទីបីនៃកបិលមហាព្រហ្ម កំពុងត្រៀមយាងចុះមក ១៤-០៤-២០២៦ វេលាម៉ោង ១០:៤៨ នាទីព្រឹក
🇰🇭មហាសង្ក្រាន្ត ឆ្នាំមមី អដ្ឋស័ក ចុល្លសករាជ១៣៨៨ នឹងចូលមកដល់នៅក្នុងថ្ងៃ អង្គារ ១២រោច ខែចេត្រ ត្រូវនឹងថ្ងៃទី ១៤ ខែមេសា ឆ្នាំ២០២៦ វេលាម៉ោង ១០:៤៨នាទីព្រឹក។
🇰🇭ពេលនោះព្រះអាទិត្យចរចេញពីមីនរាសីទៅស្ថិតនៅឯមេសរាសីតាមគោវិថីគឺផ្លូវកណ្តាល ទើបមានទេពធីតាមហាសង្ក្រាន្តមួយព្រះអង្គជាមគ្គនាយិកាព្រះនាម រាក្សសាទេវី (រាក្យសាទេវី) គង់ចាតុម្មហារាជិកា ទ្រង់អម្ពរពណ៌ខ្មៅ ព្រះកាណ៌សៀតផ្កាបុទុម អាភរណៈទ្រង់ម៉ោរា ព្រះហស្ថស្តាំទ្រង់ត្រីសូល៍ ព្រះហស្ថឆ្វេងទ្រង់កៅទណ្ឌ ភក្សាហារលោហិត ទ្រង់ឈររំពៃលើខ្នងអស្សតរជាពាហនៈ។ ទើបនាំអស់ពួកនិករទាំងមួយសែនកោដិ ហោះឆ្ពោះទៅកាន់គុហាកែវឈ្មោះគន្ធមាលី ឯទីភ្នំកៃលាស ខេត្តហេមពាន្ត ដែលជាទីប្រតិស្ថានទុកព្រះសិរសានៃអង្គកបិលមហាព្រហ្មព្រះវរបិតា តម្កល់លើពានមាស នាំចេញមកដង្ហែប្រទក្សិណភ្នំព្រះសុមេរុរាជ ជុំចក្រវាឡ តាមផ្លូវព្រះអាទិត្យចរជាគម្រប់ ៦០នាទី ហើយដង្ហែចូលទៅតម្កល់ទុកដូចដើមវិញ។រួចស្រេចស្តេចប្រជុំអស់ទេវបុត្រ ទេពធីតាទាំងមួយសែនកោដិ ចូលទៅស្រង់ទឹកអន្តោតត្តមហាស្រះ ដែលមានទឹកហូរចេញពីបំពង់ថ្មកែវមាត់គោឧសភរាជទាំង៧ ត្រជាក់ត្រជុំក្សេមក្សាន្តព្រះរាជហឫទ័យ ហើយនាំគ្នាចូលទៅសមាទានសីលដោយព្រះទ័យសោមនស្សរីករាយគ្រប់ៗអង្គ ក្នុងភគវតីសភាដែលវិស្សកម្មទេវបុត្រនិមិត្តថ្វាយ ដើម្បីបន្ទោបង់នូវអពមង្គលឱ្យជ្រះស្រឡះ ចម្រើននូវសុភមង្គលសិរីសួស្តី ជន្មាយុយឺនយូរតរៀងទៅ។
ពិធីសង្ក្រាន្ត៣ថ្ងៃ🎠
🇰🇭ថ្ងៃអង្គារ ១២រោច ខែចេត្រ ត្រូវនឹងថ្ងៃទី១៤ ខែមេសា ឆ្នាំ ២០២៦ ពីវេលាម៉ោង ១០:៤៨នាទីព្រឹក ជាថ្ងៃចូលឆ្នាំថ្មី។
🇰🇭ថ្ងៃពុធ ១៣រោច ខែចេត្រ ត្រូវនឹងថ្ងៃទី១៥ ខែមេសា ឆ្នាំ ២០២៦ ជាថ្ងៃវារៈកណ្តាល។
🇰🇭ថ្ងៃព្រហស្បតិ៍ ១៤រោច ខែចេត្រ ត្រូវនឹងថ្ងៃទី ១៦ ខែមេសា ឆ្នាំ ២០២៦ ជាថ្ងៃវារៈឡើងស័ក គម្រប់ជាមហាសង្ក្រាន្ត ៣ថ្ងៃ ស្រេចបរិបូណ៌ចូលជាសកល ឆ្នាំមមី អដ្ឋស័ក ចុល្លសករាជ ១៣៨៨ មហាសករាជ១៩៤៨ ពុទ្ធសករាជ ២៥៧០ តរៀងទៅ។
📖ប្រភពអត្ថបទពី #បុរាណណាចារ្យ📖
