10/08/2025
ខេត្តកំពង់ឆ្នាំង: នៅព្រឹកថ្ងៃអាទិត្យ ១រោច ខែស្រាពណ៍ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១០ ខែសីហា ឆ្នាំ២០២៥ ឯកឧត្តម ប៉ែន ពេជ្រសាលី ប្រធានក្រុមការងារគណបក្សថ្នាក់កណ្តាលចុះមូលដ្ឋានឃុំក្តុលសែនជ័យ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន អនុប្រធានទី១ ក្រុមការងារគណបក្សថ្នាក់កណ្តាលចុះមូលដ្ឋានខេត្តកំពង់ឆ្នាំង និងជាប្រធានក្រុមការងារគណបក្សថ្នាក់កណ្តាលចុះមូលដ្ឋានស្រុកទឹកផុស បានអញ្ជើញជាអធិបតីក្នុងពិធីចុះជួបសំណេះសំណាលសាកសួរសុខទុក្ខជាមួយបងប្អូនប្រជាពលរដ្ឋដែលទើបវិលត្រឡប់មកពីប្រទេសថៃ ក្នុងពេលមានសង្គ្រាមឈ្លានពានពីប្រទេសសៀម។
អញ្ជើញចូលរួមក្នុងពិធីនេះរួមមាន ឯកឧត្តម លោកជំទាវ លោក លោកស្រីក្រុមការងារគណបក្សថ្នាក់កណ្តាល ថ្នាក់ខេត្ត ថ្នាក់ស្រុក ថ្នាក់ឃុំ និងសាខាបក្សភូមិ ព្រមទាំងសមាជិក សមាជិកានៃអង្គពិធីទាំងមូល សរុបចំនួន ៤៣នាក់ ស្ត្រី ២១នាក់។
ឆ្លៀតក្នុងឱកាសដ៏ថ្លៃថ្លានេះ ឯកឧត្តម ប៉ែន ពេជ្រសាលី បានពាំនាំនូវប្រសាសន៍ផ្តាំផ្ញើសាកសួរសុខទុក្ខរបស់ ឯកឧត្តម ឆាយ ឫទ្ធិសែន ជូនបងប្អូនប្រជាពលរដ្ឋទាំងអស់។ ឯកឧត្តម ក៏បានគោរពចំពោះមហាវីរភាព និងពលិកម្មដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា រួមទាំង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការដឹកនាំការពារជាតិពីសត្រូវឈ្លានពាន និងទទួលបានជ័យជម្នះគ្រប់សមរភូមិ។
ឯកឧត្តមបានបញ្ជាក់ថា គិតត្រឹមថ្ងៃទី១០ ខែសីហា ឆ្នាំ២០២៥ ស្ថានការណ៍នៅតំបន់ព្រំដែនក្នុងភូមិសាស្រ្តប្រាសាទតាមាន់ធំ, តាមាន់តូច, តាក្របី, មុំបី, តាថាវ, ភ្នំទ្រព្យ, ភ្នំខ្លោច និងតំបន់ប្រាសាទព្រះវិហារ ត្រូវបានគ្រប់គ្រងយ៉ាងរឹងមាំ ១០០% ដោយទាហានកម្ពុជា និងរក្សាបាននូវសភាពស្ងប់ស្ងៀម។ ឯកឧត្តមបានលើកឡើងពីការចុះសង្កេតការណ៍ដោយផ្ទាល់របស់គណៈប្រតិភូអង្គទូត និងអនុព័ន្ធយោធា ១៣ ប្រទេស កាលពីថ្ងៃទី៣០ ខែកក្កដា ឆ្នាំ២០២៥ នៅតាមតំបន់ជម្លោះព្រំដែន និងជំរំជនភៀសសឹកខ្មែរ។
ដើម្បីពង្រឹងខឿនការពារជាតិ និងសេដ្ឋកិច្ចជាតិ ឯកឧត្តមបានអំពាវនាវដល់បងប្អូនជនរួមជាតិខ្មែរទាំងអស់បន្តរួបរួមសាមគ្គីគ្នា បន្តគាំទ្រ និងជឿជាក់លើការដឹកនាំរបស់រាជរដ្ឋាភិបាល។ ជាមួយគ្នានេះ ឯកឧត្តមបានអំពាវនាវដល់អាជ្ញាធរមូលដ្ឋានគ្រប់ជាន់ថ្នាក់ ជួយសម្របសម្រួលស្វែងរកការងារ និងរៀបចំឯកសារចាំបាច់ (អត្តសញ្ញាណបណ្ណ សៀវភៅស្នាក់នៅ សៀវភៅគ្រួសារ បណ្ណសមធម៌ បណ្ណក្រីក្រ) ជូនបងប្អូនពលករដែលទើបវិលត្រឡប់មកពីប្រទេសថៃ។ ឯកឧត្តមក៏បានជំរុញឱ្យបងប្អូនពលករកុំវិលត្រឡប់ទៅប្រទេសថៃវិញ ដោយព្យាយាមរកការងារធ្វើនៅក្នុងមាតុប្រទេស ដើម្បីជៀសវាងការរើសអើង និងការធ្វើទារុណកម្ម។ ឯកឧត្តមក៏បានណែនាំកុំឱ្យជឿព័ត៌មានក្លែងក្លាយ ញុះញង់ បំបែកបំបាក់គ្រប់ប្រភព ដោយតាមដានតែព័ត៌មានផ្លូវការរបស់រាជរដ្ឋាភិបាល។
ជាមួយគ្នានេះដែរ ដើម្បីចូលរួមចំណែកដោះស្រាយការខ្វះខាតរបស់ជូនបងប្អូនចំពោះមុខ ក្រុមការងារគណបក្សប្រជាជនកម្ពុជាថ្នាក់កណ្តាល បាននាំមកនូវអំណោយដ៏ថ្លៃថ្លារបស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ។ អំណោយនេះត្រូវបានចែកជូនចំនួន ២៨ គ្រួសារ ដោយក្នុងមួយគ្រួសារទទួលបាន៖
អំណោយជាគ្រឿងឧបភោគ បរិភោគ និងថវិកាមួយចំនួន។
បន្ទាប់ពីកម្មវិធីជួបសំណេះសំណាលសាកសួរសុខទុក្ខជាមួយបងប្អូនប្រជាពលរដ្ឋដែលទើបវិលត្រឡប់មកពីប្រទេសថៃ ឯកឧត្តមប្រធាន និងក្រុមការងារ បានចុះត្រួតពិនិត្យវឌ្ឍនភាព ការសាងសង់ស្នាក់ការបក្សឃុំ។
ជាទីបញ្ចប់ ឯកឧត្តម ប៉ែន ពេជ្រសាលី បានជូនពរលោក លោកស្រី អ្នកនាង កញ្ញា សមាជិក សមាជិកានៃអង្គពិធីទាំងមូល សូមជួបប្រទះតែនឹងពុទ្ធពរទាំង ៤ ប្រការ គឺអាយុ វណ្ណៈ សុខ និងពលៈ កុំបីឃ្លៀងឃ្លាត។
