14/08/2026
បដិវត្តន៍បច្ចេកវិទ្យាបញ្ញាសិប្បនិម្មិត (អេអាយ) និង ការរស់នៅរបស់មនុស្សនៅលើផែនដី !
ការអភិវឌ្ឍបច្ចេកវិទ្យាអេអាយ (AI) អាចជួយដល់ការរស់នៅរបស់មនុស្សបានច្រើន ប៉ុន្តែក៏ធ្វើឲ្យមនុស្សមានវិបត្តិច្រើនដែរ ។
អេអាយអាចជួយមនុស្សឲ្យរស់នៅកាន់តែងាយស្រួល កាន់តែទំនើប ទាំងការងារ ការរកស៊ី ការធ្វើអាជីវកម្ម ពាណិជ្ជកម្ម ផលិតកម្ម សេវាកម្ម ការទំនាក់ទំនង ការស្វែងរកព័ត៌មាន ចំណេះដឹង ការសិក្សា ការស្រាវជ្រាវ ការគ្រប់គ្រង... ។ល។
ដោយសារអេអាយ គេអាចបង្កើតឧបករណ៍ ឬ មនុស្សយន្តឲ្យធ្វើការជំនួសមនុស្ស ចេះគិត ចេះពិចារណា វិភាគ ចេះសម្រេចចិត្ត ចេះឆ្លើយតប ចេះស្រឡាញ់ ស្អប់ ខឹងដូចមនុស្ស ចេះធ្វើសង្គ្រាមវាយប្រហារគ្នាកាន់តែសាហាវ ។
នៅពេលអេអាយអាចធ្វើការជំនួសមនុស្សបាន ធ្វើឲ្យមនុស្សរស់នៅកាន់តែងាយស្រួល ប៉ុន្តែក៏ធ្វើឲ្យមនុស្សមានវិបត្តិច្រើនដែរ ដូចជា ៖ ការក្លែងបន្លំ ឆបោក ខ្វះការងារធ្វើ ឧក្រិដ្ឋកម្មបច្ចេកវិទ្យា... ជាដើម ។ល។
បច្ចេកវិទ្យា គឺជាអាវុធមុខពីរ បើប្រើក្នុងផ្លូវល្អ នឹងបានផលល្អ បានសុខចម្រើន បើប្រើក្នុងផ្លូវអាក្រក់ នឹងមានផលអាក្រក់ នឹងបង្កវិនាសកម្ម អន្តរាយដល់មនុស្សលោក ។
មនុស្សជាអ្នកបង្កើតអេអាយឲ្យចេះធ្វើការ យល់ដឹង ចេះគិត ពិចារណា វិភាគ ចេះសម្រេចចិត្ត ចេះឆ្លើយតប ចេះស្រឡាញ់ ស្អប់ ខឹង ចេះលួច ឆបោក Scam... ដូចមនុស្ស ចេះធ្វើសង្គ្រាមវាយប្រហារគ្នា ។
គំនិត ប្រាជ្ញា បទពិសោធន៍ ព្រឹត្តិការណ៍ រឿងរ៉ាវ ព័ត៌មានទាំងឡាយ ចំណេះដឹងគ្រប់យ៉ាង ដែលមាននៅលើលោកនេះត្រូវបានបញ្ចូលទៅក្នុងអេអាយ ។
ប៉ុន្តែ ព័ត៌មានខ្លះអាចជាព័ត៌មានមិនពិត ឬ ព័ត៌មានប្រឌិត ដែលគេបានបញ្ចូលទៅឲ្យអេអាយ ដូច្នេះ ករណីខ្លះ អេអាយក៏ប្រាប់ព័ត៌មានមិនពិតមកវិញដែរ ។ ហេតុនេះ ត្រូវប្រើអេអាយរបស់ក្រុមហ៊ុនណាដែលអាចជឿជាក់បាន និងសុក្រឹតត្រឹមត្រូវបំផុត ។
