12/07/2026
ឯកឧត្ដម ឆាយ ប្ញទ្ធិសែន អញ្ជើញជួបសំណេះសំណាល និងថ្លែងអំណរគុណជាមួយសាខាបក្ស ក្រុមបក្ស គ្រួសារបក្ស និងយុវជនបក្ស ចំនួន ១ ៦៨៣នាក់ មកពីសាខាបក្សភូមិចំនួន ៦ ក្នុងឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង
ខេត្តកំពង់ឆ្នាំង៖ នាថ្ងៃសៅរ៍ ១២រោច ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១១ ខែកក្កដា ឆ្នាំ២០២៦ ឯកឧត្ដម ឆាយ ប្ញទ្ធិសែន សមាជិកគណៈកម្មាធិការកណ្ដាលគណបក្សប្រជាជនកម្ពុជា អនុប្រធានទី១ ក្រុមការងារគណបក្សចុះមូលដ្ឋានខេត្តកំពង់ឆ្នាំង និងជាប្រធានក្រុមការងារគណបក្សចុះមូលដ្ឋានស្រុកសាមគ្គីមានជ័យ និងស្រុកទឹកផុស បានអញ្ជើញអធិបតីក្នុងពិធីសំណេះសំណាលជាមួយសាខាបក្ស ក្រុមបក្ស គ្រួសារបក្ស និងយុវជនបក្ស ចំនួន ១ ៦៨៣នាក់ មកពីសាខាបក្សភូមិចំនួន ៦ ក្នុងឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង ដោយមានវត្តមានអញ្ជើញចូលរួមពីសំណាក់ ឯកឧត្ដម អនុប្រធានក្រុមការងារគណបក្សចុះមូលដ្ឋានស្រុក, ឯកឧត្តម លោកជំទាវ លោក លោកស្រី ជាក្រុមការងារគណបក្សចុះមូលដ្ឋានឃុំ, និងគណៈកម្មាធិការគណបក្សថ្នាក់ស្រុក ឃុំ ផងដែរ។
ពិធីសំណេះសំណាលនេះ បានរៀបចំឡើងដាច់ដោយឡែកពីគ្នានៅទីតាំងចំនួន ៣ កន្លែងនៅក្នុងឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង។ ទីតាំងទី១៖ នៅស្នាក់ការគណបក្សប្រជាជនកម្ពុជាឃុំក្ដុលសែនជ័យ ដែលមានសាខាបក្សភូមិចំនួន ២ភូមិចូលរួម គឺ សាខាបក្សភូមិអញ្ចាញ និងសាខាគណបក្សភូមិក្ដុល, ទីតាំងទី២៖ ក្នុងបរិវេនវត្តពោធិវន្តរង្សី ហៅ វត្តក្ដុល មានសាខាបក្សភូមិចំនួន ២ភូមិ ចូលរួមគឺ សាខាគណបក្សភូមិដំណាក់អំពិល និងសាខាគណបក្សភូមិអូរល្ពៅ និង ទីតាំងទី៣ នៅក្នុងបរិវេណសាលាបុណ្យភូមិដំណាក់ខ្លុង ដែលមានសាខាបក្សភូមិចំនួន ២ គឺ សាខាគណបក្សភូមិភ្នំតាឱស និង សាខាគណបក្សភូមិដំណាក់ខ្លុង។ តាមរយៈរបាយការណ៍អំពីការងារកសាងសមាជិកគណបក្សដោយ លោក លោកស្រី ប្រធាន អនុប្រធានសាខាបក្សភូមិទាំង ៦ បានបង្ហាញថា៖ (១) សាខាបក្សភូមិអញ្ចាញ មានក្រុមបក្សចំនួន ៥០ក្រុម គ្រួសារបក្សចំនួន ២១៩គ្រួសារ ដែលមានសមាជិកសរុបចំនួន៤៧៥នាក់, (២) សាខាបក្សភូមិក្ដុល មានក្រុមបក្សចំនួន ៦០ក្រុម គ្រួសារបក្សចំនួន ៣២៥គ្រួសារ ដែលមានសមាជិកសរុបចំនួន ៦៩៨នាក់, (៣) សាខាបក្សភូមិដំណាក់អំពិល មានក្រុមបក្សចំនួន ៨០ក្រុម គ្រួសារបក្សចំនួន ៤២៧គ្រួសារ ដែលមានសមាជិកសរុបចំនួន ៨៩៥នាក់, (៤) សាខាបក្សភូមិអូរល្ពៅ មានក្រុមបក្សចំនួន ៣៥ក្រុម គ្រួសារបក្សចំនួន ១៨៩គ្រួសារ ដែលមានសមាជិកសរុបចំនួន ៣៩២នាក់, (៥) សាខាគណបក្សភូមិភ្នំតាឱស មានក្រុមបក្សចំនួន ៤៨ក្រុម គ្រួសារបក្សចំនួន ២៤១គ្រួសារ ដែលមានសមាជិកសរុបចំនួន៥១៩នាក់ និង (៦) សាខាគណបក្សភូមិដំណាក់ខ្លុង មានក្រុមបក្សចំនួន ៦១ក្រុម គ្រួសារបក្សចំនួន ២៨៥គ្រួសារ ដែលមានសមាជិកសរុបចំនួន៥៦៣នាក់។
