27/09/2025
ដឹងឱ្យច្រើនតែមិនគួរនិយាយច្រើន
មនុស្សគ្រប់រូប មិនមែនសុទ្ធតែកេីតមកចេះនោះទេ ចំណេះដឹង និងបទពិសោធគឺកេីតចេញពីការសិក្សា ការអង្កេត និងអនុវត្ត។ ការសិក្សាគឺគ្មានទីបញ្ចប់ឡើយ កាន់តែរៀន កាន់ចង់ដឹង កាន់តែចង់ស្រាវជ្រាវបន្ត។ ហេីយក្នុងជីវភាពរស់នៅប្រចាំថ្ងៃ មនុស្សយើងគួរតែដឹងរឿងឱ្យច្រើន តែជារឿងមានប្រយោជន៍។ វាមានដូចជា ពត៌មាននយោបាយជាតិ និងអន្តរជាតិ សេដ្ឋកិច្ច បច្ចេកវិទ្យា និងបម្រែបម្រួលអាកាសធាតុជាដើម។
ការដឹងរឿងច្រើនបែបនេះ វាអាចកេីតឡើងបានតាមរយៈការអាន ការស្ដាប់ ការតាមដានព្រឹត្តិការណ៍ពត៌មាន និងការចូលរួមក្នុងកម្មវិធីផ្សេងៗ។ ចំណេះដឹងដែលយើងទទួលបាននោះគឺជា
ពត៌មានដែលយើងអាចយកមកពិចារណា ដេីម្បីធ្វើការសម្រេចចិត្តមុននឹងធ្វើអ្វីមួយ។
ការទទួលបានពត៌មាន និងមានចំណេះដឹងវាគឺជារឿងល្អណាស់សម្រាប់មនុស្សយើង តែសួរថាតើត្រូវតែនិយាយគ្រប់ពត៌មានទាំងនោះ ឬមួយយ៉ាងណា? ហេីយមូលហេតុអ្វីបានត្រូវនិយាយ?
ពិតណាស់ មិនចាំបាច់ឡើយ តែអាចនិយាយបានបេីគេឱ្យនិយាយ និងមានឱកាសនិយាយ។ ហើយបេីនឹងនិយាយសូមគិតដល់៤ចំណុច៖
១. និយាយទៅកាន់មនុស្សប្រភេទណា?
២. និយាយក្នុងកាលៈទេសៈណា ក្នុងបរិបទសង្គមបែបណា?
៣. និយាយពាក្យពិត ពត៌មានពិតទេ?
៤. និយាយដេីម្បីសាមគ្គី ឬបំបែកបំបាក់?
សរុបមក ក្នុងការរស់នៅរបស់មនុស្សពិតជាចាំបាច់ណាស់ក្នុងការទទួលបានពត៌មាន និងចំណេះដឹង អ្វីដែលកាន់តែសំខាន់នោះ គឺការចេះវិភាគ ចេះនិយាយ និងចេះចែករំលែក ឱ្យត្រូវមនុស្ស និងពេលវេលាសមស្រប ប្រកបដោយពាក្យពិត និងចំណងសាមគ្គីភាព។ ដឹងច្រើន មិនប្រាកដថាត្រូវនិយាយច្រើនឡើយ។
PHOU Creator
