07/05/2024
ក្នុងនាមខ្ញុំផ្ទាល់ និងជាពលរដ្ឋកម្ពុជាមួយរូបដែលកំពុងរស់នៅលើដី នៃព្រះរាជាណាចក្រកម្ពុជា សូមប្រកាសជំហរជាឱឡារឹកគាំទ្រគម្រោងអភិវឌ្ឍន៍ព្រែកជីកហ្វូណន-តេជោ ប្រវែង១៨០គីឡូម៉ែត្រ ដែលបានផ្តួចផ្តើមឡើងដោយសម្តេចតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភា និងប្រធានក្រុមឧត្ដមប្រឹក្សាផ្ទាល់ព្រះមហាក្សត្រ។
ជាប្រវត្តិសាស្ត្រថ្មីលើកទី១ របស់កម្ពុជាក្នុងការសម្រេចឱ្យបាននូវគម្រោងព្រែកជីកហ្វូណន-តេជោ ដោយមានការអនុវត្តគម្រោងដោយផ្ទាល់ពីរាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី។
គម្រោងអភិវឌ្ឍន៍ព្រែកជីកហ្វូណន-តេជោ បានផ្តល់សារសំខាន់ជាច្រើនចំពោះការរួមចំណែកធ្វើឱ្យសេដ្ឋកិច្ចកម្ពុជាបន្តជំរុញសេដ្ឋកិច្ចកើនឡើងក្នុងវិស័យដឹកជញ្ជូនតាមផ្លូវទឹកពីទន្លេទៅកាន់សមុទ្រកម្ពុជា ដោយរួមចំណែកផ្តល់ផលប្រយោជន៍នានាជាច្រើន ដូចជា កាត់បន្ថយថ្លៃចំណាយដឹកជញ្ជូនតាមផ្លូវគោក កាត់បន្ថយគ្រោះថ្នាក់ចរាចរណ៍ និងការកកស្ទះចរាចរណ៍ ជាដើម។ ផ្តល់ឱ្យវិស័យកសិកម្ម រីកលូតលាស់តាមរយៈការរៀបចំប្រព័ន្ធធារាសាស្ត្រ ជាប្រភពចម្បងរំដោះទឹកជំនន់ រក្សាធនធានទឹក។ល។ និងអត្ថប្រយោជន៍ជាច្រើនផ្សេងៗទៀត បានមកពីជុំវិញគម្រោងអភិវឌ្ឍព្រែកជីកហ្វូណន-តេជោ។
ក្នុងន័យខាងលើនេះ និងឆ្លៀតក្នុងឱកាសនេះផងដែរ ខ្ញុំសូមប្រឆាំងដាច់ខាតនូវរាល់បំណងទុច្ចរិកណាមួយរបស់ជនទាំងឡាយណាដែលមានចេតនារារាំងគម្រោងអភិវឌ្ឍន៍ព្រែកជីកហ្វូណន-តេជោ។ ក្នុងសម័យ គម្រោងអភិវឌ្ឍន៍ព្រែកជីកហ្វូណន-តេជោ ត្រូវបានចងចាំទុកជាប្រវត្តិសាស្ត្រថ្មីលើកទី១ សម្រាប់កម្ពុជា និងពលរដ្ឋកម្ពុជាគ្រប់ៗរូប។ សូមប្តេជ្ញាគាំទ្រ និងរួមគ្នារក្សាទុកមត៌កប្រវត្តិសាស្ត្រនេះក្នុងបេះដូងជានិច្ច៕
ភ្នំពេញ, ថ្ងៃទី៧ ខែឧសភា ឆ្នាំ២០២៤
ហ៊ួ រដ្ឋា