07/04/2020
ចូលរួមអបអរ! លោកយាយអាយុ ១០៤ ឆ្នាំក្លាយជាមនុស្សចំណាស់ជាងគេបំផុតលើពិភពលោកដែលជាពីជំងឺកូរ៉ូណា
ស្ត្រីជនជាតិអ៊ីតាលីអាយុ ១០៤ ឆ្នាំម្នាក់បានក្លាយជាមនុស្សចំណាស់ជាងគេបំផុតនៅលើពិភពលោកដែលបានជាសះស្បើយពីជំងឺកូរ៉ូណា។
លោកយាយ Ada Zanusso ធ្លាក់ខ្លួនឈឺនៅក្នុងមណ្ឌលថែទាំឈ្មោះ Biella នៅភាគខាងជើងនៃប្រទេសអ៊ីតាលីនៅថ្ងៃទី ១៧ ខែមីនា។ លោកយាយរូបនេះត្រូវបានគេធ្វើតេស្តវិជ្ជមានវីរុស Covid-19 បន្ទាប់ពីគាត់មានអាការៈក្អួត ក្តៅខ្លួន និងពិបាកដកដង្ហើមកាលពីខែមុន។ កូនប្រុសរបស់លោកយាយ Ada Zanusso បានប្រាប់កាសែត The Sun ថាគេសង្ស័យថាលោកយាយបានឆ្លងវីរុសកូវីដ-១៩ នៅក្នុងមណ្ឌលថែទាំរបស់គាត់។
វេជ្ជបណ្ឌិតផ្ទាល់ខ្លួនលោកយាយចំណាស់រូបនេះគឺលោក Carla Furno Marchese បានឲ្យដឹងថា លោកយាយ Ada អាចក្រោកពីដំណេកបានដោយមិនសម្រាកនៅលើគ្រែទៀតទេ ហើយលោកយាយអាចដើរទៅកៅអីបានដោយខ្លួនឯងទៀតផង។ វេជ្ជបណ្ឌិតបន្ថែមថា លោកយាយមើលទៅមាំទាំនិងវាងវៃណាស់។ ការជាសះស្បើយរបស់គាត់ជាក្ដីសប្បាយរីករាយរបស់គ្រូពេទ្យនិងជាសញ្ញានៃក្តីសង្ឃឹមសម្រាប់អ្នកដែលកំពុងតែផ្ទុកវីរុសកូវីដ-១៩ដទៃទៀត។
ដំណឹងល្អរបស់លោកយាយអាយុ ១០៤ ដែលជាសះស្បើយពីជំងឺកូរ៉ូណាបានកើតឡើងស្របពេលដែលមន្រ្តីអ៊ីតាលីបាននិយាយកាលពីម្សិលមិញថា ខ្លួនអាចបន្ធូរបន្ថយការរឹតបន្តឹងនៅក្នុងប្រទេសក្នុងពេលឆាប់ៗនេះ បន្ទាប់ពីចំនួនអ្នកស្លាប់ដោយសារវីរុសកូរ៉ូណាប្រចាំថ្ងៃបានធ្លាក់ចុះ។
ក្រុមមន្រ្តីបានរាយការណ៍កាលពីថ្ងៃអាទិត្យថា តួលេខអ្នកស្លាប់ដោយសារវីរុសកូវីដ-១៩ នៅក្នុងប្រទេសអ៊ីតាលីបានថយចុះគួរឲ្យកត់សម្គាល់។ ក្នុងនោះចំនួនអ្នកស្លាប់បានធ្លាក់ចុះពី ២៩ ០១០ នៅថ្ងៃសៅរ៍មកត្រឹម ២៨ ៩៤៩ នៅថ្ងៃអាទិត្យ។ រីឯចំនួនអ្នកឆ្លងជំងឺស្ថិតក្នុងស្ថានភាពធ្ងន់ធ្ងរបានថយចុះពី ៣ ៩៩៤ នាក់នៅថ្ងៃសៅរ៍មកត្រឹម ៣ ៩៧៧ នាក់នៅថ្ងៃអាទិត្យ។