នៅពេលមនុស្សអភិវឌ្ឍប្រព័ន្ធអេអាយឲ្យមានបញ្ញា និងមានសមត្ថភាពកាន់តែខ្លាំង អេអាយអាចនឹងមិនស្តាប់តាមការបញ្ជារបស់មនុស្ស ហើយវាអាចវាយបក ឬ បង្កបញ្ហា គ្រោះថ្នាក់ អន្តរាយដល់មនុស្សវិញ ។
ហេតុដូច្នេះ មិនគួរអភិវឌ្ឍបច្ចេកវិទ្យា អភិវឌ្ឍអេអាយដោយគ្មានព្រំដែនកំណត់នោះឡើយ ជាពិសេស កុំបង្កើតឧបករណ៍ ឬ មនុស្សយន្តអេអាយ ដែលមនុស្សមិនអាចគ្រប់គ្រងវាបាន ។ បើទោះបី អភិវឌ្ឍបន្តទៅមុខទៀត ក៏ត្រូវតែរកវិធីបង្ការ ការពារ ឬ គ្រប់គ្រងអេអាយឲ្យបានដែរ បើមិនដូច្នេះទេ អេអាយនឹងបង្កវិនាសកម្មដល់មនុស្សលោកមិនខាន ។
ទោះជាយ៉ាងណាក៏ដោយ បច្ចេកវិទ្យាត្រូវតែអភិវឌ្ឍដើម្បីឲ្យពិភពលោកមានការរីកចម្រើន ប៉ុន្តែ ត្រូវអភិវឌ្ឍក្នុងផ្លូវវិជ្ជមាន មិនត្រូវអភិវឌ្ឍក្នុងផ្លូវអវិជ្ជមានដែលបង្កបញ្ហា ធ្វើឲ្យអន្តរាយដល់មនុស្សឡើយ ។
ក្រុមហ៊ុនធំៗ ដែលអភិវឌ្ឍបច្ចេកវិទ្យា អភិវឌ្ឍអេអាយ ត្រូវតែគិតអំពីផលប៉ះពាល់ ឬ ផលវិបាកនៃការអភិវឌ្ឍបច្ចេកវិទ្យារបស់ខ្លួន ។ ត្រូវធ្វើអ្វីដែលមានប្រយោជន៍ដល់មនុស្សជាតិ ដូចជា អភិវឌ្ឍបច្ចេកវិទ្យាសម្រាប់ប្រើក្នុងវិស័យកសិកម្ម ឧស្សាហកម្ម (ផលិតកម្ម) ពាណិជ្ជកម្ម សេវាកម្ម គមនាគមន៍ សន្តិសុខសុវត្ថិភាព សុខាភិបាល ការអប់រំ ការសិក្សាស្រាវជ្រាវ... ជាដើម ។ មិនត្រូវអភិវឌ្ឍបច្ចេកវិទ្យាសម្រាប់ប្រើក្នុងអំពើឧក្រិដ្ឋកម្មឡើយ ដូចជា ការឆបោក, Scam, ឧក្រិដ្ឋកម្មបច្ចេកវិទ្យា, ឧក្រិដ្ឋកម្មសង្គ្រាម (ឧបករណ៍ ឬ មនុស្សយន្តសម្រាប់ធ្វើសង្គ្រាមវាយប្រហារគ្នា)... ជាដើម ។
អំពើដែលនាំឲ្យវិនាសអន្តរាយធំបំផុតដល់ពិភពលោកគឺ វិទ្យាសាស្ត្រដែលមិនគិតពីមនុស្សជាតិ ! វិទ្យាសាស្ត្រអមនុស្សធម៌ !
