18/12/2025
ກອງບັນຊາການ ປກສ ນະຄອນ ໄກສອນ ພົມວິຫານ ໄດ້ກັກຕົວ
ຜູ້ຖືກຫາ ລັກຊັບ ຢູ່ໃນງານບຸນນະມັດສະການ ພຣະທາດອີງຮັງ
----------------------------------
ເຈົ້າໜ້າທີ່ພະແນກຕໍາຫຼວດ ກອງບັນຊາການ ປກສ ນະຄອນໄກສອນພົມວິຫານ ໄດ້ລາຍງານໃຫ້ຮູ້ວ່າ: ໃນຊ່ວງງານບຸນນະມັດສະການພຣະທາດອີງຮັງປະຈໍາປີ 2025 ເຊິ່ງໄດ້ຈັດຂື້ນໃນລະຫວ່າງວັນທີ 29 ພະຈິກ ຫາ ວັນທີ 05 ທັນວາ 2025 ໄດ້ເກີດມີປະກົດການຫຍໍ້ທໍ້ເກີດຂື້ນໃນງານບຸນເຊິ່ງມີກຸ່ມຄົນບໍ່ດີໄດ້ກໍ່ເຫດລັກຊັບປະຊາຊົນທີ່ເດີນທາງມາທ່ອງທ່ຽວ ພາຍໃນງານບຸນ ໂດຍຮູບການ ໃຊ້ຂອງມີຄົມເພື່ອປາດກະເປົ໋າເງິນ ແລ້ວລັກເອົາຊັບສິນທີ່ມີຄ່າໄປ ໃນ 01 ວັນແມ່ນມີເຫດການເກີດຂຶ້ນ 05 ຄັ້ງ ສ້າງຜົນເສຍຫາຍລວມທັງໝົດມີ: ເງີນກີບຈໍານວນ 19,500,000 ກີບ ( ສິບເກົ້າລ້ານຫ້າແສນກີບ ) ເງີນບາດ 6,420 ບາດ (ຫົກພັນສີ່ຮ້ອຍຊາວບາດ) ແລະ ໂທລະສັບມືຖື 01 ໜ່ວຍ. ເຊິ່ງເຫດການໄດ້ເກີດຂຶ້ນໃນວັນທີ 30 ພະຈິກ 2025
ເມື່ອໄດ້ຮັບແຈ້ງຄວາມ ເຈົ້າໜ້າທີ່ທີ່ຮັບຜິດຊອບໃນງານບຸນ ຈິ່ງໄດ້ປະສານສົມທົບກັບເຈົ້າໜ້າທີ່ ວິຊາສະເພາະ ປກສ ແຂວງ ລົງຕິດຕາມ ກວດກາເບິ່ງສະຖານທີ່ເກີດເຫດຕົວຈິງເພື່ອຄົ້ນຫາຜູ້ກະຜິດຕາມຫຼັກການວິຊາສະເພາະ ສືບຫາຂໍ້ມູນ ເບາະແສ ຜູ້ກໍ່ເຫດ ແລະ ກຳນົດເປົ້າໝາຍຄົນຮ້າຍດັ່ງກ່າວໄດ້ຊັດເຈນ , ຈົນມາຮອດເວລາປະມານ 15 ໂມງ 00 ນາທີ, ຂອງວັນດຽວກັນ ຈຶ່ງພົບເຫັນເປົ້າໝາຍສົງໄສ ເປັນເພດຍິງ ທີ່ກໍາລັງຈະເອົາຕົວຫຼົບໜີ ດັ່ງນັ້ນທາງເຈົ້າໜ້າທີ່ ຈຶ່ງໄດ້ເຂົ້າກັກຕົວຜູ່ກ່ຽວມາສືບສວນ - ສອບສວນ ຕາມລະບຽບຂັ້ນຕອນຂອງກົດໝາຍ.