បន្ទាប់ពីស្ដាប់របាយការណ៍រួចមក ឯកឧត្ដម ឆាយ ប្ញទ្ធិសែន បានកោតសរសើរនិងវាយតម្លៃខ្ពស់ចំពោះវត្តមានរបស់សមាជិក សមាជិកានៃអង្គពិធីទាំងអស់ដែលបានអញ្ជើញចូលរួមក្នុងពិធីសំណេះសំណាលនេះ ដែលជាកាយវិការបញ្ជាក់អំពីការយកចិត្តទុកដាក់ក្នុងការចូលរួមជីវភាពនយោបាយគណបក្ស។ ជាមួយគ្នានោះ ឯកឧត្តមប្រធាន បានថ្លែងអំណរគុណយ៉ាងជ្រាលជ្រៅចំពោះសមាជិកគណបក្សទាំងអស់ ដែលតែងតែស្រឡាញ់ ជឿជាក់ គាំទ្រ និងបោះឆ្នោតជូនគណបក្សប្រជាជនកម្ពុជាឱ្យទទួលជ័យជម្នះគ្រប់ៗអាណត្តិកន្លងមក ដែលឱ្យគណបក្សទទួលបានឱកាសបម្រើប្រជាជនតាមរយៈការបង្កើតរាជរដ្ឋាភិបាល ដែលមានសមត្ថភាពធ្វើការអភិវឌ្ឍប្រទេសជាតិឱ្យមានការរីកចម្រើនលើគ្រប់វិស័យ ទាំងវិស័យសេដ្ឋកិច្ច និងសង្គមកិច្ច។ ក្នុងឱកាសនោះ ឯកឧត្តមប្រធាន បានគូសបញ្ជាក់ជូនថា ចាប់តាំងបានរំដោះប្រទេសចេញពីភ្នក់របបប្រល័យពូជសាសន៍នៅថ្ងៃទី៧ មករា ១៩៧៩ មក គណបក្សប្រជាជនកម្ពុជា បានធ្វើការបង្រួបបង្រួមជាតិ ឯកភាពទឹកដី និងមានសន្តិភាពពេញលេញតាមរយៈនយោបាយឈ្នះ-ឈ្នះ ដែលបានអនុវត្តដោយបិតាសន្តិភាពគឺ សម្តេចអគ្គមហាសេនាបតីតេជោ ហ៊ុន សែន។ ឯកឧត្តមប្រធាន បានបញ្ជាក់បន្ថែមទៀតថា គណបក្សប្រជាជនកម្ពុជា បានខិតខំស្ដារ និងអភិវឌ្ឍនប្រទេសចាប់ពីចំណុចសូន្យ ព្រមទាំងបានថែរក្សា ការពារសន្ដិភាព និងស្ថិរភាពនយោបាយបានគង់វង្ស ដែលជាកត្តាអំណោយផលដល់ការអភិវឌ្ឍ និងការកសាងសេដ្ឋកិច្ចជាតិមានការរីកចម្រើន។ ជាមួយគ្នានោះដែរ ឯកឧត្តមប្រធាន បានអំពាវនាវដល់សមាជិក សមាជិកាគណបក្ស ក៏ដូចជាប្រជាពលរដ្ឋគ្រប់រូប ត្រូវចូលរួមថែរក្សាសុខសន្តិភាពដ៏មានតម្លៃមិនអាចកាត់ថ្លៃបាននេះ តាមរយៈការបោះឆ្នោតជូនគណបក្សប្រជាជនកម្ពុជា ដើម្បីបន្ដបុព្វហេតុនៃការអភិវឌ្ឍប្រទេសឱ្យកាន់តែរីកចម្រើនបន្ថែមទៀត ស្របតាមកម្មវិធីនយោបាយរបស់គណបក្ស។ ជាទីបញ្ចប់ ឯកឧត្តមប្រធាន បានផ្ដាំផ្ញើដល់សមាជិក សមាជិកាគ្រប់លំដាប់ថ្នាក់ បន្ដរក្សាសាមគ្គីភាព ឯកភាពផ្ទៃក្នុង និងបន្តជឿជាក់លើរាជរដ្ឋាភិបាលដែលកើតចេញពីគណបក្សប្រជាជនកម្ពុជា និងបន្ដបោះឆ្នោតជូនគណបក្សប្រជាជនកម្ពុជា ដើម្បីបន្ដដឹកនាំ និងអភិវឌ្ឍប្រទេសជាតិឱ្យកាន់តែរីកចម្រើនបន្ថែមទៀត ឈានឆ្ពោះទៅសម្រេចនូវចក្ខុវិស័យឆ្នាំ២០៥០ កម្ពុជាជាប្រទេសមានប្រាក់ចំណូលកម្រិតខ្ពស់៕