ដូច្នេះ ក្រុមហ៊ុនបច្ចេកវិទ្យាធំៗ ត្រូវឈប់ប្រកួតប្រជែងគ្នាក្នុងការអភិវឌ្ឍអេអាយក្នុងផ្លូវអវិជ្ជមាន ជាពិសេស កុំបង្កើតឧបករណ៍ ឬ មនុស្សយន្តអេអាយ ដែលមនុស្សមិនអាចគ្រប់គ្រងវាបាន ពីព្រោះ វាអាចនឹងបំផ្លាញមនុស្សវិញ ។
មនុស្សលោកគួរប្រើត្រឹមបច្ចេកវិទ្យា 5G ឬ 6G បានហើយ (ផ្លូវកណ្តាល) បើអភិវឌ្ឍដល់ 7G, 8G, 9G, 10G... នោះ អេអាយនឹងគ្រប់គ្រងមនុស្សលោកវិញ ហើយមនុស្សភាគច្រើននឹងគ្មានការងារធ្វើ បាត់បង់ប្រាក់ចំណូល ឬ អាចមានគ្រោះទុរភិក្សទៀតផង ។
អ្នកប្រាជ្ញវិទ្យាសាស្ត្រ ខំប្រឹងស្រាវជ្រាវ ស្វែងរកភពផ្សេងៗ ដើម្បីឲ្យមនុស្សទៅរស់នៅ ដូចជា ភពព្រះចន្ទ ភពអង្គារ... ប៉ុន្តែ គ្រាន់តែជាការស្រមើស្រមៃប៉ុណ្ណោះ ។
មនុស្សលោកមិនអាចទៅរស់នៅភពផ្សេងក្រៅពីផែនដីនេះបានឡើយ ។ មានតែភពផែនដីនេះទេ ដែលមនុស្សលោកអាចរស់នៅបានសុខស្រួល ។
ដូច្នេះ ត្រូវរស់នៅដោយបន្សាំជីវិតនឹងធម្មជាតិឲ្យបានច្រើន កុំសប្បាយភ្លើតភ្លើននឹងការអភិវឌ្ឍបច្ចេកវិទ្យាហួសហេតុខ្លាំងពេក ពីព្រោះ បច្ចេកវិទ្យាកាន់តែទំនើប ការរស់នៅកាន់តែងាយស្រួល ប៉ុន្តែ ក៏មានវិបត្តិ ឬ គ្រោះមហន្តរាយកាន់តែសាហាវដែរ ។
ម្យ៉ាងទៀត ដើម្បីអភិវឌ្ឍបច្ចេកវិទ្យា គេត្រូវការជីកខួង គាស់កាយយកធនធានរ៉ែនៅក្រោមដី សម្រាប់ផលិតឧបករណ៍ផ្សេងៗ ដែលធ្វើឲ្យផែនដីបាត់បង់លំនឹង ធ្វើឲ្យផែនដីប្រែប្រួល បាក់ស្រុត កក្រើក រញ្ជួយញាប់ញ័រ បង្កឲ្យមានបាតុភូតធម្មជាតិកាចសាហាវ ។
***
បច្ចេកវិទ្យាបញ្ញាសិប្បនិម្មិត (អេអាយ : AI) អាចជួយដល់ការរស់នៅ និង ការងាររបស់មនុស្សបានច្រើន កាន់តែទំនើប កាន់តែងាយស្រួល កាន់តែលឿន កាន់តែមានប្រសិទ្ធភាពខ្ពស់ ។
មនុស្សអាចប្រើ AI បានដោយពឹងលើ ឬ មានបច្ចេកវិទ្យាប្រព័ន្ធ Internet ប្រព័ន្ធអគ្គិសនី ប្រព័ន្ធបញ្ជា ឧបករណ៍បញ្ជា ឬ ឧបករណ៍ប្រើប្រាស់ ដូចជា Smart Phone, Tablet, Computer... ជាដើម ។ ប៉ុន្តែ នៅពេលដែលប្រព័ន្ធទាំងនេះ ឬ ប្រព័ន្ធណាមួយត្រូវបានកាត់ផ្តាច់ ខូច ឬ មានបញ្ហា មនុស្សមិនអាចប្រើ AI បានទេ ។
