09/04/2026
គណៈប្រតិភូជាន់ខ្ពស់ក្រសួងការពារជាតិចុះសួរសុខទុក្ខ៖
នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី អដ្ឋស័ក ព.ស ២៥៧០ , គណៈប្រតិភូជាន់ខ្ពស់ក្រសួងការពារជាតិ ដឹកនាំដោយ ឯកឧត្តម ឧត្តមសេនីយ៍ឯក លី កុសល រដ្ឋលេខាធិការក្រសួងការពារជាតិ បានអញ្ជើញចុះសំណេះសំណាលសាកសួរសុខទុក្ខ និងនាំយកអំណោយជូនដល់បុគ្គលិក យោធិន និងអ្នកជំងឺដែលកំពុងសម្រាកព្យាបាលនៅក្នុងមន្ទីរពេទ្យព្រះកេតុមាលា ។ ពិធីនេះបារព្ធធ្វើនៅព្រឹកថ្ងៃព្រហស្បតិ៍ ៧រោច ខែចេត្រ ឆ្នាំម្សាញ់ សប្ដស័ក ព.ស ២៦៦៩ , ត្រូវនឹងថ្ងៃទី ៩ ខែមេសា ឆ្នាំ២០២៦។
ឯកឧត្តម ឧត្តមសេនីយ៍ឯក វេជ្ជបណ្ឌិត លី សុវណ្ណ អគ្គនាយករង អគ្គនាយកដ្ឋានភស្តុភារ ហិរញ្ញវត្ថុ និងជានាយកមន្ទីរពេទ្យព្រះកេតុមាលា ក្រសួងការពារជាតិ បានឡើងថ្លែងជូនរបាយការណ៍លម្អិតរាល់គ្រប់សកម្មភាពការងារ ដែលសម្រេចបានកន្លងមកនៅក្នុងមន្ទីរពេទ្យ និងទិសដៅសម្រាប់អនុវត្តបន្ត ជូនគណៈប្រតិភូ និងអង្គពិធី ។ ឯកឧត្តម ឧត្តមសេនីយ៍ឯក លី កុសល តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានពាំនាំ ប្រសាសផ្ដាំផ្ញើសាកសួរសុខទុក្ខរបស់ឯកឧត្តមឧបនាយករដ្ឋមន្រ្តី ជូនដល់សមជិក សមាជិកាក្នុងអង្គពិធី ។
ឯកឧត្តម លី កុសល បានមានប្រសាសន៍វាយតម្លៃខ្ពស់លើចំណុចរីកចម្រើនឈានទៅមុខខ្ពស់ជាលំដាប់ របស់ផ្នែកជំនាញឯកទេសនីមួយៗក្នុងការសង្គ្រោះ វះកាត់ ព្យាបាលជំងឺ និងមតិផ្ដាំផ្ញើបន្តជំរុញការសិក្សាជំនាញឯកទេសផ្សេងៗបន្ថែមទៀត ដើម្បីជំរុញឲ្យវិស័យសុខាភិបាលកងទ័ពក្នុងប្រទេសមួយនេះ ផ្ដល់នូវទំនុកចិត្តខ្ពស់ និងជំនឿជឿជាក់ផ្ដល់ដល់គ្រប់មជ្ឈដ្ឋានក្នុងវិស័យយោធា ព្រមទាំងវិស័យសុខភាពសាធារណៈស៊ីវីល ។
ជាចុងបញ្ចប់ ឯកឧត្តម លី កុសល ជូនពរសូមឲ្យទេវតាឆ្នាំថ្មី ឆ្នាំមមី ព្រះនាមរាក្យសាទេវី តាមជួយបីបាច់ថែរក្សា និងប្រសិទ្ធពរជ័យជូនដល់ ឯកឧត្តម លោកជំទាវ និងលោក លោកស្រីក្នុងអង្គពីធីទាំងមូល សូមបានសមប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
