20/09/2026
🇱🇰 ෆේස්බුක් කමෙන්ට් එකක් නිසා සෞදි අරාබියේ ශ්‍රී ලාංකික තරුණයෙකුට මරණ දඬුවමක්?
ශ්‍රී ලංකාවේ කල්මුණේ, නට්පිට්ටිමුනේ ප්‍රදේශයේ පදිංචි සිවරාසා අනෝජන් නම් තරුණයා රැකියාවක් සඳහා සෞදි අරාබියට ගොස් තිබුණේ මීට මාස කිහිපයකට පෙරයි.
කතරගම පාද යාත්‍රාවට එක්ව ගිය සුනඛයෙකුට පුද්ගලයෙකු පහරදෙන ආකාරය දැක්වෙන වීඩියෝවක් සමාජ මාධ්‍යවල පැතිර යාමෙන් පසු, ඒ සම්බන්ධයෙන් සමාජ මාධ්‍ය තුළ දැඩි සංවාදයක් ඇතිවී තිබුණා. එම සංවාදය අතරතුර අනෝජන් විසින් Facebook ඔස්සේ පළ කළ සටහනක් නබිතුමාට සහ ඉස්ලාම් ආගමට අපහාස වන ආකාරයේ එකක් ලෙස සෞදි බලධාරීන් විසින් සලකා ඇති බව වාර්තා වේ.
ඒ සම්බන්ධයෙන් සෞදි අධිකරණයේදී ඔහුට මුලින් වසර 5ක සිරදඬුවමක් සහ සෞදි රියාල් මිලියන 3ක දඩයක් නියම කර තිබුණා.
ඔහුගේ දඬුවම ලිහිල් කර ගැනීම සඳහා අභියාචනයක් ඉදිරිපත් කර තිබූ අතර, පසුව එම අභියාචනා ක්‍රියාවලියෙන් අනතුරුව මරණ දඬුවම නියම වී ඇති බවට වාර්තා පළ වී තිබෙනවා.
මේ වනවිට ශ්‍රී ලංකා විදේශ කටයුතු අමාත්‍යාංශය අනෝජන්ගේ නඩුව සම්බන්ධයෙන් සෞදි බලධාරීන් සමඟ රාජ්‍ය තාන්ත්‍රික මට්ටමින් කටයුතු කරමින් සිටින බවත්, ඔහුගේ අයිතිවාසිකම් සහ ආරක්ෂාව වෙනුවෙන් හැකි සෑම සහායක්ම ලබාදීමට කටයුතු කරන බවත් ප්‍රකාශ කර තිබෙනවා.
එක් Facebook සටහනක්…
එක් තීරණයක්…
අද එය ජීවිතයත් මරණයත් අතර ප්‍රශ්නයක් බවට පත්වී තිබෙනවා.
මේ සිද්ධිය සම්බන්ධයෙන් ඉදිරි නීතිමය සහ රාජ්‍ය තාන්ත්‍රික ක්‍රියාමාර්ග පිළිබඳව ශ්‍රී ලංකාවේ බොහෝ දෙනාගේ අවධානය යොමුව තිබෙනවා.