ដូច្នេះហើយ មនុស្សលោកមិនគួរពឹងលើអេអាយខ្លាំងពេកទេ ត្រូវសិក្សារៀនសូត្រឲ្យមានចំណេះដឹងមូលដ្ឋានរបស់ខ្លួនឯងឲ្យបានច្រើន ទើបល្អ បន្ទាប់មក ប្រើអេអាយឲ្យធ្វើការជំនួសយើងវិញទើបប្រសើរ ពីព្រោះ នៅពេលដែល អេអាយមិនដំណើរការ ឬ គ្មានអេអាយជួយ ក៏យើងអាចធ្វើដោយខ្លួនឯងបាន ។
ឧទាហរណ៍ ៖
សិស្ស និស្សិតដែលរៀននៅសាលា ត្រូវរៀនសរសេរអក្សរ រៀនគិតលេខ រៀនគណនា... ឲ្យចេះដោយខ្លួនឯងឲ្យបានត្រឹមត្រូវ, អានសៀវភៅ ធ្វើលំហាត់ ធ្វើកិច្ចការគ្រូដាក់ឲ្យធ្វើនៅផ្ទះ (Homework, Assignment) រៀនកុំព្យូទ័រ (Microsoft Office: Word, Excel, PowerPoint...) រៀនភាសាបរទេស មុខវិជ្ជាផ្សេងៗ...។ល។
នៅពេលរៀនចេះស្ទាត់ហើយ ទើបគេឲ្យប្រើអេអាយដើម្បីឲ្យធ្វើកិច្ចការជំនួស ដូចជា សរសេរអក្សរ ពិនិត្យអក្ខរាវិរុទ្ធ គណនារូបមន្ត ដោះស្រាយបញ្ហា ស្វែងរកព័ត៌មាន ចំណេះដឹងផ្សេងៗ...។ល។
បើមិនដូច្នេះទេ នៅពេលសិស្សមិនអាចប្រើអេអាយបាន ឬ គ្មានអេអាយជួយ ពេលនោះ សូម្បីតែ សរសេរអក្សរ គុណលេខ... ក៏មិនចេះ ឬ មិនត្រូវដែរ ។
ឧទាហរណ៍មួយទៀត ៖ ចំពោះការបំពេញការងារ យើងអាចប្រើអេអាយឲ្យជួយធ្វើ ដូចជា ការធ្វើផែនការ ការធ្វើកម្មវិធីផ្សាយពាណិជ្ជកម្ម ការសង្ខេបខ្លឹមសារ ការរៀបចំឯកសារធ្វើបទបង្ហាញ...។ល។ ប៉ុន្តែ ទោះជាយ៉ាងណា ក៏ត្រូវតែរៀនឲ្យមានចំណេះដឹងមូលដ្ឋានក្នុងខ្លួនច្បាស់លាស់ដែរ បើមិនដូច្នេះ នៅពេលគ្មានអេអាយជួយ យើងនឹងមិនចេះធ្វើអ្វីទាំងអស់ ។
***
សរុបមក អេអាយអាចជួយការងាររបស់មនុស្សបានច្រើន បើប្រើក្នុងផ្លូវវិជ្ជមាន ប៉ុន្តែ បើប្រើក្នុងផ្លូវអវិជ្ជមាន អេអាយនឹងបំផ្លាញមនុស្សវិញ ធ្វើឲ្យមនុស្សមានវិបត្តិធ្ងន់ធ្ងរណាស់ ។
ដូច្នេះ ត្រូវឈប់អភិវឌ្ឍបច្ចេកវិទ្យាអេអាយហួសហេតុក្នុងផ្លូវអវិជ្ជាមាន ទើបមនុស្សលោកគ្មានវិបត្តិ ។ ជាពិសេស បញ្ឈប់ការបង្កើតឧបករណ៍ ឬ មនុស្សយន្តអេអាយ ដែលមនុស្សមិនអាចគ្រប់គ្រងវាបាន និង បញ្ឈប់ការអភិវឌ្ឍអេអាយដើម្បីអំពើឧក្រិដ្ឋកម្ម ដូចជា ឆបោក Scam ឧក្រិដ្ឋកម្មបច្ចេកវិទ្យា ឧក្រិដ្ឋកម្មសង្គ្រាម... ជាដើម ។ល។
ក្រុមហ៊ុនណាដែលអភិវឌ្ឍបច្ចេកវិទ្យាអេអាយក្នុងផ្លូវទុច្ចរិត ឬ ក្នុងគោលបំណងបង្កឧក្រិដ្ឋកម្ម ត្រូវតែហាមឃាត់ បញ្ឈប់ និងដាក់ទោសឲ្យធ្ងន់ធ្ងរបំផុត បើមិនដូច្នេះទេ មនុស្សលោកនឹងមានវិបត្តិ ឬ អន្តរាយដោយសារសង្គ្រាមបច្ចេកវិទ្យា ។
