30/03/2021
“បុរសល្អស្វែងរកប្រពន្ធ តែបុរសអាក្រក់ស្វែងរកស្រីសម្រាប់លេងសើច។ នារីឆ្លាត មិនមែនរៀនចប់ថ្នាក់បណ្ឌិត តែល្ងង់លើវិជ្ជារើសស្វាមីនោះទេ ពីព្រោះជោគជ័យដែលធំជាងគេរបស់នារី គឺមានក្រសែភ្នែកល្អអាចជ្រើសរើសបុរសល្អម្នាក់បាន។”
កំលោះម្នាក់បានសួរទៅឪពុករបស់ខ្លួនថា “ពុក! តើខ្ញុំអាចស្វែងរកនារីល្អម្នាក់ដែលសក្ដិសមនឹងខ្ញុំបានដោយរបៀបណា?”
ឪពុកបានឆ្លើយតបថា “កូនប្រុស! សូមកូនបំភ្លេចចោលរឿងកូនចង់ស្វែងរកនារីល្អដែលសក្ដិសមនឹងកូនទៅ ក៏ប៉ុន្តែសូមកូនគិតគូរថា តើត្រូវធ្វើបែបណាដើម្បីក្លាយខ្លួនជាបុរសល្អម្នាក់។”
មនុស្សស្រីប្រុសជាច្រើន តែងតែប្រាថ្នាចង់បានមនុស្សល្អមកធ្វើជាកម្មសិទ្ធិរបស់ខ្លួន តែភ្លេចគិតថាតើខ្លួនយើងបានធ្វើឲ្យខ្លួនឯងមានតម្លៃគ្រប់គ្រាន់ហើយឬនៅ។ បុរាណខ្មែរពោលថា “គ្របណា ឆ្នាំងហ្មឹង ឬនាងរត់រកអ្នក ស្រីខាតលក្ខណ៍រត់រកប្រុសកំបាក់អន្សា ជំទាវរត់រកឧញ៉ា ស្រីខ្លោចផ្សា រត់រកប្រុសហិនហោច។”
កិលេសតណ្ហាមនុស្សលោកច្រើន នោះសេចក្តីទុក្ខក៏ច្រើនដែរ។ ភាពខ្លាំងប្រកបដោយភាពទន់ភ្លន់របស់នារី គឺបើឲ្យក្មេងដែលពូកែយំទៅនារីម្នាក់ នោះនាងនឹងធ្វើឲ្យក្មេងញញឹម, បើឲ្យអង្ករមួយកំប៉ុងទៅនារី នោះនាងនឹងបង្កើតបានជាបាយ ហើយបើទុកឲ្យនាងនៅផ្ទះដ៏រញ៉េរញ៉ៃ នោះនាងនឹងធ្វើឲ្យមានរបៀប៕
-------------------------------------------------------
ដកស្រង់ពីសៀវភៅ #ប្រតិទិនទស្សនៈ៣៦៥ថ្ងៃ
រូបភាព