ຜ່ານການສອບສວນຈິ່ງຮູ້ວ່າ ຜູ່ກໍ່ເຫດຊື່ນາງ ຟາມທິຊວນ ອາຍຸ 57 ປີອາຊີບ ກໍາມະກອນ ເຊື້ອຊາດ ຫວຽດນາມ ສັນຊາດ ຫວຽດນາມ ບ້ານຢູ່ ຊວນຈິງ ເມືືອງ ກີມເຊິນ ແຂວງ ນິນບິ່ງ ປະເທດ ຫວຽດນາມ ໄດ້ຮັບສາລະພາບວ່າ: ຜູ້ກ່ຽວພ້ອມດ້ວຍໝູ່ອີກຈໍານວນ 03 ຄົນເຊິ່ງເປັນຄົນຫວຽດນາມຊື່ ນາງ ເຮຶອງ, ນາງ ຈຽນ ແລະ ນາງ ໜຽວ ແມ່ນໄດ້ອາໄສຢູ່ໄຊງ່ອນ ປະເທດຫວຽດນາມ ເຊິ່ງພວກກ່ຽວແມ່ນໄດ້ເຫັນຂ່າວໂຄສະນາທາງສື່ອອນລາຍເຟສບຸກ (facebook) ວ່າມີການຈັດງານບຸນນະມັດສະການພຣະທາດອີງຮັງ ຢູ່ນະຄອນໄກສອນພົມວິຫານ ແຂວງສະຫວັນນະເຂດ ( ປະເທດລາວ ) ຈິ່ງໄດ້ມີການຊັກຊວນກັນມາກໍ່ເຫດປາດກະເປົ໋າເງິນ ຈາກນັ້ນພວກກ່ຽວກໍ່ໄດ້ພາກັນເດີນຈາກໄຊງ່ອນ ເຂົ້າທາງປະເທດກໍາປູເຈຍ ແລ້ວເຂົ້າມາປະເທດລາວໂດຍຜ່ານເຂົ້າມາດານຊາຍແດນນານົກຂຽນແຂວງ ຈໍາປາສັກ ( ຊາຍແດນລາວ - ກໍາປູເຈຍ ) ມາຮອດສະຫວັນນະຂດ ເວລາປະມານ 02 ໂມງ, ຂອງວັນທີ 30/11/2025 ແລ້ວໄດ້ພັກເຊົ່າຢູ່ໃນຄີວຈົນຮອດເວລາປະມານ 08 ໂມງກໍ່ໄດ້ພາກັນໄປຕະຫຼາດສະຫວັນໄຊ ພໍຮອດເວລາປະມານ 11 ໂມງຂອງວັນດຽວກັນພວກກ່ຽວກໍ່ພາກັນຂີ່ລົດສອງແຖວເຂົ້າໄປໃນງານບຸນພະທາດອີງຮັງ ເພື່ອກໍ່ເຫດລັກຊັບສິນຂອງປະຊາຊົນຢູ່ພາຍໃນງານບຸນນະມັດສະ ການພະທາດອີງຮັ່ງ. ໃນການກໍ່ເຫດແມ່ນເຮັດເປັນທີມງານແບ່ງຄວາມຮັບຜິດຊອບໜ້າທີ່ໃຜມັນຄື ຜູ້ຊອກຫາເປົ້າໝາຍທີ່ຈະລົງມືລັກໂດຍຈະເລືອກເອົາເປົ້າໝາຍທີ່ເປັນເພດຍິງທີ່ຟາຍກະເປົ໋າ ແລະ ບໍ່ມີຄວາມລະມັດລະວັງແລ້ວຈະພາກັນຍ່າງຕິດຕາມຖ້າເປົ້າໝາຍໄປຊື້ເຄື່ອງ ແລ້ວ ເຂົ້າໄປໃກ້ສິດກັບຕົວຜູ້ເສຍຫາຍ ແລະ ເຂົ້າປະກົບຄົນລະຂ້າງບັງບຸກຄົນອື່ນທີ່ຈະເຂົ້າມາໃກ້ ຫຼື ບັງບໍ່ໃຫ້ຄົນອ້ອມຂ້າງເຫັນ ແລ້ວໃຊ້ມີດຍາວປະມານ 10 ຊັງຕີແມັດ ປາດກະເປົ໋າເງີນຂອງຜູ້ເສຍຫາຍ ເພື່ອຈົກເອົາເງີນ ຫຼື ຊັບສິນອື່ນໆຂອງຜູ້ເສຍຫາຍ ຈາກນັ້ນກໍ່ນຳເອົາຊັບສິນທີ່ລັກໄດ້ ໄປມອບໃຫ້ພັກພວກທີ່ລໍຖ້າຢູ່ຂ້າງນອກ ເພື່ອເກັບຮັກສາ ກ່ອນນຳມາແບ່ງກັນ; ຜ່ານມາ ຜູ້ຖືກຫາຈຳນວນດັ່ງກ່າວ ແມ່ນໄດ້ ເຄີຍໄປເຄື່ອນໄຫວກໍ່ເຫດປາດກະເປົ໋າແລ້ວລັກເອົາເງີນຂອງຜູ້ເສຍຫາຍຢູ່ງານບຸນກິນຈຽງ ແຂວງ ຊຽງຂວາງ ໃນຊ້ວງເດືອນ 01 ປີ 2025 ເຊິ່ງໄດ້ກໍ່ເຫດໄປ 10 ກວ່າຄັ້ງໃນງານບຸນດັ່ງກ່າວ.
ການກະທໍາ ຫຼື ການເຄື່ອນໄຫວຂອງພວກກ່ຽວເຊິ່ງໄດ້ສ້າງຜົນເສຍຫາຍຕໍ່ຊັບສິນ ແລະ ກໍາມະສິດຂອງຄົນອື່ນ, ນອກຈາກນັ້ນຍັງສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ ຕໍ່ການກະທໍາດັ່ງກ່າວ ແມ່ນຜິດຕໍ່ປະມວນກົດໝາຍອາຍາ ແຫ່ງ ສປປລາວ ສະບັບປັບປຸງປີ 2017 ມາດຕາ 231.
ສ່ວນນາງ ເຮຶອງ, ນາງ ຈຽນ ແລະ ນາງ ໜຽວ ປັດຈຸບັນພວກກ່ຽວແມ່ນເອົາຕົວຫຼົບໜີຈາກການດໍາເນີນຄະດີຂອງເຈົ້າໜ້າທີ່ ປະຈຸບັນທາງເຈົ້າໜ້າທີ່ພວກເຮົາແມ່ນຍັງໄດ້ສືບຕໍ່ນໍາກັບຕົວພວກກ່ຽວທັງ 03 ຄົນ ເພື່ອມາດໍາເນີນຄະດີຕາມຂັ້ນຕອນລະບຽບກົດໝາຍ.
CR. ວິທະຍຸກະຈາຍສຽງ ແຂວງສະຫວັນນະເຂດ
