15/09/2026
មន្ត្រីជំនាញកំពុងចុះដោះស្រាយបន្ទាន់ករណីប្រើហិង្សាលើកម្មការិនីមានផ្ទៃពោះ ដោយក្រសួងនឹងចាត់វិធានការតាមច្បាប់ ខណៈប្អូនស្រីកម្មការិនីមិនមានការបែកទឹកភ្លោះ និងបានត្រឡប់ទៅសម្រាកនៅផ្ទះក្រោយគ្រូពេទ្យពិនិត្យ
លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងនៅថ្ងៃទី១៥ ខែកញ្ញា ឆ្នាំ២០២៦ថា ភ្លាមៗក្រោយទទួលបានព័ត៌មានស្តីពីការប្រើអំពើហិង្សាលើកម្មការិនីមានផ្ទៃពោះក្នុងរោងចក្រកូធីវើ ហ្គាម៉ិន មន្ត្រីជំនាញរបស់ក្រសួង និងមន្ទីរការងារ និងបណ្តុះបណ្តាលវិជ្ជាជីវៈខេត្តកណ្តាល បានចុះដល់ទីតាំងរោងចក្រ ដើម្បីពិនិត្យ និងដោះស្រាយបន្ទាន់ចំពោះករណីប្រើអំពើហិង្សាលើកម្មការិនី ផន ងិត ដែលមានផ្ទៃពោះ២ខែកន្លះ។
លោកបានបញ្ជាក់ថា មន្ត្រីជំនាញកំពុងសាកសួរភាគីពាក់ព័ន្ធ និងស្រាវជ្រាវបញ្ជាក់អង្គហេតុ ដើម្បីចាត់វិធានការតាមច្បាប់ចំពោះការប្រព្រឹត្តខុស។
ចំពោះស្ថានភាពសុខភាព លោកអ្នកនាំពាក្យបានបញ្ជាក់ថា កម្មការិនី ផន ងិត មិនមានការបែកទឹកភ្លោះដូចព័ត៌មានដែលបានលើកឡើងនោះទេ។ បច្ចុប្បន្ន គាត់បានចេញពីមន្ទីរពេទ្យ និងត្រឡប់ទៅសម្រាកនៅផ្ទះវិញហើយ៕
