24/08/2026
ចម្បាំងជាមួយអាមេរិក-អ៉ីស្រាអែល តើអ៉ីរ៉ង់ប្រើប្រាស់អាវុធខ្លាំងអ្វីខ្លះ?
នៅពេលអាមេរិក និងអ៊ីស្រាអែល មានប្រៀបខ្លាំងខាងយន្តហោះចម្បាំង ការស៊ើបការណ៍ និងប្រព័ន្ធការពារអាកាស អ៊ីរ៉ង់មិនបានព្យាយាមប្រកួតជាមួយពួកគេតាមរបៀបដូចគ្នាទេ។ អស់រយៈពេលជាច្រើនទសវត្សរ៍ អ៊ីរ៉ង់បានផ្តោតខ្លាំងលើមីស៊ីល និងដ្រូន ដើម្បីរក្សាសមត្ថភាពវាយប្រហាររយៈចម្ងាយឆ្ងាយទៅលើគូសត្រូវរបស់ខ្លួន។ ចំពោះមីស៊ីលអ៉ីរ៉ង់ មានទាំង មីស៊ីលបាលីស្ទិក (Ballistic Missile) និងមីស៊ីល Cruise (Cruise Missile)។
🚀 មីស៊ីលបាលីស្ទិក ជាអ្វី?
និយាយឱ្យងាយយល់ Ballistic Missile គឺជាមីស៊ីលដែលប្រើរ៉ុក្កែតបាញ់ឡើងទៅកម្ពស់ខ្ពស់ បន្ទាប់មកក្បាលគ្រាប់ធ្វើដំណើរតាមគន្លងកោង មុនចុះមករកគោលដៅ។ អ៊ីរ៉ង់មានមីស៊ីលបាលីស្ទិកជាច្រើនប្រភេទ ដូចជា Shahab-3, Ghadr, Emad, Sejjil និង Fateh ដែលមានចម្ងាយ និងលក្ខណៈខុសៗគ្នា។ អ្វីដែលធ្វើឱ្យវាខ្លាំង គឺល្បឿន ចម្ងាយ និងសមត្ថភាពវាយប្រហារពីចម្ងាយឆ្ងាយ។
✈️ ចុះ Cruise Missile?
Cruise Missile ខុសពី Ballistic Missile។ វាប្រើម៉ាស៊ីនរបស់ខ្លួនហោះទៅរកគោលដៅស្ទើរតែពេញមួយផ្លូវ ហើយអាចហោះនៅកម្ពស់ទាប និងបត់បែនតាមទិសដៅបាន។
និយាយឱ្យខ្លី៖
Ballistic = បាញ់ឡើងខ្ពស់ → គន្លងកោង → ចុះរកគោលដៅ។
Cruise = ហោះទៅរកគោលដៅដោយម៉ាស៊ីន និងប្រព័ន្ធនាំផ្លូវរបស់ខ្លួន។
អ៊ីរ៉ង់មាន Cruise Missile ដូចជា Soumar និង Ya-Ali។
🛩️ ហើយដ្រូនវិញ?
ត្រកូល Shahed គឺជាអាវុធមួយទៀតដែលធ្វើឱ្យអ៊ីរ៉ង់ទទួលបានការចាប់អារម្មណ៍។ Shahed-131 និង Shahed-136 អាចវាយប្រហារគោលដៅនៅចម្ងាយឆ្ងាយ ហើយចំណុចសំខាន់មួយ គឺអាចប្រើក្នុងចំនួនច្រើន ដើម្បីបង្កើនសម្ពាធលើប្រព័ន្ធការពារអាកាសរបស់គូប្រជែង។
ដូច្នេះ កម្លាំងរបស់អ៊ីរ៉ង់មិនមែនស្ថិតលើ“អាវុធអស្ចារ្យតែមួយ” ទេ ប៉ុន្តែ ស្ថិតលើការរួមបញ្ចូល មីស៊ីលបាលីស្ទិក + Cruise Missile + ដ្រូន។
⚔️ ប៉ុន្តែ តើវាអាចប្រជែងជាមួយអាមេរិក និងអ៊ីស្រាអែលបានឬ?
នេះជាចំណុចដែលគួរឱ្យចាប់អារម្មណ៍ណាស់! អាមេរិក និងអ៊ីស្រាអែលមានប្រៀបយ៉ាងខ្លាំងខាង កម្លាំងអាកាស ស៊ើបការណ៍ និងប្រព័ន្ធការពារមីស៊ីល។ អ៊ីរ៉ង់វិញពឹងផ្អែកលើមីស៊ីល និងដ្រូន ដើម្បីរក្សាសមត្ថភាពវាយបក និងបង្កើនថ្លៃដើមសម្រាប់គូប្រជែង។
ហេតុនេះហើយ សំណួរដ៏សំខាន់មិនមែនត្រឹមតែ៖
“តើអ៊ីរ៉ង់មានអាវុធខ្លាំងប៉ុណ្ណា?”
ប៉ុន្តែគឺ៖
“តើអ៊ីរ៉ង់អាចរក្សាសមត្ថភាពផលិត និងប្រើប្រាស់មីស៊ីល និងដ្រូនរបស់ខ្លួនបានយូរប៉ុណ្ណា?”
នេះហើយជាចំណុចដែលអាចកំណត់ថា កម្លាំងមីស៊ីលរបស់អ៊ីរ៉ង់នឹងក្លាយជាខែលការពារ ឬនៅតែអាចជាដាវសម្រាប់វាយបកបានយូរប៉ុណ្ណា៕
— Soryaka
